| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
६. दानसुत्तं
6. Dānasuttaṃ
२६. वुत्तञ्हेतं भगवता, वुत्तमरहताति मे सुतं –
26. Vuttañhetaṃ bhagavatā, vuttamarahatāti me sutaṃ –
‘‘एवञ्चे, भिक्खवे, सत्ता जानेय्युं दानसंविभागस्स विपाकं यथाहं जानामि, न अदत्वा भुञ्जेय्युं, न च नेसं मच्छेरमलं चित्तं परियादाय तिट्ठेय्य। योपि नेसं अस्स चरिमो आलोपो चरिमं कबळं, ततोपि न असंविभजित्वा भुञ्जेय्युं, सचे नेसं पटिग्गाहका अस्सु। यस्मा च खो, भिक्खवे, सत्ता न एवं जानन्ति दानसंविभागस्स विपाकं यथाहं जानामि, तस्मा अदत्वा भुञ्जन्ति, मच्छेरमलञ्च नेसं चित्तं परियादाय तिट्ठती’’ति। एतमत्थं भगवा अवोच। तत्थेतं इति वुच्चति –
‘‘Evañce, bhikkhave, sattā jāneyyuṃ dānasaṃvibhāgassa vipākaṃ yathāhaṃ jānāmi, na adatvā bhuñjeyyuṃ, na ca nesaṃ maccheramalaṃ cittaṃ pariyādāya tiṭṭheyya. Yopi nesaṃ assa carimo ālopo carimaṃ kabaḷaṃ, tatopi na asaṃvibhajitvā bhuñjeyyuṃ, sace nesaṃ paṭiggāhakā assu. Yasmā ca kho, bhikkhave, sattā na evaṃ jānanti dānasaṃvibhāgassa vipākaṃ yathāhaṃ jānāmi, tasmā adatvā bhuñjanti, maccheramalañca nesaṃ cittaṃ pariyādāya tiṭṭhatī’’ti. Etamatthaṃ bhagavā avoca. Tatthetaṃ iti vuccati –
‘‘एवं चे सत्ता जानेय्युं, यथावुत्तं महेसिना।
‘‘Evaṃ ce sattā jāneyyuṃ, yathāvuttaṃ mahesinā;
विपाकं संविभागस्स, यथा होति महप्फलं॥
Vipākaṃ saṃvibhāgassa, yathā hoti mahapphalaṃ.
‘‘विनेय्य मच्छेरमलं, विप्पसन्नेन चेतसा।
‘‘Vineyya maccheramalaṃ, vippasannena cetasā;
दज्जुं कालेन अरियेसु, यत्थ दिन्नं महप्फलं॥
Dajjuṃ kālena ariyesu, yattha dinnaṃ mahapphalaṃ.
‘‘अन्नञ्च दत्वा 1 बहुनो, दक्खिणेय्येसु दक्खिणं।
‘‘Annañca datvā 2 bahuno, dakkhiṇeyyesu dakkhiṇaṃ;
इतो चुता मनुस्सत्ता, सग्गं गच्छन्ति दायका॥
Ito cutā manussattā, saggaṃ gacchanti dāyakā.
विपाकं संविभागस्स, अनुभोन्ति अमच्छरा’’ति॥
Vipākaṃ saṃvibhāgassa, anubhonti amaccharā’’ti.
अयम्पि अत्थो वुत्तो भगवता, इति मे सुतन्ति। छट्ठं।
Ayampi attho vutto bhagavatā, iti me sutanti. Chaṭṭhaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ६. दानसुत्तवण्णना • 6. Dānasuttavaṇṇanā
