| Library / Tipiṭaka / તિપિટક • Tipiṭaka / ભિક્ખુનીવિભઙ્ગ • Bhikkhunīvibhaṅga |
૬. છટ્ઠસિક્ખાપદં
6. Chaṭṭhasikkhāpadaṃ
૧૧૪૬. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન ચણ્ડકાળી ભિક્ખુની ભિક્ખુનિસઙ્ઘં ઉપસઙ્કમિત્વા વુટ્ઠાપનસમ્મુતિં યાચતિ. અથ ખો ભિક્ખુનિસઙ્ઘો ચણ્ડકાળિં ભિક્ખુનિં પરિચ્છિન્દિત્વા – ‘‘અલં તાવ તે, અય્યે, વુટ્ઠાપિતેના’’તિ, વુટ્ઠાપનસમ્મુતિં ન અદાસિ. ચણ્ડકાળી ભિક્ખુની ‘સાધૂ’તિ પટિસ્સુણિ. તેન ખો પન સમયેન ભિક્ખુનિસઙ્ઘો અઞ્ઞાસં ભિક્ખુનીનં વુટ્ઠાપનસમ્મુતિં દેતિ. ચણ્ડકાળી ભિક્ખુની ઉજ્ઝાયતિ ખિય્યતિ વિપાચેતિ – ‘‘અહમેવ નૂન બાલા, અહમેવ નૂન અલજ્જિની; યં સઙ્ઘો અઞ્ઞાસં ભિક્ખુનીનં વુટ્ઠાપનસમ્મુતિં દેતિ, મય્હમેવ ન દેતી’’તિ. યા તા ભિક્ખુનિયો અપ્પિચ્છા…પે॰… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ અય્યા ચણ્ડકાળી – ‘અલં તાવ તે, અય્યે, વુટ્ઠાપિતેના’તિ વુચ્ચમાના ‘સાધૂ’તિ પટિસ્સુણિત્વા પચ્છા ખીયનધમ્મં આપજ્જિસ્સતી’’તિ…પે॰… સચ્ચં કિર, ભિક્ખવે, ‘ચણ્ડકાળી ભિક્ખુની અલં તાવ તે અય્યે વુટ્ઠાપિતેના’તિ વુચ્ચમાના ‘‘સાધૂ’’તિ પટિસ્સુણિત્વા પચ્છા ખીયનધમ્મં આપજ્જતીતિ 1? ‘‘સચ્ચં, ભગવા’’તિ. વિગરહિ બુદ્ધો ભગવા…પે॰… કથઞ્હિ નામ, ભિક્ખવે, ચણ્ડકાળી ભિક્ખુની – ‘‘અલં તાવ તે, અય્યે, વુટ્ઠાપિતેના’’તિ વુચ્ચમાના ‘સાધૂ’તિ પટિસ્સુણિત્વા પચ્છા ખીયનધમ્મં આપજ્જિસ્સતિ! નેતં, ભિક્ખવે, અપ્પસન્નાનં વા પસાદાય…પે॰… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –
1146. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena caṇḍakāḷī bhikkhunī bhikkhunisaṅghaṃ upasaṅkamitvā vuṭṭhāpanasammutiṃ yācati. Atha kho bhikkhunisaṅgho caṇḍakāḷiṃ bhikkhuniṃ paricchinditvā – ‘‘alaṃ tāva te, ayye, vuṭṭhāpitenā’’ti, vuṭṭhāpanasammutiṃ na adāsi. Caṇḍakāḷī bhikkhunī ‘sādhū’ti paṭissuṇi. Tena kho pana samayena bhikkhunisaṅgho aññāsaṃ bhikkhunīnaṃ vuṭṭhāpanasammutiṃ deti. Caṇḍakāḷī bhikkhunī ujjhāyati khiyyati vipāceti – ‘‘ahameva nūna bālā, ahameva nūna alajjinī; yaṃ saṅgho aññāsaṃ bhikkhunīnaṃ vuṭṭhāpanasammutiṃ deti, mayhameva na detī’’ti. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā caṇḍakāḷī – ‘alaṃ tāva te, ayye, vuṭṭhāpitenā’ti vuccamānā ‘sādhū’ti paṭissuṇitvā pacchā khīyanadhammaṃ āpajjissatī’’ti…pe… saccaṃ kira, bhikkhave, ‘caṇḍakāḷī bhikkhunī alaṃ tāva te ayye vuṭṭhāpitenā’ti vuccamānā ‘‘sādhū’’ti paṭissuṇitvā pacchā khīyanadhammaṃ āpajjatīti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, caṇḍakāḷī bhikkhunī – ‘‘alaṃ tāva te, ayye, vuṭṭhāpitenā’’ti vuccamānā ‘sādhū’ti paṭissuṇitvā pacchā khīyanadhammaṃ āpajjissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
૧૧૪૭. ‘‘યા પન ભિક્ખુની – ‘અલં તાવ તે, અય્યે, વુટ્ઠાપિતેના’તિ વુચ્ચમાના ‘સાધૂ’તિ પટિસ્સુણિત્વા પચ્છા ખીયનધમ્મં આપજ્જેય્ય, પાચિત્તિય’’ન્તિ.
1147.‘‘Yā pana bhikkhunī – ‘alaṃ tāva te, ayye, vuṭṭhāpitenā’ti vuccamānā ‘sādhū’tipaṭissuṇitvā pacchā khīyanadhammaṃ āpajjeyya, pācittiya’’nti.
૧૧૪૮. યા પનાતિ યા યાદિસા…પે॰… ભિક્ખુનીતિ…પે॰… અયં ઇમસ્મિં અત્થે અધિપ્પેતા ભિક્ખુનીતિ.
1148.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
અલં તાવ તે અય્યે વુટ્ઠાપિતેનાતિ અલં તાવ તે, અય્યે, ઉપસમ્પાદિતેન. ‘સાધૂ’તિ પટિસ્સુણિત્વા પચ્છા ખીયનધમ્મં આપજ્જતિ, આપત્તિ પાચિત્તિયસ્સ.
Alaṃ tāva te ayye vuṭṭhāpitenāti alaṃ tāva te, ayye, upasampāditena. ‘Sādhū’ti paṭissuṇitvā pacchā khīyanadhammaṃ āpajjati, āpatti pācittiyassa.
૧૧૪૯. અનાપત્તિ પકતિયા છન્દા દોસા મોહા ભયા કરોન્તં ખિય્યતિ, ઉમ્મત્તિકાય, આદિકમ્મિકાયાતિ.
1149. Anāpatti pakatiyā chandā dosā mohā bhayā karontaṃ khiyyati, ummattikāya, ādikammikāyāti.
છટ્ઠસિક્ખાપદં નિટ્ઠિતં.
Chaṭṭhasikkhāpadaṃ niṭṭhitaṃ.
Footnotes:
Related texts:
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / ૨. દુતિયાદિસિક્ખાપદવણ્ણના • 2. Dutiyādisikkhāpadavaṇṇanā
