| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
3. சீவரனித்³தே³ஸவண்ணனா
3. Cīvaraniddesavaṇṇanā
30. ‘‘கோ²மஞ்ச கோஸெய்யஞ்சா’’திஆதி³னா நபுங்ஸகவிக்³க³ஹேன த்³வந்தே³ கதே கோ²ம…பே॰… ப⁴ங்கா³னி. தத்த² கோ²மந்தி க³ச்ச²ஜாதி. உபசாரதோ பன கோ²மேன கோ²மஸுத்தேன வாயிதந்தி தத்³தி⁴தேன உபசாரேன வா கோ²மங் கோ²மபடசீவரங், ததா² அவஸேஸானி. ஸாணங் ஸாணவாகஸுத்தேஹி வாயிதங் சீவரங். ப⁴ங்க³ங் கோ²மஸுத்தாதீ³னி ஸப்³பா³னி ஏகச்சானி வா வோமிஸ்ஸெத்வா வாயிதசீவரங். வாகமயமேவ வாதி கேசி. கம்ப³லந்தி மனுஸ்ஸலோமங் வாளலோமஞ்ச ட²பெத்வா ஸேஸலோமேஹி வாயிதங். ஏதானீதி கோ²மாதீ³னி யதா²வுத்தானி. ஸஹ அனுலோமேஹீதி ஸானுலோமானி. ஜாதிதோ கப்பியானி ச² சீவரானி ப⁴வந்தி.
30. ‘‘Khomañca koseyyañcā’’tiādinā napuṃsakaviggahena dvande kate khoma…pe… bhaṅgāni. Tattha khomanti gacchajāti. Upacārato pana khomena khomasuttena vāyitanti taddhitena upacārena vā khomaṃ khomapaṭacīvaraṃ, tathā avasesāni. Sāṇaṃ sāṇavākasuttehi vāyitaṃ cīvaraṃ. Bhaṅgaṃ khomasuttādīni sabbāni ekaccāni vā vomissetvā vāyitacīvaraṃ. Vākamayameva vāti keci. Kambalanti manussalomaṃ vāḷalomañca ṭhapetvā sesalomehi vāyitaṃ. Etānīti khomādīni yathāvuttāni. Saha anulomehīti sānulomāni. Jātito kappiyāni cha cīvarāni bhavanti.
31. இதா³னி ‘‘து³கூல’’ந்திஆதி³னா தேஸங் அனுலோமானி த³ஸ்ஸேதி. தத்த² து³கூலந்தி து³கூலஸங்கா²தேன கேனசி வாகவிஸேஸேன வாயிதங் சீவரங். சேவாதி ஸமுச்சயே, ஸோ உபரி ஆகட்³டி⁴தப்³போ³. பட்டுண்ணந்தி பட்டுண்ணேஸு ஜாதங் பட்டுண்ணங். தே³ஸவாசினோ ப³ஹுவசனந்தாதி ப³ஹுவசனேன விக்³க³ஹோ. ததா² ஸோமாரா ச சீனா ச, தேஸு ஜாதங் ஸோமாரசீனஜங். இமானி தீணி பாணகேஹி கதஸுத்தமயானி. ஏஹிபி⁴க்கூ²னங் புஞ்ஞித்³தி⁴யா ஜாதங் இத்³தி⁴ஜங், தங் பன கோ²மாதீ³னங் அஞ்ஞதரங். தே³வதி³ன்னந்தி தே³வேஹி தி³ன்னங் கப்பருக்கே² நிப்³ப³த்தங் சீவரங். ததே³தங் து³கூலாதி³ தஸ்ஸ தஸ்ஸ யதா²வுத்தஸ்ஸ கோ²மாதி³னோ அனுலோமிகங் ஹோதி. தத்த² லோமானி அனுக³தங் அனுலோமங், யதா² ஸேஸலோமானி அனுக³தங் லோமங் தத³னுகூலத்தா ‘‘அனுலோம’’ந்தி வுச்சதி, ததா² தங்ஜாதியகங் யேஸங் கேஸஞ்சி அனுகூலங் ஸப்³ப³ம்பி ருள்ஹீவஸேன ‘‘அனுலோம’’ந்தி வுச்சதி. தமேவ அனுலோமிகங், அனுகூலந்தி அத்தோ². கத²ங்? து³கூலங் ஸாணஸ்ஸ அனுலோமங், பட்டுண்ணாதீ³னி தீணி கோஸெய்யஸ்ஸ அனுலோமானி, இத்³தி⁴ஜங் தே³வதி³ன்னஞ்ச கோ²மாதீ³னமனுலோமந்தி.
31. Idāni ‘‘dukūla’’ntiādinā tesaṃ anulomāni dasseti. Tattha dukūlanti dukūlasaṅkhātena kenaci vākavisesena vāyitaṃ cīvaraṃ. Cevāti samuccaye, so upari ākaḍḍhitabbo. Paṭṭuṇṇanti paṭṭuṇṇesu jātaṃ paṭṭuṇṇaṃ. Desavācino bahuvacanantāti bahuvacanena viggaho. Tathā somārā ca cīnā ca, tesu jātaṃ somāracīnajaṃ. Imāni tīṇi pāṇakehi katasuttamayāni. Ehibhikkhūnaṃ puññiddhiyā jātaṃ iddhijaṃ, taṃ pana khomādīnaṃ aññataraṃ. Devadinnanti devehi dinnaṃ kapparukkhe nibbattaṃ cīvaraṃ. Tadetaṃ dukūlādi tassa tassa yathāvuttassa khomādino anulomikaṃ hoti. Tattha lomāni anugataṃ anulomaṃ, yathā sesalomāni anugataṃ lomaṃ tadanukūlattā ‘‘anuloma’’nti vuccati, tathā taṃjātiyakaṃ yesaṃ kesañci anukūlaṃ sabbampi ruḷhīvasena ‘‘anuloma’’nti vuccati. Tameva anulomikaṃ, anukūlanti attho. Kathaṃ? Dukūlaṃ sāṇassa anulomaṃ, paṭṭuṇṇādīni tīṇi koseyyassa anulomāni, iddhijaṃ devadinnañca khomādīnamanulomanti.
32-3. ஏவங் ஸானுலோமானி சீவரானி த³ஸ்ஸெத்வா இதா³னி அதி⁴ட்டா²னாதி³கங் த³ஸ்ஸேதுங் ‘‘திசீவர’’ந்திஆதி³மாஹ. தத்த² அவுத்தேபி அவஸ்ஸங் வத்தப்³ப³தாய ஸப்³ப³த்த² ச-ஸத்³தோ³ அஜ்ஜா²ஹரிதப்³போ³, திசீவரஞ்ச…பே॰… கண்டு³ச்சா²தி³ஞ்ச அதி⁴ட்டெ²ய்ய ந விகப்பெய்யாதி ஸம்ப³ந்தோ⁴. தத்த² திண்ணங் சீவரானங் ஸமாஹாரோ திசீவரங். பரிக்கா²ரஞ்ச தங் சோளஞ்சாதி பரிக்கா²ரசோளங். வஸ்ஸஸ்ஸ யொக்³கா³ வஸ்ஸிகா, ஸாவ ஸாடிகா வஸ்ஸிகஸாடிகா. புஞ்ச²தி அனேனாதி புஞ்ச²னங், முக²ஸ்ஸ புஞ்ச²னங் முக²புஞ்ச²னங். நிஸீத³ந்தி எத்தா²தி நிஸீத³னங், முக²புஞ்ச²னஞ்ச நிஸீத³னஞ்ச முக²புஞ்ச²னநிஸீத³னங் . ஸயனஸுகா²தி³ங் படிச்ச அத்த²ரீயதீதி பச்சத்த²ரணங், ததே³வ பச்சத்த²ரணகங். கண்டு³ங் சா²தே³தீதி கண்டு³ச்சா²தி³. அதி⁴ட்ட²ஹேதி ‘‘இமங் ஸங்கா⁴டிங் அதி⁴ட்டா²மீ’’திஆதி³னா நவன்னங் நாமங் க³ஹெத்வா அதி⁴ட்டெ²ய்ய. ந விகப்பெய்யாதி தஸ்ஸ தஸ்ஸ நாமங் க³ஹெத்வா ந விகப்பெய்ய, தஸ்ஸ தஸ்ஸ பன நாமங் அக்³க³ஹெத்வா ‘‘இமங் சீவரங் துய்ஹங் விகப்பேமீ’’தி விகப்பெய்யாதி அதி⁴ப்பாயோ. எத்தா²தி இமேஸு நவஸு சீவரேஸு. திசீவரந்தி திசீவரனாமேன அதி⁴ட்டி²தங். ததா² ஹி அதி⁴ட்டா²னதோ புப்³பே³ விஸுங் திசீவரங் நாம நத்தி² ஸங்கா⁴டிஆதி³ப்பஹோனகஸ்ஸ பச்சத்த²ரணாதி³வஸேனாபி அதி⁴ட்டா²துங் அனுஞ்ஞாதத்தா. தங் வினா ஏகாஹங் ஏகதி³வஸம்பி. ந வஸெய்யாதி அலத்³த⁴ஸம்முதிகோ பி⁴க்கு² அவிப்பவாஸஸீமதோ அஞ்ஞத்த² வாஸங் ந கரெய்யாதி அத்தோ². ஏவங் ஸதி திசீவரஞ்ச நிஸ்ஸஜ்ஜிதப்³ப³ங் ஹோதி, பாசித்தியஞ்ச ஆபத்திங் ஆபஜ்ஜதீதி தீ³பேதி. நிஸீத³னங் வினா சாதுமாஸங் ந வஸெய்யாதி ஸம்ப³ந்தோ⁴. சதுன்னங் மாஸானங் ஸமாஹாரோ சதுமாஸங், தமேவ சாதுமாஸங். தங் அச்சந்தஸங்யோக³வஸேன.
32-3. Evaṃ sānulomāni cīvarāni dassetvā idāni adhiṭṭhānādikaṃ dassetuṃ ‘‘ticīvara’’ntiādimāha. Tattha avuttepi avassaṃ vattabbatāya sabbattha ca-saddo ajjhāharitabbo, ticīvarañca…pe… kaṇḍucchādiñca adhiṭṭheyya na vikappeyyāti sambandho. Tattha tiṇṇaṃ cīvarānaṃ samāhāro ticīvaraṃ. Parikkhārañca taṃ coḷañcāti parikkhāracoḷaṃ. Vassassa yoggā vassikā, sāva sāṭikā vassikasāṭikā. Puñchati anenāti puñchanaṃ, mukhassa puñchanaṃ mukhapuñchanaṃ. Nisīdanti etthāti nisīdanaṃ, mukhapuñchanañca nisīdanañca mukhapuñchananisīdanaṃ. Sayanasukhādiṃ paṭicca attharīyatīti paccattharaṇaṃ, tadeva paccattharaṇakaṃ. Kaṇḍuṃ chādetīti kaṇḍucchādi. Adhiṭṭhaheti ‘‘imaṃ saṅghāṭiṃ adhiṭṭhāmī’’tiādinā navannaṃ nāmaṃ gahetvā adhiṭṭheyya. Na vikappeyyāti tassa tassa nāmaṃ gahetvā na vikappeyya, tassa tassa pana nāmaṃ aggahetvā ‘‘imaṃ cīvaraṃ tuyhaṃ vikappemī’’ti vikappeyyāti adhippāyo. Etthāti imesu navasu cīvaresu. Ticīvaranti ticīvaranāmena adhiṭṭhitaṃ. Tathā hi adhiṭṭhānato pubbe visuṃ ticīvaraṃ nāma natthi saṅghāṭiādippahonakassa paccattharaṇādivasenāpi adhiṭṭhātuṃ anuññātattā. Taṃ vinā ekāhaṃ ekadivasampi. Na vaseyyāti aladdhasammutiko bhikkhu avippavāsasīmato aññattha vāsaṃ na kareyyāti attho. Evaṃ sati ticīvarañca nissajjitabbaṃ hoti, pācittiyañca āpattiṃ āpajjatīti dīpeti. Nisīdanaṃ vinā cātumāsaṃ na vaseyyāti sambandho. Catunnaṃ māsānaṃ samāhāro catumāsaṃ, tameva cātumāsaṃ. Taṃ accantasaṃyogavasena.
34. இதா³னி ‘‘இம’’ந்திஆதி³னா ‘‘அதி⁴ட்டெ²ய்யா’’தி வுத்தமதி⁴ட்டா²னங் த³ஸ்ஸேதி. ஸங்கா⁴டிங் ‘‘இமங் ஸங்கா⁴டிங் அதி⁴ட்டா²மீ’’தி அதி⁴ட்ட²ஹேதி ஸம்ப³ந்தோ⁴. தத்த² அதி⁴ட்ட²ஹேதி ஹத்த²பாஸே டி²தங் ஏவங் அதி⁴ட்டெ²ய்ய. அஹத்த²பாஸந்தி ஹத்த²ஸ்ஸ பாஸோ ஸமீபோ ஹத்த²பாஸோ, அட்³ட⁴தெய்யஹத்த²ப்³ப⁴ந்தரோ. த்³வாத³ஸஹத்த²ப்³ப⁴ந்தரோதிபி வத³ந்தி. நத்தி² ஹத்த²பாஸோ ஏதிஸ்ஸாதி அஹத்த²பாஸா, தங் ஏதந்தி அதி⁴ட்ட²ஹேதி ஸம்ப³ந்தோ⁴. கிங் வுத்தங் ஹோதி? அந்தோக³ப்³பே⁴ வா உபரிபாஸாதே³ வா தத³ஹேவ க³ந்த்வா நிவத்தனயொக்³கே³ பதே³ஸே வா டி²தங் சீவரங் ஸல்லக்கெ²த்வா ‘‘ஏதங் ஸங்கா⁴டிங் அதி⁴ட்டா²மீ’’தி அதி⁴ட்டெ²ய்யாதி வுத்தங் ஹோதி. ததோ தூ³ரே டி²தம்பி அதி⁴ட்டா²தப்³ப³ந்திபி வத³ந்தி. ஸேஸேஸுபீதி உத்தராஸங்கா³தி³கண்டு³ப்படிச்சா²தி³பரியந்தேஸுபி அவஸேஸசீவரேஸு. அயங் நயோதி அயமேவ நயோ. யதா² ஸங்கா⁴டியா, ஏவங் ‘‘இமங் உத்தராஸங்க³ங் அதி⁴ட்டா²மீ’’திஆதி³ வுத்தனயோவாதி வுத்தங் ஹோதி. அதி⁴ட்ட²ஹந்தேன பன ஹத்தே²ன க³ஹெத்வா காயவிகாரங் கரொந்தேன ‘‘இமங் ஸங்கா⁴டிங் அதி⁴ட்டா²மீ’’தி சித்தேன ஆபோ⁴க³ங் கத்வா காயேன வா அதி⁴ட்டா²தப்³ப³ங், வசீபே⁴த³மத்தங் கத்வா வாசாய வா. பரிக்கா²ரசோளங் நாம பாடேக்கங் நிதா⁴னமுக²ந்தி திசீவரங் பரிக்கா²ரசோளம்பி அதி⁴ட்டா²துங் வட்டதீதி.
34. Idāni ‘‘ima’’ntiādinā ‘‘adhiṭṭheyyā’’ti vuttamadhiṭṭhānaṃ dasseti. Saṅghāṭiṃ ‘‘imaṃ saṅghāṭiṃ adhiṭṭhāmī’’ti adhiṭṭhaheti sambandho. Tattha adhiṭṭhaheti hatthapāse ṭhitaṃ evaṃ adhiṭṭheyya. Ahatthapāsanti hatthassa pāso samīpo hatthapāso, aḍḍhateyyahatthabbhantaro. Dvādasahatthabbhantarotipi vadanti. Natthi hatthapāso etissāti ahatthapāsā, taṃ etanti adhiṭṭhaheti sambandho. Kiṃ vuttaṃ hoti? Antogabbhe vā uparipāsāde vā tadaheva gantvā nivattanayogge padese vā ṭhitaṃ cīvaraṃ sallakkhetvā ‘‘etaṃ saṅghāṭiṃ adhiṭṭhāmī’’ti adhiṭṭheyyāti vuttaṃ hoti. Tato dūre ṭhitampi adhiṭṭhātabbantipi vadanti. Sesesupīti uttarāsaṅgādikaṇḍuppaṭicchādipariyantesupi avasesacīvaresu. Ayaṃ nayoti ayameva nayo. Yathā saṅghāṭiyā, evaṃ ‘‘imaṃ uttarāsaṅgaṃ adhiṭṭhāmī’’tiādi vuttanayovāti vuttaṃ hoti. Adhiṭṭhahantena pana hatthena gahetvā kāyavikāraṃ karontena ‘‘imaṃ saṅghāṭiṃ adhiṭṭhāmī’’ti cittena ābhogaṃ katvā kāyena vā adhiṭṭhātabbaṃ, vacībhedamattaṃ katvā vācāya vā. Parikkhāracoḷaṃ nāma pāṭekkaṃ nidhānamukhanti ticīvaraṃ parikkhāracoḷampi adhiṭṭhātuṃ vaṭṭatīti.
35. இதா³னி ஏவங் அதி⁴ட்ட²ஹதோ அஞ்ஞங் லத்³தா⁴ அதி⁴ட்டா²துகாமேன பச்சுத்³த⁴ரித்வா அதி⁴ட்டா²தப்³ப³ந்தி த³ஸ்ஸேதுங் ‘‘அதி⁴ட்ட²ஹந்தோ’’திஆதி³மாஹ. தத்த² ஸங்கா⁴டி பபு⁴தி ஆதி³ யஸ்ஸ தங் ஸங்கா⁴டிப்பபு⁴தி. ஏதங் ‘‘அதி⁴ட்ட²ஹந்தோ’’தி எத்தா²பி ‘‘அதி⁴ட்டெ²ய்யா’’தி எத்தா²பி கம்மபத³ங், ‘‘புப்³ப³சீவர’’ந்தி எத்த² பன விஸேஸனங் ஹுத்வா திட்ட²தி. பச்சுத்³த⁴ரித்வாதி பரிச்சஜித்வா. பரிக்கா²ரசோளனாமேன அதி⁴ட்ட²ஹித்வா ட²பிதவத்தே²ஹி ஸங்கா⁴டிஆதீ³னி கரோதி, நிட்டி²தே ரஜனே ச கப்பே ச இமங் பரிக்கா²ரசோளங் பச்சுத்³த⁴ரித்வா புன அதி⁴ட்டா²தப்³பா³னி. பத்தாதி⁴ட்ட²ஹனேதி பத்தஸ்ஸ அதி⁴ட்டா²னே. ததா²தி ச யதா² சீவரே, ததா² பத்தேபி அதி⁴ட்டா²னாதி³கங் ஸப்³ப³ந்தி அத்தோ². எத்த² பன ‘‘இமங் பத்தங், ஏதங் பத்த’’ந்தி வா விஸேஸோ.
35. Idāni evaṃ adhiṭṭhahato aññaṃ laddhā adhiṭṭhātukāmena paccuddharitvā adhiṭṭhātabbanti dassetuṃ ‘‘adhiṭṭhahanto’’tiādimāha. Tattha saṅghāṭi pabhuti ādi yassa taṃ saṅghāṭippabhuti. Etaṃ ‘‘adhiṭṭhahanto’’ti etthāpi ‘‘adhiṭṭheyyā’’ti etthāpi kammapadaṃ, ‘‘pubbacīvara’’nti ettha pana visesanaṃ hutvā tiṭṭhati. Paccuddharitvāti pariccajitvā. Parikkhāracoḷanāmena adhiṭṭhahitvā ṭhapitavatthehi saṅghāṭiādīni karoti, niṭṭhite rajane ca kappe ca imaṃ parikkhāracoḷaṃ paccuddharitvā puna adhiṭṭhātabbāni. Pattādhiṭṭhahaneti pattassa adhiṭṭhāne. Tathāti ca yathā cīvare, tathā pattepi adhiṭṭhānādikaṃ sabbanti attho. Ettha pana ‘‘imaṃ pattaṃ, etaṃ patta’’nti vā viseso.
36. இதா³னி பச்சுத்³தா⁴ரவிதி⁴ங் த³ஸ்ஸேதுங் ‘‘ஏத’’ந்திஆதி³மாஹ. தத்த² இமங் வ இதி வா-ஸத்³தோ³ ரஸ்ஸங் கத்வா நித்³தி³ட்டோ², ஸோ இதி-ஸத்³த³தோ பரங் யோஜேதப்³போ³, தஸ்மா ‘‘ஏதங் ஸங்கா⁴டிங் பச்சுத்³த⁴ராமீ’’தி வா ‘‘இமங் ஸங்கா⁴டிங் பச்சுத்³த⁴ராமீ’’தி வா ஸங்ஸேதி ஸம்ப³ந்தோ⁴ வேதி³தப்³போ³. ஸங்ஸேதி வதெ³ய்ய. ஏவந்தி யதா² நாமேன ஸங்கா⁴டி பச்சுத்³த⁴ரிதப்³பா³, ததா² உத்தராஸங்கா³தீ³னீதி அத்தோ². விதூ³தி பச்சுத்³த⁴ரேதிமஸ்ஸ கத்துபத³ங், பஞ்ஞவாதி அத்தோ². ஸப்³ப³த்தா²பி தூ³ராஸன்னதாதீ³ வுத்தனயேன வேதி³தப்³பா³.
36. Idāni paccuddhāravidhiṃ dassetuṃ ‘‘eta’’ntiādimāha. Tattha imaṃ va iti vā-saddo rassaṃ katvā niddiṭṭho, so iti-saddato paraṃ yojetabbo, tasmā ‘‘etaṃ saṅghāṭiṃ paccuddharāmī’’ti vā ‘‘imaṃ saṅghāṭiṃ paccuddharāmī’’ti vā saṃseti sambandho veditabbo. Saṃseti vadeyya. Evanti yathā nāmena saṅghāṭi paccuddharitabbā, tathā uttarāsaṅgādīnīti attho. Vidūti paccuddharetimassa kattupadaṃ, paññavāti attho. Sabbatthāpi dūrāsannatādī vuttanayena veditabbā.
37-8. இதா³னி ஸங்கா⁴டிஆதீ³னங் ச²ன்னங் பமாணபரிச்சே²த³ங் த³ஸ்ஸேதி ‘‘ஸங்கா⁴டீ’’திஆதி³னா. பச்சி²மோ அந்தோ பச்சி²மந்தோ, தேன, பச்சி²மகோடியாதி அத்தோ². தீ³க⁴ஸோதி தீ³க⁴தோ. முட்டி²யா ஸஹிதங் பஞ்சகங் யஸ்ஸா ஸா முட்டி²பஞ்சகா, லிங்க³விபல்லாஸவஸேன பன முட்டி²பஞ்சகோ. முட்டி²-ஸத்³தே³னெத்த² உபசாரவஸேன கதமுட்டி²கோ ஹத்தோ²வ வுத்தோ. ஸுக³தஸ்ஸ சீவரதோ ஊனாதி ஸமாஸோ. அபீதி வுத்தஸமுச்சயே, தேன யதா²வுத்தபச்சி²மப்பமாணா ச அயஞ்ச உத்தமப்பமாணாதி அத்தோ². ‘‘பச்சி²மந்தேனா’’தி இத³ங் முட்டி²த்திகஞ்ச திரியந்தி எத்தா²பி அனுவத்தெத்வா அத்தோ² வேதி³தப்³போ³. ச-ஸத்³தோ³ ‘‘உத்தமந்தேன ஸுக³தசீவரூனாபி வட்டதீ’’தி இத³ங் ஸமுச்சினோதி. தத்த² இதா³னி மஜ்ஜி²மஸ்ஸ புரிஸஸ்ஸ திஸ்ஸோ வித³த்தி²யோ ஏகா ஸுக³தவித³த்தி², தாய வித³த்தி²யா நவ வித³த்தி²யோ தீ³க⁴தோ ஸுக³தசீவரப்பமாணங், திரியங் ச² வித³த்தி²யோ, தங் பன வட்³ட⁴கிஹத்தே²ன தீ³க⁴தோ தேரஸ ஹத்தா² ஏகா ச வித³த்தி², திரியதோ நவ ஹத்தா² ஹொந்தி. தங்வஸேன உப⁴யத்த² ஊனதா விஞ்ஞாதப்³பா³.
37-8. Idāni saṅghāṭiādīnaṃ channaṃ pamāṇaparicchedaṃ dasseti ‘‘saṅghāṭī’’tiādinā. Pacchimo anto pacchimanto, tena, pacchimakoṭiyāti attho. Dīghasoti dīghato. Muṭṭhiyā sahitaṃ pañcakaṃ yassā sā muṭṭhipañcakā, liṅgavipallāsavasena pana muṭṭhipañcako. Muṭṭhi-saddenettha upacāravasena katamuṭṭhiko hatthova vutto. Sugatassa cīvarato ūnāti samāso. Apīti vuttasamuccaye, tena yathāvuttapacchimappamāṇā ca ayañca uttamappamāṇāti attho. ‘‘Pacchimantenā’’ti idaṃ muṭṭhittikañca tiriyanti etthāpi anuvattetvā attho veditabbo. Ca-saddo ‘‘uttamantena sugatacīvarūnāpi vaṭṭatī’’ti idaṃ samuccinoti. Tattha idāni majjhimassa purisassa tisso vidatthiyo ekā sugatavidatthi, tāya vidatthiyā nava vidatthiyo dīghato sugatacīvarappamāṇaṃ, tiriyaṃ cha vidatthiyo, taṃ pana vaḍḍhakihatthena dīghato terasa hatthā ekā ca vidatthi, tiriyato nava hatthā honti. Taṃvasena ubhayattha ūnatā viññātabbā.
உத்தராஸங்கோ³பி தத்தகோவாதி த³ஸ்ஸேதுங் ‘‘ததா² ஏகங்ஸிகஸ்ஸபீ’’தி ஆஹ. ஏகோ அங்ஸோ ஏகங்ஸோ, தத்த² காதப்³ப³ந்தி தத்³தி⁴தே ஏகங்ஸிகங். ‘‘அந்தரவாஸகோ’’ச்சாதி³னா நிவாஸனங் த³ஸ்ஸேதி. தத்த² அந்தரங் மஜ்ஜ²பதே³ஸோ, அந்தரே மஜ்ஜே² கடிப்பதே³ஸே வாஸோ வத்த²ங் அந்தரவாஸோ, ஸோயேவ அந்தரவாஸகோ. சாபீதி ஸமுதா³யோ, ஏகோ வா ஸமுச்சயோ. அட்³டே⁴ன ததியோ பா⁴கோ³ அட்³ட⁴தெய்யோ. எத்த² த்³வின்னங் ஹத்த²கொட்டா²ஸானங் ஸம்புண்ணானங் ததியகொட்டா²ஸஸங்ஸிஜ்ஜ²னே கரணபூ⁴தா அட்³ட⁴-ஸத்³த³னித்³தி³ட்டா² யா வித³த்தி² , ஸாவ ததியோதி நித்³தி³ட்டோ²தி உபட்³ட⁴ஹத்த²ஸங்கா²தோ ததியோ பா⁴கோ³ அட்³ட⁴தெய்யோ. ஸோ ச நானந்தரேன த்³விஹத்த²ததியதா லப்³ப⁴தீதி த்³வே ஹத்தா², ஏகா ச வித³த்தி² அட்³ட⁴தெய்யோ. தங்ஸன்னியோகே³ன பனெத்த² அந்தரவாஸகோவ அட்³ட⁴தெய்யோதி வேதி³தப்³போ³. த்³வே ஹத்தா² யஸ்ஸாதி பா³ஹிரத்த²ஸமாஸோ. பாருபனேனாபி ஸக்கா நாபி⁴ங் படிச்சா²தே³துந்தி ‘‘த்³விஹத்தோ²’’தி வுத்தங். வா-ஸத்³தோ³ அட்³ட⁴தெய்யங் விகப்பேதி. திரியஸ்ஸ அந்தோதி ச²ட்டீ²தப்புரிஸோ, திரியமேவ அந்தோதி வா கம்மதா⁴ரயோ ‘‘கா³மந்தோ’’திஆதீ³ஸு விய.
Uttarāsaṅgopi tattakovāti dassetuṃ ‘‘tathā ekaṃsikassapī’’ti āha. Eko aṃso ekaṃso, tattha kātabbanti taddhite ekaṃsikaṃ. ‘‘Antaravāsako’’ccādinā nivāsanaṃ dasseti. Tattha antaraṃ majjhapadeso, antare majjhe kaṭippadese vāso vatthaṃ antaravāso, soyeva antaravāsako. Cāpīti samudāyo, eko vā samuccayo. Aḍḍhena tatiyo bhāgo aḍḍhateyyo. Ettha dvinnaṃ hatthakoṭṭhāsānaṃ sampuṇṇānaṃ tatiyakoṭṭhāsasaṃsijjhane karaṇabhūtā aḍḍha-saddaniddiṭṭhā yā vidatthi , sāva tatiyoti niddiṭṭhoti upaḍḍhahatthasaṅkhāto tatiyo bhāgo aḍḍhateyyo. So ca nānantarena dvihatthatatiyatā labbhatīti dve hatthā, ekā ca vidatthi aḍḍhateyyo. Taṃsanniyogena panettha antaravāsakova aḍḍhateyyoti veditabbo. Dve hatthā yassāti bāhiratthasamāso. Pārupanenāpi sakkā nābhiṃ paṭicchādetunti ‘‘dvihattho’’ti vuttaṃ. Vā-saddo aḍḍhateyyaṃ vikappeti. Tiriyassa antoti chaṭṭhītappuriso, tiriyameva antoti vā kammadhārayo ‘‘gāmanto’’tiādīsu viya.
39. ‘‘நிஸீத³னஸ்ஸா’’திஆதி³னா நிஸீத³னசீவரங் த³ஸ்ஸேதி. எத்த² நிஸீத³னங் நாம ஸமே பூ⁴மிபா⁴கே³ ஏளகலோமானி உபரூபரி ஸந்த²ரித்வா கஞ்ஜிகாதீ³ஹி ஸிஞ்சித்வா கதோ த்³வீஸு டா²னேஸு பா²லிதத்தா தீஹி த³ஸாஹி யுத்தோ பரிக்கா²ரவிஸேஸோ. வித³த்தீ² த்³வேதி த்³வே வித³த்தீ². விஸாலதோ புது²லதோ.
39.‘‘Nisīdanassā’’tiādinā nisīdanacīvaraṃ dasseti. Ettha nisīdanaṃ nāma same bhūmibhāge eḷakalomāni uparūpari santharitvā kañjikādīhi siñcitvā kato dvīsu ṭhānesu phālitattā tīhi dasāhi yutto parikkhāraviseso. Vidatthī dveti dve vidatthī. Visālato puthulato.
40. ‘‘கண்டு³ப்படிச்சா²தீ³’’திஆதி³னா கண்டு³ப்படிச்சா²தி³ங் த³ஸ்ஸேதி. தத்த² கண்டூ³தி ஹி ந அத்த²தோ நானங், தக்³க³ஹணேன பனெத்த² பிளகஸ்ஸாவது²ல்லகச்சா²பா³த⁴ங் க³ய்ஹதி. கண்டு³ங் யதா²வுத்தங் பிளகாதி³ங் படிச்சா²தே³தீதி கண்டு³ப்படிச்சா²தி³. படிச்ச²த³னங் வா படிச்சா²தோ³, யதா²வுத்தகண்டு³யா படிச்சா²தோ³ கண்டு³ப்படிச்சா²தோ³, ஸோ அஸ்ஸ அத்தீ²தி கண்டு³ப்படிச்சா²தீ³, தஸ்ஸ. திரியந்தி திரியதோ.
40.‘‘Kaṇḍuppaṭicchādī’’tiādinā kaṇḍuppaṭicchādiṃ dasseti. Tattha kaṇḍūti hi na atthato nānaṃ, taggahaṇena panettha piḷakassāvathullakacchābādhaṃ gayhati. Kaṇḍuṃ yathāvuttaṃ piḷakādiṃ paṭicchādetīti kaṇḍuppaṭicchādi. Paṭicchadanaṃ vā paṭicchādo, yathāvuttakaṇḍuyā paṭicchādo kaṇḍuppaṭicchādo, so assa atthīti kaṇḍuppaṭicchādī, tassa. Tiriyanti tiriyato.
41. ‘‘வஸ்ஸிகா’’திஆதி³னா வஸ்ஸிகஸாடிகங் த³ஸ்ஸேதி, தங் ஸுவிஞ்ஞெய்யங்.
41.‘‘Vassikā’’tiādinā vassikasāṭikaṃ dasseti, taṃ suviññeyyaṃ.
42. ஏவங் பமாணவந்தானங் பமாணங் த³ஸ்ஸெத்வா வுத்தப்பமாணாதிக்கமே தோ³ஸங், கேஸஞ்சி பமாணாபா⁴வக³ணனாபா⁴வஞ்ச த³ஸ்ஸேதுங் ‘‘எத்தா²’’திஆதி³மாஹ. தத்த² எத்தா²தி வுத்தப்பமாணவந்தேஸு சீவரேஸு. தது³த்தரி ததோ வுத்தப்பமாணதோ உத்தரி நிபாதேன உத்தரி-ஸத்³தே³ன தப்புரிஸோ. கரொந்தஸ்ஸ ஸம்பாதெ³ந்தஸ்ஸ. சே²த³னபாசித்தீதி சே²த³னேன ஸஹிதா பாசித்தி, அதிரேகங் சி²ந்தி³த்வா பாசித்தியங் தே³ஸேதப்³ப³ந்தி வுத்தங் ஹோதி. வுத்தப்பமாணதோ பன அதிரேகஞ்ச ஊனகஞ்ச ‘‘பரிக்கா²ரசோள’’ந்தி அதி⁴ட்டா²தப்³ப³ங். யேன முக²ங் புஞ்ச²ந்தி, தங் முக²ஸம்ப³ந்தீ⁴தி முக²ஸ்ஸ சோளந்தி ஸமாஸே த்³வந்தோ³. ஆகங்கி²தங் இச்சி²தங் பமாணந்தி கம்மதா⁴ரயோ. தமேதேஸமத்தீ²தி ஆகங்கி²தப்பமாணிகா. எத்த² ச திசீவராதீ³ஸு அவுத்தேபி க³ணனவிபா⁴கே³ பச்சத்த²ரணமுக²புஞ்ச²னபரிக்கா²ரசோளே ட²பெத்வா ஆதி³தோ பட்டா²ய ச²க்கமேகேகமேவ வட்டதி. முக²புஞ்ச²னசோளானி பச்சத்த²ரணானி ச ப³ஹூனிபீதி விஞ்ஞாதப்³ப³ங்.
42. Evaṃ pamāṇavantānaṃ pamāṇaṃ dassetvā vuttappamāṇātikkame dosaṃ, kesañci pamāṇābhāvagaṇanābhāvañca dassetuṃ ‘‘etthā’’tiādimāha. Tattha etthāti vuttappamāṇavantesu cīvaresu. Taduttari tato vuttappamāṇato uttari nipātena uttari-saddena tappuriso. Karontassa sampādentassa. Chedanapācittīti chedanena sahitā pācitti, atirekaṃ chinditvā pācittiyaṃ desetabbanti vuttaṃ hoti. Vuttappamāṇato pana atirekañca ūnakañca ‘‘parikkhāracoḷa’’nti adhiṭṭhātabbaṃ. Yena mukhaṃ puñchanti, taṃ mukhasambandhīti mukhassa coḷanti samāse dvando. Ākaṅkhitaṃ icchitaṃ pamāṇanti kammadhārayo. Tametesamatthīti ākaṅkhitappamāṇikā. Ettha ca ticīvarādīsu avuttepi gaṇanavibhāge paccattharaṇamukhapuñchanaparikkhāracoḷe ṭhapetvā ādito paṭṭhāya chakkamekekameva vaṭṭati. Mukhapuñchanacoḷāni paccattharaṇāni ca bahūnipīti viññātabbaṃ.
43. க³ணனாதி எத்த² நபுங்ஸகஸ்ஸ இத்தி²வசனேன யோகா³பா⁴வா ‘‘ந தீ³பிதா’’தி லிங்க³ங் விபரிணாமெத்வா ஸம்ப³ந்தி⁴தப்³ப³ங், அட்ட²கதா²யங் ந பகாஸிதாதி அத்தோ². திண்ணங் பனேதேஸங் உக்கட்ட²பரிச்சே²த³வஸேனேவ வுத்தங், விகப்பனூபக³பச்சி²மேன பச்சி²மப்பமாணங் அத்தி²யேவ. இதா³னி யஸ்மா தத்த² தங் ஸப்³ப³ங் ந தீ³பிதங், தஸ்மா விகப்பனூபக³த²விகாதி³ ஸப்³ப³ங் ஏகங் ‘‘பரிக்கா²ரசோள’’ந்தி, ப³ஹூனி ஏகதோ கத்வா ‘‘பரிக்கா²ரசோளானீ’’திபி வத்வா அதி⁴ட்டா²தப்³ப³ந்தி த³ஸ்ஸெந்தோ ‘‘ததா²’’திஆதி³மாஹ. இமினா பரிக்கா²ரசோளங் நாம பாடேக்கங் நிதா⁴னமுக²ந்தி த³ஸ்ஸேதி. த²விகாதி³ங் த²விகா ஆதி³ யஸ்ஸ பரிஸ்ஸாவனாதி³னோதி ஸமாஸோ. விகப்பஸ்ஸ உபக³ங் விகப்பியங், தஞ்ச உபரி வக்க²தி.
43.Gaṇanāti ettha napuṃsakassa itthivacanena yogābhāvā ‘‘na dīpitā’’ti liṅgaṃ vipariṇāmetvā sambandhitabbaṃ, aṭṭhakathāyaṃ na pakāsitāti attho. Tiṇṇaṃ panetesaṃ ukkaṭṭhaparicchedavaseneva vuttaṃ, vikappanūpagapacchimena pacchimappamāṇaṃ atthiyeva. Idāni yasmā tattha taṃ sabbaṃ na dīpitaṃ, tasmā vikappanūpagathavikādi sabbaṃ ekaṃ ‘‘parikkhāracoḷa’’nti, bahūni ekato katvā ‘‘parikkhāracoḷānī’’tipi vatvā adhiṭṭhātabbanti dassento ‘‘tathā’’tiādimāha. Iminā parikkhāracoḷaṃ nāma pāṭekkaṃ nidhānamukhanti dasseti. Thavikādiṃ thavikā ādi yassa parissāvanādinoti samāso. Vikappassa upagaṃ vikappiyaṃ, tañca upari vakkhati.
44. இதா³னி திண்ணங் சீவரானங் படிபா⁴க³ங் த³ஸ்ஸேதுங் ‘‘அஹதா’’திஆதி³ ஆரத்³த⁴ங். தத்த² அஹதேன நவேன அதோ⁴தேன கப்பங் ஸதி³ஸங் அஹதகப்பங், ஏகவாரதோ⁴தங். அஹதஞ்ச அஹதகப்பஞ்ச அஹதாஹதகப்பானி, வத்தா²னி, தேஸங். த்³வே கு³ணா படலானி யஸ்ஸ ஸாதி து³கு³ணா. ‘‘கு³ணோ படலராஸீஸூ’’தி ஹி அபி⁴தா⁴னப்பதீ³பிகா. து³கு³ணா து³பட்டா, உத்தரஸ்மிங் தே³ஹபா⁴கே³ ஆஸஞ்ஜீயதீதி உக்கராஸங்கோ³. ஏகச்சங் ஏகபட்டங் அஸ்ஸ அத்தீ²தி ஏகச்சீ, ஏகபட்டோதி அத்தோ². நிபாதோ வா ஏகச்சீதி. ததா²தி ஸமுச்சயே, அந்தரவாஸகோ சாதி வுத்தங் ஹோதி. உபமாயங் வா, யதா² உத்தராஸங்கோ³ ஏகச்சியோ, ஏவங் அந்தரவாஸகோதி அத்தோ².
44. Idāni tiṇṇaṃ cīvarānaṃ paṭibhāgaṃ dassetuṃ ‘‘ahatā’’tiādi āraddhaṃ. Tattha ahatena navena adhotena kappaṃ sadisaṃ ahatakappaṃ, ekavāradhotaṃ. Ahatañca ahatakappañca ahatāhatakappāni, vatthāni, tesaṃ. Dve guṇā paṭalāni yassa sāti duguṇā. ‘‘Guṇo paṭalarāsīsū’’ti hi abhidhānappadīpikā. Duguṇā dupaṭṭā, uttarasmiṃ dehabhāge āsañjīyatīti ukkarāsaṅgo. Ekaccaṃ ekapaṭṭaṃ assa atthīti ekaccī, ekapaṭṭoti attho. Nipāto vā ekaccīti. Tathāti samuccaye, antaravāsako cāti vuttaṃ hoti. Upamāyaṃ vā, yathā uttarāsaṅgo ekacciyo, evaṃ antaravāsakoti attho.
45. ‘‘உதூ’’தி அனேகஉது க³ஹிதாதி உதுதோ தீ³க⁴காலதோ உத்³த⁴டா உதுத்³த⁴டா, தேஸங் பிலோதிகானந்தி அத்தோ². ஸேஸாதி உத்தராஸங்க³அந்தரவாஸகா. பங்ஸு விய குச்சி²தங் உலதி பவத்ததீதி பங்ஸுகூலங், ரதி²காஸுஸானஸங்காரகூடாதீ³னங் யத்த² கத்த²சி டி²தங் சோளக²ண்ட³ங், தஸ்மிங். யா யா ருசீதி அப்³யயீபா⁴வே யதா²ருசி, யாவத³த்த²ங் ஸதபட்டம்பி வட்டதீதி அதி⁴ப்பாயோ.
45. ‘‘Utū’’ti anekautu gahitāti ututo dīghakālato uddhaṭā utuddhaṭā, tesaṃ pilotikānanti attho. Sesāti uttarāsaṅgaantaravāsakā. Paṃsu viya kucchitaṃ ulati pavattatīti paṃsukūlaṃ, rathikāsusānasaṅkārakūṭādīnaṃ yattha katthaci ṭhitaṃ coḷakhaṇḍaṃ, tasmiṃ. Yā yā rucīti abyayībhāve yathāruci, yāvadatthaṃ satapaṭṭampi vaṭṭatīti adhippāyo.
46. இதா³னி தீஸு சி²ந்தி³த்வா காதுங் அப்பஹொந்தேஸு காதப்³ப³விதி⁴ங் த³ஸ்ஸேதுங் ‘‘தீஸூ’’திஆதி³மாஹ. தத்த² திசீவரஸமுதா³யதோ ஏகதே³ஸபூ⁴தானங் த்³வின்னமேகஸ்ஸ ச ஸங்கா²கு³ணேன நித்³தா⁴ரியமானத்தா தீஸூதி நித்³தா⁴ரணே பு⁴ம்மங். ஏகவசனஸ்ஸ ப³ஹ்வத்தே²ன யோகா³பா⁴வதோ த்³விசீவரஸங்கா²தப³ஹ்வத்த²வஸேன வசனங் விபரிணாமெத்வா யானி பஹொந்தி, தானி த்³வே வாபி சி²ந்தி³தப்³பா³னி, யங் பஹோதி, தங் ஏகங் வா சி²ந்தி³தப்³ப³ந்தி யோஜேதப்³ப³ங். பஹொந்தீதி பச்சி²மசீவரப்பமாணசி²ன்னகானி பஹொந்தி. அபீதி ஸம்பா⁴வனே, தீஸு கா கதா²தி அத்தோ². அன்வாதி⁴ந்தி ஆக³ந்துகபத்தங். அனு பச்சா² ஆதீ⁴யதீதி அன்வாதி⁴, யங் சீவரஸ்ஸோபரி ஸங்கா⁴டிஆகாரேன ஆரோபேதப்³ப³ங். அனாதி³ண்ணந்தி அனாரோபிதங் அன்வாதி⁴கங். ந தா⁴ரெய்யாதி இமினா யதி³ தா⁴ரெய்ய, து³க்கடந்தி தீ³பேதி.
46. Idāni tīsu chinditvā kātuṃ appahontesu kātabbavidhiṃ dassetuṃ ‘‘tīsū’’tiādimāha. Tattha ticīvarasamudāyato ekadesabhūtānaṃ dvinnamekassa ca saṅkhāguṇena niddhāriyamānattā tīsūti niddhāraṇe bhummaṃ. Ekavacanassa bahvatthena yogābhāvato dvicīvarasaṅkhātabahvatthavasena vacanaṃ vipariṇāmetvā yāni pahonti, tāni dve vāpi chinditabbāni, yaṃ pahoti, taṃ ekaṃ vā chinditabbanti yojetabbaṃ. Pahontīti pacchimacīvarappamāṇachinnakāni pahonti. Apīti sambhāvane, tīsu kā kathāti attho. Anvādhinti āgantukapattaṃ. Anu pacchā ādhīyatīti anvādhi, yaṃ cīvarassopari saṅghāṭiākārena āropetabbaṃ. Anādiṇṇanti anāropitaṃ anvādhikaṃ. Na dhāreyyāti iminā yadi dhāreyya, dukkaṭanti dīpeti.
47-8. இதா³னி ‘‘திசீவரங் ந வஸெய்ய வினேகாஹ’’ந்தி வுத்தானங் திண்ணங் அவிப்பவாஸலக்க²ணங் த³ஸ்ஸேதுங் ‘‘கா³மே’’திஆதி³னா உதோ³ஸிதஸிக்கா²பதே³ (பாரா॰ 471 ஆத³யோ) வுத்தபரிஹாரமாஹ. தத்த² கா³மே வா…பே॰… விஹாரே வா திசீவரங் நிக்கி²பித்வாதி ஸம்ப³ந்தோ⁴. தத்த² ‘‘படோ த³ட்³டோ⁴’’திஆதீ³ஸு விய அவயவேபி ஸமுதா³யவோஹாரவஸேன தீஸு ஏகம்பி ‘‘திசீவர’’ந்தி வுத்தங். பி⁴க்கு²ஸம்முதியஞ்ஞத்ராதி ஸங்கே⁴ன கி³லானஸ்ஸ பி⁴க்கு²னோ தீ³யமானங் சீவரேன விப்பவாஸஸம்முதிங் வினா. விப்பவத்து²ந்தி ஏகூபசாரனானூபசாரகா³மாதி³தோ ப³ஹி, அத² வா நிவேஸனாதீ³னங், தத்த² ச க³ப்³போ⁴வரகானங் சீவரஸ்ஸ வா ஹத்த²பாஸங் அதிக்கம்ம சீவரேன விப்பயுத்தோ ஹுத்வா வஸிதுங். எத்த² ச கா³மாதீ³னங் ஏகூபசாரனானூபசாரதா ஏககுலனானாகுலஸந்தகஸ்ஸ கா³மாதி³னோ பரிக்கே²பஸ்ஸ, பரிக்கே²போகாஸஸ்ஸ ச வஸேன ஸத்த²அப்³போ⁴காஸானங் ஸத்தப்³ப⁴ந்தரவஸேன ச வேதி³தப்³பா³. தத்த² ஏகோ அப்³ப⁴ந்தரோ அட்ட²வீஸதிஹத்தோ² ஹோதி. எத்த² ச நிவேஸனாதீ³னி கா³மதோ ப³ஹி ஸன்னிவிட்டா²னீதி த³ட்ட²ப்³ப³ங் விஸுங் கா³மஸ்ஸ க³ஹிதத்தா, ததா² உதோ³ஸிதாதீ³ஹி அஞ்ஞங் நிவேஸனங்.
47-8. Idāni ‘‘ticīvaraṃ na vaseyya vinekāha’’nti vuttānaṃ tiṇṇaṃ avippavāsalakkhaṇaṃ dassetuṃ ‘‘gāme’’tiādinā udositasikkhāpade (pārā. 471 ādayo) vuttaparihāramāha. Tattha gāme vā…pe… vihāre vā ticīvaraṃ nikkhipitvāti sambandho. Tattha ‘‘paṭo daḍḍho’’tiādīsu viya avayavepi samudāyavohāravasena tīsu ekampi ‘‘ticīvara’’nti vuttaṃ. Bhikkhusammutiyaññatrāti saṅghena gilānassa bhikkhuno dīyamānaṃ cīvarena vippavāsasammutiṃ vinā. Vippavatthunti ekūpacāranānūpacāragāmādito bahi, atha vā nivesanādīnaṃ, tattha ca gabbhovarakānaṃ cīvarassa vā hatthapāsaṃ atikkamma cīvarena vippayutto hutvā vasituṃ. Ettha ca gāmādīnaṃ ekūpacāranānūpacāratā ekakulanānākulasantakassa gāmādino parikkhepassa, parikkhepokāsassa ca vasena satthaabbhokāsānaṃ sattabbhantaravasena ca veditabbā. Tattha eko abbhantaro aṭṭhavīsatihattho hoti. Ettha ca nivesanādīni gāmato bahi sanniviṭṭhānīti daṭṭhabbaṃ visuṃ gāmassa gahitattā, tathā udositādīhi aññaṃ nivesanaṃ.
தத்த² உதோ³ஸிதோ நாம யானாதீ³னங் ப⁴ண்டா³னங் ஸாலா. பாஸாதோ³ தீ³க⁴பாஸாதோ³. ஹம்மியங் முண்ட³ச்ச²த³னபாஸாதோ³. நாவா ச அட்டோ ச மாளோ ச ஆராமோ ச நாவா…பே॰… ஆராமங், தஸ்மிங். அட்டோ நாம படிராஜாதீ³னங் படிபா³ஹனத்த²ங் இட்ட²காஹி கதோ ப³ஹலபி⁴த்திகோ சதுபஞ்சபூ⁴மிகோ பதிஸ்ஸயவிஸேஸோ. மாளோ ஏககூடஸங்க³ஹிதோ சதுரஸ்ஸபாஸாதோ³. ஆராமோ புப்பா²ராமோ வா ப²லாராமோ வா. ஸத்தோ² ச கெ²த்தஞ்ச க²லஞ்சாதி த்³வந்தோ³. ஸத்தோ² நாம ஜங்க⁴ஸத்தோ² வா ஸகடஸத்தோ² வா. க²லங் வுச்சதி த⁴ஞ்ஞகரணங். து³மோ நாம து³மமூலங் சா²யாய பு²ட்டோ²காஸோ உபசாரவஸேன. அப்³போ⁴காஸோ பன அகா³மகே அரஞ்ஞேவ அதி⁴ப்பேதோ.
Tattha udosito nāma yānādīnaṃ bhaṇḍānaṃ sālā. Pāsādo dīghapāsādo. Hammiyaṃ muṇḍacchadanapāsādo. Nāvā ca aṭṭo ca māḷo ca ārāmo ca nāvā…pe… ārāmaṃ, tasmiṃ. Aṭṭo nāma paṭirājādīnaṃ paṭibāhanatthaṃ iṭṭhakāhi kato bahalabhittiko catupañcabhūmiko patissayaviseso. Māḷo ekakūṭasaṅgahito caturassapāsādo. Ārāmo pupphārāmo vā phalārāmo vā. Sattho ca khettañca khalañcāti dvando. Sattho nāma jaṅghasattho vā sakaṭasattho vā. Khalaṃ vuccati dhaññakaraṇaṃ. Dumo nāma dumamūlaṃ chāyāya phuṭṭhokāso upacāravasena. Abbhokāso pana agāmake araññeva adhippeto.
49. இதா³னி ‘‘ஏதங்…பே॰… ஸங்கா⁴டி’’ந்திஆதி³னா நவன்னமேவ பச்சுத்³தா⁴ரோ வுத்தோ, ந பன தேஸங் காலபரிச்சே²தோ³தி தங் த³ஸ்ஸேதுங் ‘‘ரோகா³’’திஆதி³ ஆரத்³த⁴ங். தத்த² தே³வத³த்தோ த³த்தோதி நாமேகதே³ஸேனாபி நாமவோஹாரதோ வஸ்ஸிகஸாடிகாவ ‘‘ஸாடிகா’’தி பகரணவஸேன க³ம்மமானத்த²த்தா வுத்தா. கண்டு³ப்படிச்சா²தி³கா ச ரோக³வஸ்ஸானபரியந்தா. ரோகா³ ச வஸ்ஸானா ச மாஸா ரோக³வஸ்ஸானா, தே தத³திக்கமேன பச்சுத்³த⁴ரிதப்³ப³தாய பரியந்தா யாஸந்தி விக்³க³ஹோ.
49. Idāni ‘‘etaṃ…pe… saṅghāṭi’’ntiādinā navannameva paccuddhāro vutto, na pana tesaṃ kālaparicchedoti taṃ dassetuṃ ‘‘rogā’’tiādi āraddhaṃ. Tattha devadatto dattoti nāmekadesenāpi nāmavohārato vassikasāṭikāva ‘‘sāṭikā’’ti pakaraṇavasena gammamānatthattā vuttā. Kaṇḍuppaṭicchādikā ca rogavassānapariyantā. Rogā ca vassānā ca māsā rogavassānā, te tadatikkamena paccuddharitabbatāya pariyantā yāsanti viggaho.
கிங் வுத்தங் ஹோதி? வஸ்ஸிகஸாடிகா வஸ்ஸானமாஸாதிக்கமே கத்திகபுண்ணமாய ஏவ பச்சுத்³த⁴ரிதப்³பா³. ததா² கண்டு³ப்படிச்சா²தி³கா ஆபா³தே⁴ஸு வூபஸந்தேஸூதி வுத்தங் ஹோதி. ‘‘பச்சுத்³த⁴ரித்வா விகப்பேதப்³பா³’’தி ஹி அட்ட²கதா²யங் (பாரா॰ அட்ட²॰ 2.469) வுத்தங். எத்த² பன கேசி ஆசரியா ‘‘பச்சுத்³த⁴ரித்வாதி வஸ்ஸிகஸாடிகபா⁴வதோ அபனெத்வா’’தி வதி³ங்ஸு, தங் ந யுஜ்ஜதி. பச்சுத்³தா⁴ரவினயகம்மவிஸயேயேவ பச்சுத்³தா⁴ர-ஸத்³த³ஸ்ஸ தி³ட்ட²த்தா, ‘‘சாதுமாஸங் அதி⁴ட்டா²துங் ததோ பரங் விகப்பேது’’ந்தி (மஹாவ॰ 358) பாளிவசனதோ ச. ‘‘சாதுமாஸங் அதி⁴ட்டா²து’’ந்தி ச சதுன்னங் மாஸானங் அதி⁴ட்டா²னேன ஸஹ அச்சந்தஸங்யோகோ³ த³ஸ்ஸிதோதி ந தேன அதி⁴ட்டா²னபே⁴தோ³ விஞ்ஞாயதி. தேனேவ குருந்த³ட்ட²கதா²யம்பி ‘‘வஸ்ஸானங் சாதுமாஸங் அதி⁴ட்டா²துங், ததோ பரங் விகப்பேது’’ந்தி (மஹாவ॰ 358) வசனதோ கத்திகபுண்ணமாய ஏவ பச்சுத்³த⁴ரித்வா ஹேமந்தே விகப்பேதப்³பா³தி வுத்தங். தஸ்மா ‘‘வஸ்ஸிகஸாடிகா வஸ்ஸானமாஸாதிக்கமேனாபி கண்டு³ப்படிச்சா²தி³ ஆபா³த⁴வூபஸமேனாபி அதி⁴ட்டா²னங் விஜஹதீ’’தி (கங்கா॰ அட்ட²॰ கதி²னஸிக்கா²பத³வண்ணனா) வுத்தங். மாதிகாட்ட²கதா²யம்பி பச்சுத்³தா⁴ரவஸேனாபி அதி⁴ட்டா²னங் விஜஹதீதி ஏவமத்தோ² க³ஹேதப்³போ³. ஏவஞ்ஹி ஸதி ஸப்³ப³ட்ட²கதா²யோ ஸமெந்தி, யுத்தி ச அவிருத்³தா⁴ ஹொந்தீதி. ததோ பரந்தி பச்சுத்³தா⁴ரதோ உபரி. விகப்பெய்யாதி கண்டு³ப்படிச்சா²தி³ங் பச்சுத்³த⁴ரித்வா விகப்பெய்ய. வஸ்ஸிகஸாடிகங் கத்திகபுண்ணமாயங் பச்சுத்³த⁴ரித்வா ஹேமந்தஸ்ஸ பட²மதி³வஸே விகப்பெய்ய, ஏவங் அஸதி து³க்கடந்தி அதி⁴ப்பாயோ. ஸேஸாதி அபரே ஸத்த சீவரானி ஸேஸா. நத்தி² பரியந்தங் வுத்தஸதி³ஸோ காலபரிச்சே²தோ³ ஏதேஸந்தி அபரியந்திகா.
Kiṃ vuttaṃ hoti? Vassikasāṭikā vassānamāsātikkame kattikapuṇṇamāya eva paccuddharitabbā. Tathā kaṇḍuppaṭicchādikā ābādhesu vūpasantesūti vuttaṃ hoti. ‘‘Paccuddharitvā vikappetabbā’’ti hi aṭṭhakathāyaṃ (pārā. aṭṭha. 2.469) vuttaṃ. Ettha pana keci ācariyā ‘‘paccuddharitvāti vassikasāṭikabhāvato apanetvā’’ti vadiṃsu, taṃ na yujjati. Paccuddhāravinayakammavisayeyeva paccuddhāra-saddassa diṭṭhattā, ‘‘cātumāsaṃ adhiṭṭhātuṃ tato paraṃ vikappetu’’nti (mahāva. 358) pāḷivacanato ca. ‘‘Cātumāsaṃ adhiṭṭhātu’’nti ca catunnaṃ māsānaṃ adhiṭṭhānena saha accantasaṃyogo dassitoti na tena adhiṭṭhānabhedo viññāyati. Teneva kurundaṭṭhakathāyampi ‘‘vassānaṃ cātumāsaṃ adhiṭṭhātuṃ, tato paraṃ vikappetu’’nti (mahāva. 358) vacanato kattikapuṇṇamāya eva paccuddharitvā hemante vikappetabbāti vuttaṃ. Tasmā ‘‘vassikasāṭikā vassānamāsātikkamenāpi kaṇḍuppaṭicchādi ābādhavūpasamenāpi adhiṭṭhānaṃ vijahatī’’ti (kaṅkā. aṭṭha. kathinasikkhāpadavaṇṇanā) vuttaṃ. Mātikāṭṭhakathāyampi paccuddhāravasenāpi adhiṭṭhānaṃ vijahatīti evamattho gahetabbo. Evañhi sati sabbaṭṭhakathāyo samenti, yutti ca aviruddhā hontīti. Tato paranti paccuddhārato upari. Vikappeyyāti kaṇḍuppaṭicchādiṃ paccuddharitvā vikappeyya. Vassikasāṭikaṃ kattikapuṇṇamāyaṃ paccuddharitvā hemantassa paṭhamadivase vikappeyya, evaṃ asati dukkaṭanti adhippāyo. Sesāti apare satta cīvarāni sesā. Natthi pariyantaṃ vuttasadiso kālaparicchedo etesanti apariyantikā.
50. இதா³னி பச்சத்த²ரணாதி³கங் சீவரசதுக்கங் ஸத³ஸாதி³கங் வட்டதி, நாபரந்தி த³ஸ்ஸேதுங் ‘‘பச்சத்த²ரணா’’திஆதி³மாஹ. தத்த² பரிக்கா²ரோ ச முக²புஞ்ச²னஞ்சாதி த்³வந்தோ³. பரிக்கா²ரமுக²புஞ்ச²னமேவ சோளகந்தி கம்மதா⁴ரயோ. த்³வந்த³ஸமாஸந்தே ஸுய்யமானத்தா பன சோளக-ஸத்³தோ³ பரிக்கா²ர-ஸத்³த³தோ ச பரங் த³ட்ட²ப்³போ³ ‘‘பரிக்கா²ரசோளக’’ந்தி. தங் பன ஸாமஞ்ஞஜோதனாய விஸேஸேபி அவட்டா²னதோ ட²பெத்வா பஞ்ச சீவரானி பரிக்கா²ரசோளனாமேனாதி⁴ட்டி²தானி அவஸேஸங் த³ட்ட²ப்³ப³ங். பச்சத்த²ரணஞ்ச பரிக்கா²ரமுக²புஞ்ச²னசோளகஞ்ச பச்சத்த²ரண…பே॰… சோளகஞ்ச நிஸீத³னஞ்சாதி ஏதங் சீவரசதுக்கங் ஸத³ஸம்பி அரத்தம்பி அனாதி³ண்ணகப்பம்பி லப்³ப⁴ந்தி ஸம்ப³ந்தோ⁴. ஸத³ஸந்தி ஸஹ யாஹி காஹிசி த³ஸாஹீதி ஸத³ஸங். ஸத³ஸகே லப்³ப⁴மானே அத³ஸம்பி லப்³ப⁴தேவாதி ஸத³ஸம்பி அத³ஸம்பி புப்ப²த³ஸம்பீதி எத்த² அத்தோ². பி-ஸத்³தோ³ வுத்தாவுத்தஸம்பிண்ட³னத்தோ². அரத்தந்தி நீலபீதாதி³ரஜனேன அரஞ்ஜிதம்பி. பி-ஸத்³தே³ன ரஞ்ஜிதனீலபீதாதி³கம்பி அனாதி³ண்ணகப்பம்பீதி. ஆதி³ண்ணோ கப்போ யஸ்ஸ நத்தீ²தி தங் அனாதி³ண்ணகப்பம்பி. பி-ஸத்³தே³ன ஆதி³ண்ணகப்பம்பி.
50. Idāni paccattharaṇādikaṃ cīvaracatukkaṃ sadasādikaṃ vaṭṭati, nāparanti dassetuṃ ‘‘paccattharaṇā’’tiādimāha. Tattha parikkhāro ca mukhapuñchanañcāti dvando. Parikkhāramukhapuñchanameva coḷakanti kammadhārayo. Dvandasamāsante suyyamānattā pana coḷaka-saddo parikkhāra-saddato ca paraṃ daṭṭhabbo ‘‘parikkhāracoḷaka’’nti. Taṃ pana sāmaññajotanāya visesepi avaṭṭhānato ṭhapetvā pañca cīvarāni parikkhāracoḷanāmenādhiṭṭhitāni avasesaṃ daṭṭhabbaṃ. Paccattharaṇañca parikkhāramukhapuñchanacoḷakañca paccattharaṇa…pe… coḷakañca nisīdanañcāti etaṃ cīvaracatukkaṃ sadasampi arattampi anādiṇṇakappampi labbhanti sambandho. Sadasanti saha yāhi kāhici dasāhīti sadasaṃ. Sadasake labbhamāne adasampi labbhatevāti sadasampi adasampi pupphadasampīti ettha attho. Pi-saddo vuttāvuttasampiṇḍanattho. Arattanti nīlapītādirajanena arañjitampi. Pi-saddena rañjitanīlapītādikampi anādiṇṇakappampīti. Ādiṇṇo kappo yassa natthīti taṃ anādiṇṇakappampi. Pi-saddena ādiṇṇakappampi.
நனு ச ‘‘ந பி⁴க்க²வே ஸப்³ப³னீலகானி சீவரானி தா⁴ரேதப்³பா³னீ’’திஆதி³னா (மஹாவ॰ 372) ஸப்³ப³னீலகஸப்³ப³பீதகஸப்³ப³லோஹிதகசீவரானி ஸாமஞ்ஞேன படிக்கி²த்தானீதி கத²மித³ங் சீவரசதுக்கங் ஸத³ஸாதி³கங் வட்டதி, கத²ஞ்ச அனாதி³ண்ணகப்பம்பி வட்டதீதி? வுச்சதே – ‘‘தேன கோ² பன ஸமயேன அஞ்ஞதரோ பி⁴க்கு² குஸசீரங் நிவாஸெத்வா’’திஆதி³னா உப்பன்னவத்தூ²ஸு (மஹாவ॰ 371) ‘‘ந பி⁴க்க²வே குஸசீரங்…பே॰… தித்தி²யத்³த⁴ஜோ தா⁴ரேதப்³போ³. யோ தா⁴ரெய்ய, ஆபத்தி து²ல்லச்சயஸ்ஸா’’திஆதி³னா (மஹாவ॰ 371) உப்பன்னவத்து²வஸேனேவ நிவாஸனபாருபனஸங்கா²ததா⁴ரணஸ்ஸ படிக்கி²த்தத்தா ச தத்தே²வ அட்ட²கதா²யஞ்ச (மஹாவ॰ அட்ட²॰ 372) ‘‘ஸப்³ப³னீலகாதீ³னி ரஜனங் தோ⁴வித்வா புன ரஜித்வா தா⁴ரேதப்³பா³னி, ந ஸக்கா சே ஹொந்தி தோ⁴விதுங், பச்சத்த²ரணானி வா காதப்³பா³னி, து³பட்டசீவரஸ்ஸ வா மஜ்ஜே² தா³தப்³பா³னி, அச்சி²ன்னத³ஸதீ³க⁴த³ஸானி த³ஸா சி²ந்தி³த்வா தா⁴ரேதப்³பா³னி, கஞ்சுகங் லபி⁴த்வா பா²லெத்வா ரஜித்வா பரிபு⁴ஞ்ஜிதுங் வட்டதி, வேட²னேபி ஏஸேவ நயோ’’தி நிவாஸனபாருபனவஸேனேவ தா⁴ரணபரிபோ⁴கா³னங் வுத்தத்தா ச து³ப்³ப³ண்ணகரணஸிக்கா²பதே³ (பாசி॰ அட்ட²॰ 368) ‘‘யங் நிவாஸேதுங் வா பாருபிதுங் வா ஸக்கா ஹோதி, ததே³வ சீவரந்தி வேதி³தப்³ப³’’ந்தி பஞ்சன்னங்யேவ கப்பபி³ந்து³னோ அனுஞ்ஞாதத்தா ச திசீவரகண்டு³ப்படிச்சா²தி³வஸ்ஸிகஸாடிகஸங்கா²தானி பஞ்ச சீவரானி காயபரிஹாரியானேவ அத³ஸானி அஸப்³ப³னீலகாதீ³னி கப்பியரஜனரஜிதானி ஆதி³ண்ணகப்பானியேவ ஹொந்தி, ந நியமேன நிவத்திதானி பரானி சத்தாரீதி சீவரசதுக்கமேவ ஸத³ஸாதி³கங் அனாதி³ண்ணகப்பம்பி வட்டதீதி.
Nanu ca ‘‘na bhikkhave sabbanīlakāni cīvarāni dhāretabbānī’’tiādinā (mahāva. 372) sabbanīlakasabbapītakasabbalohitakacīvarāni sāmaññena paṭikkhittānīti kathamidaṃ cīvaracatukkaṃ sadasādikaṃ vaṭṭati, kathañca anādiṇṇakappampi vaṭṭatīti? Vuccate – ‘‘tena kho pana samayena aññataro bhikkhu kusacīraṃ nivāsetvā’’tiādinā uppannavatthūsu (mahāva. 371) ‘‘na bhikkhave kusacīraṃ…pe… titthiyaddhajo dhāretabbo. Yo dhāreyya, āpatti thullaccayassā’’tiādinā (mahāva. 371) uppannavatthuvaseneva nivāsanapārupanasaṅkhātadhāraṇassa paṭikkhittattā ca tattheva aṭṭhakathāyañca (mahāva. aṭṭha. 372) ‘‘sabbanīlakādīni rajanaṃ dhovitvā puna rajitvā dhāretabbāni, na sakkā ce honti dhovituṃ, paccattharaṇāni vā kātabbāni, dupaṭṭacīvarassa vā majjhe dātabbāni, acchinnadasadīghadasāni dasā chinditvā dhāretabbāni, kañcukaṃ labhitvā phāletvā rajitvā paribhuñjituṃ vaṭṭati, veṭhanepi eseva nayo’’ti nivāsanapārupanavaseneva dhāraṇaparibhogānaṃ vuttattā ca dubbaṇṇakaraṇasikkhāpade (pāci. aṭṭha. 368) ‘‘yaṃ nivāsetuṃ vā pārupituṃ vā sakkā hoti, tadeva cīvaranti veditabba’’nti pañcannaṃyeva kappabinduno anuññātattā ca ticīvarakaṇḍuppaṭicchādivassikasāṭikasaṅkhātāni pañca cīvarāni kāyaparihāriyāneva adasāni asabbanīlakādīni kappiyarajanarajitāni ādiṇṇakappāniyeva honti, na niyamena nivattitāni parāni cattārīti cīvaracatukkameva sadasādikaṃ anādiṇṇakappampi vaṭṭatīti.
51. ஸேஸசீவரபஞ்சகங் அத³ஸங்யேவ ரஜிதங்யேவ ஆதி³ண்ணகப்பங்வ கப்பதீதி யோஜனா. ரஜிதந்தி கப்பியரஜனேன ரஜிதங். நிஸீத³னஸ்ஸ யதா²வுத்தேனத்தே²ன ஸப்³ப³த்த² அத³ஸத்த²ங் நிஸேதே⁴துங் ‘‘ஸத³ஸங்வ நிஸீத³ன’’ந்தி வுத்தங். ஸதி ஹி ஸம்ப⁴வே ப்³யபி⁴சாரே ச விஸேஸனங் ஸாத்த²கங் ஹோதி.
51. Sesacīvarapañcakaṃ adasaṃyeva rajitaṃyeva ādiṇṇakappaṃva kappatīti yojanā. Rajitanti kappiyarajanena rajitaṃ. Nisīdanassa yathāvuttenatthena sabbattha adasatthaṃ nisedhetuṃ ‘‘sadasaṃva nisīdana’’nti vuttaṃ. Sati hi sambhave byabhicāre ca visesanaṃ sātthakaṃ hoti.
52. இதா³னி அனதி⁴ட்டி²தே அனிஸ்ஸட்டே² ச கா பவத்தீதி தங் த³ஸ்ஸேதுங் ‘‘அனதி⁴ட்டி²த’’ந்திஆதி³மாஹ. தத்த² அனதி⁴ட்டி²தந்தி திசீவராதி³வஸேன அனதி⁴ட்டி²தங். அனிஸ்ஸட்ட²ந்தி யஸ்ஸ கஸ்ஸசி தா³னலக்க²ணேன அதி³ன்னங். விகப்பெத்வா பரிபு⁴ஞ்ஜயேதி வக்க²மானநயேன ஏகப³ஹுபா⁴வங், ஸன்னிஹிதாஸன்னிஹிதபா⁴வஞ்ச ஸல்லக்கெ²த்வா விகப்பெத்வா பச்சுத்³த⁴ரித்வா பரிபு⁴ஞ்ஜெய்ய. வக்க²மானநயேன பன விஞ்ஞாயதீதி ‘‘பச்சுத்³த⁴ரித்வா’’தி ந வுத்தங்.
52. Idāni anadhiṭṭhite anissaṭṭhe ca kā pavattīti taṃ dassetuṃ ‘‘anadhiṭṭhita’’ntiādimāha. Tattha anadhiṭṭhitanti ticīvarādivasena anadhiṭṭhitaṃ. Anissaṭṭhanti yassa kassaci dānalakkhaṇena adinnaṃ. Vikappetvā paribhuñjayeti vakkhamānanayena ekabahubhāvaṃ, sannihitāsannihitabhāvañca sallakkhetvā vikappetvā paccuddharitvā paribhuñjeyya. Vakkhamānanayena pana viññāyatīti ‘‘paccuddharitvā’’ti na vuttaṃ.
இதா³னி ‘‘விகப்பெத்வா’’தி வுத்தங் கீதி³ஸங் தங் ஹெட்டி²மந்தேன விகப்பியந்தி ஆஹ ‘‘ஹத்தா²’’திஆதி³. தத்த² ஹத்தோ² தீ³கே⁴ன யஸ்ஸ தங் ஹத்த²தீ³க⁴ங். ததோதி தஸ்மா ஹத்த²தோ. உபட்³டோ⁴ ஹத்த²ஸ்ஸ து³தியோ பா⁴கோ³ வித³த்தி²ஸங்கா²தோ வித்தா²ரேன யஸ்ஸ தங் உபட்³ட⁴வித்தா²ரங்.
Idāni ‘‘vikappetvā’’ti vuttaṃ kīdisaṃ taṃ heṭṭhimantena vikappiyanti āha ‘‘hatthā’’tiādi. Tattha hattho dīghena yassa taṃ hatthadīghaṃ. Tatoti tasmā hatthato. Upaḍḍho hatthassa dutiyo bhāgo vidatthisaṅkhāto vitthārena yassa taṃ upaḍḍhavitthāraṃ.
53. இதா³னி யதா²வுத்தவிதா⁴னங் தேசீவரிகஸ்ஸேவ வஸேன, அபரோ பன அஞ்ஞதா² படிபஜ்ஜதீதி தங் த³ஸ்ஸேதுங் ‘‘திசீவரஸ்ஸா’’திஆதி³மாஹ . தத்த² நாமேனாதி⁴ட்டி²தானி தீணி சீவரானி ஏதஸ்ஸாதி திசீவரோ. தஸ்ஸ வினயதேசீவரிகஸ்ஸாதி அத்தோ², ந பரிக்கா²ரசோளனாமேன அதி⁴ட்டி²தசீவரஸ்ஸ. வினயதேசீவரிகஸ்ஸ பன உதோ³ஸிதஸிக்கா²பதே³ வுத்தபரிஹாரோ நத்தி². பரிக்கா²ரசோளியோதி பரிக்கா²ரசோளமஸ்ஸ அத்தீ²தி ணிகேன ய-காரோ. ஸப்³ப³ந்தி ஸகலங் நவவித⁴ம்பி சீவரங். ததா² வத்வாதி ஏகப³ஹுபா⁴வங், ஸன்னிஹிதாஸன்னிஹிதபா⁴வஞ்ச ஞத்வா ‘‘இமங் பரிக்கா²ரசோளங் அதி⁴ட்டா²மீ’’திஆதி³னா வத்வா. அதி⁴ட்ட²தீதி அதி⁴ட்டா²தி.
53. Idāni yathāvuttavidhānaṃ tecīvarikasseva vasena, aparo pana aññathā paṭipajjatīti taṃ dassetuṃ ‘‘ticīvarassā’’tiādimāha . Tattha nāmenādhiṭṭhitāni tīṇi cīvarāni etassāti ticīvaro. Tassa vinayatecīvarikassāti attho, na parikkhāracoḷanāmena adhiṭṭhitacīvarassa. Vinayatecīvarikassa pana udositasikkhāpade vuttaparihāro natthi. Parikkhāracoḷiyoti parikkhāracoḷamassa atthīti ṇikena ya-kāro. Sabbanti sakalaṃ navavidhampi cīvaraṃ. Tathā vatvāti ekabahubhāvaṃ, sannihitāsannihitabhāvañca ñatvā ‘‘imaṃ parikkhāracoḷaṃ adhiṭṭhāmī’’tiādinā vatvā. Adhiṭṭhatīti adhiṭṭhāti.
54. அதி⁴ட்டி²தசீவரங் பன பரிபு⁴ஞ்ஜதோ கத²ங் அதி⁴ட்டா²னங் விஜஹதீதி தங் த³ஸ்ஸெந்தோ ‘‘அச்சே²தா³’’திஆதி³மாஹ. தத்த² அச்சே²தோ³ ச விஸ்ஸஜ்ஜனஞ்ச கா³ஹோ ச விப்³ப⁴மோ சாதி த்³வந்தோ³. அச்சே²தோ³ நாம சோராதீ³ஹி அச்சி²ந்தி³த்வா க³ஹணங். விஸ்ஸஜ்ஜனங் பரேஸங் தா³னங். கா³ஹோ விஸ்ஸாஸேன க³ஹணங். விப்³ப⁴மோ ஸிக்க²ங் அப்பச்சக்கா²ய கி³ஹிபா⁴வூபக³மனங். ததா³பி தஸ்ஸ அஞ்ஞஸ்ஸ தா³னே விய சீவரஸ்ஸ நிராலயபா⁴வேன பன பரிச்சாகோ³தி. டீகாயங் பன பா⁴தி³ஸோ பி⁴க்கு²யேவாதி அதி⁴ட்டா²னங் ந விஜஹதீதி அத்த²ங் விகப்பெத்வா பி⁴க்கு²னியா கி³ஹிபா⁴வூபக³மனங் வுத்தங், தங் ந க³ஹேதப்³ப³ங், காரணங் பனெத்த² அம்ஹாகங் க³ரூஹியேவ ஸாரத்த²தீ³பனியங் (ஸாரத்த²॰ டீ॰ 2.469) ‘‘பி⁴க்கு²னியா ‘ஹீனாயாவத்தனேனா’தி விஸேஸெத்வா அவுத்தத்தா பி⁴க்கு²னியா ஹி கி³ஹிபா⁴வூபக³மனே அதி⁴ட்டா²னவிஜஹனங் விஸுங் வத்தப்³ப³ங் நத்தி² தஸ்ஸா விப்³ப⁴மனேனேவ அஸ்ஸமணீபா⁴வதோ’’தி வுத்தங். நனு ச பி⁴க்கு²னோ அப்பச்சக்கா²தஸிக்க²ஸ்ஸ கி³ஹிபா⁴வூபக³மனேன அதி⁴ட்டா²னவிஜஹனேன நிராலயபா⁴வோ காரணபா⁴வேன வுத்தோ, ஏவங் ஸதி பரிவத்தலிங்க³ஸ்ஸ நத்தி² நிராலயபா⁴வோதி கத²மஸ்ஸ அதி⁴ட்டா²னங் விஜஹதீதி? ஸச்சமேதங், ததா²பி பு³த்³த⁴மதஞ்ஞூஹி அட்ட²கதா²சரியேஹி அட்ட²கதா²யங் (பாரா॰ அட்ட²॰ 1.69) ‘‘யங் பனஸ்ஸ பி⁴க்கு²பா⁴வே அதி⁴ட்டி²தங் திசீவரஞ்ச பத்தோ ச, தங் அதி⁴ட்டா²னங் விஜஹதி, புன அதி⁴ட்டா²தப்³ப³’’ந்தி வுத்தத்தா நத்தெ²த்த² தோ³ஸோதி.
54. Adhiṭṭhitacīvaraṃ pana paribhuñjato kathaṃ adhiṭṭhānaṃ vijahatīti taṃ dassento ‘‘acchedā’’tiādimāha. Tattha acchedo ca vissajjanañca gāho ca vibbhamo cāti dvando. Acchedo nāma corādīhi acchinditvā gahaṇaṃ. Vissajjanaṃ paresaṃ dānaṃ. Gāho vissāsena gahaṇaṃ. Vibbhamo sikkhaṃ appaccakkhāya gihibhāvūpagamanaṃ. Tadāpi tassa aññassa dāne viya cīvarassa nirālayabhāvena pana pariccāgoti. Ṭīkāyaṃ pana bhādiso bhikkhuyevāti adhiṭṭhānaṃ na vijahatīti atthaṃ vikappetvā bhikkhuniyā gihibhāvūpagamanaṃ vuttaṃ, taṃ na gahetabbaṃ, kāraṇaṃ panettha amhākaṃ garūhiyeva sāratthadīpaniyaṃ (sārattha. ṭī. 2.469) ‘‘bhikkhuniyā ‘hīnāyāvattanenā’ti visesetvā avuttattā bhikkhuniyā hi gihibhāvūpagamane adhiṭṭhānavijahanaṃ visuṃ vattabbaṃ natthi tassā vibbhamaneneva assamaṇībhāvato’’ti vuttaṃ. Nanu ca bhikkhuno appaccakkhātasikkhassa gihibhāvūpagamanena adhiṭṭhānavijahanena nirālayabhāvo kāraṇabhāvena vutto, evaṃ sati parivattaliṅgassa natthi nirālayabhāvoti kathamassa adhiṭṭhānaṃ vijahatīti? Saccametaṃ, tathāpi buddhamataññūhi aṭṭhakathācariyehi aṭṭhakathāyaṃ (pārā. aṭṭha. 1.69) ‘‘yaṃ panassa bhikkhubhāve adhiṭṭhitaṃ ticīvarañca patto ca, taṃ adhiṭṭhānaṃ vijahati, puna adhiṭṭhātabba’’nti vuttattā natthettha dosoti.
மாரணலிங்க³ஸிக்கா²தி உத்தரபத³லோபேன உபசாரேன வா லிங்க³பரிவத்தனங் ஸிக்கா²பச்சக்கா²னஞ்ச ‘‘லிங்க³ஸிக்கா²’’தி ச வுத்தங். இதி ஏதே அட்ட² ஸப்³பே³ஸு நவஸு சீவரேஸு அதி⁴ட்டா²னஸ்ஸ வியோகோ³ விப்பவாஸோ, தஸ்ஸ காரணா ஹொந்தீதி பாட²ஸேஸோ. திசீவரஸ்ஸ பன ந கேவலங் இமேயேவ அட்ட², வினிவித்³த⁴சி²த்³த³ஞ்ச அதி⁴ட்டா²னவியோக³காரணந்தி லிங்க³வசனஞ்ச பரிவத்தெத்வா யோஜேதப்³ப³ங். தத்த² அப்³ப⁴ந்தரே ஏகஸ்ஸபி தந்துனோ அபா⁴வேன வினிவித்³த⁴ங் வினிவிஜ்ஜி²த்வா க³தசி²த்³த³ங்கனிட்ட²ங்கு³லினக²பிட்டி²ப்பமாணங் வினிவித்³த⁴சி²த்³த³ங். தத்த² ஸங்கா⁴டியா ச உத்தராஸங்க³ஸ்ஸ ச தீ³க⁴ந்ததோ வித³த்தி²ப்பமாணஸ்ஸ, திரியந்ததோ அட்ட²ங்கு³லப்பமாணஸ்ஸ, அந்தரவாஸகஸ்ஸ பன தீ³க⁴ந்ததோ வித³த்தி²ப்பமாணஸ்ஸேவ திரியந்ததோ சதுரங்கு³லப்பமாணஸ்ஸ பதே³ஸஸ்ஸ ஓரதோ சி²த்³த³ங் அதி⁴ட்டா²னங் பி⁴ந்த³தி, ஸூசிகம்மங் கத்வா புன அதி⁴ட்டா²தப்³ப³ங். ஸூசிகம்மங் கரொந்தேன ச சி²ந்தி³த்வா து³ப்³ப³லட்டா²னாபனயனேன சி²த்³த³ங் அத³ஸ்ஸெத்வா காதப்³ப³ங்.
Māraṇaliṅgasikkhāti uttarapadalopena upacārena vā liṅgaparivattanaṃ sikkhāpaccakkhānañca ‘‘liṅgasikkhā’’ti ca vuttaṃ. Iti ete aṭṭha sabbesu navasu cīvaresu adhiṭṭhānassa viyogo vippavāso, tassa kāraṇā hontīti pāṭhaseso. Ticīvarassa pana na kevalaṃ imeyeva aṭṭha, vinividdhachiddañca adhiṭṭhānaviyogakāraṇanti liṅgavacanañca parivattetvā yojetabbaṃ. Tattha abbhantare ekassapi tantuno abhāvena vinividdhaṃ vinivijjhitvā gatachiddaṃkaniṭṭhaṅgulinakhapiṭṭhippamāṇaṃ vinividdhachiddaṃ. Tattha saṅghāṭiyā ca uttarāsaṅgassa ca dīghantato vidatthippamāṇassa, tiriyantato aṭṭhaṅgulappamāṇassa, antaravāsakassa pana dīghantato vidatthippamāṇasseva tiriyantato caturaṅgulappamāṇassa padesassa orato chiddaṃ adhiṭṭhānaṃ bhindati, sūcikammaṃ katvā puna adhiṭṭhātabbaṃ. Sūcikammaṃ karontena ca chinditvā dubbalaṭṭhānāpanayanena chiddaṃ adassetvā kātabbaṃ.
55. இதா³னி அகப்பியானி த³ஸ்ஸேதுங் ‘‘குஸா’’திஆதி³ வுத்தங். தத்த² குஸா ச வாகா ச ப²லகானி ச, தேஸங் சீரானி குஸ…பே॰… சீரானி. தத்த² குஸேன க³ந்தெ²த்வா கதங் குஸசீரங். ததா² வாகேன க³ந்தெ²த்வா கதங் வாகசீரங், தாபஸானங் வக்கலங். ப²லகஸண்டா²னானி ப²லகானி ஸிப்³பி³த்வா கதங் ப²லகசீரங். கேஸவாலஜந்தி கேஸேஹி ச வாலேஹி ச ஜாதங் வாயிதங் கம்ப³லந்தி ஸம்ப³ந்தோ⁴. உலூகபக்கா²ஜினக்கி²பேதி உலூகானங் கோஸியஸகுணானங் பக்க²ங் பக்கே²ன கதங் நிவாஸனஞ்ச அஜினக்கி²பங் ஸலோமங் ஸகு²ரங் அஜினமிகா³னங் சம்மஞ்ச தா⁴ரயதோ து²ல்லச்சயந்தி ஸம்ப³ந்தோ⁴.
55. Idāni akappiyāni dassetuṃ ‘‘kusā’’tiādi vuttaṃ. Tattha kusā ca vākā ca phalakāni ca, tesaṃ cīrāni kusa…pe… cīrāni. Tattha kusena ganthetvā kataṃ kusacīraṃ. Tathā vākena ganthetvā kataṃ vākacīraṃ, tāpasānaṃ vakkalaṃ. Phalakasaṇṭhānāni phalakāni sibbitvā kataṃ phalakacīraṃ. Kesavālajanti kesehi ca vālehi ca jātaṃ vāyitaṃ kambalanti sambandho. Ulūkapakkhājinakkhipeti ulūkānaṃ kosiyasakuṇānaṃ pakkhaṃ pakkhena kataṃ nivāsanañca ajinakkhipaṃ salomaṃ sakhuraṃ ajinamigānaṃ cammañca dhārayato thullaccayanti sambandho.
56. கத³லேரகக்கது³ஸ்ஸேஸூதி கத³லியோ ச ஏரகோ ச அக்கோ ச, தேஸங் து³ஸ்ஸானி வத்தா²னி, தேஸு சேவ மகசிவாகேஹி கதே பொத்த²கே சாபி து³க்கடங். நிமித்தத்தே² சேதங் பு⁴ம்மங். கத³லிது³ஸ்ஸாதி³ஸத்³தே³ன தங்தா⁴ரணமதி⁴ப்பேதங், தஸ்மா தங்தா⁴ரணனிமித்தங் து³க்கடங் ஹோதீதி அத்தோ². ஏவங் ஸப்³ப³த்த². ‘‘நீலகோ சா’’திஆதி³னா த்³வந்தோ³. ஸப்³பா³ நீலக…பே॰… கண்ஹகாதி கம்மதா⁴ரயோ. நீலாதி³வண்ணயோகே³ன வத்த²ங் நீலாதி³. நீலகங் உமாபுப்ப²வண்ணங். மஞ்ஜெட்ட²ங் மஞ்ஜெட்டி²கவண்ணங். பீதங் கணிகாரபுப்ப²வண்ணங். லோஹிதங் ஜயஸுமனபுப்ப²வண்ணங். கண்ஹகங் அத்³தா³ரிட்ட²கவண்ணங். ஸப்³ப³-ஸத்³தோ³ பனெத்த² பச்சேகங் யோஜேதப்³போ³.
56.Kadalerakakkadussesūti kadaliyo ca erako ca akko ca, tesaṃ dussāni vatthāni, tesu ceva makacivākehi kate potthake cāpi dukkaṭaṃ. Nimittatthe cetaṃ bhummaṃ. Kadalidussādisaddena taṃdhāraṇamadhippetaṃ, tasmā taṃdhāraṇanimittaṃ dukkaṭaṃ hotīti attho. Evaṃ sabbattha. ‘‘Nīlako cā’’tiādinā dvando. Sabbā nīlaka…pe… kaṇhakāti kammadhārayo. Nīlādivaṇṇayogena vatthaṃ nīlādi. Nīlakaṃ umāpupphavaṇṇaṃ. Mañjeṭṭhaṃ mañjeṭṭhikavaṇṇaṃ. Pītaṃ kaṇikārapupphavaṇṇaṃ. Lohitaṃ jayasumanapupphavaṇṇaṃ. Kaṇhakaṃ addāriṭṭhakavaṇṇaṃ. Sabba-saddo panettha paccekaṃ yojetabbo.
57. மஹா…பே॰… ரத்தேதி மஹாரங்கோ³ ச மஹானாமரங்கோ³ ச, தேஹி ரத்தே. எத்தா²பி புன ஸுய்யமானங் ஸப்³ப³ஸத்³த³மனுவத்தியங், ‘‘ஸப்³ப³மஹாரங்க³ரத்தே’’திஆதி³னா அத்தோ² வேதி³தப்³போ³. இமினா ச அஸப்³ப³னீலகாதி³ கப்பியரஜனரஜிதங் பரிபு⁴ஞ்ஜந்தஸ்ஸ நத்தி² தோ³ஸோதி தீ³பேதி. தத்த² மஹாரங்கோ³ ஸதபதி³பிட்டி²வண்ணோ. மஹானாமரங்கோ³ ஸம்பி⁴ன்னவண்ணோ, ஸோ பன பண்டு³பலாஸவண்ணோ ஹோதி, பது³மவண்ணோதிபி வத³ந்தி. திரீடகேதி தங் நாமக ருக்க²தசே. அச்சி²ன்னதீ³க⁴த³ஸகேதி ஸப்³ப³ஸோ அச்சி²ன்னத்தா அச்சி²ன்னா ச மஜ்ஜே² சி²ன்னத்தா தீ³கா⁴ ச ஸா த³ஸா ச வத்த²கோடி யஸ்ஸாதி அஞ்ஞபத³த்த²ஸமாஸோ. ப²லபுப்ப²த³ஸேதி அஞ்ஞமஞ்ஞங் ஸங்ஸிப்³பி³த்வா கதா ப²லஸதி³ஸா த³ஸா ‘‘ப²லா’’தி வுச்சந்தி, கேதகாதி³ புப்ப²ஸதி³ஸானி ‘‘புப்பா²னீ’’தி ச, ப²லா ச புப்பா² ச த³ஸா யஸ்ஸ, ப²லஸதி³ஸே த³ஸே, புப்ப²ஸதி³ஸே த³ஸே சாதி அத்தோ². வேட²னேதி ஸீஸவேட²னே. ததா²தி இமினா ஸப்³ப³னீலகாதீ³ஸு து³க்கடங் அதிதி³ஸதி. ஸப்³ப³ந்தி குஸசீராதி³கங் ஸகலங். அச்சி²ன்னங் சீவரங் யஸ்ஸ ஸோ லப⁴தீதி ஸம்ப³ந்தோ⁴.
57.Mahā…pe… ratteti mahāraṅgo ca mahānāmaraṅgo ca, tehi ratte. Etthāpi puna suyyamānaṃ sabbasaddamanuvattiyaṃ, ‘‘sabbamahāraṅgaratte’’tiādinā attho veditabbo. Iminā ca asabbanīlakādi kappiyarajanarajitaṃ paribhuñjantassa natthi dosoti dīpeti. Tattha mahāraṅgo satapadipiṭṭhivaṇṇo. Mahānāmaraṅgo sambhinnavaṇṇo, so pana paṇḍupalāsavaṇṇo hoti, padumavaṇṇotipi vadanti. Tirīṭaketi taṃ nāmaka rukkhatace. Acchinnadīghadasaketi sabbaso acchinnattā acchinnā ca majjhe chinnattā dīghā ca sā dasā ca vatthakoṭi yassāti aññapadatthasamāso. Phalapupphadaseti aññamaññaṃ saṃsibbitvā katā phalasadisā dasā ‘‘phalā’’ti vuccanti, ketakādi pupphasadisāni ‘‘pupphānī’’ti ca, phalā ca pupphā ca dasā yassa, phalasadise dase, pupphasadise dase cāti attho. Veṭhaneti sīsaveṭhane. Tathāti iminā sabbanīlakādīsu dukkaṭaṃ atidisati. Sabbanti kusacīrādikaṃ sakalaṃ. Acchinnaṃ cīvaraṃ yassa so labhatīti sambandho.
சீவரனித்³தே³ஸவண்ணனா நிட்டி²தா.
Cīvaraniddesavaṇṇanā niṭṭhitā.
