| Library / Tipiṭaka / ತಿಪಿಟಕ • Tipiṭaka / ಪರಿವಾರಪಾಳಿ • Parivārapāḷi |
ಅಪರಗಾಥಾಸಙ್ಗಣಿಕಂ
Aparagāthāsaṅgaṇikaṃ
೧. ಚೋದನಾದಿಪುಚ್ಛಾವಿಸ್ಸಜ್ಜನಾ
1. Codanādipucchāvissajjanā
೩೫೯.
359.
ಚೋದನಾ ಕಿಮತ್ಥಾಯ, ಸಾರಣಾ ಕಿಸ್ಸ ಕಾರಣಾ।
Codanā kimatthāya, sāraṇā kissa kāraṇā;
ಸಙ್ಘೋ ಕಿಮತ್ಥಾಯ, ಮತಿಕಮ್ಮಂ ಪನ ಕಿಸ್ಸ ಕಾರಣಾ॥
Saṅgho kimatthāya, matikammaṃ pana kissa kāraṇā.
ಚೋದನಾ ಸಾರಣತ್ಥಾಯ, ನಿಗ್ಗಹತ್ಥಾಯ ಸಾರಣಾ।
Codanā sāraṇatthāya, niggahatthāya sāraṇā;
ಸಙ್ಘೋ ಪರಿಗ್ಗಹತ್ಥಾಯ, ಮತಿಕಮ್ಮಂ ಪನ ಪಾಟಿಯೇಕ್ಕಂ॥
Saṅgho pariggahatthāya, matikammaṃ pana pāṭiyekkaṃ.
ಮಾ ಖೋ ತುರಿತೋ ಅಭಣಿ, ಮಾ ಖೋ ಚಣ್ಡಿಕತೋ ಭಣಿ।
Mā kho turito abhaṇi, mā kho caṇḍikato bhaṇi;
ಮಾ ಖೋ ಪಟಿಘಂ ಜನಯಿ, ಸಚೇ ಅನುವಿಜ್ಜಕೋ ತುವಂ॥
Mā kho paṭighaṃ janayi, sace anuvijjako tuvaṃ.
ಮಾ ಖೋ ಸಹಸಾ ಅಭಣಿ, ಕಥಂ ವಿಗ್ಗಾಹಿಕಂ ಅನತ್ಥಸಂಹಿತಂ।
Mā kho sahasā abhaṇi, kathaṃ viggāhikaṃ anatthasaṃhitaṃ;
ಸುತ್ತೇ ವಿನಯೇ ಅನುಲೋಮೇ, ಪಞ್ಞತ್ತೇ ಅನುಲೋಮಿಕೇ॥
Sutte vinaye anulome, paññatte anulomike.
ಅನುಯೋಗವತ್ತಂ ನಿಸಾಮಯ, ಕುಸಲೇನ ಬುದ್ಧಿಮತಾ ಕತಂ।
Anuyogavattaṃ nisāmaya, kusalena buddhimatā kataṃ;
ಸುವುತ್ತಂ ಸಿಕ್ಖಾಪದಾನುಲೋಮಿಕಂ, ಗತಿಂ ನ ನಾಸೇನ್ತೋ ಸಮ್ಪರಾಯಿಕಂ।
Suvuttaṃ sikkhāpadānulomikaṃ, gatiṃ na nāsento samparāyikaṃ;
ಹಿತೇಸೀ ಅನುಯುಞ್ಜಸ್ಸು, ಕಾಲೇನತ್ಥೂಪಸಂಹಿತಂ॥
Hitesī anuyuñjassu, kālenatthūpasaṃhitaṃ.
ಚುದಿತಸ್ಸ ಚ ಚೋದಕಸ್ಸ ಚ।
Cuditassa ca codakassa ca;
ಸಹಸಾ ವೋಹಾರಂ ಮಾ ಪಧಾರೇಸಿ।
Sahasā vohāraṃ mā padhāresi;
ಚೋದಕೋ ಆಹ ಆಪನ್ನೋತಿ।
Codako āha āpannoti;
ಚುದಿತಕೋ ಆಹ ಅನಾಪನ್ನೋತಿ॥
Cuditako āha anāpannoti.
ಉಭೋ ಅನುಕ್ಖಿಪನ್ತೋ, ಪಟಿಞ್ಞಾನುಸನ್ಧಿತೇನ ಕಾರಯೇ।
Ubho anukkhipanto, paṭiññānusandhitena kāraye;
ಪಟಿಞ್ಞಾ ಲಜ್ಜೀಸು ಕತಾ, ಅಲಜ್ಜೀಸು ಏವಂ ನ ವಿಜ್ಜತಿ।
Paṭiññā lajjīsu katā, alajjīsu evaṃ na vijjati;
ಬಹುಮ್ಪಿ ಅಲಜ್ಜೀ ಭಾಸೇಯ್ಯ, ವತ್ತಾನುಸನ್ಧಿತೇನ 1 ಕಾರಯೇ॥
Bahumpi alajjī bhāseyya, vattānusandhitena 2 kāraye.
ಅಲಜ್ಜೀ ಕೀದಿಸೋ ಹೋತಿ, ಪಟಿಞ್ಞಾ ಯಸ್ಸ ನ ರೂಹತಿ।
Alajjī kīdiso hoti, paṭiññā yassa na rūhati;
ಏತಞ್ಚ 3 ತಾಹಂ ಪುಚ್ಛಾಮಿ, ಕೀದಿಸೋ ವುಚ್ಚತಿ ಅಲಜ್ಜೀ ಪುಗ್ಗಲೋ॥
Etañca 4 tāhaṃ pucchāmi, kīdiso vuccati alajjī puggalo.
ಸಞ್ಚಿಚ್ಚ ಆಪತ್ತಿಂ ಆಪಜ್ಜತಿ, ಆಪತ್ತಿಂ ಪರಿಗೂಹತಿ।
Sañcicca āpattiṃ āpajjati, āpattiṃ parigūhati;
ಅಗತಿಗಮನಞ್ಚ ಗಚ್ಛತಿ, ಏದಿಸೋ ವುಚ್ಚತಿ ಅಲಜ್ಜೀಪುಗ್ಗಲೋ॥
Agatigamanañca gacchati, ediso vuccati alajjīpuggalo.
ಸಚ್ಚಂ ಅಹಮ್ಪಿ ಜಾನಾಮಿ, ಏದಿಸೋ ವುಚ್ಚತಿ ಅಲಜ್ಜೀಪುಗ್ಗಲೋ।
Saccaṃ ahampi jānāmi, ediso vuccati alajjīpuggalo;
ಅಞ್ಞಞ್ಚ ತಾಹಂ ಪುಚ್ಛಾಮಿ, ಕೀದಿಸೋ ವುಚ್ಚತಿ ಲಜ್ಜೀಪುಗ್ಗಲೋ॥
Aññañca tāhaṃ pucchāmi, kīdiso vuccati lajjīpuggalo.
ಸಞ್ಚಿಚ್ಚ ಆಪತ್ತಿಂ ನಾಪಜ್ಜತಿ, ಆಪತ್ತಿಂ ನ ಪರಿಗೂಹತಿ।
Sañcicca āpattiṃ nāpajjati, āpattiṃ na parigūhati;
ಅಗತಿಗಮನಂ ನ ಗಚ್ಛತಿ, ಏದಿಸೋ ವುಚ್ಚತಿ ಲಜ್ಜೀಪುಗ್ಗಲೋ॥
Agatigamanaṃ na gacchati, ediso vuccati lajjīpuggalo.
ಸಚ್ಚಂ ಅಹಮ್ಪಿ ಜಾನಾಮಿ, ಏದಿಸೋ ವುಚ್ಚತಿ ಲಜ್ಜೀಪುಗ್ಗಲೋ।
Saccaṃ ahampi jānāmi, ediso vuccati lajjīpuggalo;
ಅಞ್ಞಞ್ಚ ತಾಹಂ ಪುಚ್ಛಾಮಿ, ಕೀದಿಸೋ ವುಚ್ಚತಿ ಅಧಮ್ಮಚೋದಕೋ॥
Aññañca tāhaṃ pucchāmi, kīdiso vuccati adhammacodako.
ಅಕಾಲೇ ಚೋದೇತಿ ಅಭೂತೇನ।
Akāle codeti abhūtena;
ಫರುಸೇನ ಅನತ್ಥಸಂಹಿತೇನ।
Pharusena anatthasaṃhitena;
ದೋಸನ್ತರೋ ಚೋದೇತಿ ನೋ ಮೇತ್ತಾಚಿತ್ತೋ।
Dosantaro codeti no mettācitto;
ಏದಿಸೋ ವುಚ್ಚತಿ ಅಧಮ್ಮಚೋದಕೋ॥
Ediso vuccati adhammacodako.
ಸಚ್ಚಂ ಅಹಮ್ಪಿ ಜಾನಾಮಿ, ಏದಿಸೋ ವುಚ್ಚತಿ ಅಧಮ್ಮಚೋದಕೋ।
Saccaṃ ahampi jānāmi, ediso vuccati adhammacodako;
ಅಞ್ಞಞ್ಚ ತಾಹಂ ಪುಚ್ಛಾಮಿ, ಕೀದಿಸೋ ವುಚ್ಚತಿ ಧಮ್ಮಚೋದಕೋ॥
Aññañca tāhaṃ pucchāmi, kīdiso vuccati dhammacodako.
ಕಾಲೇನ ಚೋದೇತಿ ಭೂತೇನ, ಸಣ್ಹೇನ ಅತ್ಥಸಂಹಿತೇನ।
Kālena codeti bhūtena, saṇhena atthasaṃhitena;
ಮೇತ್ತಾಚಿತ್ತೋ ಚೋದೇತಿ ನೋ ದೋಸನ್ತರೋ।
Mettācitto codeti no dosantaro;
ಏದಿಸೋ ವುಚ್ಚತಿ ಧಮ್ಮಚೋದಕೋ॥
Ediso vuccati dhammacodako.
ಸಚ್ಚಂ ಅಹಮ್ಪಿ ಜಾನಾಮಿ, ಏದಿಸೋ ವುಚ್ಚತಿ ಧಮ್ಮಚೋದಕೋ।
Saccaṃ ahampi jānāmi, ediso vuccati dhammacodako;
ಅಞ್ಞಞ್ಚ ತಾಹಂ ಪುಚ್ಛಾಮಿ, ಕೀದಿಸೋ ವುಚ್ಚತಿ ಬಾಲಚೋದಕೋ॥
Aññañca tāhaṃ pucchāmi, kīdiso vuccati bālacodako.
ಪುಬ್ಬಾಪರಂ ನ ಜಾನಾತಿ, ಪುಬ್ಬಾಪರಸ್ಸ ಅಕೋವಿದೋ।
Pubbāparaṃ na jānāti, pubbāparassa akovido;
ಅನುಸನ್ಧಿವಚನಪಥಂ ನ ಜಾನಾತಿ।
Anusandhivacanapathaṃ na jānāti;
ಅನುಸನ್ಧಿವಚನಪಥಸ್ಸ ಅಕೋವಿದೋ।
Anusandhivacanapathassa akovido;
ಏದಿಸೋ ವುಚ್ಚತಿ ಬಾಲಚೋದಕೋ॥
Ediso vuccati bālacodako.
ಸಚ್ಚಂ ಅಹಮ್ಪಿ ಜಾನಾಮಿ, ಏದಿಸೋ ವುಚ್ಚತಿ ಬಾಲಚೋದಕೋ।
Saccaṃ ahampi jānāmi, ediso vuccati bālacodako;
ಅಞ್ಞಞ್ಚ ತಾಹಂ ಪುಚ್ಛಾಮಿ, ಕೀದಿಸೋ ವುಚ್ಚತಿ ಪಣ್ಡಿತಚೋದಕೋ॥
Aññañca tāhaṃ pucchāmi, kīdiso vuccati paṇḍitacodako.
ಪುಬ್ಬಾಪರಮ್ಪಿ ಜಾನಾತಿ, ಪುಬ್ಬಾಪರಸ್ಸ ಕೋವಿದೋ।
Pubbāparampi jānāti, pubbāparassa kovido;
ಅನುಸನ್ಧಿವಚನಪಥಂ ಜಾನಾತಿ, ಅನುಸನ್ಧಿವಚನಪಥಸ್ಸ ಕೋವಿದೋ।
Anusandhivacanapathaṃ jānāti, anusandhivacanapathassa kovido;
ಏದಿಸೋ ವುಚ್ಚತಿ ಪಣ್ಡಿತಚೋದಕೋ॥
Ediso vuccati paṇḍitacodako.
ಸಚ್ಚಂ ಅಹಮ್ಪಿ ಜಾನಾಮಿ, ಏದಿಸೋ ವುಚ್ಚತಿ ಪಣ್ಡಿತಚೋದಕೋ।
Saccaṃ ahampi jānāmi, ediso vuccati paṇḍitacodako;
ಅಞ್ಞಞ್ಚ ತಾಹಂ ಪುಚ್ಛಾಮಿ, ಚೋದನಾ ಕಿನ್ತಿ ವುಚ್ಚತಿ॥
Aññañca tāhaṃ pucchāmi, codanā kinti vuccati.
ಸೀಲವಿಪತ್ತಿಯಾ ಚೋದೇತಿ, ಅಥೋ ಆಚಾರದಿಟ್ಠಿಯಾ।
Sīlavipattiyā codeti, atho ācāradiṭṭhiyā;
ಆಜೀವೇನಪಿ ಚೋದೇತಿ, ಚೋದನಾ ತೇನ ವುಚ್ಚತೀತಿ॥
Ājīvenapi codeti, codanā tena vuccatīti.
ಅಪರಂ ಗಾಥಾಸಙ್ಗಣಿಕಂ ನಿಟ್ಠಿತಂ।
Aparaṃ gāthāsaṅgaṇikaṃ niṭṭhitaṃ.
Footnotes:
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಪರಿವಾರ-ಅಟ್ಠಕಥಾ • Parivāra-aṭṭhakathā / ಚೋದನಾದಿಪುಚ್ಛಾವಿಸ್ಸಜ್ಜನಾವಣ್ಣನಾ • Codanādipucchāvissajjanāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ದುತಿಯಗಾಥಾಸಙ್ಗಣಿಕವಣ್ಣನಾ • Dutiyagāthāsaṅgaṇikavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಚೋದನಾದಿಪುಚ್ಛಾವಿಸ್ಸಜ್ಜನಾವಣ್ಣನಾ • Codanādipucchāvissajjanāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಚೋದನಾದಿಪುಚ್ಛಾವಿಸ್ಸಜ್ಜನಾವಣ್ಣನಾ • Codanādipucchāvissajjanāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ಚೋದನಾದಿಪುಚ್ಛಾವಿಸ್ಸಜ್ಜನಾವಣ್ಣನಾ • Codanādipucchāvissajjanāvaṇṇanā
