| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
७. धम्मानुधम्मपटिपन्नसुत्तं
7. Dhammānudhammapaṭipannasuttaṃ
८६. वुत्तञ्हेतं भगवता, वुत्तमरहताति मे सुतं –
86. Vuttañhetaṃ bhagavatā, vuttamarahatāti me sutaṃ –
‘‘धम्मानुधम्मपटिपन्नस्स भिक्खुनो अयमनुधम्मो होति वेय्याकरणाय – धम्मानुधम्मपटिपन्नोयन्ति भासमानो धम्मञ्ञेव भासति नो अधम्मं, वितक्कयमानो वा धम्मवितक्कञ्ञेव वितक्केति नो अधम्मवितक्कं, तदुभयं वा पन अभिनिवेज्जेत्वा उपेक्खको विहरति सतो सम्पजानो’’ति। एतमत्थं भगवा अवोच। तत्थेतं इति वुच्चति –
‘‘Dhammānudhammapaṭipannassa bhikkhuno ayamanudhammo hoti veyyākaraṇāya – dhammānudhammapaṭipannoyanti bhāsamāno dhammaññeva bhāsati no adhammaṃ, vitakkayamāno vā dhammavitakkaññeva vitakketi no adhammavitakkaṃ, tadubhayaṃ vā pana abhinivejjetvā upekkhako viharati sato sampajāno’’ti. Etamatthaṃ bhagavā avoca. Tatthetaṃ iti vuccati –
‘‘धम्मारामो धम्मरतो, धम्मं अनुविचिन्तयं।
‘‘Dhammārāmo dhammarato, dhammaṃ anuvicintayaṃ;
धम्मं अनुस्सरं भिक्खु, सद्धम्मा न परिहायति॥
Dhammaṃ anussaraṃ bhikkhu, saddhammā na parihāyati.
‘‘चरं वा यदि वा तिट्ठं, निसिन्नो उद वा सयं।
‘‘Caraṃ vā yadi vā tiṭṭhaṃ, nisinno uda vā sayaṃ;
अज्झत्तं समयं चित्तं, सन्तिमेवाधिगच्छती’’ति॥
Ajjhattaṃ samayaṃ cittaṃ, santimevādhigacchatī’’ti.
अयम्पि अत्थो वुत्तो भगवता, इति मे सुतन्ति। सत्तमं।
Ayampi attho vutto bhagavatā, iti me sutanti. Sattamaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ७. धम्मानुधम्मपटिपन्नसुत्तवण्णना • 7. Dhammānudhammapaṭipannasuttavaṇṇanā
