| Library / Tipiṭaka / တိပိဋက • Tipiṭaka / ဣတိဝုတ္တက-အဋ္ဌကထာ • Itivuttaka-aṭṭhakathā |
၅. ဒုစ္စရိတသုတ္တဝဏ္ဏနာ
5. Duccaritasuttavaṇṇanā
၆၄. ပဉ္စမေ ဒုဋ္ဌု စရိတာနိ, ဒုဋ္ဌာနိ ဝာ စရိတာနိ ဒုစ္စရိတာနိ။ ကာယေန ဒုစ္စရိတံ, ကာယတော ဝာ ပဝတ္တံ ဒုစ္စရိတံ ကာယဒုစ္စရိတံ။ သေသေသုပိ ဧသေဝ နယော ။ ဣမာနိ စ ဒုစ္စရိတာနိ ပညတ္တိယာ ဝာ ကထေတဗ္ဗာနိ ကမ္မပထေဟိ ဝာ။ တတ္ထ ပညတ္တိယာ တာဝ ကာယဒ္ဝာရေ ပညတ္တသိက္ခာပဒသ္သ ဝီတိက္ကမော ကာယဒုစ္စရိတံ, ဝစီဒ္ဝာရေ ပညတ္တသိက္ခာပဒသ္သ ဝီတိက္ကမော ဝစီဒုစ္စရိတံ, ဥဘယတ္ထ ပညတ္တသ္သ ဝီတိက္ကမော မနောဒုစ္စရိတန္တိ အယံ ပညတ္တိကထာ။ ပာဏာတိပာတာဒယော ပန တိသ္သော စေတနာ ကာယဒ္ဝာရေပိ, ဝစီဒ္ဝာရေပိ, ဥပ္ပန္နာ ကာယဒုစ္စရိတံ, တထာ စတသ္သော မုသာဝာဒာဒိစေတနာ ဝစီဒုစ္စရိတံ, အဘိဇ္ဈာ, ဗ္ယာပာဒော, မိစ္ဆာဒိဋ္ဌီတိ တယော စေတနာသမ္ပယုတ္တဓမ္မာ မနောဒုစ္စရိတန္တိ အယံ ကမ္မပထကထာ။
64. Pañcame duṭṭhu caritāni, duṭṭhāni vā caritāni duccaritāni. Kāyena duccaritaṃ, kāyato vā pavattaṃ duccaritaṃ kāyaduccaritaṃ. Sesesupi eseva nayo . Imāni ca duccaritāni paññattiyā vā kathetabbāni kammapathehi vā. Tattha paññattiyā tāva kāyadvāre paññattasikkhāpadassa vītikkamo kāyaduccaritaṃ, vacīdvāre paññattasikkhāpadassa vītikkamo vacīduccaritaṃ, ubhayattha paññattassa vītikkamo manoduccaritanti ayaṃ paññattikathā. Pāṇātipātādayo pana tisso cetanā kāyadvārepi, vacīdvārepi, uppannā kāyaduccaritaṃ, tathā catasso musāvādādicetanā vacīduccaritaṃ, abhijjhā, byāpādo, micchādiṭṭhīti tayo cetanāsampayuttadhammā manoduccaritanti ayaṃ kammapathakathā.
ဂာထာယံ ကမ္မပထပ္ပတ္တောယေဝ ပာပဓမ္မော ကာယဒုစ္စရိတာဒိဘာဝေန ဝုတ္တောတိ တဒညံ ပာပဓမ္မံ သင္ဂဏ္ဟိတုံ ‘‘ယဉ္စညံ ဒောသသဉ္ဟိတ’’န္တိ ဝုတ္တံ။ တတ္ထ ဒောသသဉ္ဟိတန္တိ ရာဂာဒိကိလေသသံဟိတံ။ သေသံ သုဝိညေယ္ယမေဝ။
Gāthāyaṃ kammapathappattoyeva pāpadhammo kāyaduccaritādibhāvena vuttoti tadaññaṃ pāpadhammaṃ saṅgaṇhituṃ ‘‘yañcaññaṃ dosasañhita’’nti vuttaṃ. Tattha dosasañhitanti rāgādikilesasaṃhitaṃ. Sesaṃ suviññeyyameva.
ပဉ္စမသုတ္တဝဏ္ဏနာ နိဋ္ဌိတာ။
Pañcamasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / ဣတိဝုတ္တကပာဠိ • Itivuttakapāḷi / ၅. ဒုစ္စရိတသုတ္တံ • 5. Duccaritasuttaṃ
