| Library / Tipiṭaka / तिपिटक • Tipiṭaka / संयुत्तनिकाय (अट्ठकथा) • Saṃyuttanikāya (aṭṭhakathā) |
३. धातुसंयुत्तं
3. Dhātusaṃyuttaṃ
१. नानत्तवग्गो
1. Nānattavaggo
१.धातुनानत्तसुत्तवण्णना
1. Dhātunānattasuttavaṇṇanā
८५. धातुसंयुत्तस्स पठमे निस्सत्तट्ठसुञ्ञतट्ठसङ्खातेन सभावट्ठेन धातूति लद्धनामानं धम्मानं नानासभावो धातुनानत्तं। चक्खुधातूतिआदीसु चक्खुपसादो चक्खुधातु, रूपारम्मणं रूपधातु, चक्खुपसादवत्थुकं चित्तं चक्खुविञ्ञाणधातु। सोतपसादो सोतधातु, सद्दारम्मणं सद्दधातु, सोतपसादवत्थुकं चित्तं सोतविञ्ञाणधातु। घानपसादो घानधातु, गन्धारम्मणं गन्धधातु, घानपसादवत्थुकं चित्तं घानविञ्ञाणधातु। जिव्हापसादो जिव्हाधातु, रसारम्मणं रसधातु, जिव्हापसादवत्थुकं चित्तं जिव्हाविञ्ञाणधातु। कायपसादो कायधातु, फोट्ठब्बारम्मणं फोट्ठब्बधातु, कायपसादवत्थुकं चित्तं कायविञ्ञाणधातु। तिस्सो मनोधातुयो मनोधातु, वेदनादयो तयो खन्धा सुखुमरूपानि निब्बानञ्च धम्मधातु, सब्बम्पि मनोविञ्ञाणं मनोविञ्ञाणधातूति। एत्थ च सोळस धातुयो कामावचरा, अवसाने द्वे चतुभूमिकाति। पठमं।
85. Dhātusaṃyuttassa paṭhame nissattaṭṭhasuññataṭṭhasaṅkhātena sabhāvaṭṭhena dhātūti laddhanāmānaṃ dhammānaṃ nānāsabhāvo dhātunānattaṃ. Cakkhudhātūtiādīsu cakkhupasādo cakkhudhātu, rūpārammaṇaṃ rūpadhātu, cakkhupasādavatthukaṃ cittaṃ cakkhuviññāṇadhātu. Sotapasādo sotadhātu, saddārammaṇaṃ saddadhātu, sotapasādavatthukaṃ cittaṃ sotaviññāṇadhātu. Ghānapasādo ghānadhātu, gandhārammaṇaṃ gandhadhātu, ghānapasādavatthukaṃ cittaṃ ghānaviññāṇadhātu. Jivhāpasādo jivhādhātu, rasārammaṇaṃ rasadhātu, jivhāpasādavatthukaṃ cittaṃ jivhāviññāṇadhātu. Kāyapasādo kāyadhātu, phoṭṭhabbārammaṇaṃ phoṭṭhabbadhātu, kāyapasādavatthukaṃ cittaṃ kāyaviññāṇadhātu. Tisso manodhātuyo manodhātu, vedanādayo tayo khandhā sukhumarūpāni nibbānañca dhammadhātu, sabbampi manoviññāṇaṃ manoviññāṇadhātūti. Ettha ca soḷasa dhātuyo kāmāvacarā, avasāne dve catubhūmikāti. Paṭhamaṃ.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / १. धातुनानत्तसुत्तं • 1. Dhātunānattasuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / १. धातुनानत्तसुत्तवण्णना • 1. Dhātunānattasuttavaṇṇanā
