| Library / Tipiṭaka / तिपिटक • Tipiṭaka / अपदानपाळि • Apadānapāḷi |
९. धम्मचक्किकत्थेरअपदानं
9. Dhammacakkikattheraapadānaṃ
१०२.
102.
‘‘सिद्धत्थस्स भगवतो, सीहासनस्स सम्मुखा।
‘‘Siddhatthassa bhagavato, sīhāsanassa sammukhā;
धम्मचक्कं मे ठपितं, सुकतं विञ्ञुवण्णितं॥
Dhammacakkaṃ me ṭhapitaṃ, sukataṃ viññuvaṇṇitaṃ.
१०३.
103.
‘‘चारुवण्णोव सोभामि, सयोग्गबलवाहनो।
‘‘Cāruvaṇṇova sobhāmi, sayoggabalavāhano;
परिवारेन्ति मं निच्चं, अनुयन्ता बहुज्जना॥
Parivārenti maṃ niccaṃ, anuyantā bahujjanā.
१०४.
104.
‘‘सट्ठितूरियसहस्सेहि, परिचारेमहं सदा।
‘‘Saṭṭhitūriyasahassehi, paricāremahaṃ sadā;
परिवारेन सोभामि, पुञ्ञकम्मस्सिदं फलं॥
Parivārena sobhāmi, puññakammassidaṃ phalaṃ.
१०५.
105.
‘‘चतुन्नवुतितो कप्पे, यं चक्कं ठपयिं अहं।
‘‘Catunnavutito kappe, yaṃ cakkaṃ ṭhapayiṃ ahaṃ;
दुग्गतिं नाभिजानामि, धम्मचक्कस्सिदं फलं॥
Duggatiṃ nābhijānāmi, dhammacakkassidaṃ phalaṃ.
१०६.
106.
‘‘इतो एकादसे कप्पे, अट्ठासिंसु जनाधिपा।
‘‘Ito ekādase kappe, aṭṭhāsiṃsu janādhipā;
सहस्सराजनामेन, चक्कवत्ती महब्बला॥
Sahassarājanāmena, cakkavattī mahabbalā.
१०७.
107.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा धम्मचक्किको थेरो इमा गाथायो अभासित्थाति।
Itthaṃ sudaṃ āyasmā dhammacakkiko thero imā gāthāyo abhāsitthāti.
धम्मचक्किकत्थेरस्सापदानं नवमं।
Dhammacakkikattherassāpadānaṃ navamaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / ९. धम्मचक्किकत्थेरअपदानवण्णना • 9. Dhammacakkikattheraapadānavaṇṇanā
