| Library / Tipiṭaka / तिपिटक • Tipiṭaka / कङ्खावितरणी-अभिनव-टीका • Kaṅkhāvitaraṇī-abhinava-ṭīkā |
२. चोरिवुट्ठापिकासिक्खापदवण्णना
2. Corivuṭṭhāpikāsikkhāpadavaṇṇanā
मल्लगणभटिपुत्तगणादिकन्तिआदीसु (सारत्थ॰ टी॰ पाचित्तिय ३.६८३) मल्लगणो नाम नारायनभत्तिको तत्थ तत्थ पानीयट्ठपनपोक्खरणिखणनादिपुञ्ञकम्मकारको गणो। भटिपुत्तगणो नाम कुमारभत्तिकगणो। धम्मगणोति सासनभत्तिको अनेकप्पकारपुञ्ञकम्मकारको गणो। गन्धिकसेणीति अनेकप्पकारसुगन्धिविकतिकारको गणो। दुस्सिकसेणीति दुस्सवाणिजसमूहो, पेसकारगणोति अत्थो।
Mallagaṇabhaṭiputtagaṇādikantiādīsu (sārattha. ṭī. pācittiya 3.683) mallagaṇo nāma nārāyanabhattiko tattha tattha pānīyaṭṭhapanapokkharaṇikhaṇanādipuññakammakārako gaṇo. Bhaṭiputtagaṇo nāma kumārabhattikagaṇo. Dhammagaṇoti sāsanabhattiko anekappakārapuññakammakārako gaṇo. Gandhikaseṇīti anekappakārasugandhivikatikārako gaṇo. Dussikaseṇīti dussavāṇijasamūho, pesakāragaṇoti attho.
वुट्ठापेन्तियाति उपसम्पादेन्तिया। केनचि करणीयेन पक्कन्तासु भिक्खुनीसु अगन्त्वा खण्डसीमं यथानिसिन्नट्ठानेयेव अत्तनो निस्सितकपरिसाय सद्धिं वुट्ठापेन्तिया वाचाचित्ततो समुट्ठाति (पाचि॰ अट्ठ॰ ६८३), अञ्ञं सीमं वा नदिं वा गन्त्वा वुट्ठापेन्तिया कायवाचाचित्ततो समुट्ठातीति आह ‘‘चोरिवुट्ठापनसमुट्ठान’’न्ति। अनापुच्छा वुट्ठापनवसेन किरियाकिरियं। पञ्ञत्तिं अजानन्ता अरियापि वुट्ठापेन्तीति वा कम्मवाचापरियोसाने आपत्तिक्खणे विपाकाब्याकतसमङ्गितावसेन वा तिचित्तं।
Vuṭṭhāpentiyāti upasampādentiyā. Kenaci karaṇīyena pakkantāsu bhikkhunīsu agantvā khaṇḍasīmaṃ yathānisinnaṭṭhāneyeva attano nissitakaparisāya saddhiṃ vuṭṭhāpentiyā vācācittato samuṭṭhāti (pāci. aṭṭha. 683), aññaṃ sīmaṃ vā nadiṃ vā gantvā vuṭṭhāpentiyā kāyavācācittato samuṭṭhātīti āha ‘‘corivuṭṭhāpanasamuṭṭhāna’’nti. Anāpucchā vuṭṭhāpanavasena kiriyākiriyaṃ. Paññattiṃ ajānantā ariyāpi vuṭṭhāpentīti vā kammavācāpariyosāne āpattikkhaṇe vipākābyākatasamaṅgitāvasena vā ticittaṃ.
चोरिवुट्ठापिकासिक्खापदवण्णना निट्ठिता।
Corivuṭṭhāpikāsikkhāpadavaṇṇanā niṭṭhitā.
