| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༨. དེཝལོཀསུཏྟཾ
8. Devalokasuttaṃ
༡༨. ‘‘སཙེ ཝོ, བྷིཀྑཝེ, ཨཉྙཏིཏྠིཡཱ པརིབྦཱཛཀཱ ཨེཝཾ པུཙྪེཡྻུཾ – ‘དེཝལོཀཱུཔཔཏྟིཡཱ, ཨཱཝུསོ, སམཎེ གོཏམེ བྲཧྨཙརིཡཾ ཝུསྶཐཱ’ཏི? ནནུ ཏུམྷེ, བྷིཀྑཝེ, ཨེཝཾ པུཊྛཱ ཨཊྚཱིཡེཡྻཱཐ ཧརཱཡེཡྻཱཐ ཛིགུཙྪེཡྻཱཐཱ’’ཏི? ‘‘ཨེཝཾ, བྷནྟེ’’། ‘‘ཨིཏི ཀིར ཏུམྷེ, བྷིཀྑཝེ, དིབྦེན ཨཱཡུནཱ ཨཊྚཱིཡཐ ཧརཱཡཐ ཛིགུཙྪཐ, དིབྦེན ཝཎྞེན དིབྦེན སུཁེན དིབྦེན ཡསེན དིབྦེནཱདྷིཔཏེཡྻེན ཨཊྚཱིཡཐ ཧརཱཡཐ ཛིགུཙྪཐ; པགེཝ ཁོ པན, བྷིཀྑཝེ, ཏུམྷེཧི ཀཱཡདུཙྩརིཏེན ཨཊྚཱིཡིཏབྦཾ ཧརཱཡིཏབྦཾ ཛིགུཙྪིཏབྦཾ, ཝཙཱིདུཙྩརིཏེན… མནོདུཙྩརིཏེན ཨཊྚཱིཡིཏབྦཾ ཧརཱཡིཏབྦཾ ཛིགུཙྪིཏབྦ’’ནྟི། ཨཊྛམཾ།
18. ‘‘Sace vo, bhikkhave, aññatitthiyā paribbājakā evaṃ puccheyyuṃ – ‘devalokūpapattiyā, āvuso, samaṇe gotame brahmacariyaṃ vussathā’ti? Nanu tumhe, bhikkhave, evaṃ puṭṭhā aṭṭīyeyyātha harāyeyyātha jiguccheyyāthā’’ti? ‘‘Evaṃ, bhante’’. ‘‘Iti kira tumhe, bhikkhave, dibbena āyunā aṭṭīyatha harāyatha jigucchatha, dibbena vaṇṇena dibbena sukhena dibbena yasena dibbenādhipateyyena aṭṭīyatha harāyatha jigucchatha; pageva kho pana, bhikkhave, tumhehi kāyaduccaritena aṭṭīyitabbaṃ harāyitabbaṃ jigucchitabbaṃ, vacīduccaritena… manoduccaritena aṭṭīyitabbaṃ harāyitabbaṃ jigucchitabba’’nti. Aṭṭhamaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༨. དེཝལོཀསུཏྟཝཎྞནཱ • 8. Devalokasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༨. དེཝལོཀསུཏྟཝཎྞནཱ • 8. Devalokasuttavaṇṇanā
