| Library / Tipiṭaka / তিপিটক • Tipiṭaka / জাতক-অট্ঠকথা • Jātaka-aṭṭhakathā |
[৫২] ২. চূল়জনকজাতকৰণ্ণনা
[52] 2. Cūḷajanakajātakavaṇṇanā
ৰাযমেথেৰ পুরিসোতি ইদং সত্থা জেতৰনে ৰিহরন্তো ওস্সট্ঠৰীরিযমেৰারব্ভ কথেসি। তত্থ যং ৰত্তব্বং, তং সব্বং মহাজনকজাতকে (জা॰ ২.২২.১২৩ আদযো) আৰি ভৰিস্সতি। জনকরাজা পন সেতচ্ছত্তস্স হেট্ঠা নিসিন্নো ইমং গাথমাহ –
Vāyametheva purisoti idaṃ satthā jetavane viharanto ossaṭṭhavīriyamevārabbha kathesi. Tattha yaṃ vattabbaṃ, taṃ sabbaṃ mahājanakajātake (jā. 2.22.123 ādayo) āvi bhavissati. Janakarājā pana setacchattassa heṭṭhā nisinno imaṃ gāthamāha –
৫২.
52.
‘‘ৰাযমেথেৰ পুরিসো, ন নিব্বিন্দেয্য পণ্ডিতো।
‘‘Vāyametheva puriso, na nibbindeyya paṇḍito;
পস্সামি ৰোহং অত্তানং, উদকা থলমুব্ভত’’ন্তি॥
Passāmi vohaṃ attānaṃ, udakā thalamubbhata’’nti.
তত্থ ৰাযমেথেৰাতি ৰাযামং করোথেৰ। উদকা থলমুব্ভতন্তি উদকতো থলমুত্তিণ্ণং থলে পতিট্ঠিতং অত্তানং পস্সামীতি। ইধাপি ওস্সট্ঠৰীরিযো ভিক্খু অরহত্তং পত্তো, জনকরাজা সম্মাসম্বুদ্ধোৰ অহোসীতি।
Tattha vāyamethevāti vāyāmaṃ karotheva. Udakā thalamubbhatanti udakato thalamuttiṇṇaṃ thale patiṭṭhitaṃ attānaṃ passāmīti. Idhāpi ossaṭṭhavīriyo bhikkhu arahattaṃ patto, janakarājā sammāsambuddhova ahosīti.
চূল়জনকজাতকৰণ্ণনা দুতিযা।
Cūḷajanakajātakavaṇṇanā dutiyā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / জাতকপাল়ি • Jātakapāḷi / ৫২. চূল়জনকজাতকং • 52. Cūḷajanakajātakaṃ
