| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৭. ধম্মানুধম্মপটিপন্নসুত্তং
7. Dhammānudhammapaṭipannasuttaṃ
৮৬. ৰুত্তঞ্হেতং ভগৰতা, ৰুত্তমরহতাতি মে সুতং –
86. Vuttañhetaṃ bhagavatā, vuttamarahatāti me sutaṃ –
‘‘ধম্মানুধম্মপটিপন্নস্স ভিক্খুনো অযমনুধম্মো হোতি ৰেয্যাকরণায – ধম্মানুধম্মপটিপন্নোযন্তি ভাসমানো ধম্মঞ্ঞেৰ ভাসতি নো অধম্মং, ৰিতক্কযমানো ৰা ধম্মৰিতক্কঞ্ঞেৰ ৰিতক্কেতি নো অধম্মৰিতক্কং, তদুভযং ৰা পন অভিনিৰেজ্জেত্ৰা উপেক্খকো ৰিহরতি সতো সম্পজানো’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Dhammānudhammapaṭipannassa bhikkhuno ayamanudhammo hoti veyyākaraṇāya – dhammānudhammapaṭipannoyanti bhāsamāno dhammaññeva bhāsati no adhammaṃ, vitakkayamāno vā dhammavitakkaññeva vitakketi no adhammavitakkaṃ, tadubhayaṃ vā pana abhinivejjetvā upekkhako viharati sato sampajāno’’ti. Etamatthaṃ bhagavā avoca. Tatthetaṃ iti vuccati –
‘‘ধম্মারামো ধম্মরতো, ধম্মং অনুৰিচিন্তযং।
‘‘Dhammārāmo dhammarato, dhammaṃ anuvicintayaṃ;
ধম্মং অনুস্সরং ভিক্খু, সদ্ধম্মা ন পরিহাযতি॥
Dhammaṃ anussaraṃ bhikkhu, saddhammā na parihāyati.
‘‘চরং ৰা যদি ৰা তিট্ঠং, নিসিন্নো উদ ৰা সযং।
‘‘Caraṃ vā yadi vā tiṭṭhaṃ, nisinno uda vā sayaṃ;
অজ্ঝত্তং সমযং চিত্তং, সন্তিমেৰাধিগচ্ছতী’’তি॥
Ajjhattaṃ samayaṃ cittaṃ, santimevādhigacchatī’’ti.
অযম্পি অত্থো ৰুত্তো ভগৰতা, ইতি মে সুতন্তি। সত্তমং।
Ayampi attho vutto bhagavatā, iti me sutanti. Sattamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ৭. ধম্মানুধম্মপটিপন্নসুত্তৰণ্ণনা • 7. Dhammānudhammapaṭipannasuttavaṇṇanā
