| Library / Tipiṭaka / తిపిటక • Tipiṭaka / అఙ్గుత్తరనికాయ (అట్ఠకథా) • Aṅguttaranikāya (aṭṭhakathā) |
౫. దారుకమ్మికసుత్తవణ్ణనా
5. Dārukammikasuttavaṇṇanā
౫౯. పఞ్చమే దారుకమ్మికోతి దారువిక్కయేన పవత్తితాజీవో ఏకో ఉపాసకో. కాసికచన్దనన్తి సణ్హచన్దనం. అఙ్గేనాతి అగుణఙ్గేన, సుక్కపక్ఖే గుణఙ్గేన. నేమన్తనికోతి నిమన్తనం గణ్హనకో. సఙ్ఘే దానం దస్సామీతి భిక్ఖుసఙ్ఘస్స దస్సామి. సో ఏవం వత్వా సత్థారం అభివాదేత్వా పక్కామి. అథస్స అపరభాగే పఞ్చసతా కులూపకా భిక్ఖూ గిహిభావం పాపుణింసు. సో ‘‘కులూపకభిక్ఖూ తే విబ్భన్తా’’తి వుత్తే ‘‘కిం ఏత్థ మయ్హ’’న్తి వత్వా చిత్తుప్పాదవేమత్తమత్తమ్పి న అకాసి. ఇదం సన్ధాయ సత్థా సఙ్ఘే తే దానం దదతో చిత్తం పసీదిస్సతీతి ఆహ.
59. Pañcame dārukammikoti dāruvikkayena pavattitājīvo eko upāsako. Kāsikacandananti saṇhacandanaṃ. Aṅgenāti aguṇaṅgena, sukkapakkhe guṇaṅgena. Nemantanikoti nimantanaṃ gaṇhanako. Saṅghe dānaṃ dassāmīti bhikkhusaṅghassa dassāmi. So evaṃ vatvā satthāraṃ abhivādetvā pakkāmi. Athassa aparabhāge pañcasatā kulūpakā bhikkhū gihibhāvaṃ pāpuṇiṃsu. So ‘‘kulūpakabhikkhū te vibbhantā’’ti vutte ‘‘kiṃ ettha mayha’’nti vatvā cittuppādavemattamattampi na akāsi. Idaṃ sandhāya satthā saṅghe te dānaṃ dadato cittaṃ pasīdissatīti āha.
Related texts:
తిపిటక (మూల) • Tipiṭaka (Mūla) / సుత్తపిటక • Suttapiṭaka / అఙ్గుత్తరనికాయ • Aṅguttaranikāya / ౫. దారుకమ్మికసుత్తం • 5. Dārukammikasuttaṃ
టీకా • Tīkā / సుత్తపిటక (టీకా) • Suttapiṭaka (ṭīkā) / అఙ్గుత్తరనికాయ (టీకా) • Aṅguttaranikāya (ṭīkā) / ౫. దారుకమ్మికసుత్తవణ్ణనా • 5. Dārukammikasuttavaṇṇanā
