| Library / Tipiṭaka / तिपिटक • Tipiṭaka / धम्मपदपाळि • Dhammapadapāḷi |
३. चित्तवग्गो
3. Cittavaggo
३३.
33.
उजुं करोति मेधावी, उसुकारोव तेजनं॥
Ujuṃ karoti medhāvī, usukārova tejanaṃ.
३४.
34.
वारिजोव थले खित्तो, ओकमोकतउब्भतो।
Vārijova thale khitto, okamokataubbhato;
परिफन्दतिदं चित्तं, मारधेय्यं पहातवे॥
Pariphandatidaṃ cittaṃ, māradheyyaṃ pahātave.
३५.
35.
दुन्निग्गहस्स लहुनो, यत्थकामनिपातिनो।
Dunniggahassa lahuno, yatthakāmanipātino;
चित्तस्स दमथो साधु, चित्तं दन्तं सुखावहं॥
Cittassa damatho sādhu, cittaṃ dantaṃ sukhāvahaṃ.
३६.
36.
सुदुद्दसं सुनिपुणं, यत्थकामनिपातिनं।
Sududdasaṃ sunipuṇaṃ, yatthakāmanipātinaṃ;
चित्तं रक्खेथ मेधावी, चित्तं गुत्तं सुखावहं॥
Cittaṃ rakkhetha medhāvī, cittaṃ guttaṃ sukhāvahaṃ.
३७.
37.
ये चित्तं संयमेस्सन्ति, मोक्खन्ति मारबन्धना॥
Ye cittaṃ saṃyamessanti, mokkhanti mārabandhanā.
३८.
38.
अनवट्ठितचित्तस्स, सद्धम्मं अविजानतो।
Anavaṭṭhitacittassa, saddhammaṃ avijānato;
परिप्लवपसादस्स, पञ्ञा न परिपूरति॥
Pariplavapasādassa, paññā na paripūrati.
३९.
39.
अनवस्सुतचित्तस्स, अनन्वाहतचेतसो।
Anavassutacittassa, ananvāhatacetaso;
पुञ्ञपापपहीनस्स, नत्थि जागरतो भयं॥
Puññapāpapahīnassa, natthi jāgarato bhayaṃ.
४०.
40.
कुम्भूपमं कायमिमं विदित्वा, नगरूपमं चित्तमिदं ठपेत्वा।
Kumbhūpamaṃ kāyamimaṃ viditvā, nagarūpamaṃ cittamidaṃ ṭhapetvā;
योधेथ मारं पञ्ञावुधेन, जितञ्च रक्खे अनिवेसनो सिया॥
Yodhetha māraṃ paññāvudhena, jitañca rakkhe anivesano siyā.
४१.
41.
अचिरं वतयं कायो, पथविं अधिसेस्सति।
Aciraṃ vatayaṃ kāyo, pathaviṃ adhisessati;
छुद्धो अपेतविञ्ञाणो, निरत्थंव कलिङ्गरं॥
Chuddho apetaviññāṇo, niratthaṃva kaliṅgaraṃ.
४२.
42.
दिसो दिसं यं तं कयिरा, वेरी वा पन वेरिनं।
Diso disaṃ yaṃ taṃ kayirā, verī vā pana verinaṃ;
४३.
43.
न तं माता पिता कयिरा, अञ्ञे वापि च ञातका।
Na taṃ mātā pitā kayirā, aññe vāpi ca ñātakā;
सम्मापणिहितं चित्तं, सेय्यसो नं ततो करे॥
Sammāpaṇihitaṃ cittaṃ, seyyaso naṃ tato kare.
चित्तवग्गो ततियो निट्ठितो।
Cittavaggo tatiyo niṭṭhito.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / धम्मपद-अट्ठकथा • Dhammapada-aṭṭhakathā / ३. चित्तवग्गो • 3. Cittavaggo
