| Library / Tipiṭaka / တိပိဋက • Tipiṭaka / ပရိဝာရပာဠိ • Parivārapāḷi |
၅. စိတ္တာဂာရဝဂ္ဂော
5. Cittāgāravaggo
၂၃၅. ရာဇာဂာရံ ဝာ စိတ္တာဂာရံ ဝာ အာရာမံ ဝာ ဥယ္ယာနံ ဝာ ပောက္ခရဏိံ ဝာ ဒသ္သနာယ ဂစ္ဆန္တီ ဒ္ဝေ အာပတ္တိယော အာပဇ္ဇတိ။ ဂစ္ဆတိ, အာပတ္တိ ဒုက္ကဋသ္သ; ယတ္ထ ဌိတာ ပသ္သတိ, အာပတ္တိ ပာစိတ္တိယသ္သ။
235. Rājāgāraṃ vā cittāgāraṃ vā ārāmaṃ vā uyyānaṃ vā pokkharaṇiṃ vā dassanāya gacchantī dve āpattiyo āpajjati. Gacchati, āpatti dukkaṭassa; yattha ṭhitā passati, āpatti pācittiyassa.
အာသန္ဒိံ ဝာ ပလ္လင္ကံ ဝာ ပရိဘုဉ္ဇန္တီ ဒ္ဝေ အာပတ္တိယော အာပဇ္ဇတိ။ ပရိဘုဉ္ဇတိ, ပယောဂေ ဒုက္ကဋံ; ပရိဘုတ္တေ, အာပတ္တိ ပာစိတ္တိယသ္သ။
Āsandiṃ vā pallaṅkaṃ vā paribhuñjantī dve āpattiyo āpajjati. Paribhuñjati, payoge dukkaṭaṃ; paribhutte, āpatti pācittiyassa.
သုတ္တံ ကန္တန္တီ ဒ္ဝေ အာပတ္တိယော အာပဇ္ဇတိ။ ကန္တတိ, ပယောဂေ ဒုက္ကဋံ; ဥဇ္ဇဝုဇ္ဇဝေ, အာပတ္တိ ပာစိတ္တိယသ္သ။
Suttaṃ kantantī dve āpattiyo āpajjati. Kantati, payoge dukkaṭaṃ; ujjavujjave, āpatti pācittiyassa.
ဂိဟိဝေယ္ယာဝစ္စံ ကရောန္တီ ဒ္ဝေ အာပတ္တိယော အာပဇ္ဇတိ။ ကရောတိ, ပယောဂေ ဒုက္ကဋံ; ကတေ, အာပတ္တိ ပာစိတ္တိယသ္သ။
Gihiveyyāvaccaṃ karontī dve āpattiyo āpajjati. Karoti, payoge dukkaṭaṃ; kate, āpatti pācittiyassa.
ဘိက္ခုနိယာ – ‘‘ဧဟာယ္ယေ ဣမံ အဓိကရဏံ ဝူပသမေဟီ’’တိ ဝုစ္စမာနာ – ‘‘သာဓူ’’တိ ပဋိသ္သုဏိတ္ဝာ နေဝ ဝူပသမေန္တီ န ဝူပသမာယ ဥသ္သုက္ကံ ကရောန္တီ ဧကံ အာပတ္တိံ အာပဇ္ဇတိ။ ပာစိတ္တိယံ။
Bhikkhuniyā – ‘‘ehāyye imaṃ adhikaraṇaṃ vūpasamehī’’ti vuccamānā – ‘‘sādhū’’ti paṭissuṇitvā neva vūpasamentī na vūpasamāya ussukkaṃ karontī ekaṃ āpattiṃ āpajjati. Pācittiyaṃ.
အဂာရိကသ္သ ဝာ ပရိဗ္ဗာဇကသ္သ ဝာ ပရိဗ္ဗာဇိကာယ ဝာ သဟတ္ထာ ခာဒနီယံ ဝာ ဘောဇနီယံ ဝာ ဒေန္တီ ဒ္ဝေ အာပတ္တိယော အာပဇ္ဇတိ။ ဒေတိ, ပယောဂေ ဒုက္ကဋံ; ဒိန္နေ, အာပတ္တိ ပာစိတ္တိယသ္သ။
Agārikassa vā paribbājakassa vā paribbājikāya vā sahatthā khādanīyaṃ vā bhojanīyaṃ vā dentī dve āpattiyo āpajjati. Deti, payoge dukkaṭaṃ; dinne, āpatti pācittiyassa.
အာဝသထစီဝရံ အနိသ္သဇ္ဇိတ္ဝာ ပရိဘုဉ္ဇန္တီ ဒ္ဝေ အာပတ္တိယော အာပဇ္ဇတိ။ ပရိဘုဉ္ဇတိ, ပယောဂေ ဒုက္ကဋံ; ပရိဘုတ္တေ, အာပတ္တိ ပာစိတ္တိယသ္သ။
Āvasathacīvaraṃ anissajjitvā paribhuñjantī dve āpattiyo āpajjati. Paribhuñjati, payoge dukkaṭaṃ; paribhutte, āpatti pācittiyassa.
အာဝသထံ အနိသ္သဇ္ဇိတ္ဝာ စာရိကံ ပက္ကမန္တီ ဒ္ဝေ အာပတ္တိယော အာပဇ္ဇတိ။ ပဌမံ ပာဒံ ပရိက္ခေပံ အတိက္ကာမေတိ, အာပတ္တိ ဒုက္ကဋသ္သ; ဒုတိယံ ပာဒံ အတိက္ကာမေတိ, အာပတ္တိ ပာစိတ္တိယသ္သ။
Āvasathaṃ anissajjitvā cārikaṃ pakkamantī dve āpattiyo āpajjati. Paṭhamaṃ pādaṃ parikkhepaṃ atikkāmeti, āpatti dukkaṭassa; dutiyaṃ pādaṃ atikkāmeti, āpatti pācittiyassa.
တိရစ္ဆာနဝိဇ္ဇံ ပရိယာပုဏန္တီ ဒ္ဝေ အာပတ္တိယော အာပဇ္ဇတိ။ ပရိယာပုဏာတိ, ပယောဂေ ဒုက္ကဋံ; ပဒေ ပဒေ အာပတ္တိ ပာစိတ္တိယသ္သ။
Tiracchānavijjaṃ pariyāpuṇantī dve āpattiyo āpajjati. Pariyāpuṇāti, payoge dukkaṭaṃ; pade pade āpatti pācittiyassa.
တိရစ္ဆာနဝိဇ္ဇံ ဝာစေန္တီ ဒ္ဝေ အာပတ္တိယော အာပဇ္ဇတိ။ ဝာစေတိ, ပယောဂေ ဒုက္ကဋံ; ပဒေ ပဒေ အာပတ္တိ ပာစိတ္တိယသ္သ။
Tiracchānavijjaṃ vācentī dve āpattiyo āpajjati. Vāceti, payoge dukkaṭaṃ; pade pade āpatti pācittiyassa.
စိတ္တာဂာရဝဂ္ဂော ပဉ္စမော။
Cittāgāravaggo pañcamo.
