| Library / Tipiṭaka / តិបិដក • Tipiṭaka / បរិវារបាឡិ • Parivārapāḷi |
អបរគាថាសង្គណិកំ
Aparagāthāsaṅgaṇikaṃ
១. ចោទនាទិបុច្ឆាវិស្សជ្ជនា
1. Codanādipucchāvissajjanā
៣៥៩.
359.
ចោទនា កិមត្ថាយ, សារណា កិស្ស ការណា;
Codanā kimatthāya, sāraṇā kissa kāraṇā;
សង្ឃោ កិមត្ថាយ, មតិកម្មំ បន កិស្ស ការណា។
Saṅgho kimatthāya, matikammaṃ pana kissa kāraṇā.
ចោទនា សារណត្ថាយ, និគ្គហត្ថាយ សារណា;
Codanā sāraṇatthāya, niggahatthāya sāraṇā;
សង្ឃោ បរិគ្គហត្ថាយ, មតិកម្មំ បន បាដិយេក្កំ។
Saṅgho pariggahatthāya, matikammaṃ pana pāṭiyekkaṃ.
មា ខោ តុរិតោ អភណិ, មា ខោ ចណ្ឌិកតោ ភណិ;
Mā kho turito abhaṇi, mā kho caṇḍikato bhaṇi;
មា ខោ បដិឃំ ជនយិ, សចេ អនុវិជ្ជកោ តុវំ។
Mā kho paṭighaṃ janayi, sace anuvijjako tuvaṃ.
មា ខោ សហសា អភណិ, កថំ វិគ្គាហិកំ អនត្ថសំហិតំ;
Mā kho sahasā abhaṇi, kathaṃ viggāhikaṃ anatthasaṃhitaṃ;
សុត្តេ វិនយេ អនុលោមេ, បញ្ញត្តេ អនុលោមិកេ។
Sutte vinaye anulome, paññatte anulomike.
អនុយោគវត្តំ និសាមយ, កុសលេន ពុទ្ធិមតា កតំ;
Anuyogavattaṃ nisāmaya, kusalena buddhimatā kataṃ;
សុវុត្តំ សិក្ខាបទានុលោមិកំ, គតិំ ន នាសេន្តោ សម្បរាយិកំ;
Suvuttaṃ sikkhāpadānulomikaṃ, gatiṃ na nāsento samparāyikaṃ;
ហិតេសី អនុយុញ្ជស្សុ, កាលេនត្ថូបសំហិតំ។
Hitesī anuyuñjassu, kālenatthūpasaṃhitaṃ.
ចុទិតស្ស ច ចោទកស្ស ច;
Cuditassa ca codakassa ca;
សហសា វោហារំ មា បធារេសិ;
Sahasā vohāraṃ mā padhāresi;
ចោទកោ អាហ អាបន្នោតិ;
Codako āha āpannoti;
ចុទិតកោ អាហ អនាបន្នោតិ។
Cuditako āha anāpannoti.
ឧភោ អនុក្ខិបន្តោ, បដិញ្ញានុសន្ធិតេន ការយេ;
Ubho anukkhipanto, paṭiññānusandhitena kāraye;
បដិញ្ញា លជ្ជីសុ កតា, អលជ្ជីសុ ឯវំ ន វិជ្ជតិ;
Paṭiññā lajjīsu katā, alajjīsu evaṃ na vijjati;
ពហុម្បិ អលជ្ជី ភាសេយ្យ, វត្តានុសន្ធិតេន 1 ការយេ។
Bahumpi alajjī bhāseyya, vattānusandhitena 2 kāraye.
អលជ្ជី កីទិសោ ហោតិ, បដិញ្ញា យស្ស ន រូហតិ;
Alajjī kīdiso hoti, paṭiññā yassa na rūhati;
ឯតញ្ច 3 តាហំ បុច្ឆាមិ, កីទិសោ វុច្ចតិ អលជ្ជី បុគ្គលោ។
Etañca 4 tāhaṃ pucchāmi, kīdiso vuccati alajjī puggalo.
សញ្ចិច្ច អាបត្តិំ អាបជ្ជតិ, អាបត្តិំ បរិគូហតិ;
Sañcicca āpattiṃ āpajjati, āpattiṃ parigūhati;
អគតិគមនញ្ច គច្ឆតិ, ឯទិសោ វុច្ចតិ អលជ្ជីបុគ្គលោ។
Agatigamanañca gacchati, ediso vuccati alajjīpuggalo.
សច្ចំ អហម្បិ ជានាមិ, ឯទិសោ វុច្ចតិ អលជ្ជីបុគ្គលោ;
Saccaṃ ahampi jānāmi, ediso vuccati alajjīpuggalo;
អញ្ញញ្ច តាហំ បុច្ឆាមិ, កីទិសោ វុច្ចតិ លជ្ជីបុគ្គលោ។
Aññañca tāhaṃ pucchāmi, kīdiso vuccati lajjīpuggalo.
សញ្ចិច្ច អាបត្តិំ នាបជ្ជតិ, អាបត្តិំ ន បរិគូហតិ;
Sañcicca āpattiṃ nāpajjati, āpattiṃ na parigūhati;
អគតិគមនំ ន គច្ឆតិ, ឯទិសោ វុច្ចតិ លជ្ជីបុគ្គលោ។
Agatigamanaṃ na gacchati, ediso vuccati lajjīpuggalo.
សច្ចំ អហម្បិ ជានាមិ, ឯទិសោ វុច្ចតិ លជ្ជីបុគ្គលោ;
Saccaṃ ahampi jānāmi, ediso vuccati lajjīpuggalo;
អញ្ញញ្ច តាហំ បុច្ឆាមិ, កីទិសោ វុច្ចតិ អធម្មចោទកោ។
Aññañca tāhaṃ pucchāmi, kīdiso vuccati adhammacodako.
អកាលេ ចោទេតិ អភូតេន;
Akāle codeti abhūtena;
ផរុសេន អនត្ថសំហិតេន;
Pharusena anatthasaṃhitena;
ទោសន្តរោ ចោទេតិ នោ មេត្តាចិត្តោ;
Dosantaro codeti no mettācitto;
ឯទិសោ វុច្ចតិ អធម្មចោទកោ។
Ediso vuccati adhammacodako.
សច្ចំ អហម្បិ ជានាមិ, ឯទិសោ វុច្ចតិ អធម្មចោទកោ;
Saccaṃ ahampi jānāmi, ediso vuccati adhammacodako;
អញ្ញញ្ច តាហំ បុច្ឆាមិ, កីទិសោ វុច្ចតិ ធម្មចោទកោ។
Aññañca tāhaṃ pucchāmi, kīdiso vuccati dhammacodako.
កាលេន ចោទេតិ ភូតេន, សណ្ហេន អត្ថសំហិតេន;
Kālena codeti bhūtena, saṇhena atthasaṃhitena;
មេត្តាចិត្តោ ចោទេតិ នោ ទោសន្តរោ;
Mettācitto codeti no dosantaro;
ឯទិសោ វុច្ចតិ ធម្មចោទកោ។
Ediso vuccati dhammacodako.
សច្ចំ អហម្បិ ជានាមិ, ឯទិសោ វុច្ចតិ ធម្មចោទកោ;
Saccaṃ ahampi jānāmi, ediso vuccati dhammacodako;
អញ្ញញ្ច តាហំ បុច្ឆាមិ, កីទិសោ វុច្ចតិ ពាលចោទកោ។
Aññañca tāhaṃ pucchāmi, kīdiso vuccati bālacodako.
បុព្ពាបរំ ន ជានាតិ, បុព្ពាបរស្ស អកោវិទោ;
Pubbāparaṃ na jānāti, pubbāparassa akovido;
អនុសន្ធិវចនបថំ ន ជានាតិ;
Anusandhivacanapathaṃ na jānāti;
អនុសន្ធិវចនបថស្ស អកោវិទោ;
Anusandhivacanapathassa akovido;
ឯទិសោ វុច្ចតិ ពាលចោទកោ។
Ediso vuccati bālacodako.
សច្ចំ អហម្បិ ជានាមិ, ឯទិសោ វុច្ចតិ ពាលចោទកោ;
Saccaṃ ahampi jānāmi, ediso vuccati bālacodako;
អញ្ញញ្ច តាហំ បុច្ឆាមិ, កីទិសោ វុច្ចតិ បណ្ឌិតចោទកោ។
Aññañca tāhaṃ pucchāmi, kīdiso vuccati paṇḍitacodako.
បុព្ពាបរម្បិ ជានាតិ, បុព្ពាបរស្ស កោវិទោ;
Pubbāparampi jānāti, pubbāparassa kovido;
អនុសន្ធិវចនបថំ ជានាតិ, អនុសន្ធិវចនបថស្ស កោវិទោ;
Anusandhivacanapathaṃ jānāti, anusandhivacanapathassa kovido;
ឯទិសោ វុច្ចតិ បណ្ឌិតចោទកោ។
Ediso vuccati paṇḍitacodako.
សច្ចំ អហម្បិ ជានាមិ, ឯទិសោ វុច្ចតិ បណ្ឌិតចោទកោ;
Saccaṃ ahampi jānāmi, ediso vuccati paṇḍitacodako;
អញ្ញញ្ច តាហំ បុច្ឆាមិ, ចោទនា កិន្តិ វុច្ចតិ។
Aññañca tāhaṃ pucchāmi, codanā kinti vuccati.
សីលវិបត្តិយា ចោទេតិ, អថោ អាចារទិដ្ឋិយា;
Sīlavipattiyā codeti, atho ācāradiṭṭhiyā;
អាជីវេនបិ ចោទេតិ, ចោទនា តេន វុច្ចតីតិ។
Ājīvenapi codeti, codanā tena vuccatīti.
អបរំ គាថាសង្គណិកំ និដ្ឋិតំ។
Aparaṃ gāthāsaṅgaṇikaṃ niṭṭhitaṃ.
Footnotes:
Related texts:
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / បរិវារ-អដ្ឋកថា • Parivāra-aṭṭhakathā / ចោទនាទិបុច្ឆាវិស្សជ្ជនាវណ្ណនា • Codanādipucchāvissajjanāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ទុតិយគាថាសង្គណិកវណ្ណនា • Dutiyagāthāsaṅgaṇikavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ចោទនាទិបុច្ឆាវិស្សជ្ជនាវណ្ណនា • Codanādipucchāvissajjanāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ចោទនាទិបុច្ឆាវិស្សជ្ជនាវណ្ណនា • Codanādipucchāvissajjanāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ចោទនាទិបុច្ឆាវិស្សជ្ជនាវណ្ណនា • Codanādipucchāvissajjanāvaṇṇanā
