| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၂. ဒုတိယအနုသယသုတ္တံ
2. Dutiyaanusayasuttaṃ
၁၂. ‘‘သတ္တန္နံ, ဘိက္ခဝေ, အနုသယာနံ ပဟာနာယ သမုစ္ဆေဒာယ ဗ္ရဟ္မစရိယံ ဝုသ္သတိ။ ကတမေသံ သတ္တန္နံ? ကာမရာဂာနုသယသ္သ ပဟာနာယ သမုစ္ဆေဒာယ ဗ္ရဟ္မစရိယံ ဝုသ္သတိ, ပဋိဃာနုသယသ္သ။ပေ.။ ဒိဋ္ဌာနုသယသ္သ။ ဝိစိကိစ္ဆာနုသယသ္သ။ မာနာနုသယသ္သ။ ဘဝရာဂာနုသယသ္သ။ အဝိဇ္ဇာနုသယသ္သ ပဟာနာယ သမုစ္ဆေဒာယ ဗ္ရဟ္မစရိယံ ဝုသ္သတိ။ ဣမေသံ ခော, ဘိက္ခဝေ, သတ္တန္နံ အနုသယာနံ ပဟာနာယ သမုစ္ဆေဒာယ ဗ္ရဟ္မစရိယံ ဝုသ္သတိ။
12. ‘‘Sattannaṃ, bhikkhave, anusayānaṃ pahānāya samucchedāya brahmacariyaṃ vussati. Katamesaṃ sattannaṃ? Kāmarāgānusayassa pahānāya samucchedāya brahmacariyaṃ vussati, paṭighānusayassa…pe… diṭṭhānusayassa… vicikicchānusayassa… mānānusayassa… bhavarāgānusayassa… avijjānusayassa pahānāya samucchedāya brahmacariyaṃ vussati. Imesaṃ kho, bhikkhave, sattannaṃ anusayānaṃ pahānāya samucchedāya brahmacariyaṃ vussati.
‘‘ယတော စ ခော, ဘိက္ခဝေ, ဘိက္ခုနော ကာမရာဂာနုသယော ပဟီနော ဟောတိ ဥစ္ဆိန္နမူလော တာလာဝတ္ထုကတော အနဘာဝံကတော အာယတိံ အနုပ္ပာဒဓမ္မော။ ပဋိဃာနုသယော။ပေ.။ ဒိဋ္ဌာနုသယော။ ဝိစိကိစ္ဆာနုသယော။ မာနာနုသယော။ ဘဝရာဂာနုသယော။ အဝိဇ္ဇာနုသယော ပဟီနော ဟောတိ ဥစ္ဆိန္နမူလော တာလာဝတ္ထုကတော အနဘာဝံကတော အာယတိံ အနုပ္ပာဒဓမ္မော။ အယံ ဝုစ္စတိ, ဘိက္ခဝေ, ဘိက္ခု အစ္ဆေစ္ဆိ တဏ္ဟံ, ဝိဝတ္တယိ သံယောဇနံ, သမ္မာ မာနာဘိသမယာ အန္တမကာသိ ဒုက္ခသ္သာ’’တိ။ ဒုတိယံ။
‘‘Yato ca kho, bhikkhave, bhikkhuno kāmarāgānusayo pahīno hoti ucchinnamūlo tālāvatthukato anabhāvaṃkato āyatiṃ anuppādadhammo. Paṭighānusayo…pe… diṭṭhānusayo… vicikicchānusayo… mānānusayo… bhavarāgānusayo… avijjānusayo pahīno hoti ucchinnamūlo tālāvatthukato anabhāvaṃkato āyatiṃ anuppādadhammo. Ayaṃ vuccati, bhikkhave, bhikkhu acchecchi taṇhaṃ, vivattayi saṃyojanaṃ, sammā mānābhisamayā antamakāsi dukkhassā’’ti. Dutiyaṃ.
