| Library / Tipiṭaka / တိပိဋက • Tipiṭaka / ပရိဝာရပာဠိ • Parivārapāḷi |
၆. ဓုတင္ဂဝဂ္ဂော
6. Dhutaṅgavaggo
၄၄၃. ‘‘ကတိ နု ခော, ဘန္တေ, အာရညိကာ’’တိ? ‘‘ပဉ္စိမေ, ဥပာလိ, အာရညိကာ 1။ ကတမေ ပဉ္စ? မန္ဒတ္တာ မောမူဟတ္တာ အာရညိကော ဟောတိ, ပာပိစ္ဆော ဣစ္ဆာပကတော အာရညိကော ဟောတိ, ဥမ္မာဒာ စိတ္တက္ခေပာ အာရညိကော ဟောတိ, ဝဏ္ဏိတံ ဗုဒ္ဓေဟိ ဗုဒ္ဓသာဝကေဟီတိ အာရညိကော ဟောတိ, အပိ စ အပ္ပိစ္ဆညေဝ နိသ္သာယ သန္တုဋ္ဌိညေဝ နိသ္သာယ – သလ္လေခညေဝ နိသ္သာယ ပဝိဝေကညေဝ နိသ္သာယ ဣဒမတ္ထိတညေဝ နိသ္သာယ အာရညိကော ဟောတိ – ဣမေ ခော, ဥပာလိ, ပဉ္စ အာရညိကာ’’တိ။
443. ‘‘Kati nu kho, bhante, āraññikā’’ti? ‘‘Pañcime, upāli, āraññikā 2. Katame pañca? Mandattā momūhattā āraññiko hoti, pāpiccho icchāpakato āraññiko hoti, ummādā cittakkhepā āraññiko hoti, vaṇṇitaṃ buddhehi buddhasāvakehīti āraññiko hoti, api ca appicchaññeva nissāya santuṭṭhiññeva nissāya – sallekhaññeva nissāya pavivekaññeva nissāya idamatthitaññeva nissāya āraññiko hoti – ime kho, upāli, pañca āraññikā’’ti.
‘‘ကတိ နု ခော, ဘန္တေ, ပိဏ္ဍပာတိကာတိ။ပေ.။ ကတိ နု ခော, ဘန္တေ, ပံသုကူလိကာတိ။ပေ.။ ကတိ နု ခော, ဘန္တေ, ရုက္ခမူလိကာတိ။ပေ.။ ကတိ နု ခော, ဘန္တေ, သောသာနိကာတိ။ပေ.။ ကတိ နု ခော, ဘန္တေ, အဗ္ဘောကာသိကာတိ။ပေ.။ ကတိ နု ခော, ဘန္တေ, တေစီဝရိကာတိ။ပေ.။ ကတိ နု ခော, ဘန္တေ, သပဒာနစာရိကာတိ။ပေ.။ ကတိ နု ခော, ဘန္တေ, နေသဇ္ဇိကာတိ။ပေ.။ ကတိ နု ခော, ဘန္တေ, ယထာသန္ထတိကာတိ။ပေ.။ ကတိ နု ခော, ဘန္တေ, ဧကာသနိကာတိ။ပေ.။ ကတိ နု ခော, ဘန္တေ, ခလုပစ္ဆာဘတ္တိကာတိ။ပေ.။ ကတိ နု ခော, ဘန္တေ, ပတ္တပိဏ္ဍိကာတိ? ပဉ္စိမေ, ဥပာလိ, ပတ္တပိဏ္ဍိကာ။ ကတမေ ပဉ္စ? မန္ဒတ္တာ မောမူဟတ္တာ ပတ္တပိဏ္ဍိကော ဟောတိ, ပာပိစ္ဆော ဣစ္ဆာပကတော ပတ္တပိဏ္ဍိကော ဟောတိ, ဥမ္မာဒာ စိတ္တက္ခေပာ ပတ္တပိဏ္ဍိကော ဟောတိ, ဝဏ္ဏိတံ ဗုဒ္ဓေဟိ ဗုဒ္ဓသာဝကေဟီတိ ပတ္တပိဏ္ဍိကော ဟောတိ, အပိ စ အပ္ပိစ္ဆညေဝ နိသ္သာယ သန္တုဋ္ဌိညေဝ နိသ္သာယ သလ္လေခညေဝ နိသ္သာယ ပဝိဝေကညေဝ နိသ္သာယ ဣဒမတ္ထိတညေဝ နိသ္သာယ ပတ္တပိဏ္ဍိကော ဟောတိ – ဣမေ ခော, ဥပာလိ, ပဉ္စ ပတ္တပိဏ္ဍိကာ’’တိ။
‘‘Kati nu kho, bhante, piṇḍapātikāti…pe… kati nu kho, bhante, paṃsukūlikāti…pe… kati nu kho, bhante, rukkhamūlikāti…pe… kati nu kho, bhante, sosānikāti…pe… kati nu kho, bhante, abbhokāsikāti…pe… kati nu kho, bhante, tecīvarikāti…pe… kati nu kho, bhante, sapadānacārikāti…pe… kati nu kho, bhante, nesajjikāti…pe… kati nu kho, bhante, yathāsanthatikāti…pe… kati nu kho, bhante, ekāsanikāti…pe… kati nu kho, bhante, khalupacchābhattikāti…pe… kati nu kho, bhante, pattapiṇḍikāti? Pañcime, upāli, pattapiṇḍikā. Katame pañca? Mandattā momūhattā pattapiṇḍiko hoti, pāpiccho icchāpakato pattapiṇḍiko hoti, ummādā cittakkhepā pattapiṇḍiko hoti, vaṇṇitaṃ buddhehi buddhasāvakehīti pattapiṇḍiko hoti, api ca appicchaññeva nissāya santuṭṭhiññeva nissāya sallekhaññeva nissāya pavivekaññeva nissāya idamatthitaññeva nissāya pattapiṇḍiko hoti – ime kho, upāli, pañca pattapiṇḍikā’’ti.
ဓုတင္ဂဝဂ္ဂော နိဋ္ဌိတော ဆဋ္ဌော။
Dhutaṅgavaggo niṭṭhito chaṭṭho.
တသ္သုဒ္ဒာနံ –
Tassuddānaṃ –
အာရညိကော ပိဏ္ဍိပံသု၊ ရုက္ခသုသာနပဉ္စမံ။
Āraññiko piṇḍipaṃsu, rukkhasusānapañcamaṃ;
အဗ္ဘော တေစီဝရဉ္စေဝ၊ သပဒာနနေသဇ္ဇိကာ။
Abbho tecīvarañceva, sapadānanesajjikā;
သန္ထတေကာသနဉ္စေဝ၊ ခလုပစ္ဆာ ပတ္တပိဏ္ဍိကာတိ။
Santhatekāsanañceva, khalupacchā pattapiṇḍikāti.
Footnotes:
