| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ • Saṃyuttanikāya |
੫. ਦੁਤਿਯਦੇવਪਦਸੁਤ੍ਤਂ
5. Dutiyadevapadasuttaṃ
੧੦੩੧. ‘‘ਚਤ੍ਤਾਰਿਮਾਨਿ, ਭਿਕ੍ਖવੇ, ਦੇવਾਨਂ ਦੇવਪਦਾਨਿ ਅવਿਸੁਦ੍ਧਾਨਂ ਸਤ੍ਤਾਨਂ વਿਸੁਦ੍ਧਿਯਾ ਅਪਰਿਯੋਦਾਤਾਨਂ ਸਤ੍ਤਾਨਂ ਪਰਿਯੋਦਪਨਾਯ।
1031. ‘‘Cattārimāni, bhikkhave, devānaṃ devapadāni avisuddhānaṃ sattānaṃ visuddhiyā apariyodātānaṃ sattānaṃ pariyodapanāya.
‘‘ਕਤਮਾਨਿ ਚਤ੍ਤਾਰਿ? ਇਧ, ਭਿਕ੍ਖવੇ, ਅਰਿਯਸਾવਕੋ ਬੁਦ੍ਧੇ ਅવੇਚ੍ਚਪ੍ਪਸਾਦੇਨ ਸਮਨ੍ਨਾਗਤੋ ਹੋਤਿ – ਇਤਿਪਿ ਸੋ ਭਗવਾ…ਪੇ॰… ਸਤ੍ਥਾ ਦੇવਮਨੁਸ੍ਸਾਨਂ ਬੁਦ੍ਧੋ ਭਗવਾਤਿ। ਸੋ ਇਤਿ ਪਟਿਸਞ੍ਚਿਕ੍ਖਤਿ – ‘ਕਿਂ ਨੁ ਖੋ ਦੇવਾਨਂ ਦੇવਪਦ’ਨ੍ਤਿ? ਸੋ ਏવਂ ਪਜਾਨਾਤਿ – ‘ਅਬ੍ਯਾਬਜ੍ਝਪਰਮੇ ਖ੍વਾਹਂ ਏਤਰਹਿ ਦੇવੇ ਸੁਣਾਮਿ। ਨ ਚ ਖੋ ਪਨਾਹਂ ਕਿਞ੍ਚਿ ਬ੍ਯਾਬਾਧੇਮਿ ਤਸਂ વਾ ਥਾવਰਂ વਾ। ਅਦ੍ਧਾਹਂ ਦੇવਪਦਧਮ੍ਮਸਮਨ੍ਨਾਗਤੋ વਿਹਰਾਮੀ’’’ਤਿ। ਇਦਂ ਪਠਮਂ ਦੇવਾਨਂ ਦੇવਪਦਂ ਅવਿਸੁਦ੍ਧਾਨਂ ਸਤ੍ਤਾਨਂ વਿਸੁਦ੍ਧਿਯਾ ਅਪਰਿਯੋਦਾਤਾਨਂ ਸਤ੍ਤਾਨਂ ਪਰਿਯੋਦਪਨਾਯ।
‘‘Katamāni cattāri? Idha, bhikkhave, ariyasāvako buddhe aveccappasādena samannāgato hoti – itipi so bhagavā…pe… satthā devamanussānaṃ buddho bhagavāti. So iti paṭisañcikkhati – ‘kiṃ nu kho devānaṃ devapada’nti? So evaṃ pajānāti – ‘abyābajjhaparame khvāhaṃ etarahi deve suṇāmi. Na ca kho panāhaṃ kiñci byābādhemi tasaṃ vā thāvaraṃ vā. Addhāhaṃ devapadadhammasamannāgato viharāmī’’’ti. Idaṃ paṭhamaṃ devānaṃ devapadaṃ avisuddhānaṃ sattānaṃ visuddhiyā apariyodātānaṃ sattānaṃ pariyodapanāya.
‘‘ਪੁਨ ਚਪਰਂ, ਭਿਕ੍ਖવੇ, ਅਰਿਯਸਾવਕੋ ਧਮ੍ਮੇ…ਪੇ॰… ਸਙ੍ਘੇ…ਪੇ॰…।
‘‘Puna caparaṃ, bhikkhave, ariyasāvako dhamme…pe… saṅghe…pe….
‘‘ਪੁਨ ਚਪਰਂ, ਭਿਕ੍ਖવੇ, ਅਰਿਯਸਾવਕੋ ਅਰਿਯਕਨ੍ਤੇਹਿ ਸੀਲੇਹਿ ਸਮਨ੍ਨਾਗਤੋ ਹੋਤਿ ਅਖਣ੍ਡੇਹਿ…ਪੇ॰… ਸਮਾਧਿਸਂવਤ੍ਤਨਿਕੇਹਿ। ਸੋ ਇਤਿ ਪਟਿਸਞ੍ਚਿਕ੍ਖਤਿ – ‘ਕਿਂ ਨੁ ਖੋ ਦੇવਾਨਂ ਦੇવਪਦ’ਨ੍ਤਿ ? ਸੋ ਏવਂ ਪਜਾਨਾਤਿ – ‘ਅਬ੍ਯਾਬਜ੍ਝਪਰਮੇ ਖ੍વਾਹਂ ਏਤਰਹਿ ਦੇવੇ ਸੁਣਾਮਿ। ਨ ਖੋ ਪਨਾਹਂ ਕਿਞ੍ਚਿ ਬ੍ਯਾਬਾਧੇਮਿ ਤਸਂ વਾ ਥਾવਰਂ વਾ। ਅਦ੍ਧਾਹਂ ਦੇવਪਦਧਮ੍ਮਸਮਨ੍ਨਾਗਤੋ વਿਹਰਾਮੀ’ਤਿ। ਇਦਂ ਚਤੁਤ੍ਥਂ ਦੇવਾਨਂ ਦੇવਪਦਂ ਅવਿਸੁਦ੍ਧਾਨਂ ਸਤ੍ਤਾਨਂ વਿਸੁਦ੍ਧਿਯਾ ਅਪਰਿਯੋਦਾਤਾਨਂ ਸਤ੍ਤਾਨਂ ਪਰਿਯੋਦਪਨਾਯ। ਇਮਾਨਿ ਖੋ, ਭਿਕ੍ਖવੇ, ਚਤ੍ਤਾਰਿ ਦੇવਾਨਂ ਦੇવਪਦਾਨਿ ਅવਿਸੁਦ੍ਧਾਨਂ ਸਤ੍ਤਾਨਂ વਿਸੁਦ੍ਧਿਯਾ ਅਪਰਿਯੋਦਾਤਾਨਂ ਸਤ੍ਤਾਨਂ ਪਰਿਯੋਦਪਨਾਯਾ’’ਤਿ। ਪਞ੍ਚਮਂ।
‘‘Puna caparaṃ, bhikkhave, ariyasāvako ariyakantehi sīlehi samannāgato hoti akhaṇḍehi…pe… samādhisaṃvattanikehi. So iti paṭisañcikkhati – ‘kiṃ nu kho devānaṃ devapada’nti ? So evaṃ pajānāti – ‘abyābajjhaparame khvāhaṃ etarahi deve suṇāmi. Na kho panāhaṃ kiñci byābādhemi tasaṃ vā thāvaraṃ vā. Addhāhaṃ devapadadhammasamannāgato viharāmī’ti. Idaṃ catutthaṃ devānaṃ devapadaṃ avisuddhānaṃ sattānaṃ visuddhiyā apariyodātānaṃ sattānaṃ pariyodapanāya. Imāni kho, bhikkhave, cattāri devānaṃ devapadāni avisuddhānaṃ sattānaṃ visuddhiyā apariyodātānaṃ sattānaṃ pariyodapanāyā’’ti. Pañcamaṃ.
