| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৫. দুতিযদেৰপদসুত্তং
5. Dutiyadevapadasuttaṃ
১০৩১. ‘‘চত্তারিমানি, ভিক্খৰে, দেৰানং দেৰপদানি অৰিসুদ্ধানং সত্তানং ৰিসুদ্ধিযা অপরিযোদাতানং সত্তানং পরিযোদপনায।
1031. ‘‘Cattārimāni, bhikkhave, devānaṃ devapadāni avisuddhānaṃ sattānaṃ visuddhiyā apariyodātānaṃ sattānaṃ pariyodapanāya.
‘‘কতমানি চত্তারি? ইধ, ভিক্খৰে, অরিযসাৰকো বুদ্ধে অৰেচ্চপ্পসাদেন সমন্নাগতো হোতি – ইতিপি সো ভগৰা…পে॰… সত্থা দেৰমনুস্সানং বুদ্ধো ভগৰাতি। সো ইতি পটিসঞ্চিক্খতি – ‘কিং নু খো দেৰানং দেৰপদ’ন্তি? সো এৰং পজানাতি – ‘অব্যাবজ্ঝপরমে খ্ৰাহং এতরহি দেৰে সুণামি। ন চ খো পনাহং কিঞ্চি ব্যাবাধেমি তসং ৰা থাৰরং ৰা। অদ্ধাহং দেৰপদধম্মসমন্নাগতো ৰিহরামী’’’তি। ইদং পঠমং দেৰানং দেৰপদং অৰিসুদ্ধানং সত্তানং ৰিসুদ্ধিযা অপরিযোদাতানং সত্তানং পরিযোদপনায।
‘‘Katamāni cattāri? Idha, bhikkhave, ariyasāvako buddhe aveccappasādena samannāgato hoti – itipi so bhagavā…pe… satthā devamanussānaṃ buddho bhagavāti. So iti paṭisañcikkhati – ‘kiṃ nu kho devānaṃ devapada’nti? So evaṃ pajānāti – ‘abyābajjhaparame khvāhaṃ etarahi deve suṇāmi. Na ca kho panāhaṃ kiñci byābādhemi tasaṃ vā thāvaraṃ vā. Addhāhaṃ devapadadhammasamannāgato viharāmī’’’ti. Idaṃ paṭhamaṃ devānaṃ devapadaṃ avisuddhānaṃ sattānaṃ visuddhiyā apariyodātānaṃ sattānaṃ pariyodapanāya.
‘‘পুন চপরং, ভিক্খৰে, অরিযসাৰকো ধম্মে…পে॰… সঙ্ঘে…পে॰…।
‘‘Puna caparaṃ, bhikkhave, ariyasāvako dhamme…pe… saṅghe…pe….
‘‘পুন চপরং, ভিক্খৰে, অরিযসাৰকো অরিযকন্তেহি সীলেহি সমন্নাগতো হোতি অখণ্ডেহি…পে॰… সমাধিসংৰত্তনিকেহি। সো ইতি পটিসঞ্চিক্খতি – ‘কিং নু খো দেৰানং দেৰপদ’ন্তি ? সো এৰং পজানাতি – ‘অব্যাবজ্ঝপরমে খ্ৰাহং এতরহি দেৰে সুণামি। ন খো পনাহং কিঞ্চি ব্যাবাধেমি তসং ৰা থাৰরং ৰা। অদ্ধাহং দেৰপদধম্মসমন্নাগতো ৰিহরামী’তি। ইদং চতুত্থং দেৰানং দেৰপদং অৰিসুদ্ধানং সত্তানং ৰিসুদ্ধিযা অপরিযোদাতানং সত্তানং পরিযোদপনায। ইমানি খো, ভিক্খৰে, চত্তারি দেৰানং দেৰপদানি অৰিসুদ্ধানং সত্তানং ৰিসুদ্ধিযা অপরিযোদাতানং সত্তানং পরিযোদপনাযা’’তি। পঞ্চমং।
‘‘Puna caparaṃ, bhikkhave, ariyasāvako ariyakantehi sīlehi samannāgato hoti akhaṇḍehi…pe… samādhisaṃvattanikehi. So iti paṭisañcikkhati – ‘kiṃ nu kho devānaṃ devapada’nti ? So evaṃ pajānāti – ‘abyābajjhaparame khvāhaṃ etarahi deve suṇāmi. Na kho panāhaṃ kiñci byābādhemi tasaṃ vā thāvaraṃ vā. Addhāhaṃ devapadadhammasamannāgato viharāmī’ti. Idaṃ catutthaṃ devānaṃ devapadaṃ avisuddhānaṃ sattānaṃ visuddhiyā apariyodātānaṃ sattānaṃ pariyodapanāya. Imāni kho, bhikkhave, cattāri devānaṃ devapadāni avisuddhānaṃ sattānaṃ visuddhiyā apariyodātānaṃ sattānaṃ pariyodapanāyā’’ti. Pañcamaṃ.
