| Library / Tipiṭaka / ತಿಪಿಟಕ • Tipiṭaka / ಬುದ್ಧವಂಸಪಾಳಿ • Buddhavaṃsapāḷi |
೨೯. ಧಾತುಭಾಜನೀಯಕಥಾ
29. Dhātubhājanīyakathā
೧.
1.
ಮಹಾಗೋತಮೋ ಜಿನವರೋ, ಕುಸಿನಾರಮ್ಹಿ ನಿಬ್ಬುತೋ।
Mahāgotamo jinavaro, kusināramhi nibbuto;
ಧಾತುವಿತ್ಥಾರಿಕಂ ಆಸಿ, ತೇಸು ತೇಸು ಪದೇಸತೋ॥
Dhātuvitthārikaṃ āsi, tesu tesu padesato.
೨.
2.
ಏಕೋ ಅಜಾತಸತ್ತುಸ್ಸ, ಏಕೋ ವೇಸಾಲಿಯಾ ಪುರೇ।
Eko ajātasattussa, eko vesāliyā pure;
ಏಕೋ ಕಪಿಲವತ್ಥುಸ್ಮಿಂ, ಏಕೋ ಚ ಅಲ್ಲಕಪ್ಪಕೇ॥
Eko kapilavatthusmiṃ, eko ca allakappake.
೩.
3.
ಏಕೋ ಚ ರಾಮಗಾಮಮ್ಹಿ, ಏಕೋ ಚ ವೇಠದೀಪಕೇ।
Eko ca rāmagāmamhi, eko ca veṭhadīpake;
ಏಕೋ ಪಾವೇಯ್ಯಕೇ ಮಲ್ಲೇ, ಏಕೋ ಚ ಕೋಸಿನಾರಕೇ॥
Eko pāveyyake malle, eko ca kosinārake.
೪.
4.
ಕುಮ್ಭಸ್ಸ ಥೂಪಂ ಕಾರೇಸಿ, ಬ್ರಾಹ್ಮಣೋ ದೋಣಸವ್ಹಯೋ।
Kumbhassa thūpaṃ kāresi, brāhmaṇo doṇasavhayo;
ಅಙ್ಗಾರಥೂಪಂ ಕಾರೇಸುಂ, ಮೋರಿಯಾ ತುಟ್ಠಮಾನಸಾ॥
Aṅgārathūpaṃ kāresuṃ, moriyā tuṭṭhamānasā.
೫.
5.
ಅಟ್ಠ ಸಾರೀರಿಕಾ ಥೂಪಾ, ನವಮೋ ಕುಮ್ಭಚೇತಿಯೋ।
Aṭṭha sārīrikā thūpā, navamo kumbhacetiyo;
ಅಙ್ಗಾರಥೂಪೋ ದಸಮೋ, ತದಾಯೇವ ಪತಿಟ್ಠಿತೋ॥
Aṅgārathūpo dasamo, tadāyeva patiṭṭhito.
೬.
6.
ಉಣ್ಹೀಸಂ ಚತಸ್ಸೋ ದಾಠಾ, ಅಕ್ಖಕಾ ದ್ವೇ ಚ ಧಾತುಯೋ।
Uṇhīsaṃ catasso dāṭhā, akkhakā dve ca dhātuyo;
ಅಸಮ್ಭಿನ್ನಾ ಇಮಾ ಸತ್ತ, ಸೇಸಾ ಭಿನ್ನಾವ ಧಾತುಯೋ॥
Asambhinnā imā satta, sesā bhinnāva dhātuyo.
೭.
7.
ಖುದ್ದಕಾ ಸಾಸಪಮತ್ತಾ ಚ, ನಾನಾವಣ್ಣಾ ಚ ಧಾತುಯೋ॥
Khuddakā sāsapamattā ca, nānāvaṇṇā ca dhātuyo.
೮.
8.
ಮಹನ್ತಾ ಸುವಣ್ಣವಣ್ಣಾ ಚ, ಮುತ್ತವಣ್ಣಾ ಚ ಮಜ್ಝಿಮಾ।
Mahantā suvaṇṇavaṇṇā ca, muttavaṇṇā ca majjhimā;
ಖುದ್ದಕಾ ಮಕುಲವಣ್ಣಾ ಚ, ಸೋಳಸದೋಣಮತ್ತಿಕಾ॥
Khuddakā makulavaṇṇā ca, soḷasadoṇamattikā.
೯.
9.
ಮಹನ್ತಾ ಪಞ್ಚ ನಾಳಿಯೋ, ನಾಳಿಯೋ ಪಞ್ಚ ಮಜ್ಝಿಮಾ।
Mahantā pañca nāḷiyo, nāḷiyo pañca majjhimā;
ಖುದ್ದಕಾ ಛ ನಾಳೀ ಚೇವ, ಏತಾ ಸಬ್ಬಾಪಿ ಧಾತುಯೋ॥
Khuddakā cha nāḷī ceva, etā sabbāpi dhātuyo.
೧೦.
10.
ಉಣ್ಹೀಸಂ ಸೀಹಳೇ ದೀಪೇ, ಬ್ರಹ್ಮಲೋಕೇ ಚ ವಾಮಕಂ।
Uṇhīsaṃ sīhaḷe dīpe, brahmaloke ca vāmakaṃ;
ಸೀಹಳೇ ದಕ್ಖಿಣಕ್ಖಞ್ಚ, ಸಬ್ಬಾಪೇತಾ ಪತಿಟ್ಠಿತಾ॥
Sīhaḷe dakkhiṇakkhañca, sabbāpetā patiṭṭhitā.
೧೧.
11.
ಏಕಾ ದಾಠಾ ತಿದಸಪುರೇ, ಏಕಾ ನಾಗಪುರೇ ಅಹು।
Ekā dāṭhā tidasapure, ekā nāgapure ahu;
ಏಕಾ ಗನ್ಧಾರವಿಸಯೇ, ಏಕಾ ಕಲಿಙ್ಗರಾಜಿನೋ॥
Ekā gandhāravisaye, ekā kaliṅgarājino.
೧೨.
12.
ಚತ್ತಾಲೀಸಸಮಾ ದನ್ತಾ, ಕೇಸಾ ಲೋಮಾ ಚ ಸಬ್ಬಸೋ।
Cattālīsasamā dantā, kesā lomā ca sabbaso;
ದೇವಾ ಹರಿಂಸು ಏಕೇಕಂ, ಚಕ್ಕವಾಳಪರಮ್ಪರಾ॥
Devā hariṃsu ekekaṃ, cakkavāḷaparamparā.
೧೩.
13.
ವಜಿರಾಯಂ ಭಗವತೋ, ಪತ್ತೋ ದಣ್ಡಞ್ಚ ಚೀವರಂ।
Vajirāyaṃ bhagavato, patto daṇḍañca cīvaraṃ;
೧೪.
14.
ಪಾಟಲಿಪುತ್ತಪುರಮ್ಹಿ, ಕರಣಂ ಕಾಯಬನ್ಧನಂ।
Pāṭaliputtapuramhi, karaṇaṃ kāyabandhanaṃ;
ಚಮ್ಪಾಯುದಕಸಾಟಿಯಂ, ಉಣ್ಣಲೋಮಞ್ಚ ಕೋಸಲೇ॥
Campāyudakasāṭiyaṃ, uṇṇalomañca kosale.
೧೫.
15.
ಕಾಸಾವಂ ಬ್ರಹ್ಮಲೋಕೇ ಚ, ವೇಠನಂ ತಿದಸೇ ಪುರೇ।
Kāsāvaṃ brahmaloke ca, veṭhanaṃ tidase pure;
೧೬.
16.
ಅರಣೀ ಚ ಮಿಥಿಲಾಯಂ, ವಿದೇಹೇ ಪರಿಸಾವನಂ।
Araṇī ca mithilāyaṃ, videhe parisāvanaṃ;
ವಾಸಿ ಸೂಚಿಘರಞ್ಚಾಪಿ, ಇನ್ದಪತ್ಥಪುರೇ ತದಾ॥
Vāsi sūcigharañcāpi, indapatthapure tadā.
೧೭.
17.
ಪರಿಕ್ಖಾರಾ ಅವಸೇಸಾ, ಜನಪದೇ ಅಪರನ್ತಕೇ।
Parikkhārā avasesā, janapade aparantake;
ಪರಿಭುತ್ತಾನಿ ಮುನಿನಾ, ಅಕಂಸು ಮನುಜಾ ತದಾ॥
Paribhuttāni muninā, akaṃsu manujā tadā.
೧೮.
18.
ಧಾತುವಿತ್ಥಾರಿಕಂ ಆಸಿ, ಗೋತಮಸ್ಸ ಮಹೇಸಿನೋ।
Dhātuvitthārikaṃ āsi, gotamassa mahesino;
ಪಾಣೀನಂ ಅನುಕಮ್ಪಾಯ, ಅಹು ಪೋರಾಣಿಕಂ ತದಾತಿ॥
Pāṇīnaṃ anukampāya, ahu porāṇikaṃ tadāti.
ಧಾತುಭಾಜನೀಯಕಥಾ ನಿಟ್ಠಿತಾ।
Dhātubhājanīyakathā niṭṭhitā.
ಬುದ್ಧವಂಸೋನಿಟ್ಠಿತೋ।
Buddhavaṃsoniṭṭhito.
Footnotes:
