| Library / Tipiṭaka / திபிடக • Tipiṭaka / ஸுத்தனிபாதபாளி • Suttanipātapāḷi |
884.
884.
ஸகங்ஸகங்தி³ட்டி²பரிப்³ப³ஸானா, விக்³க³ய்ஹ நானா குஸலா வத³ந்தி;
Sakaṃsakaṃdiṭṭhiparibbasānā, viggayha nānā kusalā vadanti;
யோ ஏவங் ஜானாதி ஸ வேதி³ த⁴ம்மங், இத³ங் படிக்கோஸமகேவலீ ஸோ.
Yo evaṃ jānāti sa vedi dhammaṃ, idaṃ paṭikkosamakevalī so.
885.
885.
ஏவம்பி விக்³க³ய்ஹ விவாத³யந்தி, பா³லோ பரோ அக்குஸலோதி 3 சாஹு;
Evampi viggayha vivādayanti, bālo paro akkusaloti 4 cāhu;
ஸச்சோ நு வாதோ³ கதமோ இமேஸங், ஸப்³பே³வ ஹீமே குஸலா வதா³னா.
Sacco nu vādo katamo imesaṃ, sabbeva hīme kusalā vadānā.
886.
886.
பரஸ்ஸ சே த⁴ம்மமனானுஜானங், பா³லோமகோ 5 ஹோதி நிஹீனபஞ்ஞோ;
Parassa ce dhammamanānujānaṃ, bālomako 6 hoti nihīnapañño;
ஸப்³பே³வ பா³லா ஸுனிஹீனபஞ்ஞா, ஸப்³பே³விமே தி³ட்டி²பரிப்³ப³ஸானா.
Sabbeva bālā sunihīnapaññā, sabbevime diṭṭhiparibbasānā.
887.
887.
ஸந்தி³ட்டி²யா சேவ ந வீவதா³தா, ஸங்ஸுத்³த⁴பஞ்ஞா குஸலா முதீமா;
Sandiṭṭhiyā ceva na vīvadātā, saṃsuddhapaññā kusalā mutīmā;
ந தேஸங் கோசி பரிஹீனபஞ்ஞோ 7, தி³ட்டீ² ஹி தேஸம்பி ததா² ஸமத்தா.
Na tesaṃ koci parihīnapañño 8, diṭṭhī hi tesampi tathā samattā.
888.
888.
ந வாஹமேதங் ததி²யந்தி 9 ப்³ரூமி, யமாஹு பா³லா மிது² அஞ்ஞமஞ்ஞங்;
Na vāhametaṃ tathiyanti 10 brūmi, yamāhu bālā mithu aññamaññaṃ;
ஸகங்ஸகங்தி³ட்டி²மகங்ஸு ஸச்சங், தஸ்மா ஹி பா³லோதி பரங் த³ஹந்தி.
Sakaṃsakaṃdiṭṭhimakaṃsu saccaṃ, tasmā hi bāloti paraṃ dahanti.
889.
889.
யமாஹு ஸச்சங் ததி²யந்தி ஏகே, தமாஹு அஞ்ஞே 11 துச்ச²ங் முஸாதி;
Yamāhu saccaṃ tathiyanti eke, tamāhu aññe 12 tucchaṃ musāti;
ஏவம்பி விக³ய்ஹ விவாத³யந்தி, கஸ்மா ந ஏகங் ஸமணா வத³ந்தி.
Evampi vigayha vivādayanti, kasmā na ekaṃ samaṇā vadanti.
890.
890.
ஏகஞ்ஹி ஸச்சங் ந து³தீயமத்தி², யஸ்மிங் பஜா நோ விவதே³ பஜானங்;
Ekañhi saccaṃ na dutīyamatthi, yasmiṃ pajā no vivade pajānaṃ;
நானா தே 13 ஸச்சானி ஸயங் து²னந்தி, தஸ்மா ந ஏகங் ஸமணா வத³ந்தி.
Nānā te 14 saccāni sayaṃ thunanti, tasmā na ekaṃ samaṇā vadanti.
891.
891.
கஸ்மா நு ஸச்சானி வத³ந்தி நானா, பவாதி³யாஸே குஸலா வதா³னா;
Kasmā nu saccāni vadanti nānā, pavādiyāse kusalā vadānā;
ஸச்சானி ஸுதானி ப³ஹூனி நானா, உதா³ஹு தே தக்கமனுஸ்ஸரந்தி.
Saccāni sutāni bahūni nānā, udāhu te takkamanussaranti.
892.
892.
ந ஹேவ ஸச்சானி ப³ஹூனி நானா, அஞ்ஞத்ர ஸஞ்ஞாய நிச்சானி லோகே;
Na heva saccāni bahūni nānā, aññatra saññāya niccāni loke;
தக்கஞ்ச தி³ட்டீ²ஸு பகப்பயித்வா, ஸச்சங் முஸாதி த்³வயத⁴ம்மமாஹு.
Takkañca diṭṭhīsu pakappayitvā, saccaṃ musāti dvayadhammamāhu.
893.
893.
தி³ட்டே² ஸுதே ஸீலவதே முதே வா, ஏதே ச நிஸ்ஸாய விமானத³ஸ்ஸீ;
Diṭṭhe sute sīlavate mute vā, ete ca nissāya vimānadassī;
வினிச்ச²யே ட²த்வா பஹஸ்ஸமானோ, பா³லோ பரோ அக்குஸலோதி சாஹ.
Vinicchaye ṭhatvā pahassamāno, bālo paro akkusaloti cāha.
894.
894.
யேனேவ பா³லோதி பரங் த³ஹாதி, தேனாதுமானங் குஸலோதி சாஹ;
Yeneva bāloti paraṃ dahāti, tenātumānaṃ kusaloti cāha;
ஸயமத்தனா ஸோ குஸலோ வதா³னோ, அஞ்ஞங் விமானேதி ததே³வ பாவ.
Sayamattanā so kusalo vadāno, aññaṃ vimāneti tadeva pāva.
895.
895.
அதிஸாரதி³ட்டி²யாவ ஸோ ஸமத்தோ, மானேன மத்தோ பரிபுண்ணமானீ;
Atisāradiṭṭhiyāva so samatto, mānena matto paripuṇṇamānī;
ஸயமேவ ஸாமங் மனஸாபி⁴ஸித்தோ, தி³ட்டீ² ஹி ஸா தஸ்ஸ ததா² ஸமத்தா.
Sayameva sāmaṃ manasābhisitto, diṭṭhī hi sā tassa tathā samattā.
896.
896.
பரஸ்ஸ சே ஹி வசஸா நிஹீனோ, துமோ ஸஹா ஹோதி நிஹீனபஞ்ஞோ;
Parassa ce hi vacasā nihīno, tumo sahā hoti nihīnapañño;
அத² சே ஸயங் வேத³கூ³ ஹோதி தீ⁴ரோ, ந கோசி பா³லோ ஸமணேஸு அத்தி².
Atha ce sayaṃ vedagū hoti dhīro, na koci bālo samaṇesu atthi.
897.
897.
அஞ்ஞங் இதோ யாபி⁴வத³ந்தி த⁴ம்மங், அபரத்³தா⁴ ஸுத்³தி⁴மகேவலீ தே 15;
Aññaṃ ito yābhivadanti dhammaṃ, aparaddhā suddhimakevalī te 16;
ஏவம்பி தித்த்²யா புது²ஸோ வத³ந்தி, ஸந்தி³ட்டி²ராகே³ன ஹி தேபி⁴ரத்தா 17.
Evampi titthyā puthuso vadanti, sandiṭṭhirāgena hi tebhirattā 18.
898.
898.
இதே⁴வ ஸுத்³தி⁴ இதி வாத³யந்தி, நாஞ்ஞேஸு த⁴ம்மேஸு விஸுத்³தி⁴மாஹு;
Idheva suddhi iti vādayanti, nāññesu dhammesu visuddhimāhu;
ஏவம்பி தித்த்²யா புது²ஸோ நிவிட்டா², ஸகாயனே தத்த² த³ள்ஹங் வதா³னா.
Evampi titthyā puthuso niviṭṭhā, sakāyane tattha daḷhaṃ vadānā.
899.
899.
ஸகாயனே வாபி த³ள்ஹங் வதா³னோ, கமெத்த² பா³லோதி பரங் த³ஹெய்ய;
Sakāyane vāpi daḷhaṃ vadāno, kamettha bāloti paraṃ daheyya;
ஸயமேவ ஸோ மேத⁴க³மாவஹெய்ய 19, பரங் வத³ங் பா³லமஸுத்³தி⁴த⁴ம்மங்.
Sayameva so medhagamāvaheyya 20, paraṃ vadaṃ bālamasuddhidhammaṃ.
900.
900.
வினிச்ச²யே ட²த்வா ஸயங் பமாய, உத்³த⁴ங் ஸ 21 லோகஸ்மிங் விவாத³மேதி;
Vinicchaye ṭhatvā sayaṃ pamāya, uddhaṃ sa 22 lokasmiṃ vivādameti;
ஹித்வான ஸப்³பா³னி வினிச்ச²யானி, ந மேத⁴க³ங் குப்³ப³தி ஜந்து லோகேதி.
Hitvāna sabbāni vinicchayāni, na medhagaṃ kubbati jantu loketi.
சூளப்³யூஹஸுத்தங் த்³வாத³ஸமங் நிட்டி²தங்.
Cūḷabyūhasuttaṃ dvādasamaṃ niṭṭhitaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / ஸுத்தனிபாத-அட்ட²கதா² • Suttanipāta-aṭṭhakathā / 12. சூளப்³யூஹஸுத்தவண்ணனா • 12. Cūḷabyūhasuttavaṇṇanā
