| Library / Tipiṭaka / तिपिटक • Tipiṭaka / उदानपाळि • Udānapāḷi |
१०. चूळपन्थकसुत्तं
10. Cūḷapanthakasuttaṃ
५०. एवं मे सुतं – एकं समयं भगवा सावत्थियं विहरति जेतवने अनाथपिण्डिकस्स आरामे। तेन खो पन समयेन आयस्मा चूळपन्थको 1 भगवतो अविदूरे निसिन्नो होति पल्लङ्कं आभुजित्वा उजुं कायं पणिधाय परिमुखं सतिं उपट्ठपेत्वा।
50. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā cūḷapanthako 2 bhagavato avidūre nisinno hoti pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā.
अद्दसा खो भगवा आयस्मन्तं चूळपन्थकं अविदूरे निसिन्नं पल्लङ्कं आभुजित्वा उजुं कायं पणिधाय परिमुखं सतिं उपट्ठपेत्वा।
Addasā kho bhagavā āyasmantaṃ cūḷapanthakaṃ avidūre nisinnaṃ pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā.
अथ खो भगवा एतमत्थं विदित्वा तायं वेलायं इमं उदानं उदानेसि –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘ठितेन कायेन ठितेन चेतसा,
‘‘Ṭhitena kāyena ṭhitena cetasā,
तिट्ठं निसिन्नो उद वा सयानो।
Tiṭṭhaṃ nisinno uda vā sayāno;
लभेथ पुब्बापरियं विसेसं।
Labhetha pubbāpariyaṃ visesaṃ;
लद्धान पुब्बापरियं विसेसं,
Laddhāna pubbāpariyaṃ visesaṃ,
अदस्सनं मच्चुराजस्स गच्छे’’ति॥ दसमं।
Adassanaṃ maccurājassa gacche’’ti. dasamaṃ;
तस्सुद्दानं –
Tassuddānaṃ –
पियो अप्पायुका कुट्ठी, कुमारका उपोसथो।
Piyo appāyukā kuṭṭhī, kumārakā uposatho;
सोणो च रेवतो भेदो, सधाय पन्थकेन चाति॥
Soṇo ca revato bhedo, sadhāya panthakena cāti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / उदान-अट्ठकथा • Udāna-aṭṭhakathā / १०. चूळपन्थकसुत्तवण्णना • 10. Cūḷapanthakasuttavaṇṇanā
