| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၉. ဆတ္တုပာဟနဝဂ္ဂော
9. Chattupāhanavaggo
၁-၂. ဆတ္တုပာဟနာဒိသိက္ခာပဒဝဏ္ဏနာ
1-2. Chattupāhanādisikkhāpadavaṇṇanā
ဝုတ္တလက္ခဏံ ဆတ္တန္တိ ‘‘ဆတ္တံ နာမ တီဏိ ဆတ္တာနိ – သေတစ္ဆတ္တံ, ကိလဉ္ဇစ္ဆတ္တံ, ပဏ္ဏစ္ဆတ္တံ မဏ္ဍလဗဒ္ဓံ, သလာကဗဒ္ဓ’’န္တိ (ပာစိ. ၁၁၈၁) ဧဝံ ပဒဘာဇနေ ဝုတ္တလက္ခဏံ ဆတ္တံ။ တာဒိသံ ဌာနံ ပတ္ဝာတိ ဂစ္ဆကဒ္ဒမာဒီသု တံ တံ ဌာနံ ပတ္ဝာ။
Vuttalakkhaṇaṃ chattanti ‘‘chattaṃ nāma tīṇi chattāni – setacchattaṃ, kilañjacchattaṃ, paṇṇacchattaṃ maṇḍalabaddhaṃ, salākabaddha’’nti (pāci. 1181) evaṃ padabhājane vuttalakkhaṇaṃ chattaṃ. Tādisaṃ ṭhānaṃ patvāti gacchakaddamādīsu taṃ taṃ ṭhānaṃ patvā.
ဆတ္တသ္သေဝာတိ ကဒ္ဒမာဒီနိ ပတ္ဝာ ဥပာဟနာ ဩမုဉ္စိတ္ဝာ ဆတ္တသ္သေဝ ဓာရဏံ။ ဥပာဟနာနံယေဝ ဝာတိ ဂစ္ဆာဒီနိ ဒိသ္ဝာ ဆတ္တံ အပနာမေတ္ဝာ ဥပာဟနာနံယေဝ ဓာရဏံ။
Chattassevāti kaddamādīni patvā upāhanā omuñcitvā chattasseva dhāraṇaṃ. Upāhanānaṃyeva vāti gacchādīni disvā chattaṃ apanāmetvā upāhanānaṃyeva dhāraṇaṃ.
ဒုတိယံ ဥတ္တာနတ္ထမေဝ။
Dutiyaṃ uttānatthameva.
ဆတ္တုပာဟနာဒိသိက္ခာပဒဝဏ္ဏနာ နိဋ္ဌိတာ။
Chattupāhanādisikkhāpadavaṇṇanā niṭṭhitā.
