| Library / Tipiṭaka / തിപിടക • Tipiṭaka / കഥാവത്ഥുപാളി • Kathāvatthupāḷi |
൨൨. ബാവീസതിമവഗ്ഗോ
22. Bāvīsatimavaggo
(൨൧൧) ൪. ധമ്മാഭിസമയകഥാ
(211) 4. Dhammābhisamayakathā
൮൯൭. അത്ഥി ഗബ്ഭസേയ്യായ ധമ്മാഭിസമയോതി? ആമന്താ. അത്ഥി ഗബ്ഭസേയ്യായ ധമ്മദേസനാ, ധമ്മസ്സവനം, ധമ്മസാകച്ഛാ, പരിപുച്ഛാ, സീലസമാദാനം , ഇന്ദ്രിയേസു ഗുത്തദ്വാരതാ, ഭോജനേ മത്തഞ്ഞുതാ, പുബ്ബരത്താപരരത്തം ജാഗരിയാനുയോഗോതി ? ന ഹേവം വത്തബ്ബേ…പേ॰… നത്ഥി ഗബ്ഭസേയ്യായ ധമ്മദേസനാ, ധമ്മസ്സവനം…പേ॰… പുബ്ബരത്താപരരത്തം ജാഗരിയാനുയോഗോതി? ആമന്താ. ഹഞ്ചി നത്ഥി ഗബ്ഭസേയ്യായ ധമ്മദേസനാ, ധമ്മസ്സവനം…പേ॰… പുബ്ബരത്താപരരത്തം ജാഗരിയാനുയോഗോ, നോ ച വത രേ വത്തബ്ബേ – ‘‘അത്ഥി ഗബ്ഭസേയ്യായ ധമ്മാഭിസമയോ’’തി.
897. Atthi gabbhaseyyāya dhammābhisamayoti? Āmantā. Atthi gabbhaseyyāya dhammadesanā, dhammassavanaṃ, dhammasākacchā, paripucchā, sīlasamādānaṃ , indriyesu guttadvāratā, bhojane mattaññutā, pubbarattāpararattaṃ jāgariyānuyogoti ? Na hevaṃ vattabbe…pe… natthi gabbhaseyyāya dhammadesanā, dhammassavanaṃ…pe… pubbarattāpararattaṃ jāgariyānuyogoti? Āmantā. Hañci natthi gabbhaseyyāya dhammadesanā, dhammassavanaṃ…pe… pubbarattāpararattaṃ jāgariyānuyogo, no ca vata re vattabbe – ‘‘atthi gabbhaseyyāya dhammābhisamayo’’ti.
അത്ഥി ഗബ്ഭസേയ്യായ ധമ്മാഭിസമയോതി? ആമന്താ. നനു ദ്വേ പച്ചയാ സമ്മാദിട്ഠിയാ ഉപ്പാദായ – പരതോ ച ഘോസോ, യോനിസോ ച മനസികാരോതി? ആമന്താ. ഹഞ്ചി ദ്വേ പച്ചയാ സമ്മാദിട്ഠിയാ ഉപ്പാദായ – പരതോ ച ഘോസോ, യോനിസോ ച മനസികാരോ, നോ ച വത രേ വത്തബ്ബേ – ‘‘അത്ഥി ഗബ്ഭസേയ്യായ ധമ്മാഭിസമയോ’’തി.
Atthi gabbhaseyyāya dhammābhisamayoti? Āmantā. Nanu dve paccayā sammādiṭṭhiyā uppādāya – parato ca ghoso, yoniso ca manasikāroti? Āmantā. Hañci dve paccayā sammādiṭṭhiyā uppādāya – parato ca ghoso, yoniso ca manasikāro, no ca vata re vattabbe – ‘‘atthi gabbhaseyyāya dhammābhisamayo’’ti.
അത്ഥി ഗബ്ഭസേയ്യായ ധമ്മാഭിസമയോതി? ആമന്താ. സുത്തസ്സ പമത്തസ്സ മുട്ഠസ്സതിസ്സ അസമ്പജാനസ്സ ധമ്മാഭിസമയോതി? ന ഹേവം വത്തബ്ബേ…പേ॰….
Atthi gabbhaseyyāya dhammābhisamayoti? Āmantā. Suttassa pamattassa muṭṭhassatissa asampajānassa dhammābhisamayoti? Na hevaṃ vattabbe…pe….
ധമ്മാഭിസമയകഥാ നിട്ഠിതാ.
Dhammābhisamayakathā niṭṭhitā.
Related texts:
അട്ഠകഥാ • Aṭṭhakathā / അഭിധമ്മപിടക (അട്ഠകഥാ) • Abhidhammapiṭaka (aṭṭhakathā) / പഞ്ചപകരണ-അട്ഠകഥാ • Pañcapakaraṇa-aṭṭhakathā / ൪. ധമ്മാഭിസമയകഥാവണ്ണനാ • 4. Dhammābhisamayakathāvaṇṇanā
