| Library / Tipiṭaka / તિપિટક • Tipiṭaka / પઞ્ચપકરણ-મૂલટીકા • Pañcapakaraṇa-mūlaṭīkā |
૧૪. ચુદ્દસમનયો વિપ્પયુત્તેનસઙ્ગહિતાસઙ્ગહિતપદવણ્ણના
14. Cuddasamanayo vippayuttenasaṅgahitāsaṅgahitapadavaṇṇanā
૪૫૬. ચુદ્દસમનયે ધમ્માયતનાદીનં અનારમ્મણમિસ્સકસબ્બચિત્તુપ્પાદગતધમ્મભાવતો વિપ્પયોગસ્સ અરુહણં દટ્ઠબ્બં. જાતિઆદિત્તયસ્સ ચેત્થ ધમ્મસભાવમત્તત્તા ન કથઞ્ચિ સમ્પયોગો વિપ્પયોગો ચ રુહતિ અજ્ઝત્તબહિદ્ધધમ્માનં સબ્બધમ્મસમોધાનત્તા, અનિદસ્સનઅપ્પટિઘાદીનં અનારમ્મણમિસ્સકસબ્બચિત્તુપ્પાદત્તા. દુક્ખસચ્ચાદિધમ્માવ ઇધ તેહિ વિપ્પયુત્તાનં સઙ્ગહાસઙ્ગહસબ્ભાવા ગહિતાતિ.
456. Cuddasamanaye dhammāyatanādīnaṃ anārammaṇamissakasabbacittuppādagatadhammabhāvato vippayogassa aruhaṇaṃ daṭṭhabbaṃ. Jātiādittayassa cettha dhammasabhāvamattattā na kathañci sampayogo vippayogo ca ruhati ajjhattabahiddhadhammānaṃ sabbadhammasamodhānattā, anidassanaappaṭighādīnaṃ anārammaṇamissakasabbacittuppādattā. Dukkhasaccādidhammāva idha tehi vippayuttānaṃ saṅgahāsaṅgahasabbhāvā gahitāti.
પાળિઉદ્દાનગાથાયં સમુચ્છેદે ન લબ્ભન્તીતિ પરિયોસાને નયે ન લબ્ભન્તીતિ અત્થો. મોઘપુચ્છકેન ચાતિ અલબ્ભમાના ચ તે મોઘપુચ્છકેન હેતુના ન લબ્ભન્તિ તેસં પુચ્છાય મોઘત્તાતિ વુત્તં હોતિ. અથ વા મોઘપુચ્છકો અટ્ઠમો નયો, તેન ચ સહ ઓસાનનયે એતે ધમ્મા વિપ્પયોગસ્સપિ અભાવા સબ્બથાપિ ન લબ્ભન્તીતિ અત્થો.
Pāḷiuddānagāthāyaṃ samucchede na labbhantīti pariyosāne naye na labbhantīti attho. Moghapucchakena cāti alabbhamānā ca te moghapucchakena hetunā na labbhanti tesaṃ pucchāya moghattāti vuttaṃ hoti. Atha vā moghapucchako aṭṭhamo nayo, tena ca saha osānanaye ete dhammā vippayogassapi abhāvā sabbathāpi na labbhantīti attho.
ચુદ્દસમનયવિપ્પયુત્તેનસઙ્ગહિતાસઙ્ગહિતપદવણ્ણના નિટ્ઠિતા.
Cuddasamanayavippayuttenasaṅgahitāsaṅgahitapadavaṇṇanā niṭṭhitā.
ધાતુકથાપકરણ-મૂલટીકા સમત્તા.
Dhātukathāpakaraṇa-mūlaṭīkā samattā.
Related texts:
તિપિટક (મૂલ) • Tipiṭaka (Mūla) / અભિધમ્મપિટક • Abhidhammapiṭaka / ધાતુકથાપાળિ • Dhātukathāpāḷi / ૧૪. વિપ્પયુત્તેનસઙ્ગહિતાસઙ્ગહિતપદનિદ્દેસો • 14. Vippayuttenasaṅgahitāsaṅgahitapadaniddeso
અટ્ઠકથા • Aṭṭhakathā / અભિધમ્મપિટક (અટ્ઠકથા) • Abhidhammapiṭaka (aṭṭhakathā) / પઞ્ચપકરણ-અટ્ઠકથા • Pañcapakaraṇa-aṭṭhakathā / ૧૪. ચુદ્દસમનયો વિપ્પયુત્તેનસઙ્ગહિતાસઙ્ગહિતપદવણ્ણના • 14. Cuddasamanayo vippayuttenasaṅgahitāsaṅgahitapadavaṇṇanā
ટીકા • Tīkā / અભિધમ્મપિટક (ટીકા) • Abhidhammapiṭaka (ṭīkā) / પઞ્ચપકરણ-અનુટીકા • Pañcapakaraṇa-anuṭīkā / ૧૪. ચુદ્દસમનયો વિપ્પયુત્તેનસઙ્ગહિતાસઙ્ગહિતપદવણ્ણના • 14. Cuddasamanayo vippayuttenasaṅgahitāsaṅgahitapadavaṇṇanā
