| Library / Tipiṭaka / तिपिटक • Tipiṭaka / चूळनिद्देसपाळि • Cūḷaniddesapāḷi |
५. धोतकमाणवपुच्छा
5. Dhotakamāṇavapucchā
८६.
86.
‘‘पुच्छामि तं भगवा ब्रूहि मेतं, [इच्चायस्मा धोतको]
‘‘Pucchāmi taṃ bhagavā brūhi metaṃ, [iccāyasmā dhotako]
वाचाभिकङ्खामि महेसि तुय्हं।
Vācābhikaṅkhāmi mahesi tuyhaṃ;
तव सुत्वान निग्घोसं, सिक्खे निब्बानमत्तनो’’॥
Tava sutvāna nigghosaṃ, sikkhe nibbānamattano’’.
८७.
87.
‘‘तेनहातप्पं करोहि, [धोतकाति भगवा]
‘‘Tenahātappaṃ karohi, [dhotakāti bhagavā]
इधेव निपको सतो।
Idheva nipako sato;
इतो सुत्वान निग्घोसं, सिक्खे निब्बानमत्तनो’’॥
Ito sutvāna nigghosaṃ, sikkhe nibbānamattano’’.
८८.
88.
‘‘पस्सामहं देवमनुस्सलोके, अकिञ्चनं ब्राह्मणमिरियमानं।
‘‘Passāmahaṃ devamanussaloke, akiñcanaṃ brāhmaṇamiriyamānaṃ;
तं तं नमस्सामि समन्तचक्खु, पमुञ्च मं सक्क कथंकथाहि’’॥
Taṃ taṃ namassāmi samantacakkhu, pamuñca maṃ sakka kathaṃkathāhi’’.
८९.
89.
‘‘नाहं सहिस्सामि पमोचनाय, कथंकथिं धोतक कञ्चि लोके।
‘‘Nāhaṃ sahissāmi pamocanāya, kathaṃkathiṃ dhotaka kañci loke;
धम्मञ्च सेट्ठं अभिजानमानो 1, एवं तुवं ओघमिमं तरेसि’’॥
Dhammañca seṭṭhaṃ abhijānamāno 2, evaṃ tuvaṃ oghamimaṃ taresi’’.
९०.
90.
‘‘अनुसास ब्रह्मे करुणायमानो, विवेकधम्मं यमहं विजञ्ञं।
‘‘Anusāsa brahme karuṇāyamāno, vivekadhammaṃ yamahaṃ vijaññaṃ;
यथाहं आकासोव अब्यापज्जमानो, इधेव सन्तो असितो चरेय्यं’’॥
Yathāhaṃ ākāsova abyāpajjamāno, idheva santo asito careyyaṃ’’.
९१.
91.
‘‘कित्तयिस्सामि ते सन्तिं, [धोतकाति भगवा]
‘‘Kittayissāmi te santiṃ, [dhotakāti bhagavā]
दिट्ठे धम्मे अनीतिहं।
Diṭṭhe dhamme anītihaṃ;
यं विदित्वा सतो चरं, तरे लोके विसत्तिकं’’॥
Yaṃ viditvā sato caraṃ, tare loke visattikaṃ’’.
९२.
92.
‘‘तञ्चाहं अभिनन्दामि, महेसि सन्तिमुत्तमं।
‘‘Tañcāhaṃ abhinandāmi, mahesi santimuttamaṃ;
यं विदित्वा सतो चरं, तरे लोके विसत्तिकं’’॥
Yaṃ viditvā sato caraṃ, tare loke visattikaṃ’’.
९३.
93.
‘‘यं किञ्चि सम्पजानासि, [धोतकाति भगवा]
‘‘Yaṃ kiñci sampajānāsi, [dhotakāti bhagavā]
उद्धं अधो तिरियञ्चापि मज्झे।
Uddhaṃ adho tiriyañcāpi majjhe;
एतं विदित्वा सङ्गोति लोके, भवाभवाय माकासि तण्ह’’न्ति॥
Etaṃ viditvā saṅgoti loke, bhavābhavāya mākāsi taṇha’’nti.
धोतकमाणवपुच्छा पञ्चमी।
Dhotakamāṇavapucchā pañcamī.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / चूळनिद्देस-अट्ठकथा • Cūḷaniddesa-aṭṭhakathā / ५. धोतकमाणवसुत्तनिद्देसवण्णना • 5. Dhotakamāṇavasuttaniddesavaṇṇanā
