| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
2. දෙසනාගාමිනියාදිආපත්ති
2. Desanāgāminiyādiāpatti
475.
475.
කති දෙසනාගාමිනියො, කති සප්පටිකම්මා කතා;
Kati desanāgāminiyo, kati sappaṭikammā katā;
කතෙත්ථ අප්පටිකම්මා වුත්තා, බුද්ධෙනාදිච්චබන්ධුනා.
Katettha appaṭikammā vuttā, buddhenādiccabandhunā.
පඤ්ච දෙසනාගාමිනියො, ඡ සප්පටිකම්මා කතා;
Pañca desanāgāminiyo, cha sappaṭikammā katā;
එකෙත්ථ අප්පටිකම්මා වුත්තා, බුද්ධෙනාදිච්චබන්ධුනා.
Ekettha appaṭikammā vuttā, buddhenādiccabandhunā.
විනයගරුකා කති වුත්තා, කායවාචසිකානි ච;
Vinayagarukā kati vuttā, kāyavācasikāni ca;
කති විකාලෙ ධඤ්ඤරසො, කති ඤත්තිචතුත්ථෙන සම්මුති.
Kati vikāle dhaññaraso, kati ñatticatutthena sammuti.
විනයගරුකා ද්වෙ වුත්තා, කායවාචසිකානි ච;
Vinayagarukā dve vuttā, kāyavācasikāni ca;
එකො විකාලෙ ධඤ්ඤරසො, එකා ඤත්තිචතුත්ථෙන සම්මුති.
Eko vikāle dhaññaraso, ekā ñatticatutthena sammuti.
පාරාජිකා කායිකා කති, කති සංවාසකභූමියො;
Pārājikā kāyikā kati, kati saṃvāsakabhūmiyo;
කතිනං රත්තිච්ඡෙදො, පඤ්ඤත්තා ද්වඞ්ගුලා කති.
Katinaṃ ratticchedo, paññattā dvaṅgulā kati.
පාරාජිකා කායිකා ද්වෙ, ද්වෙ සංවාසකභූමියො;
Pārājikā kāyikā dve, dve saṃvāsakabhūmiyo;
ද්වින්නං රත්තිච්ඡෙදො, පඤ්ඤත්තා ද්වඞ්ගුලා දුවෙ.
Dvinnaṃ ratticchedo, paññattā dvaṅgulā duve.
කතත්තානං වධිත්වාන, කතිහි සඞ්ඝො භිජ්ජති;
Katattānaṃ vadhitvāna, katihi saṅgho bhijjati;
කතෙත්ථ පඨමාපත්තිකා, ඤත්තියා කරණා කති.
Katettha paṭhamāpattikā, ñattiyā karaṇā kati.
ද්වෙ අත්තානං වධිත්වාන, ද්වීහි සඞ්ඝො භිජ්ජති;
Dve attānaṃ vadhitvāna, dvīhi saṅgho bhijjati;
ද්වෙත්ථ පඨමාපත්තිකා, ඤත්තියා කරණා දුවෙ.
Dvettha paṭhamāpattikā, ñattiyā karaṇā duve.
පාණාතිපාතෙ කති ආපත්තියො, වාචා පාරාජිකා කති;
Pāṇātipāte kati āpattiyo, vācā pārājikā kati;
ඔභාසනා කති වුත්තා, සඤ්චරිත්තෙන වා කති.
Obhāsanā kati vuttā, sañcarittena vā kati.
පාණාතිපාතෙ තිස්සො ආපත්තියො;
Pāṇātipāte tisso āpattiyo;
වාචා පාරාජිකා තයො;
Vācā pārājikā tayo;
ඔභාසනා තයො වුත්තා;
Obhāsanā tayo vuttā;
සඤ්චරිත්තෙන වා තයො.
Sañcarittena vā tayo.
කති පුග්ගලා න උපසම්පාදෙතබ්බා, කති කම්මානං සඞ්ගහා;
Kati puggalā na upasampādetabbā, kati kammānaṃ saṅgahā;
නාසිතකා කති වුත්තා, කතිනං එකවාචිකා.
Nāsitakā kati vuttā, katinaṃ ekavācikā.
තයො පුග්ගලා න උපසම්පාදෙතබ්බා, තයො කම්මානං සඞ්ගහා;
Tayo puggalā na upasampādetabbā, tayo kammānaṃ saṅgahā;
නාසිතකා තයො වුත්තා, තිණ්ණන්නං එකවාචිකා.
Nāsitakā tayo vuttā, tiṇṇannaṃ ekavācikā.
අදින්නාදානෙ කති ආපත්තියො, කති මෙථුනපච්චයා;
Adinnādāne kati āpattiyo, kati methunapaccayā;
ඡින්දන්තස්ස කති ආපත්තියො, කති ඡඩ්ඩිතපච්චයා.
Chindantassa kati āpattiyo, kati chaḍḍitapaccayā.
අදින්නාදානෙ තිස්සො ආපත්තියො, චතස්සො මෙථුනපච්චයා;
Adinnādāne tisso āpattiyo, catasso methunapaccayā;
ඡින්දන්තස්ස තිස්සො ආපත්තියො, පඤ්ච ඡඩ්ඩිතපච්චයා.
Chindantassa tisso āpattiyo, pañca chaḍḍitapaccayā.
භික්ඛුනොවාදකවග්ගස්මිං , පාචිත්තියෙන දුක්කටා;
Bhikkhunovādakavaggasmiṃ , pācittiyena dukkaṭā;
කතෙත්ථ නවකා වුත්තා, කතිනං චීවරෙන ච.
Katettha navakā vuttā, katinaṃ cīvarena ca.
භික්ඛුනොවාදකවග්ගස්මිං , පාචිත්තියෙන දුක්කටා කතා;
Bhikkhunovādakavaggasmiṃ , pācittiyena dukkaṭā katā;
චතුරෙත්ථ නවකා වුත්තා, ද්වින්නං චීවරෙන ච.
Caturettha navakā vuttā, dvinnaṃ cīvarena ca.
භික්ඛුනීනඤ්ච අක්ඛාතා, පාටිදෙසනියා කති;
Bhikkhunīnañca akkhātā, pāṭidesaniyā kati;
භුඤ්ජන්තාමකධඤ්ඤෙන, පාචිත්තියෙන දුක්කටා කති.
Bhuñjantāmakadhaññena, pācittiyena dukkaṭā kati.
භික්ඛුනීනඤ්ච අක්ඛාතා, අට්ඨ පාටිදෙසනීයා කතා;
Bhikkhunīnañca akkhātā, aṭṭha pāṭidesanīyā katā;
භුඤ්ජන්තාමකධඤ්ඤෙන, පාචිත්තියෙන දුක්කටා කතා.
Bhuñjantāmakadhaññena, pācittiyena dukkaṭā katā.
ගච්ඡන්තස්ස කති ආපත්තියො, ඨිතස්ස චාපි කිත්තකා;
Gacchantassa kati āpattiyo, ṭhitassa cāpi kittakā;
නිසින්නස්ස කති ආපත්තියො, නිපන්නස්සාපි කිත්තකා.
Nisinnassa kati āpattiyo, nipannassāpi kittakā.
ගච්ඡන්තස්ස චතස්සො ආපත්තියො, ඨිතස්ස චාපි තත්තකා;
Gacchantassa catasso āpattiyo, ṭhitassa cāpi tattakā;
නිසින්නස්ස චතස්සො ආපත්තියො, නිපන්නස්සාපි තත්තකා.
Nisinnassa catasso āpattiyo, nipannassāpi tattakā.
Related texts:
අට්ඨකථා • Aṭṭhakathā / විනයපිටක (අට්ඨකථා) • Vinayapiṭaka (aṭṭhakathā) / පරිවාර-අට්ඨකථා • Parivāra-aṭṭhakathā / (2) දෙසනාගාමිනියාදිවණ්ණනා • (2) Desanāgāminiyādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්ථදීපනී-ටීකා • Sāratthadīpanī-ṭīkā / දෙසනාගාමිනියාදිවණ්ණනා • Desanāgāminiyādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්ධි-ටීකා • Vajirabuddhi-ṭīkā / කායිකාදිආපත්තිවණ්ණනා • Kāyikādiāpattivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / කායිකාදිආපත්තිවණ්ණනා • Kāyikādiāpattivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්යාදියොජනාපාළි • Pācityādiyojanāpāḷi / (2) දෙසනාගාමිනියාදිවණ්ණනා • (2) Desanāgāminiyādivaṇṇanā
