| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
១០. ទីឃដ្ឋិបញ្ហោ
10. Dīghaṭṭhipañho
១០. រាជា អាហ ‘‘ភន្តេ នាគសេន, តុម្ហេ ឯវំ ភណថ ‘អដ្ឋិកានិ ទីឃានិ យោជនសតិកានិបី’តិ, រុក្ខោបិ តាវ នត្ថិ យោជនសតិកោ, កុតោ បន អដ្ឋិកានិ ទីឃានិ យោជនសតិកានិ ភវិស្សន្តី’’តិ?
10. Rājā āha ‘‘bhante nāgasena, tumhe evaṃ bhaṇatha ‘aṭṭhikāni dīghāni yojanasatikānipī’ti, rukkhopi tāva natthi yojanasatiko, kuto pana aṭṭhikāni dīghāni yojanasatikāni bhavissantī’’ti?
‘‘តំ កិំ មញ្ញសិ, មហារាជ, សុតំ តេ ‘មហាសមុទ្ទេ បញ្ចយោជនសតិកាបិ មច្ឆា អត្ថី’’’តិ? ‘‘អាម, ភន្តេ, សុត’’ន្តិ។ ‘‘ននុ មហារាជ, បញ្ចយោជនសតិកស្ស មច្ឆស្ស អដ្ឋិកានិ ទីឃានិ ភវិស្សន្តិ យោជនសតិកានិបី’’តិ?
‘‘Taṃ kiṃ maññasi, mahārāja, sutaṃ te ‘mahāsamudde pañcayojanasatikāpi macchā atthī’’’ti? ‘‘Āma, bhante, suta’’nti. ‘‘Nanu mahārāja, pañcayojanasatikassa macchassa aṭṭhikāni dīghāni bhavissanti yojanasatikānipī’’ti?
‘‘កល្លោសិ , ភន្តេ នាគសេនា’’តិ។
‘‘Kallosi , bhante nāgasenā’’ti.
ទីឃដ្ឋិបញ្ហោ ទសមោ។
Dīghaṭṭhipañho dasamo.
