4. Dhammasaññakattheraapadānaṃ

13.

‘‘Vipassino bhagavato, mahābodhimaho ahu;

Rukkhaṭṭhasseva sambuddho, ³ lokajeṭṭho narāsabho ⁴.

14.

‘‘Bhagavā tamhi samaye, bhikkhusaṅghapurakkhato;

Catusaccaṃ pakāseti, vācāsabhimudīrayaṃ.

15.

‘‘Saṅkhittena ca desento, vitthārena ca desayaṃ ⁶;

Vivaṭṭacchado sambuddho, nibbāpesi mahājanaṃ.

16.

‘‘Tassāhaṃ dhammaṃ sutvāna, lokajeṭṭhassa tādino;

Vanditvā satthuno pāde, pakkāmiṃ uttarāmukho.

17.

‘‘Ekanavutito kappe, yaṃ dhammamasuṇiṃ tadā;

Duggatiṃ nābhijānāmi, dhammasavassidaṃ phalaṃ.

18.

‘‘Tettiṃsamhi ito kappe, eko āsiṃ mahīpati;

Sutavā nāma nāmena, cakkavattī mahabbalo.

19.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā dhammasaññako thero imā gāthāyo abhāsitthāti.

Dhammasaññakattherassāpadānaṃ catutthaṃ.