| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༦. དེཝསབྷཱགསུཏྟཾ
6. Devasabhāgasuttaṃ
༡༠༣༢. ‘‘ཙཏཱུཧི, བྷིཀྑཝེ, དྷམྨེཧི སམནྣཱགཏཾ ཨཏྟམནཱ དེཝཱ སབྷཱགཏཾ ཀཐེནྟི། ཀཏམེཧི ཙཏཱུཧི? ཨིདྷ, བྷིཀྑཝེ, ཨརིཡསཱཝཀོ བུདྡྷེ ཨཝེཙྩཔྤསཱདེན སམནྣཱགཏོ ཧོཏི – ཨིཏིཔི སོ བྷགཝཱ…པེ॰… སཏྠཱ དེཝམནུསྶཱནཾ བུདྡྷོ བྷགཝཱཏི། ཡཱ ཏཱ དེཝཏཱ བུདྡྷེ ཨཝེཙྩཔྤསཱདེན སམནྣཱགཏཱ ཨིཏོ ཙུཏཱ ཏཏྲཱུཔཔནྣཱ ཏཱསཾ ཨེཝཾ ཧོཏི – ‘ཡཐཱརཱུཔེན ཁོ མཡཾ བུདྡྷེ ཨཝེཙྩཔྤསཱདེན སམནྣཱགཏཱ ཏཏོ ཙུཏཱ ཨིདྷཱུཔཔནྣཱ, ཨརིཡསཱཝཀོཔི ཏཐཱརཱུཔེན བུདྡྷེ ཨཝེཙྩཔྤསཱདེན སམནྣཱགཏོ ཨེཧཱིཏི དེཝཱནཾ སནྟིཀེ’’’ཏི།
1032. ‘‘Catūhi, bhikkhave, dhammehi samannāgataṃ attamanā devā sabhāgataṃ kathenti. Katamehi catūhi? Idha, bhikkhave, ariyasāvako buddhe aveccappasādena samannāgato hoti – itipi so bhagavā…pe… satthā devamanussānaṃ buddho bhagavāti. Yā tā devatā buddhe aveccappasādena samannāgatā ito cutā tatrūpapannā tāsaṃ evaṃ hoti – ‘yathārūpena kho mayaṃ buddhe aveccappasādena samannāgatā tato cutā idhūpapannā, ariyasāvakopi tathārūpena buddhe aveccappasādena samannāgato ehīti devānaṃ santike’’’ti.
‘‘པུན ཙཔརཾ, བྷིཀྑཝེ, ཨརིཡསཱཝཀོ དྷམྨེ…པེ॰… སངྒྷེ…པེ॰… ཨརིཡཀནྟེཧི སཱིལེཧི སམནྣཱགཏོ ཧོཏི ཨཁཎྜེཧི…པེ॰… སམཱདྷིསཾཝཏྟནིཀེཧི། ཡཱ ཏཱ དེཝཏཱ ཨརིཡཀནྟེཧི སཱིལེཧི སམནྣཱགཏཱ ཨིཏོ ཙུཏཱ ཏཏྲཱུཔཔནྣཱ ཏཱསཾ ཨེཝཾ ཧོཏི – ‘ཡཐཱརཱུཔེཧི ཁོ མཡཾ ཨརིཡཀནྟེཧི སཱིལེཧི སམནྣཱགཏཱ ཏཏོ ཙུཏཱ ཨིདྷཱུཔཔནྣཱ, ཨརིཡསཱཝཀོཔི ཏཐཱརཱུཔེཧི ཨརིཡཀནྟེཧི སཱིལེཧི སམནྣཱགཏོ ཨེཧཱིཏི དེཝཱནཾ སནྟིཀེ’ཏི། ཨིམེཧི ཁོ, བྷིཀྑཝེ, ཙཏཱུཧི དྷམྨེཧི སམནྣཱགཏཾ ཨཏྟམནཱ དེཝཱ སབྷཱགཏཾ ཀཐེནྟཱི’’ཏི། ཚཊྛཾ།
‘‘Puna caparaṃ, bhikkhave, ariyasāvako dhamme…pe… saṅghe…pe… ariyakantehi sīlehi samannāgato hoti akhaṇḍehi…pe… samādhisaṃvattanikehi. Yā tā devatā ariyakantehi sīlehi samannāgatā ito cutā tatrūpapannā tāsaṃ evaṃ hoti – ‘yathārūpehi kho mayaṃ ariyakantehi sīlehi samannāgatā tato cutā idhūpapannā, ariyasāvakopi tathārūpehi ariyakantehi sīlehi samannāgato ehīti devānaṃ santike’ti. Imehi kho, bhikkhave, catūhi dhammehi samannāgataṃ attamanā devā sabhāgataṃ kathentī’’ti. Chaṭṭhaṃ.
