| Library / Tipiṭaka / திபிடக • Tipiṭaka / பு³த்³த⁴வங்ஸபாளி • Buddhavaṃsapāḷi |
29. தா⁴துபா⁴ஜனீயகதா²
29. Dhātubhājanīyakathā
1.
1.
மஹாகோ³தமோ ஜினவரோ, குஸினாரம்ஹி நிப்³பு³தோ;
Mahāgotamo jinavaro, kusināramhi nibbuto;
தா⁴துவித்தா²ரிகங் ஆஸி, தேஸு தேஸு பதே³ஸதோ.
Dhātuvitthārikaṃ āsi, tesu tesu padesato.
2.
2.
ஏகோ அஜாதஸத்துஸ்ஸ, ஏகோ வேஸாலியா புரே;
Eko ajātasattussa, eko vesāliyā pure;
ஏகோ கபிலவத்து²ஸ்மிங், ஏகோ ச அல்லகப்பகே.
Eko kapilavatthusmiṃ, eko ca allakappake.
3.
3.
ஏகோ ச ராமகா³மம்ஹி, ஏகோ ச வேட²தீ³பகே;
Eko ca rāmagāmamhi, eko ca veṭhadīpake;
ஏகோ பாவெய்யகே மல்லே, ஏகோ ச கோஸினாரகே.
Eko pāveyyake malle, eko ca kosinārake.
4.
4.
கும்ப⁴ஸ்ஸ தூ²பங் காரேஸி, ப்³ராஹ்மணோ தோ³ணஸவ்ஹயோ;
Kumbhassa thūpaṃ kāresi, brāhmaṇo doṇasavhayo;
அங்கா³ரதூ²பங் காரேஸுங், மோரியா துட்ட²மானஸா.
Aṅgārathūpaṃ kāresuṃ, moriyā tuṭṭhamānasā.
5.
5.
அட்ட² ஸாரீரிகா தூ²பா, நவமோ கும்ப⁴சேதியோ;
Aṭṭha sārīrikā thūpā, navamo kumbhacetiyo;
அங்கா³ரதூ²போ த³ஸமோ, ததா³யேவ பதிட்டி²தோ.
Aṅgārathūpo dasamo, tadāyeva patiṭṭhito.
6.
6.
உண்ஹீஸங் சதஸ்ஸோ தா³டா², அக்க²கா த்³வே ச தா⁴துயோ;
Uṇhīsaṃ catasso dāṭhā, akkhakā dve ca dhātuyo;
அஸம்பி⁴ன்னா இமா ஸத்த, ஸேஸா பி⁴ன்னாவ தா⁴துயோ.
Asambhinnā imā satta, sesā bhinnāva dhātuyo.
7.
7.
கு²த்³த³கா ஸாஸபமத்தா ச, நானாவண்ணா ச தா⁴துயோ.
Khuddakā sāsapamattā ca, nānāvaṇṇā ca dhātuyo.
8.
8.
மஹந்தா ஸுவண்ணவண்ணா ச, முத்தவண்ணா ச மஜ்ஜி²மா;
Mahantā suvaṇṇavaṇṇā ca, muttavaṇṇā ca majjhimā;
கு²த்³த³கா மகுலவண்ணா ச, ஸோளஸதோ³ணமத்திகா.
Khuddakā makulavaṇṇā ca, soḷasadoṇamattikā.
9.
9.
மஹந்தா பஞ்ச நாளியோ, நாளியோ பஞ்ச மஜ்ஜி²மா;
Mahantā pañca nāḷiyo, nāḷiyo pañca majjhimā;
கு²த்³த³கா ச² நாளீ சேவ, ஏதா ஸப்³பா³பி தா⁴துயோ.
Khuddakā cha nāḷī ceva, etā sabbāpi dhātuyo.
10.
10.
உண்ஹீஸங் ஸீஹளே தீ³பே, ப்³ரஹ்மலோகே ச வாமகங்;
Uṇhīsaṃ sīhaḷe dīpe, brahmaloke ca vāmakaṃ;
ஸீஹளே த³க்கி²ணக்க²ஞ்ச, ஸப்³பா³பேதா பதிட்டி²தா.
Sīhaḷe dakkhiṇakkhañca, sabbāpetā patiṭṭhitā.
11.
11.
ஏகா தா³டா² தித³ஸபுரே, ஏகா நாக³புரே அஹு;
Ekā dāṭhā tidasapure, ekā nāgapure ahu;
ஏகா க³ந்தா⁴ரவிஸயே, ஏகா கலிங்க³ராஜினோ.
Ekā gandhāravisaye, ekā kaliṅgarājino.
12.
12.
சத்தாலீஸஸமா த³ந்தா, கேஸா லோமா ச ஸப்³ப³ஸோ;
Cattālīsasamā dantā, kesā lomā ca sabbaso;
தே³வா ஹரிங்ஸு ஏகேகங், சக்கவாளபரம்பரா.
Devā hariṃsu ekekaṃ, cakkavāḷaparamparā.
13.
13.
வஜிராயங் ப⁴க³வதோ, பத்தோ த³ண்ட³ஞ்ச சீவரங்;
Vajirāyaṃ bhagavato, patto daṇḍañca cīvaraṃ;
14.
14.
பாடலிபுத்தபுரம்ஹி, கரணங் காயப³ந்த⁴னங்;
Pāṭaliputtapuramhi, karaṇaṃ kāyabandhanaṃ;
சம்பாயுத³கஸாடியங், உண்ணலோமஞ்ச கோஸலே.
Campāyudakasāṭiyaṃ, uṇṇalomañca kosale.
15.
15.
காஸாவங் ப்³ரஹ்மலோகே ச, வேட²னங் தித³ஸே புரே;
Kāsāvaṃ brahmaloke ca, veṭhanaṃ tidase pure;
16.
16.
அரணீ ச மிதி²லாயங், விதே³ஹே பரிஸாவனங்;
Araṇī ca mithilāyaṃ, videhe parisāvanaṃ;
வாஸி ஸூசிக⁴ரஞ்சாபி, இந்த³பத்த²புரே ததா³.
Vāsi sūcigharañcāpi, indapatthapure tadā.
17.
17.
பரிக்கா²ரா அவஸேஸா, ஜனபதே³ அபரந்தகே;
Parikkhārā avasesā, janapade aparantake;
பரிபு⁴த்தானி முனினா, அகங்ஸு மனுஜா ததா³.
Paribhuttāni muninā, akaṃsu manujā tadā.
18.
18.
தா⁴துவித்தா²ரிகங் ஆஸி, கோ³தமஸ்ஸ மஹேஸினோ;
Dhātuvitthārikaṃ āsi, gotamassa mahesino;
பாணீனங் அனுகம்பாய, அஹு போராணிகங் ததா³தி.
Pāṇīnaṃ anukampāya, ahu porāṇikaṃ tadāti.
தா⁴துபா⁴ஜனீயகதா² நிட்டி²தா.
Dhātubhājanīyakathā niṭṭhitā.
பு³த்³த⁴வங்ஸோனிட்டி²தோ.
Buddhavaṃsoniṭṭhito.
Footnotes:
