| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৩. ধাতুসংযুত্তং
3. Dhātusaṃyuttaṃ
১. নানত্তৰগ্গো
1. Nānattavaggo
১. ধাতুনানত্তসুত্তৰণ্ণনা
1. Dhātunānattasuttavaṇṇanā
৮৫. পঠমন্তি ইমস্মিং নিদানৰগ্গে সংযুত্তানং পঠমং সংগীতত্তা। নিস্সত্তট্ঠসুঞ্ঞতট্ঠসঙ্খাতেনাতি ধম্মমত্ততায নিস্সত্ততাসঙ্খাতেন নিচ্চসুভসুখঅত্তসুঞ্ঞতত্থসঙ্খাতেন। সভাৰট্ঠেনাতি যথাভূতসভাৰট্ঠেন। ততো এৰ সভাৰস্স ধারণট্ঠেন ধাতূতি লদ্ধনামানং। নানাসভাৰো অঞ্ঞমঞ্ঞৰিসদিসতা ধাতুনানত্তং। চক্খুসঙ্খাতো পসাদো চক্খুপসাদো। সো এৰ চক্খনট্ঠেন চক্খু, নিস্সত্তসুঞ্ঞতট্ঠেন ধাতু চাতি চক্খুধাতু। চক্খুপসাদৰত্থুং অধিট্ঠানং কত্ৰা পৰত্তং চক্খুপসাদৰত্থুকং। সেসপদেসুপি এসেৰ নযো। দ্ৰে সম্পটিচ্ছনমনোধাতুযো, একা কিরিযা মনোধাতূতি তিস্সো মনোধাতুযো মনোধাতু ‘‘মননমত্তা ধাতূ’’তি কত্ৰা। ৰেদনাদযো…পে॰… নিব্বানঞ্চ ধম্মধাতু ৰিসেসসঞ্ঞাপরিহারেন সামঞ্ঞসঞ্ঞায পৰত্তনতো। তথা হেতে ধম্মা আযতনদেসনায ‘‘ধম্মাযতন’’ন্তেৰ দেসিতা। ন হি নেসং রূপাযতনাদীনং ৰিয ৰিঞ্ঞাণেহি অঞ্ঞৰিঞ্ঞাণেন গহেতব্বতাকারো অত্থি। সব্বম্পীতি ছসত্ততিৰিধং মনোৰিঞ্ঞাণং। কামাৰচরা কামধাতুপরিযাপন্নত্তা। অৰসানে দ্ৰেতি ধম্মধাতুমনোৰিঞ্ঞাণধাতুযো। অযমেত্থ সঙ্খেপো, ৰিত্থারো পন ৰিসুদ্ধিমগ্গে তংসংৰণ্ণনাসু দট্ঠব্বো।
85.Paṭhamanti imasmiṃ nidānavagge saṃyuttānaṃ paṭhamaṃ saṃgītattā. Nissattaṭṭhasuññataṭṭhasaṅkhātenāti dhammamattatāya nissattatāsaṅkhātena niccasubhasukhaattasuññatatthasaṅkhātena. Sabhāvaṭṭhenāti yathābhūtasabhāvaṭṭhena. Tato eva sabhāvassa dhāraṇaṭṭhena dhātūti laddhanāmānaṃ. Nānāsabhāvo aññamaññavisadisatā dhātunānattaṃ. Cakkhusaṅkhāto pasādo cakkhupasādo. So eva cakkhanaṭṭhena cakkhu, nissattasuññataṭṭhena dhātu cāti cakkhudhātu. Cakkhupasādavatthuṃ adhiṭṭhānaṃ katvā pavattaṃ cakkhupasādavatthukaṃ. Sesapadesupi eseva nayo. Dve sampaṭicchanamanodhātuyo, ekā kiriyā manodhātūti tisso manodhātuyo manodhātu ‘‘mananamattā dhātū’’ti katvā. Vedanādayo…pe… nibbānañca dhammadhātu visesasaññāparihārena sāmaññasaññāya pavattanato. Tathā hete dhammā āyatanadesanāya ‘‘dhammāyatana’’nteva desitā. Na hi nesaṃ rūpāyatanādīnaṃ viya viññāṇehi aññaviññāṇena gahetabbatākāro atthi. Sabbampīti chasattatividhaṃ manoviññāṇaṃ. Kāmāvacarā kāmadhātupariyāpannattā. Avasāne dveti dhammadhātumanoviññāṇadhātuyo. Ayamettha saṅkhepo, vitthāro pana visuddhimagge taṃsaṃvaṇṇanāsu daṭṭhabbo.
ধাতুনানত্তসুত্তৰণ্ণনা নিট্ঠিতা।
Dhātunānattasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. ধাতুনানত্তসুত্তং • 1. Dhātunānattasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১.ধাতুনানত্তসুত্তৰণ্ণনা • 1. Dhātunānattasuttavaṇṇanā
