| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৩. ছত্তঙ্গপঞ্হো
3. Chattaṅgapañho
৩. ‘‘ভন্তে নাগসেন, ‘ছত্তস্স তীণি অঙ্গানি গহেতব্বানী’তি যং ৰদেসি, কতমানি তানি তীণি অঙ্গানি গহেতব্বানী’’তি? ‘‘যথা, মহারাজ, ছত্তং উপরি মুদ্ধনি চরতি, এৰমেৰ খো, মহারাজ, যোগিনা যোগাৰচরেন কিলেসানং উপরি মুদ্ধনি চরেন ভৰিতব্বং। ইদং, মহারাজ, ছত্তস্স পঠমং অঙ্গং গহেতব্বং।
3. ‘‘Bhante nāgasena, ‘chattassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti? ‘‘Yathā, mahārāja, chattaṃ upari muddhani carati, evameva kho, mahārāja, yoginā yogāvacarena kilesānaṃ upari muddhani carena bhavitabbaṃ. Idaṃ, mahārāja, chattassa paṭhamaṃ aṅgaṃ gahetabbaṃ.
‘‘পুন চপরং, মহারাজ, ছত্তং মুদ্ধনুপত্থম্ভং হোতি, এৰমেৰ খো, মহারাজ, যোগিনা যোগাৰচরেন যোনিসো মনসিকারুপত্থম্ভেন ভৰিতব্বং। ইদং, মহারাজ, ছত্তস্স দুতিযং অঙ্গং গহেতব্বং।
‘‘Puna caparaṃ, mahārāja, chattaṃ muddhanupatthambhaṃ hoti, evameva kho, mahārāja, yoginā yogāvacarena yoniso manasikārupatthambhena bhavitabbaṃ. Idaṃ, mahārāja, chattassa dutiyaṃ aṅgaṃ gahetabbaṃ.
‘‘পুন চপরং, মহারাজ, ছত্তং ৰাতাতপমেঘৰুট্ঠিযো পটিহনতি, এৰমেৰ খো, মহারাজ, যোগিনা যোগাৰচরেন নানাৰিধদিট্ঠিপুথুসমণব্রাহ্মণানং 1 মতৰাততিৰিধগ্গিসন্তাপকিলেসৰুট্ঠিযো পটিহন্তব্বা । ইদং, মহারাজ, ছত্তস্স ততিযং অঙ্গং গহেতব্বং। ভাসিতম্পেতং, মহারাজ, থেরেন সারিপুত্তেন ধম্মসেনাপতিনা –
‘‘Puna caparaṃ, mahārāja, chattaṃ vātātapameghavuṭṭhiyo paṭihanati, evameva kho, mahārāja, yoginā yogāvacarena nānāvidhadiṭṭhiputhusamaṇabrāhmaṇānaṃ 2 matavātatividhaggisantāpakilesavuṭṭhiyo paṭihantabbā . Idaṃ, mahārāja, chattassa tatiyaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘যথাপি ছত্তং ৰিপুলং, অচ্ছিদ্দং থিরসংহিতং।
‘‘‘Yathāpi chattaṃ vipulaṃ, acchiddaṃ thirasaṃhitaṃ;
ৰাতাতপং নিৰারেতি, মহতী মেঘৰুট্ঠিযো॥
Vātātapaṃ nivāreti, mahatī meghavuṭṭhiyo.
‘‘‘তথেৰ বুদ্ধপুত্তোপি, সীলছত্তধরো সুচি।
‘‘‘Tatheva buddhaputtopi, sīlachattadharo suci;
কিলেসৰুট্ঠিং ৰারেতি, সন্তাপতিৰিধগ্গযো’’’তি॥
Kilesavuṭṭhiṃ vāreti, santāpatividhaggayo’’’ti.
ছত্তঙ্গপঞ্হো ততিযো।
Chattaṅgapañho tatiyo.
Footnotes:
