| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೫. ದುತಿಯದೇವಪದಸುತ್ತಂ
5. Dutiyadevapadasuttaṃ
೧೦೩೧. ‘‘ಚತ್ತಾರಿಮಾನಿ, ಭಿಕ್ಖವೇ, ದೇವಾನಂ ದೇವಪದಾನಿ ಅವಿಸುದ್ಧಾನಂ ಸತ್ತಾನಂ ವಿಸುದ್ಧಿಯಾ ಅಪರಿಯೋದಾತಾನಂ ಸತ್ತಾನಂ ಪರಿಯೋದಪನಾಯ।
1031. ‘‘Cattārimāni, bhikkhave, devānaṃ devapadāni avisuddhānaṃ sattānaṃ visuddhiyā apariyodātānaṃ sattānaṃ pariyodapanāya.
‘‘ಕತಮಾನಿ ಚತ್ತಾರಿ? ಇಧ, ಭಿಕ್ಖವೇ, ಅರಿಯಸಾವಕೋ ಬುದ್ಧೇ ಅವೇಚ್ಚಪ್ಪಸಾದೇನ ಸಮನ್ನಾಗತೋ ಹೋತಿ – ಇತಿಪಿ ಸೋ ಭಗವಾ…ಪೇ॰… ಸತ್ಥಾ ದೇವಮನುಸ್ಸಾನಂ ಬುದ್ಧೋ ಭಗವಾತಿ। ಸೋ ಇತಿ ಪಟಿಸಞ್ಚಿಕ್ಖತಿ – ‘ಕಿಂ ನು ಖೋ ದೇವಾನಂ ದೇವಪದ’ನ್ತಿ? ಸೋ ಏವಂ ಪಜಾನಾತಿ – ‘ಅಬ್ಯಾಬಜ್ಝಪರಮೇ ಖ್ವಾಹಂ ಏತರಹಿ ದೇವೇ ಸುಣಾಮಿ। ನ ಚ ಖೋ ಪನಾಹಂ ಕಿಞ್ಚಿ ಬ್ಯಾಬಾಧೇಮಿ ತಸಂ ವಾ ಥಾವರಂ ವಾ। ಅದ್ಧಾಹಂ ದೇವಪದಧಮ್ಮಸಮನ್ನಾಗತೋ ವಿಹರಾಮೀ’’’ತಿ। ಇದಂ ಪಠಮಂ ದೇವಾನಂ ದೇವಪದಂ ಅವಿಸುದ್ಧಾನಂ ಸತ್ತಾನಂ ವಿಸುದ್ಧಿಯಾ ಅಪರಿಯೋದಾತಾನಂ ಸತ್ತಾನಂ ಪರಿಯೋದಪನಾಯ।
‘‘Katamāni cattāri? Idha, bhikkhave, ariyasāvako buddhe aveccappasādena samannāgato hoti – itipi so bhagavā…pe… satthā devamanussānaṃ buddho bhagavāti. So iti paṭisañcikkhati – ‘kiṃ nu kho devānaṃ devapada’nti? So evaṃ pajānāti – ‘abyābajjhaparame khvāhaṃ etarahi deve suṇāmi. Na ca kho panāhaṃ kiñci byābādhemi tasaṃ vā thāvaraṃ vā. Addhāhaṃ devapadadhammasamannāgato viharāmī’’’ti. Idaṃ paṭhamaṃ devānaṃ devapadaṃ avisuddhānaṃ sattānaṃ visuddhiyā apariyodātānaṃ sattānaṃ pariyodapanāya.
‘‘ಪುನ ಚಪರಂ, ಭಿಕ್ಖವೇ, ಅರಿಯಸಾವಕೋ ಧಮ್ಮೇ…ಪೇ॰… ಸಙ್ಘೇ…ಪೇ॰…।
‘‘Puna caparaṃ, bhikkhave, ariyasāvako dhamme…pe… saṅghe…pe….
‘‘ಪುನ ಚಪರಂ, ಭಿಕ್ಖವೇ, ಅರಿಯಸಾವಕೋ ಅರಿಯಕನ್ತೇಹಿ ಸೀಲೇಹಿ ಸಮನ್ನಾಗತೋ ಹೋತಿ ಅಖಣ್ಡೇಹಿ…ಪೇ॰… ಸಮಾಧಿಸಂವತ್ತನಿಕೇಹಿ। ಸೋ ಇತಿ ಪಟಿಸಞ್ಚಿಕ್ಖತಿ – ‘ಕಿಂ ನು ಖೋ ದೇವಾನಂ ದೇವಪದ’ನ್ತಿ ? ಸೋ ಏವಂ ಪಜಾನಾತಿ – ‘ಅಬ್ಯಾಬಜ್ಝಪರಮೇ ಖ್ವಾಹಂ ಏತರಹಿ ದೇವೇ ಸುಣಾಮಿ। ನ ಖೋ ಪನಾಹಂ ಕಿಞ್ಚಿ ಬ್ಯಾಬಾಧೇಮಿ ತಸಂ ವಾ ಥಾವರಂ ವಾ। ಅದ್ಧಾಹಂ ದೇವಪದಧಮ್ಮಸಮನ್ನಾಗತೋ ವಿಹರಾಮೀ’ತಿ। ಇದಂ ಚತುತ್ಥಂ ದೇವಾನಂ ದೇವಪದಂ ಅವಿಸುದ್ಧಾನಂ ಸತ್ತಾನಂ ವಿಸುದ್ಧಿಯಾ ಅಪರಿಯೋದಾತಾನಂ ಸತ್ತಾನಂ ಪರಿಯೋದಪನಾಯ। ಇಮಾನಿ ಖೋ, ಭಿಕ್ಖವೇ, ಚತ್ತಾರಿ ದೇವಾನಂ ದೇವಪದಾನಿ ಅವಿಸುದ್ಧಾನಂ ಸತ್ತಾನಂ ವಿಸುದ್ಧಿಯಾ ಅಪರಿಯೋದಾತಾನಂ ಸತ್ತಾನಂ ಪರಿಯೋದಪನಾಯಾ’’ತಿ। ಪಞ್ಚಮಂ।
‘‘Puna caparaṃ, bhikkhave, ariyasāvako ariyakantehi sīlehi samannāgato hoti akhaṇḍehi…pe… samādhisaṃvattanikehi. So iti paṭisañcikkhati – ‘kiṃ nu kho devānaṃ devapada’nti ? So evaṃ pajānāti – ‘abyābajjhaparame khvāhaṃ etarahi deve suṇāmi. Na kho panāhaṃ kiñci byābādhemi tasaṃ vā thāvaraṃ vā. Addhāhaṃ devapadadhammasamannāgato viharāmī’ti. Idaṃ catutthaṃ devānaṃ devapadaṃ avisuddhānaṃ sattānaṃ visuddhiyā apariyodātānaṃ sattānaṃ pariyodapanāya. Imāni kho, bhikkhave, cattāri devānaṃ devapadāni avisuddhānaṃ sattānaṃ visuddhiyā apariyodātānaṃ sattānaṃ pariyodapanāyā’’ti. Pañcamaṃ.
