| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
৬. ধুতঙ্গৰগ্গো
6. Dhutaṅgavaggo
৪৪৩. ‘‘কতি নু খো, ভন্তে, আরঞ্ঞিকা’’তি? ‘‘পঞ্চিমে, উপালি, আরঞ্ঞিকা 1। কতমে পঞ্চ? মন্দত্তা মোমূহত্তা আরঞ্ঞিকো হোতি, পাপিচ্ছো ইচ্ছাপকতো আরঞ্ঞিকো হোতি, উম্মাদা চিত্তক্খেপা আরঞ্ঞিকো হোতি, ৰণ্ণিতং বুদ্ধেহি বুদ্ধসাৰকেহীতি আরঞ্ঞিকো হোতি, অপি চ অপ্পিচ্ছঞ্ঞেৰ নিস্সায সন্তুট্ঠিঞ্ঞেৰ নিস্সায – সল্লেখঞ্ঞেৰ নিস্সায পৰিৰেকঞ্ঞেৰ নিস্সায ইদমত্থিতঞ্ঞেৰ নিস্সায আরঞ্ঞিকো হোতি – ইমে খো, উপালি, পঞ্চ আরঞ্ঞিকা’’তি।
443. ‘‘Kati nu kho, bhante, āraññikā’’ti? ‘‘Pañcime, upāli, āraññikā 2. Katame pañca? Mandattā momūhattā āraññiko hoti, pāpiccho icchāpakato āraññiko hoti, ummādā cittakkhepā āraññiko hoti, vaṇṇitaṃ buddhehi buddhasāvakehīti āraññiko hoti, api ca appicchaññeva nissāya santuṭṭhiññeva nissāya – sallekhaññeva nissāya pavivekaññeva nissāya idamatthitaññeva nissāya āraññiko hoti – ime kho, upāli, pañca āraññikā’’ti.
‘‘কতি নু খো, ভন্তে, পিণ্ডপাতিকাতি…পে॰… কতি নু খো, ভন্তে, পংসুকূলিকাতি…পে॰… কতি নু খো, ভন্তে, রুক্খমূলিকাতি…পে॰… কতি নু খো, ভন্তে, সোসানিকাতি…পে॰… কতি নু খো, ভন্তে, অব্ভোকাসিকাতি…পে॰… কতি নু খো, ভন্তে, তেচীৰরিকাতি…পে॰… কতি নু খো, ভন্তে, সপদানচারিকাতি…পে॰… কতি নু খো, ভন্তে, নেসজ্জিকাতি…পে॰… কতি নু খো, ভন্তে, যথাসন্থতিকাতি…পে॰… কতি নু খো, ভন্তে, একাসনিকাতি…পে॰… কতি নু খো, ভন্তে, খলুপচ্ছাভত্তিকাতি…পে॰… কতি নু খো, ভন্তে, পত্তপিণ্ডিকাতি? পঞ্চিমে, উপালি, পত্তপিণ্ডিকা। কতমে পঞ্চ? মন্দত্তা মোমূহত্তা পত্তপিণ্ডিকো হোতি, পাপিচ্ছো ইচ্ছাপকতো পত্তপিণ্ডিকো হোতি, উম্মাদা চিত্তক্খেপা পত্তপিণ্ডিকো হোতি, ৰণ্ণিতং বুদ্ধেহি বুদ্ধসাৰকেহীতি পত্তপিণ্ডিকো হোতি, অপি চ অপ্পিচ্ছঞ্ঞেৰ নিস্সায সন্তুট্ঠিঞ্ঞেৰ নিস্সায সল্লেখঞ্ঞেৰ নিস্সায পৰিৰেকঞ্ঞেৰ নিস্সায ইদমত্থিতঞ্ঞেৰ নিস্সায পত্তপিণ্ডিকো হোতি – ইমে খো, উপালি, পঞ্চ পত্তপিণ্ডিকা’’তি।
‘‘Kati nu kho, bhante, piṇḍapātikāti…pe… kati nu kho, bhante, paṃsukūlikāti…pe… kati nu kho, bhante, rukkhamūlikāti…pe… kati nu kho, bhante, sosānikāti…pe… kati nu kho, bhante, abbhokāsikāti…pe… kati nu kho, bhante, tecīvarikāti…pe… kati nu kho, bhante, sapadānacārikāti…pe… kati nu kho, bhante, nesajjikāti…pe… kati nu kho, bhante, yathāsanthatikāti…pe… kati nu kho, bhante, ekāsanikāti…pe… kati nu kho, bhante, khalupacchābhattikāti…pe… kati nu kho, bhante, pattapiṇḍikāti? Pañcime, upāli, pattapiṇḍikā. Katame pañca? Mandattā momūhattā pattapiṇḍiko hoti, pāpiccho icchāpakato pattapiṇḍiko hoti, ummādā cittakkhepā pattapiṇḍiko hoti, vaṇṇitaṃ buddhehi buddhasāvakehīti pattapiṇḍiko hoti, api ca appicchaññeva nissāya santuṭṭhiññeva nissāya sallekhaññeva nissāya pavivekaññeva nissāya idamatthitaññeva nissāya pattapiṇḍiko hoti – ime kho, upāli, pañca pattapiṇḍikā’’ti.
ধুতঙ্গৰগ্গো নিট্ঠিতো ছট্ঠো।
Dhutaṅgavaggo niṭṭhito chaṭṭho.
তস্সুদ্দানং –
Tassuddānaṃ –
আরঞ্ঞিকো পিণ্ডিপংসু, রুক্খসুসানপঞ্চমং।
Āraññiko piṇḍipaṃsu, rukkhasusānapañcamaṃ;
অব্ভো তেচীৰরঞ্চেৰ, সপদাননেসজ্জিকা।
Abbho tecīvarañceva, sapadānanesajjikā;
সন্থতেকাসনঞ্চেৰ, খলুপচ্ছা পত্তপিণ্ডিকাতি॥
Santhatekāsanañceva, khalupacchā pattapiṇḍikāti.
Footnotes:
