| Library / Tipiṭaka / तिपिटक • Tipiṭaka / कथावत्थुपाळि • Kathāvatthupāḷi |
२२. बावीसतिमवग्गो
22. Bāvīsatimavaggo
(२११) ४. धम्माभिसमयकथा
(211) 4. Dhammābhisamayakathā
८९७. अत्थि गब्भसेय्याय धम्माभिसमयोति? आमन्ता। अत्थि गब्भसेय्याय धम्मदेसना, धम्मस्सवनं, धम्मसाकच्छा, परिपुच्छा, सीलसमादानं , इन्द्रियेसु गुत्तद्वारता, भोजने मत्तञ्ञुता, पुब्बरत्तापररत्तं जागरियानुयोगोति ? न हेवं वत्तब्बे…पे॰… नत्थि गब्भसेय्याय धम्मदेसना, धम्मस्सवनं…पे॰… पुब्बरत्तापररत्तं जागरियानुयोगोति? आमन्ता। हञ्चि नत्थि गब्भसेय्याय धम्मदेसना, धम्मस्सवनं…पे॰… पुब्बरत्तापररत्तं जागरियानुयोगो, नो च वत रे वत्तब्बे – ‘‘अत्थि गब्भसेय्याय धम्माभिसमयो’’ति।
897. Atthi gabbhaseyyāya dhammābhisamayoti? Āmantā. Atthi gabbhaseyyāya dhammadesanā, dhammassavanaṃ, dhammasākacchā, paripucchā, sīlasamādānaṃ , indriyesu guttadvāratā, bhojane mattaññutā, pubbarattāpararattaṃ jāgariyānuyogoti ? Na hevaṃ vattabbe…pe… natthi gabbhaseyyāya dhammadesanā, dhammassavanaṃ…pe… pubbarattāpararattaṃ jāgariyānuyogoti? Āmantā. Hañci natthi gabbhaseyyāya dhammadesanā, dhammassavanaṃ…pe… pubbarattāpararattaṃ jāgariyānuyogo, no ca vata re vattabbe – ‘‘atthi gabbhaseyyāya dhammābhisamayo’’ti.
अत्थि गब्भसेय्याय धम्माभिसमयोति? आमन्ता। ननु द्वे पच्चया सम्मादिट्ठिया उप्पादाय – परतो च घोसो, योनिसो च मनसिकारोति? आमन्ता। हञ्चि द्वे पच्चया सम्मादिट्ठिया उप्पादाय – परतो च घोसो, योनिसो च मनसिकारो, नो च वत रे वत्तब्बे – ‘‘अत्थि गब्भसेय्याय धम्माभिसमयो’’ति।
Atthi gabbhaseyyāya dhammābhisamayoti? Āmantā. Nanu dve paccayā sammādiṭṭhiyā uppādāya – parato ca ghoso, yoniso ca manasikāroti? Āmantā. Hañci dve paccayā sammādiṭṭhiyā uppādāya – parato ca ghoso, yoniso ca manasikāro, no ca vata re vattabbe – ‘‘atthi gabbhaseyyāya dhammābhisamayo’’ti.
अत्थि गब्भसेय्याय धम्माभिसमयोति? आमन्ता। सुत्तस्स पमत्तस्स मुट्ठस्सतिस्स असम्पजानस्स धम्माभिसमयोति? न हेवं वत्तब्बे…पे॰…।
Atthi gabbhaseyyāya dhammābhisamayoti? Āmantā. Suttassa pamattassa muṭṭhassatissa asampajānassa dhammābhisamayoti? Na hevaṃ vattabbe…pe….
धम्माभिसमयकथा निट्ठिता।
Dhammābhisamayakathā niṭṭhitā.
Related texts:
अट्ठकथा • Aṭṭhakathā / अभिधम्मपिटक (अट्ठकथा) • Abhidhammapiṭaka (aṭṭhakathā) / पञ्चपकरण-अट्ठकथा • Pañcapakaraṇa-aṭṭhakathā / ४. धम्माभिसमयकथावण्णना • 4. Dhammābhisamayakathāvaṇṇanā
