| Library / Tipiṭaka / तिपिटक • Tipiṭaka / विमानवत्थुपाळि • Vimānavatthupāḷi |
२. दुतियअगारियविमानवत्थु
2. Dutiyaagāriyavimānavatthu
१०५४.
1054.
‘‘यथा वनं चित्तलतं पभासति, उय्यानसेट्ठं तिदसानमुत्तमं।
‘‘Yathā vanaṃ cittalataṃ pabhāsati, uyyānaseṭṭhaṃ tidasānamuttamaṃ;
तथूपमं तुय्हमिदं विमानं, ओभासयं तिट्ठति अन्तलिक्खे॥
Tathūpamaṃ tuyhamidaṃ vimānaṃ, obhāsayaṃ tiṭṭhati antalikkhe.
१०५५.
1055.
‘‘देविद्धिपत्तोसि महानुभावो, मनुस्सभूतो किमकासि पुञ्ञं।
‘‘Deviddhipattosi mahānubhāvo, manussabhūto kimakāsi puññaṃ;
केनासि एवं जलितानुभावो, वण्णो च ते सब्बदिसा पभासती’’ति॥
Kenāsi evaṃ jalitānubhāvo, vaṇṇo ca te sabbadisā pabhāsatī’’ti.
१०५६.
1056.
सो देवपुत्तो अत्तमनो…पे॰… यस्स कम्मस्सिदं फलं॥
So devaputto attamano…pe… yassa kammassidaṃ phalaṃ.
१०५७.
1057.
‘‘अहञ्च भरिया च मनुस्सलोके, ओपानभूता घरमावसिम्ह।
‘‘Ahañca bhariyā ca manussaloke, opānabhūtā gharamāvasimha;
अन्नञ्च पानञ्च पसन्नचित्ता, सक्कच्च दानं विपुलं अदम्ह॥
Annañca pānañca pasannacittā, sakkacca dānaṃ vipulaṃ adamha.
१०५८.
1058.
‘‘तेन मेतादिसो वण्णो…पे॰… वण्णो च मे सब्बदिसा पभासती’’ति॥
‘‘Tena metādiso vaṇṇo…pe… vaṇṇo ca me sabbadisā pabhāsatī’’ti.
दुतियअगारियविमानं दुतियं।
Dutiyaagāriyavimānaṃ dutiyaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / विमानवत्थु-अट्ठकथा • Vimānavatthu-aṭṭhakathā / २. दुतियअगारियविमानवण्णना • 2. Dutiyaagāriyavimānavaṇṇanā
