| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
৮. দুব্বণ্ণকরণসিক্খাপদং
8. Dubbaṇṇakaraṇasikkhāpadaṃ
৩৬৮. অট্ঠমে অলভীতি লভোতি ৰচনত্থে অপচ্চযং কত্ৰা ণপচ্চযস্স স্ৰত্থভাৰং দস্সেতুং ৰুত্তং ‘‘লভোযেৰ লাভো’’তি। অপচ্চযমকত্ৰা পকতিযা ণপচ্চযোপি যুত্তোযেৰাতি দট্ঠব্বং। সদ্দন্তরোপি অত্থন্তরাভাৰা সমাসো হোতীতি আহ ‘‘নৰচীৰরলাভেনাতি ৰত্তব্বে’’তি। অনুনাসিকলোপন্তি ‘‘নৰ’’ন্তি এত্থ নিগ্গহীতস্স ৰিনাসং। নিগ্গহীতঞ্হি নাসং অনুগতত্তা ‘‘অনুনাসিক’’ন্তি ৰুচ্চতি, তস্স অদস্সন, মকত্ৰাতি অত্থো। মজ্ঝে ঠিতপদদ্ৰযেতি ‘‘নৰ’’ন্তি চ ‘‘চীৰরলাভেনা’’তি চ দ্ৰিন্নং পদানমন্তরে ‘‘ঠিতে পনা’’তি চ ‘‘ভিক্খুনা’’তি চ পদদ্ৰযে। নিদ্ধারণে চেতং ভুম্মৰচনং। নিপাতোতি নিপাতমত্তং। অলভীতি লভোতি ৰচনত্থস্স অভিধেয্যত্থং দস্সেতুং ‘‘ভিক্খুনা’’তি ৰুত্তন্তি আহ ‘‘ভিক্খুনা’’তিআদি। পদভাজনে পন ৰুত্তন্তি সম্বন্ধো। যন্তি যং চীৰরং। ‘‘চীৰর’’ন্তি এত্থ চীৰরসরূপং দস্সেন্তো আহ ‘‘যং নিৰাসেতুং ৰা’’তিআদি। চম্মকারনীলন্তি চম্মকারানং তিফলে পক্খিত্তস্স অযগূথস্স নীলং। মহাপচ্চরিযং ৰুত্তন্তি সম্বন্ধো। দুব্বণ্ণো করীযতি অনেনাতি দুব্বণ্ণকরণং, কপ্পবিন্দুন্তি আহ ‘‘কপ্পবিন্দুং সন্ধাযা’’তি। আদিযন্তেন ভিক্খুনা আদাতব্বন্তি সম্বন্ধো। কোণেসূতি অন্তেসু। ৰাসদ্দো অনিযমৰিকপ্পত্থো। অক্খিমণ্ডলমত্তং ৰাতি অক্খিমণ্ডলস্স পমাণং ৰা কপ্পবিন্দূতি সম্বন্ধো। পট্টে ৰাতি অনুৰাতপট্টে ৰা। গণ্ঠিযং ৰাতি গণ্ঠিকপট্টে ৰা। পাল়িকপ্পোতি দ্ৰে ৰা তিস্সো ৰা ততো অধিকা ৰা বিন্দুআৰলী কত্ৰা কতো কপ্পো। কণ্ণিককপ্পোতি কণ্ণিকং ৰিয বিন্দুগোচ্ছকং কত্ৰা কতো কপ্পো। আদিসদ্দেন অগ্ঘিযকপ্পাদযো সঙ্গণ্হাতি। সব্বত্থাতি সব্বাসু অট্ঠকথাসু। একোপি বিন্দু ৰট্টোযেৰ ৰট্টতীতি আহ ‘‘একং ৰট্টবিন্দু’’ন্তি।
368. Aṭṭhame alabhīti labhoti vacanatthe apaccayaṃ katvā ṇapaccayassa svatthabhāvaṃ dassetuṃ vuttaṃ ‘‘labhoyeva lābho’’ti. Apaccayamakatvā pakatiyā ṇapaccayopi yuttoyevāti daṭṭhabbaṃ. Saddantaropi atthantarābhāvā samāso hotīti āha ‘‘navacīvaralābhenāti vattabbe’’ti. Anunāsikalopanti ‘‘nava’’nti ettha niggahītassa vināsaṃ. Niggahītañhi nāsaṃ anugatattā ‘‘anunāsika’’nti vuccati, tassa adassana, makatvāti attho. Majjhe ṭhitapadadvayeti ‘‘nava’’nti ca ‘‘cīvaralābhenā’’ti ca dvinnaṃ padānamantare ‘‘ṭhite panā’’ti ca ‘‘bhikkhunā’’ti ca padadvaye. Niddhāraṇe cetaṃ bhummavacanaṃ. Nipātoti nipātamattaṃ. Alabhīti labhoti vacanatthassa abhidheyyatthaṃ dassetuṃ ‘‘bhikkhunā’’ti vuttanti āha ‘‘bhikkhunā’’tiādi. Padabhājane pana vuttanti sambandho. Yanti yaṃ cīvaraṃ. ‘‘Cīvara’’nti ettha cīvarasarūpaṃ dassento āha ‘‘yaṃ nivāsetuṃ vā’’tiādi. Cammakāranīlanti cammakārānaṃ tiphale pakkhittassa ayagūthassa nīlaṃ. Mahāpaccariyaṃ vuttanti sambandho. Dubbaṇṇo karīyati anenāti dubbaṇṇakaraṇaṃ, kappabindunti āha ‘‘kappabinduṃ sandhāyā’’ti. Ādiyantena bhikkhunā ādātabbanti sambandho. Koṇesūti antesu. Vāsaddo aniyamavikappattho. Akkhimaṇḍalamattaṃ vāti akkhimaṇḍalassa pamāṇaṃ vā kappabindūti sambandho. Paṭṭe vāti anuvātapaṭṭe vā. Gaṇṭhiyaṃ vāti gaṇṭhikapaṭṭe vā. Pāḷikappoti dve vā tisso vā tato adhikā vā binduāvalī katvā kato kappo. Kaṇṇikakappoti kaṇṇikaṃ viya bindugocchakaṃ katvā kato kappo. Ādisaddena agghiyakappādayo saṅgaṇhāti. Sabbatthāti sabbāsu aṭṭhakathāsu. Ekopi bindu vaṭṭoyeva vaṭṭatīti āha ‘‘ekaṃ vaṭṭabindu’’nti.
৩৭১. অগ্গল়াদীনীতি আদিসদ্দেন অনুৰাতপরিভণ্ডে সঙ্গণ্হাতীতি। অট্ঠমং।
371.Aggaḷādīnīti ādisaddena anuvātaparibhaṇḍe saṅgaṇhātīti. Aṭṭhamaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৬. সুরাপানৰগ্গো • 6. Surāpānavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৮. দুব্বণ্ণকরণসিক্খাপদৰণ্ণনা • 8. Dubbaṇṇakaraṇasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৮. দুব্বণ্ণকরণসিক্খাপদৰণ্ণনা • 8. Dubbaṇṇakaraṇasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৮. দুব্বণ্ণকরণসিক্খাপদৰণ্ণনা • 8. Dubbaṇṇakaraṇasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৮. দুব্বণ্ণকরণসিক্খাপদৰণ্ণনা • 8. Dubbaṇṇakaraṇasikkhāpadavaṇṇanā
