| Library / Tipiṭaka / ತಿಪಿಟಕ • Tipiṭaka / ಇತಿವುತ್ತಕಪಾಳಿ • Itivuttakapāḷi |
೧೦. ದೋಸಪರಿಞ್ಞಾಸುತ್ತಂ
10. Dosapariññāsuttaṃ
೧೦. ವುತ್ತಞ್ಹೇತಂ ಭಗವತಾ, ವುತ್ತಮರಹತಾತಿ ಮೇ ಸುತಂ –
10. Vuttañhetaṃ bhagavatā, vuttamarahatāti me sutaṃ –
‘‘ದೋಸಂ, ಭಿಕ್ಖವೇ, ಅನಭಿಜಾನಂ ಅಪರಿಜಾನಂ ತತ್ಥ ಚಿತ್ತಂ ಅವಿರಾಜಯಂ ಅಪ್ಪಜಹಂ ಅಭಬ್ಬೋ ದುಕ್ಖಕ್ಖಯಾಯ। ದೋಸಞ್ಚ ಖೋ, ಭಿಕ್ಖವೇ, ಅಭಿಜಾನಂ ಪರಿಜಾನಂ ತತ್ಥ ಚಿತ್ತಂ ವಿರಾಜಯಂ ಪಜಹಂ ಭಬ್ಬೋ ದುಕ್ಖಕ್ಖಯಾಯಾ’’ತಿ। ಏತಮತ್ಥಂ ಭಗವಾ ಅವೋಚ। ತತ್ಥೇತಂ ಇತಿ ವುಚ್ಚತಿ –
‘‘Dosaṃ, bhikkhave, anabhijānaṃ aparijānaṃ tattha cittaṃ avirājayaṃ appajahaṃ abhabbo dukkhakkhayāya. Dosañca kho, bhikkhave, abhijānaṃ parijānaṃ tattha cittaṃ virājayaṃ pajahaṃ bhabbo dukkhakkhayāyā’’ti. Etamatthaṃ bhagavā avoca. Tatthetaṃ iti vuccati –
‘‘ಯೇನ ದೋಸೇನ ದುಟ್ಠಾಸೇ, ಸತ್ತಾ ಗಚ್ಛನ್ತಿ ದುಗ್ಗತಿಂ।
‘‘Yena dosena duṭṭhāse, sattā gacchanti duggatiṃ;
ತಂ ದೋಸಂ ಸಮ್ಮದಞ್ಞಾಯ, ಪಜಹನ್ತಿ ವಿಪಸ್ಸಿನೋ।
Taṃ dosaṃ sammadaññāya, pajahanti vipassino;
ಪಹಾಯ ನ ಪುನಾಯನ್ತಿ, ಇಮಂ ಲೋಕಂ ಕುದಾಚನ’’ನ್ತಿ॥
Pahāya na punāyanti, imaṃ lokaṃ kudācana’’nti.
ಅಯಮ್ಪಿ ಅತ್ಥೋ ವುತ್ತೋ ಭಗವತಾ, ಇತಿ ಮೇ ಸುತನ್ತಿ। ದಸಮಂ।
Ayampi attho vutto bhagavatā, iti me sutanti. Dasamaṃ.
ಪಠಮೋ ವಗ್ಗೋ ನಿಟ್ಠಿತೋ।
Paṭhamo vaggo niṭṭhito.
ತಸ್ಸುದ್ದಾನಂ –
Tassuddānaṃ –
ರಾಗದೋಸಾ ಅಥ ಮೋಹೋ, ಕೋಧಮಕ್ಖಾ ಮಾನಂ ಸಬ್ಬಂ।
Rāgadosā atha moho, kodhamakkhā mānaṃ sabbaṃ;
ಮಾನತೋ ರಾಗದೋಸಾ ಪುನ ದ್ವೇ, ಪಕಾಸಿತಾ ವಗ್ಗಮಾಹು ಪಠಮನ್ತಿ॥
Mānato rāgadosā puna dve, pakāsitā vaggamāhu paṭhamanti.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಇತಿವುತ್ತಕ-ಅಟ್ಠಕಥಾ • Itivuttaka-aṭṭhakathā / ೯-೧೦. ಲೋಭದೋಸಪರಿಞ್ಞಾಸುತ್ತದ್ವಯವಣ್ಣನಾ • 9-10. Lobhadosapariññāsuttadvayavaṇṇanā
