| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
(৯) ৪. ধম্মৰগ্গৰণ্ণনা
(9) 4. Dhammavaggavaṇṇanā
৮৮. চতুত্থস্স পঠমে চেতোৰিমুত্তীতি ফলসমাধি। পঞ্ঞাৰিমুত্তীতি ফলপঞ্ঞা।
88. Catutthassa paṭhame cetovimuttīti phalasamādhi. Paññāvimuttīti phalapaññā.
৮৯. দুতিযে পগ্গাহোতি ৰীরিযং। অৰিক্খেপোতি চিত্তেকগ্গতা।
89. Dutiye paggāhoti vīriyaṃ. Avikkhepoti cittekaggatā.
৯০. ততিযে নামন্তি চত্তারো অরূপক্খন্ধা। রূপন্তি রূপক্খন্ধো। ইতি ইমস্মিং সুত্তে ধম্মকোট্ঠাসপরিচ্ছেদঞাণং নাম কথিতং।
90. Tatiye nāmanti cattāro arūpakkhandhā. Rūpanti rūpakkhandho. Iti imasmiṃ sutte dhammakoṭṭhāsaparicchedañāṇaṃ nāma kathitaṃ.
৯১. চতুত্থে ৰিজ্জাতি ফলঞাণং। ৰিমুত্তীতি তংসম্পযুত্তা সেসধম্মা।
91. Catutthe vijjāti phalañāṇaṃ. Vimuttīti taṃsampayuttā sesadhammā.
৯২. পঞ্চমে ভৰদিট্ঠীতি সস্সতদিট্ঠি। ৰিভৰদিট্ঠীতি উচ্ছেদদিট্ঠি। ছট্ঠসত্তমানি উত্তানত্থানেৰ।
92. Pañcame bhavadiṭṭhīti sassatadiṭṭhi. Vibhavadiṭṭhīti ucchedadiṭṭhi. Chaṭṭhasattamāni uttānatthāneva.
৯৫. অট্ঠমে দোৰচস্সতাতি দুব্বচভাৰো। পাপমিত্ততাতি পাপমিত্তসেৰনভাৰো। নৰমং ৰুত্তৰিপরিযাযেন ৰেদিতব্বং।
95. Aṭṭhame dovacassatāti dubbacabhāvo. Pāpamittatāti pāpamittasevanabhāvo. Navamaṃ vuttavipariyāyena veditabbaṃ.
৯৭. দসমে ধাতুকুসলতাতি অট্ঠারস ধাতুযো ধাতূতি জাননং। মনসিকারকুসলতাতি তাসংযেৰ ধাতূনং অনিচ্চাদিৰসেন লক্খণত্তযং আরোপেত্ৰা জাননং।
97. Dasame dhātukusalatāti aṭṭhārasa dhātuyo dhātūti jānanaṃ. Manasikārakusalatāti tāsaṃyeva dhātūnaṃ aniccādivasena lakkhaṇattayaṃ āropetvā jānanaṃ.
৯৮. একাদসমে আপত্তিকুসলতাতি পঞ্চন্নঞ্চ সত্তন্নঞ্চ আপত্তিক্খন্ধানং জাননং। আপত্তিৰুট্ঠানকুসলতাতি দেসনায ৰা কম্মৰাচায ৰা আপত্তীহি ৰুট্ঠানজাননন্তি।
98. Ekādasame āpattikusalatāti pañcannañca sattannañca āpattikkhandhānaṃ jānanaṃ. Āpattivuṭṭhānakusalatāti desanāya vā kammavācāya vā āpattīhi vuṭṭhānajānananti.
ধম্মৰগ্গো চতুত্থো।
Dhammavaggo catuttho.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / (৯) ৪. ধম্মৰগ্গো • (9) 4. Dhammavaggo
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / (৯) ৪. ধম্মৰগ্গৰণ্ণনা • (9) 4. Dhammavaggavaṇṇanā
