| Library / Tipiṭaka / तिपिटक • Tipiṭaka / मिलिन्दपञ्हपाळि • Milindapañhapāḷi |
१०. दीघट्ठिपञ्हो
10. Dīghaṭṭhipañho
१०. राजा आह ‘‘भन्ते नागसेन, तुम्हे एवं भणथ ‘अट्ठिकानि दीघानि योजनसतिकानिपी’ति, रुक्खोपि ताव नत्थि योजनसतिको, कुतो पन अट्ठिकानि दीघानि योजनसतिकानि भविस्सन्ती’’ति?
10. Rājā āha ‘‘bhante nāgasena, tumhe evaṃ bhaṇatha ‘aṭṭhikāni dīghāni yojanasatikānipī’ti, rukkhopi tāva natthi yojanasatiko, kuto pana aṭṭhikāni dīghāni yojanasatikāni bhavissantī’’ti?
‘‘तं किं मञ्ञसि, महाराज, सुतं ते ‘महासमुद्दे पञ्चयोजनसतिकापि मच्छा अत्थी’’’ति? ‘‘आम, भन्ते, सुत’’न्ति। ‘‘ननु महाराज, पञ्चयोजनसतिकस्स मच्छस्स अट्ठिकानि दीघानि भविस्सन्ति योजनसतिकानिपी’’ति?
‘‘Taṃ kiṃ maññasi, mahārāja, sutaṃ te ‘mahāsamudde pañcayojanasatikāpi macchā atthī’’’ti? ‘‘Āma, bhante, suta’’nti. ‘‘Nanu mahārāja, pañcayojanasatikassa macchassa aṭṭhikāni dīghāni bhavissanti yojanasatikānipī’’ti?
‘‘कल्लोसि , भन्ते नागसेना’’ति।
‘‘Kallosi , bhante nāgasenā’’ti.
दीघट्ठिपञ्हो दसमो।
Dīghaṭṭhipañho dasamo.
