| Library / Tipiṭaka / തിപിടക • Tipiṭaka / പരിവാരപാളി • Parivārapāḷi |
൫. ചിത്താഗാരവഗ്ഗോ
5. Cittāgāravaggo
൨൩൫. രാജാഗാരം വാ ചിത്താഗാരം വാ ആരാമം വാ ഉയ്യാനം വാ പോക്ഖരണിം വാ ദസ്സനായ ഗച്ഛന്തീ ദ്വേ ആപത്തിയോ ആപജ്ജതി. ഗച്ഛതി, ആപത്തി ദുക്കടസ്സ; യത്ഥ ഠിതാ പസ്സതി, ആപത്തി പാചിത്തിയസ്സ.
235. Rājāgāraṃ vā cittāgāraṃ vā ārāmaṃ vā uyyānaṃ vā pokkharaṇiṃ vā dassanāya gacchantī dve āpattiyo āpajjati. Gacchati, āpatti dukkaṭassa; yattha ṭhitā passati, āpatti pācittiyassa.
ആസന്ദിം വാ പല്ലങ്കം വാ പരിഭുഞ്ജന്തീ ദ്വേ ആപത്തിയോ ആപജ്ജതി. പരിഭുഞ്ജതി, പയോഗേ ദുക്കടം; പരിഭുത്തേ, ആപത്തി പാചിത്തിയസ്സ.
Āsandiṃ vā pallaṅkaṃ vā paribhuñjantī dve āpattiyo āpajjati. Paribhuñjati, payoge dukkaṭaṃ; paribhutte, āpatti pācittiyassa.
സുത്തം കന്തന്തീ ദ്വേ ആപത്തിയോ ആപജ്ജതി. കന്തതി, പയോഗേ ദുക്കടം; ഉജ്ജവുജ്ജവേ, ആപത്തി പാചിത്തിയസ്സ.
Suttaṃ kantantī dve āpattiyo āpajjati. Kantati, payoge dukkaṭaṃ; ujjavujjave, āpatti pācittiyassa.
ഗിഹിവേയ്യാവച്ചം കരോന്തീ ദ്വേ ആപത്തിയോ ആപജ്ജതി. കരോതി, പയോഗേ ദുക്കടം; കതേ, ആപത്തി പാചിത്തിയസ്സ.
Gihiveyyāvaccaṃ karontī dve āpattiyo āpajjati. Karoti, payoge dukkaṭaṃ; kate, āpatti pācittiyassa.
ഭിക്ഖുനിയാ – ‘‘ഏഹായ്യേ ഇമം അധികരണം വൂപസമേഹീ’’തി വുച്ചമാനാ – ‘‘സാധൂ’’തി പടിസ്സുണിത്വാ നേവ വൂപസമേന്തീ ന വൂപസമായ ഉസ്സുക്കം കരോന്തീ ഏകം ആപത്തിം ആപജ്ജതി. പാചിത്തിയം.
Bhikkhuniyā – ‘‘ehāyye imaṃ adhikaraṇaṃ vūpasamehī’’ti vuccamānā – ‘‘sādhū’’ti paṭissuṇitvā neva vūpasamentī na vūpasamāya ussukkaṃ karontī ekaṃ āpattiṃ āpajjati. Pācittiyaṃ.
അഗാരികസ്സ വാ പരിബ്ബാജകസ്സ വാ പരിബ്ബാജികായ വാ സഹത്ഥാ ഖാദനീയം വാ ഭോജനീയം വാ ദേന്തീ ദ്വേ ആപത്തിയോ ആപജ്ജതി. ദേതി, പയോഗേ ദുക്കടം; ദിന്നേ, ആപത്തി പാചിത്തിയസ്സ.
Agārikassa vā paribbājakassa vā paribbājikāya vā sahatthā khādanīyaṃ vā bhojanīyaṃ vā dentī dve āpattiyo āpajjati. Deti, payoge dukkaṭaṃ; dinne, āpatti pācittiyassa.
ആവസഥചീവരം അനിസ്സജ്ജിത്വാ പരിഭുഞ്ജന്തീ ദ്വേ ആപത്തിയോ ആപജ്ജതി. പരിഭുഞ്ജതി, പയോഗേ ദുക്കടം; പരിഭുത്തേ, ആപത്തി പാചിത്തിയസ്സ.
Āvasathacīvaraṃ anissajjitvā paribhuñjantī dve āpattiyo āpajjati. Paribhuñjati, payoge dukkaṭaṃ; paribhutte, āpatti pācittiyassa.
ആവസഥം അനിസ്സജ്ജിത്വാ ചാരികം പക്കമന്തീ ദ്വേ ആപത്തിയോ ആപജ്ജതി. പഠമം പാദം പരിക്ഖേപം അതിക്കാമേതി, ആപത്തി ദുക്കടസ്സ; ദുതിയം പാദം അതിക്കാമേതി, ആപത്തി പാചിത്തിയസ്സ.
Āvasathaṃ anissajjitvā cārikaṃ pakkamantī dve āpattiyo āpajjati. Paṭhamaṃ pādaṃ parikkhepaṃ atikkāmeti, āpatti dukkaṭassa; dutiyaṃ pādaṃ atikkāmeti, āpatti pācittiyassa.
തിരച്ഛാനവിജ്ജം പരിയാപുണന്തീ ദ്വേ ആപത്തിയോ ആപജ്ജതി. പരിയാപുണാതി, പയോഗേ ദുക്കടം; പദേ പദേ ആപത്തി പാചിത്തിയസ്സ.
Tiracchānavijjaṃ pariyāpuṇantī dve āpattiyo āpajjati. Pariyāpuṇāti, payoge dukkaṭaṃ; pade pade āpatti pācittiyassa.
തിരച്ഛാനവിജ്ജം വാചേന്തീ ദ്വേ ആപത്തിയോ ആപജ്ജതി. വാചേതി, പയോഗേ ദുക്കടം; പദേ പദേ ആപത്തി പാചിത്തിയസ്സ.
Tiracchānavijjaṃ vācentī dve āpattiyo āpajjati. Vāceti, payoge dukkaṭaṃ; pade pade āpatti pācittiyassa.
ചിത്താഗാരവഗ്ഗോ പഞ്ചമോ.
Cittāgāravaggo pañcamo.
