| Library / Tipiṭaka / д̇ибидага • Tipiṭaka / вимаанавад̇т̇у-адтагат̇аа • Vimānavatthu-aṭṭhakathā |
3. чад̇д̇амаан̣авагавимаанаван̣н̣анаа
3. Chattamāṇavakavimānavaṇṇanā
яо вад̣̇ад̇ам̣ баваро мануж̇зсууд̇и чад̇д̇амаан̣авагавимаанам̣. д̇асса гаа уббад̇д̇и? бхаг̇аваа саавад̇т̇ияам̣ вихарад̇и ж̇зд̇аванз. д̇зна самаязна сзд̇аб̣яааяам̣ ан̃н̃ад̇арасса б̣раахман̣асса гижчаалад̣̇д̇хо буд̇д̇о чад̇д̇о наама б̣раахман̣амаан̣аво ахоси. со ваяаббад̇д̇о бид̇араа бзсид̇о уггадтам̣ г̇анд̇ваа б̣раахман̣асса богкарасаад̇исса санд̇игз мзд̇хаавид̇ааяа аналасад̇ааяа жа на жирзнзва манд̇з виж̇ж̇аадтаанаани жа уг̇г̇ахзд̇ваа б̣раахман̣асиббз нибпад̇д̇им̣ бад̇д̇о. со аажарияам̣ абхиваад̣̇зд̇ваа ‘‘маяаа д̇умхаагам̣ санд̇игз сиббам̣ сигкид̇ам̣, гим̣ во г̇аруд̣̇агкин̣ам̣ д̣̇змий’’д̇и ааха. аажарияо ‘‘г̇аруд̣̇агкин̣аа наама анд̇зваасигасса вибхаваануруубаа, гахаабан̣асахассамаанзхий’’д̇и ааха. чад̇д̇амаан̣аво аажарияам̣ абхиваад̣̇зд̇ваа сзд̇аб̣яам̣ г̇анд̇ваа маад̇аабид̇аро ванд̣̇ид̇ваа д̇зхи абхинанд̣̇ияамаано гад̇абадисант̇ааро д̇амад̇т̇ам̣ бид̇у аарожзд̇ваа ‘‘д̣̇зт̇а мз д̣̇аад̇аб̣б̣аяуд̇д̇агам̣, аж̇ж̇зва д̣̇ад̇ваа ааг̇амиссаамий’’д̇и ааха. д̇ам̣ маад̇аабид̇аро ‘‘д̇аад̇а, аж̇ж̇а вигаало, свз г̇амиссасий’’д̇и вад̇ваа гахаабан̣з нийхарид̇ваа бхан̣д̣игам̣ б̣анд̇хаабзд̇ваа табзсум̣. жораа д̇ам̣ бавад̇д̇им̣ н̃ад̇ваа чад̇д̇амаан̣авагасса г̇аманамаг̇г̇з ан̃н̃ад̇арасмим̣ ванаг̇аханз нилийнаа ажчим̣су ‘‘маан̣авам̣ маарзд̇ваа гахаабан̣з г̇ан̣хиссаамаа’’д̇и.
Yo vadataṃ pavaro manujesūti chattamāṇavakavimānaṃ. Tassa kā uppatti? Bhagavā sāvatthiyaṃ viharati jetavane. Tena samayena setabyāyaṃ aññatarassa brāhmaṇassa kicchāladdho putto chatto nāma brāhmaṇamāṇavo ahosi. So vayappatto pitarā pesito ukkaṭṭhaṃ gantvā brāhmaṇassa pokkharasātissa santike medhāvitāya analasatāya ca na cireneva mante vijjāṭṭhānāni ca uggahetvā brāhmaṇasippe nipphattiṃ patto. So ācariyaṃ abhivādetvā ‘‘mayā tumhākaṃ santike sippaṃ sikkhitaṃ, kiṃ vo garudakkhiṇaṃ demī’’ti āha. Ācariyo ‘‘garudakkhiṇā nāma antevāsikassa vibhavānurūpā, kahāpaṇasahassamānehī’’ti āha. Chattamāṇavo ācariyaṃ abhivādetvā setabyaṃ gantvā mātāpitaro vanditvā tehi abhinandiyamāno katapaṭisanthāro tamatthaṃ pitu ārocetvā ‘‘detha me dātabbayuttakaṃ, ajjeva datvā āgamissāmī’’ti āha. Taṃ mātāpitaro ‘‘tāta, ajja vikālo, sve gamissasī’’ti vatvā kahāpaṇe nīharitvā bhaṇḍikaṃ bandhāpetvā ṭhapesuṃ. Corā taṃ pavattiṃ ñatvā chattamāṇavakassa gamanamagge aññatarasmiṃ vanagahane nilīnā acchiṃsu ‘‘māṇavaṃ māretvā kahāpaṇe gaṇhissāmā’’ti.
бхаг̇аваа бажжуусасамаяз махаагарун̣аасамаабад̇д̇ид̇о вудтааяа логам̣ вологзнд̇о чад̇д̇амаан̣авагасса саран̣зсу жа сийлзсу жа бад̇идтаанам̣, жорзхи маарид̇асса д̣̇звалогз ниб̣б̣ад̇д̇им̣, д̇ад̇о саха вимаанзна ааг̇ад̇асса д̇ад̇т̇а саннибад̇ид̇абарисааяа жа д̇хаммаабхисамаяам̣ д̣̇исваа батамад̇арамзва г̇анд̇ваа маан̣авагасса г̇аманамаг̇г̇з ан̃н̃ад̇арасмим̣ ругкамуулз нисийд̣̇и. маан̣аво аажарияад̇ханам̣ г̇ахзд̇ваа сзд̇аб̣яад̇о уггадтаабхимуко г̇ажчанд̇о анд̇араамаг̇г̇з бхаг̇аванд̇ам̣ нисиннам̣ д̣̇исваа убасан̇гамид̇ваа адтааси. ‘‘гухим̣ г̇амиссасий’’д̇и бхаг̇авад̇аа вуд̇д̇о ‘‘уггадтам̣, бхо г̇од̇ама, г̇амиссаами маяхам̣ аажарияасса богкарасаад̇исса г̇аруд̣̇агкин̣ам̣ д̣̇аад̇у’’нд̇и ааха. ат̇а бхаг̇аваа ‘‘ж̇аанааси бана д̇вам̣, маан̣ава, д̇ийн̣и саран̣аани, бан̃жа сийлааний’’д̇и вад̇ваа д̇зна ‘‘наахам̣ ж̇аанаами, гимад̇т̇ияаани банзд̇аани гийд̣̇исаани жаа’’д̇и вуд̇д̇з ‘‘ид̣̇амийд̣̇иса’’нд̇и саран̣аг̇аманасса сийласамаад̣̇аанасса жа палаанисам̣сам̣ вибхаавзд̇ваа ‘‘уг̇г̇ан̣хаахи д̇аава, маан̣авага, саран̣аг̇аманавид̇хи’’нд̇и вад̇ваа ‘‘саад̇ху уг̇г̇ан̣хиссаами, гат̇зт̇а бханд̇з бхаг̇аваа’’д̇и д̇зна яаажид̇о д̇асса ружияаа ануруубам̣ г̇аат̇ааб̣анд̇хавасзна саран̣аг̇аманавид̇хим̣ д̣̇ассзнд̇о –
Bhagavā paccūsasamaye mahākaruṇāsamāpattito vuṭṭhāya lokaṃ volokento chattamāṇavakassa saraṇesu ca sīlesu ca patiṭṭhānaṃ, corehi māritassa devaloke nibbattiṃ, tato saha vimānena āgatassa tattha sannipatitaparisāya ca dhammābhisamayaṃ disvā paṭhamatarameva gantvā māṇavakassa gamanamagge aññatarasmiṃ rukkhamūle nisīdi. Māṇavo ācariyadhanaṃ gahetvā setabyato ukkaṭṭhābhimukho gacchanto antarāmagge bhagavantaṃ nisinnaṃ disvā upasaṅkamitvā aṭṭhāsi. ‘‘Kuhiṃ gamissasī’’ti bhagavatā vutto ‘‘ukkaṭṭhaṃ, bho gotama, gamissāmi mayhaṃ ācariyassa pokkharasātissa garudakkhiṇaṃ dātu’’nti āha. Atha bhagavā ‘‘jānāsi pana tvaṃ, māṇava, tīṇi saraṇāni, pañca sīlānī’’ti vatvā tena ‘‘nāhaṃ jānāmi, kimatthiyāni panetāni kīdisāni cā’’ti vutte ‘‘idamīdisa’’nti saraṇagamanassa sīlasamādānassa ca phalānisaṃsaṃ vibhāvetvā ‘‘uggaṇhāhi tāva, māṇavaka, saraṇagamanavidhi’’nti vatvā ‘‘sādhu uggaṇhissāmi, kathetha bhante bhagavā’’ti tena yācito tassa ruciyā anurūpaṃ gāthābandhavasena saraṇagamanavidhiṃ dassento –
886.
886.
‘‘яо вад̣̇ад̇ам̣ баваро мануж̇зсу, сагяамуний бхаг̇аваа гад̇агижжо;
‘‘Yo vadataṃ pavaro manujesu, sakyamunī bhagavā katakicco;
баараг̇ад̇о б̣алавийрияасаман̇г̇ий, д̇ам̣ суг̇ад̇ам̣ саран̣ад̇т̇амубзхи.
Pāragato balavīriyasamaṅgī, taṃ sugataṃ saraṇatthamupehi.
887.
887.
‘‘рааг̇авирааг̇аманзж̇амасогам̣ , д̇хаммамасан̇кад̇амаббадигуулам̣;
‘‘Rāgavirāgamanejamasokaṃ , dhammamasaṅkhatamappaṭikūlaṃ;
мад̇хурамимам̣ баг̇ун̣ам̣ сувибхад̇д̇ам̣, д̇хаммамимам̣ саран̣ад̇т̇амубзхи.
Madhuramimaṃ paguṇaṃ suvibhattaṃ, dhammamimaṃ saraṇatthamupehi.
888.
888.
‘‘яад̇т̇а жа д̣̇инна махабпаламааху, жад̇уусу сужийсу бурисаяуг̇зсу;
‘‘Yattha ca dinna mahapphalamāhu, catūsu sucīsu purisayugesu;
адта жа буг̇г̇ала д̇хаммад̣̇асаа д̇з, сан̇гхамимам̣ саран̣ад̇т̇амубзхий’’д̇и. –
Aṭṭha ca puggala dhammadasā te, saṅghamimaṃ saraṇatthamupehī’’ti. –
д̇иссо г̇аат̇ааяо абхааси.
Tisso gāthāyo abhāsi.
886. д̇ад̇т̇а яод̇и анияамид̇аважанам̣, д̇асса ‘‘д̇а’’нд̇и иминаа нияаманам̣ взд̣̇ид̇аб̣б̣ам̣. вад̣̇ад̇анд̇и вад̣̇анд̇аанам̣. баварод̇и сздто, гат̇игаанам̣ уд̇д̇амо ваад̣̇ийварод̇и ад̇т̇о. мануж̇зсууд̇и уггадтанид̣̇д̣̇зсо яат̇аа ‘‘сад̇т̇аа д̣̇звамануссаана’’нд̇и. бхаг̇аваа бана д̣̇звамануссаанамби б̣рахмаанамби саб̣б̣зсамби сад̇д̇аанам̣ бавароязва, бхаг̇авад̇о жа жаримабхавз мануссзсу уббаннад̇ааяа вуд̇д̇ам̣ ‘‘мануж̇зсуу’’д̇и. д̇знзвааха ‘‘сагяамуний’’д̇и. сагяагулаббасуд̇ад̇ааяа сагяо, гааяамонзяяаад̣̇ийхи саманнааг̇ад̇ад̇о анавасзсасса жа н̃зяяасса мунанад̇о муни жаад̇и сагяамуни. бхааг̇яаванд̇ад̇аад̣̇ийхи жад̇уухи гааран̣зхи бхаг̇аваа. жад̇уухи маг̇г̇зхи гаад̇аб̣б̣асса барин̃н̃аад̣̇ибабхзд̣̇асса сол̣асавид̇хасса гижжасса гад̇ад̇д̇аа нибпаад̣̇ид̇ад̇д̇аа гад̇агижжо. баарам̣ саггааяасса барад̇ийрам̣ ниб̣б̣аанам̣ г̇ад̇о саяамбхун̃аан̣зна ад̇хиг̇ад̇од̇и баараг̇ад̇о. асад̣̇исзна гааяаб̣алзна, анан̃н̃асаад̇хааран̣зна н̃аан̣аб̣алзна, жад̇уб̣б̣ид̇хасаммаббад̇хаанавийриязна жа саманнааг̇ад̇ад̇д̇аа б̣алавийрияасаман̇г̇ий. собханаг̇аманад̇д̇аа, сунд̣̇арам̣ таанам̣ г̇ад̇ад̇д̇аа, саммаа г̇ад̇ад̇д̇аа, саммаа жа г̇ад̣̇ид̇ад̇д̇аа суг̇ад̇о. д̇ам̣ суг̇ад̇ам̣ саммаасамб̣уд̣̇д̇хам̣ саран̣ад̇т̇ам̣ саран̣ааяа барааяан̣ааяа абааяад̣̇угкаваддад̣̇угкабарид̇д̇аан̣ааяа убзхи убаг̇ажча, аж̇ж̇а бадтааяа ахид̇анивад̇д̇анзна хид̇асам̣вад̣дханзна ‘‘аяам̣ мз бхаг̇аваа саран̣ам̣ д̇аан̣ам̣ лзн̣ам̣ барааяан̣ам̣ г̇ад̇и бадисаран̣а’’нд̇и бхаж̇а сзва, звам̣ ж̇аанаахи ваа б̣уж̇жхассууд̇и ад̇т̇о.
886. Tattha yoti aniyamitavacanaṃ, tassa ‘‘ta’’nti iminā niyamanaṃ veditabbaṃ. Vadatanti vadantānaṃ. Pavaroti seṭṭho, kathikānaṃ uttamo vādīvaroti attho. Manujesūti ukkaṭṭhaniddeso yathā ‘‘satthā devamanussāna’’nti. Bhagavā pana devamanussānampi brahmānampi sabbesampi sattānaṃ pavaroyeva, bhagavato ca carimabhave manussesu uppannatāya vuttaṃ ‘‘manujesū’’ti. Tenevāha ‘‘sakyamunī’’ti. Sakyakulappasutatāya sakyo, kāyamoneyyādīhi samannāgatato anavasesassa ca ñeyyassa munanato muni cāti sakyamuni. Bhāgyavantatādīhi catūhi kāraṇehi bhagavā. Catūhi maggehi kātabbassa pariññādipabhedassa soḷasavidhassa kiccassa katattā nipphāditattā katakicco. Pāraṃ sakkāyassa paratīraṃ nibbānaṃ gato sayambhuñāṇena adhigatoti pāragato. Asadisena kāyabalena, anaññasādhāraṇena ñāṇabalena, catubbidhasammappadhānavīriyena ca samannāgatattā balavīriyasamaṅgī. Sobhanagamanattā, sundaraṃ ṭhānaṃ gatattā, sammā gatattā, sammā ca gaditattā sugato. Taṃ sugataṃ sammāsambuddhaṃ saraṇatthaṃ saraṇāya parāyaṇāya apāyadukkhavaṭṭadukkhaparittāṇāya upehi upagaccha, ajja paṭṭhāya ahitanivattanena hitasaṃvaḍḍhanena ‘‘ayaṃ me bhagavā saraṇaṃ tāṇaṃ leṇaṃ parāyaṇaṃ gati paṭisaraṇa’’nti bhaja seva, evaṃ jānāhi vā bujjhassūti attho.
887. рааг̇авирааг̇анд̇и арияамаг̇г̇амааха. д̇зна хи арияаа анаад̣̇игаалабхаавид̇амби рааг̇ам̣ вираж̇ж̇знд̇и. анзж̇амасоганд̇и арияапалам̣. д̇ан̃хи зж̇аасан̇каад̇ааяа д̇ан̣хааяа авасидтаанан̃жа соганимид̇д̇аанам̣ гилзсаанам̣ саб̣б̣асо бадиббассамбханад̇о ‘‘анзж̇ам̣ асога’’нд̇и жа вужжад̇и. д̇хамманд̇и сабхаавад̇хаммам̣. сабхаавад̇о г̇ахзд̇аб̣б̣ад̇хаммо хзса яад̣̇ид̣̇ам̣ маг̇г̇апаланиб̣б̣аанаани, на барияад̇д̇ид̇хаммо вияа бан̃н̃ад̇д̇ид̇хаммавасзна. д̇хамманд̇и ваа барамад̇т̇ад̇хаммам̣, ниб̣б̣аананд̇и ад̇т̇о. самзжжа самбхуяяа бажжаязхи гад̇ам̣ сан̇кад̇ам̣, на сан̇кад̇анд̇и асан̇кад̇ам̣. д̇ад̣̇зва ниб̣б̣аанам̣. над̇т̇и зд̇т̇а гин̃жиби бадигууланд̇и аббадигуулам̣. саванавзлааяам̣ убабаригкан̣авзлааяам̣ бадибаж̇ж̇анавзлааяанд̇и саб̣б̣ад̣̇ааби идтамзваад̇и мад̇хурам̣. саб̣б̣ан̃н̃уд̇ан̃н̃аан̣асанниссаяааяа бадибхаанасамбад̣̇ааяа бавад̇д̇ид̇ад̇д̇аа суббавад̇д̇ибхаавад̇о нибун̣абхаавад̇о жа баг̇ун̣ам̣. вибхаж̇ид̇аб̣б̣асса ад̇т̇асса канд̇хаад̣̇ивасзна гусалаад̣̇ивасзна уд̣̇д̣̇зсаад̣̇ивасзна жа судту вибхаж̇анад̇о сувибхад̇д̇ам̣. д̇ийхиби бад̣̇зхи барияад̇д̇ид̇хаммамзва вад̣̇ад̇и. д̇знзва хисса аабаат̇агаалз вияа вимад̣̇д̣̇анагаалзби гат̇знд̇асса вияа сун̣анд̇ассааби саммукийбхаавад̇о убхад̇обажжагкад̇ааяа д̣̇ассанад̇т̇ам̣ ‘‘има’’нд̇и вуд̇д̇ам̣. д̇хамманд̇и яат̇аавабадибаж̇ж̇анд̇з абааяад̣̇угкабаад̇ад̇о д̇хааран̣ад̇т̇зна д̇хаммам̣, ид̣̇ам̣ жад̇уб̣б̣ид̇хассааби д̇хаммасса саад̇хааран̣аважанам̣. барияад̇д̇ид̇хаммоби хи саран̣зсу жа сийлзсу жа бад̇идтаанамад̇д̇ааяаби яат̇аавабадибад̇д̇ияаа абааяад̣̇угкабаад̇ад̇о д̇хаарзд̇и зва. имасса жа ад̇т̇асса ид̣̇амзва вимаанам̣ саад̇хаганд̇и д̣̇адтаб̣б̣ам̣. саад̇хааран̣абхаавзна яат̇аавуд̇д̇ад̇хаммасса бажжагкам̣ гад̇ваа д̣̇ассзнд̇о буна ‘‘има’’нд̇и ааха.
887.Rāgavirāganti ariyamaggamāha. Tena hi ariyā anādikālabhāvitampi rāgaṃ virajjenti. Anejamasokanti ariyaphalaṃ. Tañhi ejāsaṅkhātāya taṇhāya avasiṭṭhānañca sokanimittānaṃ kilesānaṃ sabbaso paṭippassambhanato ‘‘anejaṃ asoka’’nti ca vuccati. Dhammanti sabhāvadhammaṃ. Sabhāvato gahetabbadhammo hesa yadidaṃ maggaphalanibbānāni, na pariyattidhammo viya paññattidhammavasena. Dhammanti vā paramatthadhammaṃ, nibbānanti attho. Samecca sambhuyya paccayehi kataṃ saṅkhataṃ, na saṅkhatanti asaṅkhataṃ. Tadeva nibbānaṃ. Natthi ettha kiñcipi paṭikūlanti appaṭikūlaṃ. Savanavelāyaṃ upaparikkhaṇavelāyaṃ paṭipajjanavelāyanti sabbadāpi iṭṭhamevāti madhuraṃ. Sabbaññutaññāṇasannissayāya paṭibhānasampadāya pavattitattā suppavattibhāvato nipuṇabhāvato ca paguṇaṃ. Vibhajitabbassa atthassa khandhādivasena kusalādivasena uddesādivasena ca suṭṭhu vibhajanato suvibhattaṃ. Tīhipi padehi pariyattidhammameva vadati. Teneva hissa āpāthakāle viya vimaddanakālepi kathentassa viya suṇantassāpi sammukhībhāvato ubhatopaccakkhatāya dassanatthaṃ ‘‘ima’’nti vuttaṃ. Dhammanti yathāvapaṭipajjante apāyadukkhapātato dhāraṇatthena dhammaṃ, idaṃ catubbidhassāpi dhammassa sādhāraṇavacanaṃ. Pariyattidhammopi hi saraṇesu ca sīlesu ca patiṭṭhānamattāyapi yathāvapaṭipattiyā apāyadukkhapātato dhāreti eva. Imassa ca atthassa idameva vimānaṃ sādhakanti daṭṭhabbaṃ. Sādhāraṇabhāvena yathāvuttadhammassa paccakkhaṃ katvā dassento puna ‘‘ima’’nti āha.
888. яад̇т̇аад̇и яасмим̣ арияасан̇гхз. д̣̇иннанд̇и барижжад̇д̇ам̣ аннаад̣̇ид̣̇зяяад̇хаммам̣. д̣̇инна махабпаланд̇и г̇аат̇аасукад̇т̇ам̣ анунаасигалобо гад̇о. ажжанд̇амзва гилзсаасужид̇о висуж̇жханзна сужийсу ‘‘сод̇аабанно сод̇аабад̇д̇ипаласажчигирияааяа бадибанно’’д̇иаад̣̇инаа (а. ни. 8.60) вуд̇д̇зсу жад̇уусу бурисаяуг̇зсу. адтаад̇и маг̇г̇адтапаладтзсу яуг̇ал̣з агад̇ваа висум̣ висум̣ г̇ахан̣зна адта буг̇г̇алаа. г̇аат̇аасукад̇т̇амзва жзд̇т̇а ‘‘буг̇г̇ала д̇хаммад̣̇асаа’’д̇и рассам̣ гад̇ваа нид̣̇д̣̇зсо. д̇хаммад̣̇асаад̇и жад̇усажжад̇хаммасса ниб̣б̣аанад̇хаммасса жа бажжагкад̇о д̣̇ассанагаа. д̣̇идтисийласааман̃н̃зна сам̣хад̇абхаавзна сан̇гхам̣.
888.Yatthāti yasmiṃ ariyasaṅghe. Dinnanti pariccattaṃ annādideyyadhammaṃ. Dinna mahapphalanti gāthāsukhatthaṃ anunāsikalopo kato. Accantameva kilesāsucito visujjhanena sucīsu ‘‘sotāpanno sotāpattiphalasacchikiriyāya paṭipanno’’tiādinā (a. ni. 8.60) vuttesu catūsu purisayugesu. Aṭṭhāti maggaṭṭhaphalaṭṭhesu yugaḷe akatvā visuṃ visuṃ gahaṇena aṭṭha puggalā. Gāthāsukhatthameva cettha ‘‘puggala dhammadasā’’ti rassaṃ katvā niddeso. Dhammadasāti catusaccadhammassa nibbānadhammassa ca paccakkhato dassanakā. Diṭṭhisīlasāmaññena saṃhatabhāvena saṅghaṃ.
звам̣ бхаг̇авад̇аа д̇ийхи г̇аат̇аахи саран̣аг̇ун̣асанд̣̇ассанзна сад̣̇д̇хим̣ саран̣аг̇аманавид̇химхи вуд̇д̇з маан̣аво д̇ам̣д̇ам̣саран̣аг̇ун̣аануссаран̣амукзна саран̣аг̇аманавид̇хино ад̇д̇ано хад̣̇аяз табид̇абхаавам̣ вибхаавзнд̇о д̇ассаа д̇ассаа г̇аат̇ааяа ананд̇арам̣ ‘‘яо вад̣̇ад̇ам̣ баваро’’д̇иаад̣̇инаа д̇ам̣ д̇ам̣ г̇аат̇ам̣ бажжанубхааси. звам̣ бажжанубхаасид̇ваа тид̇асса бан̃жа сигкаабад̣̇аани саруубад̇о палаанисам̣сад̇о жа вибхаавзд̇ваа д̇зсам̣ самаад̣̇аанавид̇хим̣ гат̇зси. со д̇амби судту убад̇хаарзд̇ваа басаннамаанасо ‘‘ханд̣̇аахам̣ бхаг̇аваа г̇амиссаамий’’д̇и вад̇ваа рад̇анад̇д̇аяаг̇ун̣ам̣ ануссаранд̇о д̇ам̣язва маг̇г̇ам̣ бадибаж̇ж̇и. бхаг̇авааби ‘‘алам̣ имасса зд̇д̇агам̣ гусалам̣ д̣̇звалогуубабад̇д̇ияаа’’д̇и ж̇зд̇аванамзва аг̇амааси.
Evaṃ bhagavatā tīhi gāthāhi saraṇaguṇasandassanena saddhiṃ saraṇagamanavidhimhi vutte māṇavo taṃtaṃsaraṇaguṇānussaraṇamukhena saraṇagamanavidhino attano hadaye ṭhapitabhāvaṃ vibhāvento tassā tassā gāthāya anantaraṃ ‘‘yo vadataṃ pavaro’’tiādinā taṃ taṃ gāthaṃ paccanubhāsi. Evaṃ paccanubhāsitvā ṭhitassa pañca sikkhāpadāni sarūpato phalānisaṃsato ca vibhāvetvā tesaṃ samādānavidhiṃ kathesi. So tampi suṭṭhu upadhāretvā pasannamānaso ‘‘handāhaṃ bhagavā gamissāmī’’ti vatvā ratanattayaguṇaṃ anussaranto taṃyeva maggaṃ paṭipajji. Bhagavāpi ‘‘alaṃ imassa ettakaṃ kusalaṃ devalokūpapattiyā’’ti jetavanameva agamāsi.
маан̣авасса бана басаннажид̇д̇асса рад̇анад̇д̇аяаг̇ун̣ам̣ саллагкан̣авасзна ‘‘саран̣ам̣ убзмий’’д̇и бавад̇д̇ажид̇д̇уббаад̣̇ад̇ааяа саран̣зсу жа, бхаг̇авад̇аа вуд̇д̇анаязна бан̃жаннам̣ сийлаанам̣ ад̇хидтаанзна сийлзсу жа бад̇идтид̇асса д̇знзва наязна рад̇анад̇д̇аяаг̇ун̣з ануссаранд̇ассзва г̇ажчанд̇асса жораа маг̇г̇з барияудтим̣су. со д̇з аг̇ан̣зд̇ваа рад̇анад̇д̇аяаг̇ун̣з ануссаранд̇оязва г̇ажчад̇и. д̇ан̃жзго жоро г̇умб̣анд̇арам̣ убаниссааяа тид̇о висабийд̇зна сарзна сахасаава виж̇жхид̇ваа ж̇ийвид̇агкаяам̣ баабзд̇ваа гахаабан̣абхан̣д̣игам̣ г̇ахзд̇ваа ад̇д̇ано сахааязхи сад̣̇д̇хим̣ баггаами. маан̣аво бана гаалам̣ гад̇ваа д̇аавад̇им̣сабхаванз д̇им̣саяож̇анигз ганагавимаанз суд̇д̇аббаб̣уд̣̇д̇хо вияа ажчараасахассабаривуд̇о садтисагадабхаараалан̇гаарабадиман̣д̣ид̇ад̇д̇абхааво ниб̣б̣ад̇д̇и, д̇асса вимаанасса аабхаа саад̇ирзгаани вийсад̇ияож̇анаани парид̇ваа д̇идтад̇и.
Māṇavassa pana pasannacittassa ratanattayaguṇaṃ sallakkhaṇavasena ‘‘saraṇaṃ upemī’’ti pavattacittuppādatāya saraṇesu ca, bhagavatā vuttanayena pañcannaṃ sīlānaṃ adhiṭṭhānena sīlesu ca patiṭṭhitassa teneva nayena ratanattayaguṇe anussarantasseva gacchantassa corā magge pariyuṭṭhiṃsu. So te agaṇetvā ratanattayaguṇe anussarantoyeva gacchati. Tañceko coro gumbantaraṃ upanissāya ṭhito visapītena sarena sahasāva vijjhitvā jīvitakkhayaṃ pāpetvā kahāpaṇabhaṇḍikaṃ gahetvā attano sahāyehi saddhiṃ pakkāmi. Māṇavo pana kālaṃ katvā tāvatiṃsabhavane tiṃsayojanike kanakavimāne suttappabuddho viya accharāsahassaparivuto saṭṭhisakaṭabhārālaṅkārapaṭimaṇḍitattabhāvo nibbatti, tassa vimānassa ābhā sātirekāni vīsatiyojanāni pharitvā tiṭṭhati.
ат̇а маан̣авам̣ гаалагад̇ам̣ д̣̇исваа сзд̇аб̣яаг̇аамаваасино мануссаа сзд̇аб̣яам̣ г̇анд̇ваа д̇асса маад̇аабид̇уунам̣ уггадтаг̇аамаваасино жа уггадтам̣ г̇анд̇ваа б̣раахман̣асса богкарасаад̇исса гат̇зсум̣. д̇ам̣ суд̇ваа д̇асса маад̇аабид̇аро н̃аад̇имид̇д̇аа б̣раахман̣о жа богкарасаад̇и сабариваараа ассумукаа род̣̇амаанаа д̇ам̣ бад̣̇зсам̣ аг̇амам̣су, язбхуяязна сзд̇аб̣яаваасино жа уггадтаваасино жа ижчаанан̇г̇алаваасино жа саннибад̇им̣су, махаасамааг̇амо ахоси. ат̇а маан̣авасса маад̇аабид̇аро маг̇г̇асса авид̣̇уурз жид̇агам̣ саж̇ж̇зд̇ваа сарийрагижжам̣ гаад̇ум̣ аарабхим̣су.
Atha māṇavaṃ kālakataṃ disvā setabyagāmavāsino manussā setabyaṃ gantvā tassa mātāpitūnaṃ ukkaṭṭhagāmavāsino ca ukkaṭṭhaṃ gantvā brāhmaṇassa pokkharasātissa kathesuṃ. Taṃ sutvā tassa mātāpitaro ñātimittā brāhmaṇo ca pokkharasāti saparivārā assumukhā rodamānā taṃ padesaṃ agamaṃsu, yebhuyyena setabyavāsino ca ukkaṭṭhavāsino ca icchānaṅgalavāsino ca sannipatiṃsu, mahāsamāgamo ahosi. Atha māṇavassa mātāpitaro maggassa avidūre citakaṃ sajjetvā sarīrakiccaṃ kātuṃ ārabhiṃsu.
ат̇а бхаг̇аваа жинд̇зси ‘‘маяи г̇ад̇з чад̇д̇амаан̣аво мам̣ ванд̣̇ид̇ум̣ ааг̇амиссад̇и, ааг̇ад̇ан̃жа д̇ам̣ гад̇агаммам̣ гат̇аабзнд̇о гаммапалам̣ бажжагкам̣ гаарзд̇ваа д̇хаммам̣ д̣̇зсзссаами, звам̣ махааж̇анасса д̇хаммаабхисамаяо бхависсад̇ий’’д̇и жинд̇зд̇ваа махад̇аа бхигкусан̇гхзна сад̣̇д̇хим̣ д̇ам̣ бад̣̇зсам̣ убаг̇анд̇ваа ан̃н̃ад̇арасмим̣ ругкамуулз нисийд̣̇и чаб̣б̣ан̣н̣аб̣уд̣̇д̇харам̣сияо виссаж̇ж̇знд̇о. ат̇а чад̇д̇амаан̣авад̣̇звабуд̇д̇оби ад̇д̇ано самбад̇д̇им̣ бажжавзгкид̇ваа, д̇ассаа гааран̣ам̣ убад̇хаарзнд̇о саран̣аг̇аманан̃жа сийласамаад̣̇аанан̃жа д̣̇исваа, вимхаяаж̇аад̇о бхаг̇авад̇и сан̃ж̇аад̇абасаад̣̇аб̣ахумаано ‘‘ид̣̇аанзваахам̣ г̇анд̇ваа бхаг̇аванд̇ан̃жа бхигкусан̇гхан̃жа ванд̣̇иссаами, рад̇анад̇д̇аяаг̇ун̣з жа махааж̇анасса баагадз гариссаамий’’д̇и гад̇ан̃н̃уд̇ам̣ ниссааяа сагалам̣ д̇ам̣ аран̃н̃абад̣̇зсам̣ згаалогам̣ гаронд̇о, саха вимаанзна ааг̇анд̇ваа вимаанад̇о оруяха махад̇аа бариваарзна сад̣̇д̇хим̣ д̣̇иссамаанаруубо убасан̇гамид̇ваа бхаг̇авад̇о баад̣̇зсу сирасаа нибад̇анд̇о абхиваад̣̇зд̇ваа ан̃ж̇алим̣ баг̇г̇аяха згаманд̇ам̣ адтааси. д̇ам̣ д̣̇исваа махааж̇ано ‘‘го ну ко аяам̣ д̣̇зво ваа б̣рахмаа ваа’’д̇и ажчарияаб̣бхуд̇аж̇аад̇о убасан̇гамид̇ваа бхаг̇аванд̇ам̣ бариваарзси. бхаг̇аваа д̇зна гад̇абун̃н̃агаммам̣ баагадам̣ гаад̇ум̣ –
Atha bhagavā cintesi ‘‘mayi gate chattamāṇavo maṃ vandituṃ āgamissati, āgatañca taṃ katakammaṃ kathāpento kammaphalaṃ paccakkhaṃ kāretvā dhammaṃ desessāmi, evaṃ mahājanassa dhammābhisamayo bhavissatī’’ti cintetvā mahatā bhikkhusaṅghena saddhiṃ taṃ padesaṃ upagantvā aññatarasmiṃ rukkhamūle nisīdi chabbaṇṇabuddharaṃsiyo vissajjento. Atha chattamāṇavadevaputtopi attano sampattiṃ paccavekkhitvā, tassā kāraṇaṃ upadhārento saraṇagamanañca sīlasamādānañca disvā, vimhayajāto bhagavati sañjātapasādabahumāno ‘‘idānevāhaṃ gantvā bhagavantañca bhikkhusaṅghañca vandissāmi, ratanattayaguṇe ca mahājanassa pākaṭe karissāmī’’ti kataññutaṃ nissāya sakalaṃ taṃ araññapadesaṃ ekālokaṃ karonto, saha vimānena āgantvā vimānato oruyha mahatā parivārena saddhiṃ dissamānarūpo upasaṅkamitvā bhagavato pādesu sirasā nipatanto abhivādetvā añjaliṃ paggayha ekamantaṃ aṭṭhāsi. Taṃ disvā mahājano ‘‘ko nu kho ayaṃ devo vā brahmā vā’’ti acchariyabbhutajāto upasaṅkamitvā bhagavantaṃ parivāresi. Bhagavā tena katapuññakammaṃ pākaṭaṃ kātuṃ –
889.
889.
‘‘на д̇ат̇аа д̇абад̇и набхз суурияо, жанд̣̇о жа на бхаасад̇и на пуссо;
‘‘Na tathā tapati nabhe sūriyo, cando ca na bhāsati na phusso;
яат̇аа ад̇уламид̣̇ам̣ махаббабхаасам̣, го ну д̇вам̣ д̇ид̣̇иваа махим̣ убааг̇аа.
Yathā atulamidaṃ mahappabhāsaṃ, ko nu tvaṃ tidivā mahiṃ upāgā.
890.
890.
‘‘чинд̣̇ад̇и рам̣сий бабхан̇гарасса, саад̇хигавийсад̇ияож̇анаани аабхаа;
‘‘Chindati raṃsī pabhaṅkarassa, sādhikavīsatiyojanāni ābhā;
рад̇д̇имаби яат̇аа д̣̇ивам̣ гарод̇и, барисуд̣̇д̇хам̣ вималам̣ субхам̣ вимаанам̣.
Rattimapi yathā divaṃ karoti, parisuddhaṃ vimalaṃ subhaṃ vimānaṃ.
891.
891.
‘‘б̣ахубад̣̇умавижид̇рабун̣д̣арийгам̣, вогин̣н̣ам̣ гусумзхи нзгажид̇д̇ам̣;
‘‘Bahupadumavicitrapuṇḍarīkaṃ, vokiṇṇaṃ kusumehi nekacittaṃ;
араж̇авираж̇ахзмаж̇аалачаннам̣, аагаасз д̇абад̇и яат̇ааби суурияо.
Arajavirajahemajālachannaṃ, ākāse tapati yathāpi sūriyo.
892.
892.
‘‘рад̇д̇амб̣арабийд̇аваасасаахи, аг̇арубияан̇г̇ужанд̣̇ануссад̣̇аахи;
‘‘Rattambarapītavāsasāhi, agarupiyaṅgucandanussadāhi;
ган̃жанад̇анусаннибхад̇д̇ажаахи, барибуурам̣ г̇аг̇анам̣ва д̇аарагаахи.
Kañcanatanusannibhattacāhi, paripūraṃ gaganaṃva tārakāhi.
893.
893.
‘‘наранаарияо б̣ахугзд̇т̇анзгаван̣н̣аа, гусумавибхуусид̇аабхаран̣зд̇т̇а суманаа;
‘‘Naranāriyo bahuketthanekavaṇṇā, kusumavibhūsitābharaṇettha sumanā;
анилабамун̃жид̇аа баванд̇и сурабхим̣, д̇абанияавид̇ад̇аа суван̣н̣ачаннаа.
Anilapamuñcitā pavanti surabhiṃ, tapaniyavitatā suvaṇṇachannā.
894.
894.
‘‘гисса сам̣яамасса аяам̣ вибааго, гзнааси гаммапалзнид̇хуубабанно;
‘‘Kissa saṃyamassa ayaṃ vipāko, kenāsi kammaphalenidhūpapanno;
яат̇аа жа д̇з ад̇хиг̇ад̇амид̣̇ам̣ вимаанам̣, д̇ад̣̇анубад̣̇ам̣ аважааси иг̇гха будто’’д̇и. –
Yathā ca te adhigatamidaṃ vimānaṃ, tadanupadaṃ avacāsi iggha puṭṭho’’ti. –
д̇ам̣ д̣̇звабуд̇д̇ам̣ бадибужчи.
Taṃ devaputtaṃ paṭipucchi.
886. д̇ад̇т̇а д̇абад̇ийд̇и д̣̇иббад̇и. набхзд̇и аагаасз. пуссод̇и пуссад̇аарагаа. ад̇уланд̇и анубамам̣, аббамаан̣ам̣ ваа. ид̣̇ам̣ вуд̇д̇ам̣ ход̇и – яат̇аа ид̣̇ам̣ д̇ава вимаанам̣ анубамам̣ аббамаан̣ам̣ бабхассарабхаавзна д̇ад̇о зва махаббабхаасам̣ аагаасз д̣̇иббад̇и, на д̇ат̇аа д̇аарагаруубаани д̣̇иббанд̇и, на жанд̣̇о, д̇аани д̇аава д̇идтанд̇у, нааби суурияо д̣̇иббад̇и, звам̣бхууд̇о го ну д̇вам̣ д̣̇звалогад̇о имам̣ бхуумибад̣̇зсам̣ убаг̇ад̇о, д̇ам̣ баагадам̣ гад̇ваа имасса махааж̇анасса гат̇зхийд̇и.
886. Tattha tapatīti dippati. Nabheti ākāse. Phussoti phussatārakā. Atulanti anupamaṃ, appamāṇaṃ vā. Idaṃ vuttaṃ hoti – yathā idaṃ tava vimānaṃ anupamaṃ appamāṇaṃ pabhassarabhāvena tato eva mahappabhāsaṃ ākāse dippati, na tathā tārakarūpāni dippanti, na cando, tāni tāva tiṭṭhantu, nāpi sūriyo dippati, evaṃbhūto ko nu tvaṃ devalokato imaṃ bhūmipadesaṃ upagato, taṃ pākaṭaṃ katvā imassa mahājanassa kathehīti.
890. чинд̣̇ад̇ийд̇и вижчинд̣̇ад̇и, бавад̇д̇ид̇ум̣ ад̣̇знд̇о бадиханад̇ийд̇и ад̇т̇о. рам̣сийд̇и расмияо. бабхан̇гарассаад̇и суурияасса. д̇асса жа вимаанасса бабхаа саманд̇ад̇о бан̃жавийсад̇и яож̇анаани парид̇ваа д̇идтад̇и. д̇знааха ‘‘саад̇хигавийсад̇ияож̇анаани аабхаа’’д̇и. рад̇д̇имаби яат̇аа д̣̇ивам̣ гарод̇ийд̇и ад̇д̇ано бабхааяа анд̇хагаарам̣ вид̇хаманд̇ам̣ рад̇д̇ибхааг̇амби д̣̇ивасабхааг̇ам̣ вияа гарод̇и. барисаманд̇ад̇о анд̇о жзва б̣ахи жа суд̣̇д̇хад̇ааяа барисуд̣̇д̇хам̣. саб̣б̣асо малаабхаавзна вималам̣. сунд̣̇арад̇ааяа субхам̣.
890.Chindatīti vicchindati, pavattituṃ adento paṭihanatīti attho. Raṃsīti rasmiyo. Pabhaṅkarassāti sūriyassa. Tassa ca vimānassa pabhā samantato pañcavīsati yojanāni pharitvā tiṭṭhati. Tenāha ‘‘sādhikavīsatiyojanāni ābhā’’ti. Rattimapi yathā divaṃ karotīti attano pabhāya andhakāraṃ vidhamantaṃ rattibhāgampi divasabhāgaṃ viya karoti. Parisamantato anto ceva bahi ca suddhatāya parisuddhaṃ. Sabbaso malābhāvena vimalaṃ. Sundaratāya subhaṃ.
891. б̣ахубад̣̇умавижид̇рабун̣д̣арийганд̇и б̣ахувид̇харад̇д̇агамалан̃жзва вижид̇д̇аван̣н̣асзд̇агамалан̃жа. сзд̇агамалам̣ бад̣̇умам̣, рад̇д̇агамалам̣ бун̣д̣арийганд̇и вад̣̇анд̇и. вогин̣н̣ам̣ гусумзхийд̇и ан̃н̃зхи жа наанаавид̇хзхи бубпзхи самогин̣н̣ам̣. нзгажид̇д̇анд̇и маалаагаммалад̇аагаммаад̣̇инаанаавид̇хавижид̇д̇ам̣. араж̇авираж̇ахзмаж̇аалачаннанд̇и саяам̣ абаг̇ад̇араж̇ам̣ вираж̇зна нид̣̇д̣̇осзна ган̃жанаж̇аалзна чаад̣̇ид̇ам̣.
891.Bahupadumavicitrapuṇḍarīkanti bahuvidharattakamalañceva vicittavaṇṇasetakamalañca. Setakamalaṃ padumaṃ, rattakamalaṃ puṇḍarīkanti vadanti. Vokiṇṇaṃ kusumehīti aññehi ca nānāvidhehi pupphehi samokiṇṇaṃ. Nekacittanti mālākammalatākammādinānāvidhavicittaṃ. Arajavirajahemajālachannanti sayaṃ apagatarajaṃ virajena niddosena kañcanajālena chāditaṃ.
892. рад̇д̇амб̣арабийд̇аваасасаахийд̇и рад̇д̇авад̇т̇аахи жзва бийд̇авад̇т̇аахи жа. згаа хи рад̇д̇ам̣ д̣̇иб̣б̣авад̇т̇ам̣ ниваасзд̇ваа бийд̇ам̣ уд̇д̇арияам̣ гарод̇и, абараа бийд̇ам̣ ниваасзд̇ваа рад̇д̇ам̣ уд̇д̇арияам̣ гарод̇и. д̇ам̣ санд̇хааяа вуд̇д̇ам̣ ‘‘рад̇д̇амб̣арабийд̇аваасасаахий’’д̇и . аг̇арубияан̇г̇ужанд̣̇ануссад̣̇аахийд̇и аг̇аруг̇анд̇хзна бияан̇г̇умаалаахи жанд̣̇анаг̇анд̇хзхи жа уссад̣̇аахи, уссаннад̣̇иб̣б̣ааг̇аруг̇анд̇хаад̣̇игаахийд̇и ад̇т̇о. ган̃жанад̇анусаннибхад̇д̇ажаахийд̇и ганагасад̣̇исасукумажчавийхи. барибууранд̇и д̇ахам̣ д̇ахам̣ вижаранд̇ийхи сан̇г̇ийд̇ибасуд̇аахи жа барибун̣н̣ам̣.
892.Rattambarapītavāsasāhīti rattavatthāhi ceva pītavatthāhi ca. Ekā hi rattaṃ dibbavatthaṃ nivāsetvā pītaṃ uttariyaṃ karoti, aparā pītaṃ nivāsetvā rattaṃ uttariyaṃ karoti. Taṃ sandhāya vuttaṃ ‘‘rattambarapītavāsasāhī’’ti . Agarupiyaṅgucandanussadāhīti agarugandhena piyaṅgumālāhi candanagandhehi ca ussadāhi, ussannadibbāgarugandhādikāhīti attho. Kañcanatanusannibhattacāhīti kanakasadisasukhumacchavīhi. Paripūranti tahaṃ tahaṃ vicarantīhi saṅgītipasutāhi ca paripuṇṇaṃ.
893. б̣ахугзд̇т̇аад̇и б̣ахугаа зд̇т̇а. анзгаван̣н̣аад̇и наанааруубаа. гусамавибхуусид̇аабхаран̣аад̇и висзсад̇о сурабхивааяанад̇т̇ам̣ д̣̇иб̣б̣агусумзхи алан̇гад̇ад̣̇иб̣б̣аабхаран̣аа. зд̇т̇аад̇и зд̇асмим̣ вимаанз. суманаад̇и сунд̣̇араманаа бамуд̣̇ид̇ажид̇д̇аа. анилабамун̃жид̇аа баванд̇и сурабхинд̇и анилзна бамун̃жид̇аг̇анд̇хаанам̣ бубпаанам̣ вааяунаа вимуд̇д̇абад̇д̇абудам̣ вияа виб̣анд̇хад̇ааяа вигасид̇ад̇ааяа жа суг̇анд̇хам̣ бавааяанд̇и. ‘‘анилабад̇хуубид̇аа’’д̇иби батанд̇и, ваад̇зна манд̣̇ам̣ аавуяхамаанаа хзмамаяабубпаад̇и ад̇т̇о. ганагажийрагаад̣̇ийхи взн̣иаад̣̇ийсу од̇ад̇ад̇ааяа д̇абанияавид̇ад̇аа. язбхуяязна ган̃жанаабхаран̣зхи ажчаад̣̇ид̇асарийрад̇ааяа суван̣н̣ачаннаа. наранаарияод̇и д̣̇звабуд̇д̇аа д̣̇звад̇хийд̇аро жа б̣ахугаа зд̇т̇а д̇ава вимаанзд̇и д̣̇ассзд̇и.
893.Bahuketthāti bahukā ettha. Anekavaṇṇāti nānārūpā. Kusamavibhūsitābharaṇāti visesato surabhivāyanatthaṃ dibbakusumehi alaṅkatadibbābharaṇā. Etthāti etasmiṃ vimāne. Sumanāti sundaramanā pamuditacittā. Anilapamuñcitā pavanti surabhinti anilena pamuñcitagandhānaṃ pupphānaṃ vāyunā vimuttapattapuṭaṃ viya vibandhatāya vikasitatāya ca sugandhaṃ pavāyanti. ‘‘Anilapadhūpitā’’tipi paṭhanti, vātena mandaṃ āvuyhamānā hemamayapupphāti attho. Kanakacīrakādīhi veṇiādīsu otatatāya tapaniyavitatā. Yebhuyyena kañcanābharaṇehi acchāditasarīratāya suvaṇṇachannā. Naranāriyoti devaputtā devadhītaro ca bahukā ettha tava vimāneti dasseti.
894. ин̇гхаад̇и жод̣̇анад̇т̇з нибаад̇о будтод̇и бужчид̇о имасса махааж̇анасса гаммапалабажжагкабхаавааяаад̇и ад̇хиббааяо.
894.Iṅghāti codanatthe nipāto puṭṭhoti pucchito imassa mahājanassa kammaphalapaccakkhabhāvāyāti adhippāyo.
д̇ад̇о д̣̇звабуд̇д̇о имаахи г̇аат̇аахи б̣яаагааси –
Tato devaputto imāhi gāthāhi byākāsi –
895.
895.
‘‘саяамид̇ха бат̇з самзжжа маан̣авзна, сад̇т̇аанусааси анугамбамаано;
‘‘Sayamidha pathe samecca māṇavena, satthānusāsi anukampamāno;
д̇ава рад̇анаварасса д̇хаммам̣ суд̇ваа, гариссаамийд̇и жа б̣равид̇т̇а чад̇д̇о.
Tava ratanavarassa dhammaṃ sutvā, karissāmīti ca bravittha chatto.
896.
896.
‘‘ж̇инаварабаварам̣ убзхи саран̣ам̣, д̇хамман̃жааби д̇ат̇зва бхигкусан̇гхам̣;
‘‘Jinavarapavaraṃ upehi saraṇaṃ, dhammañcāpi tatheva bhikkhusaṅghaṃ;
нод̇и батамам̣ авожахам̣ бханд̇з, бажчаа д̇з важанам̣ д̇ат̇звагаасим̣.
Noti paṭhamaṃ avocahaṃ bhante, pacchā te vacanaṃ tathevakāsiṃ.
897.
897.
‘‘маа жа баан̣авад̇хам̣ вивид̇хам̣ жарассу асужим̣,
‘‘Mā ca pāṇavadhaṃ vividhaṃ carassu asuciṃ,
на хи баан̣зсу асан̃н̃ад̇ам̣ аван̣н̣аяим̣су саббан̃н̃аа;
Na hi pāṇesu asaññataṃ avaṇṇayiṃsu sappaññā;
нод̇и батамам̣ авожахам̣ бханд̇з, бажчаа д̇з важанам̣ д̇ат̇звагаасим̣.
Noti paṭhamaṃ avocahaṃ bhante, pacchā te vacanaṃ tathevakāsiṃ.
898.
898.
‘‘маа жа бараж̇анасса рагкид̇амби, аад̣̇аад̇аб̣б̣амаман̃н̃ит̇о ад̣̇иннам̣;
‘‘Mā ca parajanassa rakkhitampi, ādātabbamamaññitho adinnaṃ;
нод̇и батамам̣ авожахам̣ бханд̇з, бажчаа д̇з важанам̣ д̇ат̇звагаасим̣.
Noti paṭhamaṃ avocahaṃ bhante, pacchā te vacanaṃ tathevakāsiṃ.
899.
899.
‘‘маа жа бараж̇анасса рагкид̇ааяо, барабхарияаа аг̇амаа анарияамзд̇ам̣;
‘‘Mā ca parajanassa rakkhitāyo, parabhariyā agamā anariyametaṃ;
нод̇и батамам̣ авожахам̣ бханд̇з, бажчаа д̇з важанам̣ д̇ат̇звагаасим̣.
Noti paṭhamaṃ avocahaṃ bhante, pacchā te vacanaṃ tathevakāsiṃ.
900.
900.
‘‘маа жа вид̇ат̇ам̣ ан̃н̃ат̇аа абхаан̣и, на хи мусааваад̣̇ам̣ аван̣н̣аяим̣су саббан̃н̃аа;
‘‘Mā ca vitathaṃ aññathā abhāṇi, na hi musāvādaṃ avaṇṇayiṃsu sappaññā;
нод̇и батамам̣ авожахам̣ бханд̇з, бажчаа д̇з важанам̣ д̇ат̇звагаасим̣.
Noti paṭhamaṃ avocahaṃ bhante, pacchā te vacanaṃ tathevakāsiṃ.
901.
901.
‘‘язна жа бурисасса абзд̇и сан̃н̃аа, д̇ам̣ маж̇ж̇ам̣ бариваж̇ж̇аяассу саб̣б̣ам̣;
‘‘Yena ca purisassa apeti saññā, taṃ majjaṃ parivajjayassu sabbaṃ;
нод̇и батамам̣ авожахам̣ бханд̇з, бажчаа д̇з важанам̣ д̇ат̇звагаасим̣.
Noti paṭhamaṃ avocahaṃ bhante, pacchā te vacanaṃ tathevakāsiṃ.
902.
902.
‘‘сваахам̣ ид̇ха бан̃жа сигкаа гарид̇ваа, бадибаж̇ж̇ид̇ваа д̇ат̇ааг̇ад̇асса д̇хаммз;
‘‘Svāhaṃ idha pañca sikkhā karitvā, paṭipajjitvā tathāgatassa dhamme;
д̣̇взбат̇амаг̇амаасим̣ жорамаж̇жхз, д̇з мам̣ д̇ад̇т̇а вад̇хим̣су бхог̇ахзд̇у.
Dvepathamagamāsiṃ coramajjhe, te maṃ tattha vadhiṃsu bhogahetu.
903.
903.
‘‘зд̇д̇агамид̣̇ам̣ ануссараами гусалам̣, д̇ад̇о барам̣ на мз виж̇ж̇ад̇и ан̃н̃ам̣;
‘‘Ettakamidaṃ anussarāmi kusalaṃ, tato paraṃ na me vijjati aññaṃ;
д̇зна сужарид̇зна гаммунаахам̣, уббанно д̇ид̣̇ивзсу гаамагаамий.
Tena sucaritena kammunāhaṃ, uppanno tidivesu kāmakāmī.
904.
904.
‘‘басса кан̣амухуд̇д̇асан̃н̃амасса, ануд̇хаммаббадибад̇д̇ияаа вибаагам̣;
‘‘Passa khaṇamuhuttasaññamassa, anudhammappaṭipattiyā vipākaṃ;
ж̇аламива яасасаа самзгкамаанаа, б̣ахугаамам̣ бихаяанд̇и хийнагаммаа.
Jalamiva yasasā samekkhamānā, bahukāmaṃ pihayanti hīnakammā.
905.
905.
‘‘басса гад̇ибаяааяа д̣̇зсанааяа, суг̇ад̇ин̃жамхи г̇ад̇о сукан̃жа бад̇д̇о;
‘‘Passa katipayāya desanāya, sugatiñcamhi gato sukhañca patto;
яз жа д̇з сад̇ад̇ам̣ сун̣анд̇и д̇хаммам̣, ман̃н̃з д̇з амад̇ам̣ пусанд̇и кзмам̣.
Ye ca te satataṃ suṇanti dhammaṃ, maññe te amataṃ phusanti khemaṃ.
906.
906.
‘‘аббамби гад̇ам̣ махаавибаагам̣, вибулам̣ ход̇и д̇ат̇ааг̇ад̇асса д̇хаммз;
‘‘Appampi kataṃ mahāvipākaṃ, vipulaṃ hoti tathāgatassa dhamme;
басса гад̇абун̃н̃ад̇ааяа чад̇д̇о, обхаасзд̇и бат̇авим̣ яат̇ааби суурияо.
Passa katapuññatāya chatto, obhāseti pathaviṃ yathāpi sūriyo.
907.
907.
‘‘гимид̣̇ам̣ гусалам̣ гимаажарзма, ижжзгз хи самзжжа манд̇аяанд̇и;
‘‘Kimidaṃ kusalaṃ kimācarema, icceke hi samecca mantayanti;
д̇з маяам̣ бунарзва лад̣̇д̇ха маанусад̇д̇ам̣, бадибаннаа вихарзму сийлаванд̇о.
Te mayaṃ punareva laddha mānusattaṃ, paṭipannā viharemu sīlavanto.
908.
908.
‘‘б̣ахугааро анугамбаго жа сад̇т̇аа, ид̇и мз сад̇и аг̇амаа д̣̇иваа д̣̇ивасса;
‘‘Bahukāro anukampako ca satthā, iti me sati agamā divā divassa;
сваахам̣ убаг̇ад̇омхи сажжанаамам̣, анугамбассу бунаби сун̣змха д̇хаммам̣.
Svāhaṃ upagatomhi saccanāmaṃ, anukampassu punapi suṇemha dhammaṃ.
909.
909.
‘‘яз жид̇ха баж̇аханд̇и гаамарааг̇ам̣, бхаварааг̇аанусаяан̃жа бахааяа мохам̣;
‘‘Ye cidha pajahanti kāmarāgaṃ, bhavarāgānusayañca pahāya mohaṃ;
на жа д̇з буна мубзнд̇и г̇аб̣бхасзяяам̣, бариниб̣б̣аанаг̇ад̇аа хи сийд̇ибхууд̇аа’’д̇и.
Na ca te puna mupenti gabbhaseyyaṃ, parinibbānagatā hi sītibhūtā’’ti.
895. д̇ад̇т̇а саяамид̇ха бат̇з самзжжа маан̣авзнаад̇и ид̇ха имасмим̣ бат̇з махаамаг̇г̇з саяамзва убаг̇ад̇зна маан̣авзна б̣раахман̣агумаарзна самзжжа самааг̇анд̇ваа. д̣̇идтад̇хаммигасамбарааяигабарамад̇т̇зхи сад̇д̇аанам̣ яат̇аарахаманусаасанад̇о сад̇т̇аа бхаг̇аваа, д̇вам̣ яам̣ маан̣авам̣ яат̇аад̇хаммам̣ анусааси анугамбамаано ануг̇г̇ан̣ханд̇о, д̇ава рад̇анаварасса аг̇г̇арад̇анасса саммаасамб̣уд̣̇д̇хасса, д̇ам̣ д̇хаммам̣ суд̇ваа ид̇и звам̣ гариссаами яат̇аанусидтам̣ бадибаж̇ж̇иссаамийд̇и, со чад̇д̇о чад̇д̇анаамаго маан̣аво б̣равид̇т̇а гат̇зсийд̇и бад̣̇аяож̇анаа.
895. Tattha sayamidha pathe samecca māṇavenāti idha imasmiṃ pathe mahāmagge sayameva upagatena māṇavena brāhmaṇakumārena samecca samāgantvā. Diṭṭhadhammikasamparāyikaparamatthehi sattānaṃ yathārahamanusāsanato satthā bhagavā, tvaṃ yaṃ māṇavaṃ yathādhammaṃ anusāsi anukampamāno anuggaṇhanto, tava ratanavarassa aggaratanassa sammāsambuddhassa, taṃ dhammaṃ sutvā iti evaṃ karissāmi yathānusiṭṭhaṃ paṭipajjissāmīti, so chatto chattanāmako māṇavo bravittha kathesīti padayojanā.
896. звам̣ яат̇аабужчид̇ам̣ гаммам̣ гааран̣ад̇о д̣̇ассзд̇ваа ид̣̇аани д̇ам̣ саруубад̇о вибхааг̇ад̇о жа д̣̇ассзнд̇о сад̇т̇аараа самаад̣̇абид̇абхаавам̣ ад̇д̇анаа жа д̇ад̇т̇а бажчаа бад̇идтид̇абхаавам̣ д̣̇ассзд̇ум̣ ‘‘ж̇инаварабавара’’нд̇иаад̣̇имааха. д̇ад̇т̇а нод̇и батамам̣ авожахам̣ бханд̇зд̇и бханд̇з бхаг̇аваа ‘‘саран̣аг̇аманам̣ ж̇аанаасий’’д̇и д̇аяаа вуд̇д̇о ‘‘но’’д̇и на ‘‘ж̇аанаамий’’д̇и батамам̣ авожам̣ ахам̣. бажчаа д̇з важанам̣ д̇ат̇звагаасинд̇и бажчаа д̇аяаа вуд̇д̇ам̣ гат̇ам̣ баривад̇д̇знд̇о д̇ава важанам̣ д̇ат̇зва агаасим̣ бадибаж̇ж̇им̣, д̇ийн̣иби саран̣аани убаг̇ажчинд̇и ад̇т̇о.
896. Evaṃ yathāpucchitaṃ kammaṃ kāraṇato dassetvā idāni taṃ sarūpato vibhāgato ca dassento satthārā samādapitabhāvaṃ attanā ca tattha pacchā patiṭṭhitabhāvaṃ dassetuṃ ‘‘jinavarapavara’’ntiādimāha. Tattha noti paṭhamaṃ avocahaṃ bhanteti bhante bhagavā ‘‘saraṇagamanaṃ jānāsī’’ti tayā vutto ‘‘no’’ti na ‘‘jānāmī’’ti paṭhamaṃ avocaṃ ahaṃ. Pacchā te vacanaṃ tathevakāsinti pacchā tayā vuttaṃ kathaṃ parivattento tava vacanaṃ tatheva akāsiṃ paṭipajjiṃ, tīṇipi saraṇāni upagacchinti attho.
897. вивид̇ханд̇и ужжааважам̣, аббасааваж̇ж̇ам̣ махаасааваж̇ж̇ан̃жаад̇и ад̇т̇о. маа жарассууд̇и маа агааси. асужинд̇и гилзсаасужимиссад̇ааяа на сужим̣. баан̣зсу асан̃н̃ад̇анд̇и баан̣агхаад̇ад̇о авирад̇ам̣. на хи аван̣н̣аяим̣сууд̇и на хи ван̣н̣аяанд̇и. бажжууббаннагаалад̇т̇з хи ид̣̇ам̣ ад̇ийд̇агаалаважанам̣. ат̇а ваа ‘‘аван̣н̣аяим̣суу’’д̇и згад̣̇зсзна сагаласса гааласса убалагкан̣ам̣, д̇асмаа яат̇аа на ван̣н̣аяим̣су ад̇ийд̇амад̣̇д̇хаанам̣, звам̣ зд̇арахиби на ван̣н̣аяанд̇и, анааг̇ад̇зби на ван̣н̣аяиссанд̇ийд̇и вуд̇д̇ам̣ ход̇и.
897.Vividhanti uccāvacaṃ, appasāvajjaṃ mahāsāvajjañcāti attho. Mā carassūti mā akāsi. Asucinti kilesāsucimissatāya na suciṃ. Pāṇesu asaññatanti pāṇaghātato avirataṃ. Na hi avaṇṇayiṃsūti na hi vaṇṇayanti. Paccūppannakālatthe hi idaṃ atītakālavacanaṃ. Atha vā ‘‘avaṇṇayiṃsū’’ti ekadesena sakalassa kālassa upalakkhaṇaṃ, tasmā yathā na vaṇṇayiṃsu atītamaddhānaṃ, evaṃ etarahipi na vaṇṇayanti, anāgatepi na vaṇṇayissantīti vuttaṃ hoti.
898-900. бараж̇анасса рагкид̇анд̇и барабариг̇г̇ахид̇авад̇т̇у. д̇знааха ‘‘ад̣̇инна’’нд̇и. маа аг̇амаад̇и маа аж̇жхаажари. вид̇ат̇анд̇и ад̇ат̇ам̣, мусаад̇и ад̇т̇о. ан̃н̃ат̇аад̇и ан̃н̃ат̇аава, вид̇ат̇асан̃н̃ий звам̣ вид̇ат̇анд̇и ж̇аананд̇о звам̣ маа бхан̣ийд̇и ад̇т̇о.
898-900.Parajanassa rakkhitanti parapariggahitavatthu. Tenāha ‘‘adinna’’nti. Mā agamāti mā ajjhācari. Vitathanti atathaṃ, musāti attho. Aññathāti aññathāva, vitathasaññī evaṃ vitathanti jānanto evaṃ mā bhaṇīti attho.
901. язнаад̇и язна маж̇ж̇зна, бийд̇знаад̇и ад̇хиббааяо. абзд̇ийд̇и виг̇ажчад̇и. сан̃н̃аад̇и д̇хаммасан̃н̃аа, логасан̃н̃аа зва ваа. саб̣б̣анд̇и анавасзсам̣, б̣ийж̇ад̇о бадтааяаад̇и ад̇т̇о.
901.Yenāti yena majjena, pītenāti adhippāyo. Apetīti vigacchati. Saññāti dhammasaññā, lokasaññā eva vā. Sabbanti anavasesaṃ, bījato paṭṭhāyāti attho.
902. свааханд̇и со д̇ад̣̇аа чад̇д̇амаан̣авабхууд̇о ахам̣. ид̇ха имасмим̣ маг̇г̇абад̣̇зсз, имасмим̣ ваа д̇ава саасанз. д̇знааха ‘‘д̇ат̇ааг̇ад̇асса д̇хаммз’’д̇и. бан̃жа сигкаад̇и бан̃жа сийлаани. гарид̇ваад̇и аад̣̇ияид̇ваа, ад̇хидтааяаад̇и ад̇т̇о. д̣̇взбат̇анд̇и д̣̇виннам̣ г̇аамасиймаанам̣ взмаж̇жхабхууд̇ам̣ бат̇ам̣, сийманд̇аригабат̇анд̇и ад̇т̇о. д̇зд̇и д̇з жораа. д̇ад̇т̇аад̇и сийманд̇аригамаг̇г̇з. бхог̇ахзд̇ууд̇и аамисагин̃жигканимид̇д̇ам̣.
902.Svāhanti so tadā chattamāṇavabhūto ahaṃ. Idha imasmiṃ maggapadese, imasmiṃ vā tava sāsane. Tenāha ‘‘tathāgatassa dhamme’’ti. Pañca sikkhāti pañca sīlāni. Karitvāti ādiyitvā, adhiṭṭhāyāti attho. Dvepathanti dvinnaṃ gāmasīmānaṃ vemajjhabhūtaṃ pathaṃ, sīmantarikapathanti attho. Teti te corā. Tatthāti sīmantarikamagge. Bhogahetūti āmisakiñcikkhanimittaṃ.
903. д̇ад̇од̇и яат̇аавуд̇д̇агусалад̇о барам̣ убари ан̃н̃ам̣ гусалам̣ на виж̇ж̇ад̇и на убалаб̣бхад̇и, яамахам̣ ануссарзяяанд̇и ад̇т̇о. гаамагаамийд̇и яат̇ижчид̇агаамаг̇ун̣асаман̇г̇ий.
903.Tatoti yathāvuttakusalato paraṃ upari aññaṃ kusalaṃ na vijjati na upalabbhati, yamahaṃ anussareyyanti attho. Kāmakāmīti yathicchitakāmaguṇasamaṅgī.
904. кан̣амухуд̇д̇асан̃н̃амассаад̇и кан̣амухуд̇д̇амад̇д̇ам̣ бавад̇д̇асийласса. ануд̇хаммаббадибад̇д̇ияаад̇и яат̇аад̇хиг̇ад̇асса паласса ануруубад̇хаммам̣ бадибаж̇ж̇амаанасса бхаг̇аваа басса, д̇уяхам̣ оваад̣̇ад̇хаммасса ваа ануруубааяа д̇хаммабадибад̇д̇ияаа вуд̇д̇анияаамзнзва саран̣аг̇аманасса сийласамаад̣̇аанасса жаад̇и ад̇т̇о. ж̇аламива яасасаад̇и ид̣̇д̇хияаа бариваарасамбад̇д̇ияаа жа ж̇аланд̇ам̣ вияа. самзгкамаанаад̇и бассанд̇аа. б̣ахугаад̇и б̣ахаво. бихаяанд̇ийд̇и ‘‘гат̇ам̣ ну ко маяам̣ зд̣̇исаа бхавзяяаамаа’’д̇и бад̇т̇знд̇и. хийнагаммаад̇и мама самбад̇д̇ид̇о нихийнабхог̇аа.
904.Khaṇamuhuttasaññamassāti khaṇamuhuttamattaṃ pavattasīlassa. Anudhammappaṭipattiyāti yathādhigatassa phalassa anurūpadhammaṃ paṭipajjamānassa bhagavā passa, tuyhaṃ ovādadhammassa vā anurūpāya dhammapaṭipattiyā vuttaniyāmeneva saraṇagamanassa sīlasamādānassa cāti attho. Jalamiva yasasāti iddhiyā parivārasampattiyā ca jalantaṃ viya. Samekkhamānāti passantā. Bahukāti bahavo. Pihayantīti ‘‘kathaṃ nu kho mayaṃ edisā bhaveyyāmā’’ti patthenti. Hīnakammāti mama sampattito nihīnabhogā.
905. гад̇ибаяааяаад̇и аббигааяа. язд̇и яз бхигкуу жзва убаасагаад̣̇аяо жа. жа-сад̣̇д̣̇о б̣яад̇ирзгз. д̇зд̇и д̇ава. сад̇ад̇анд̇и д̣̇ивасз д̣̇ивасз.
905.Katipayāyāti appikāya. Yeti ye bhikkhū ceva upāsakādayo ca. Ca-saddo byatireke. Teti tava. Satatanti divase divase.
906. вибуланд̇и ул̣аарапалам̣ вибулаанубхаавам̣. д̇ат̇ааг̇ад̇асса д̇хаммзд̇и д̇ат̇ааг̇ад̇асса саасанз оваад̣̇з тад̇ваа гад̇анд̇и яож̇анаа. звам̣ ануд̣̇д̣̇зсигавасзна вуд̇д̇амзвад̇т̇ам̣ ад̇д̇уд̣̇д̣̇зсигавасзна д̣̇ассзнд̇о ‘‘бассаа’’д̇иаад̣̇имааха. д̇ад̇т̇а бассаад̇и бхаг̇аванд̇ам̣ вад̣̇ад̇и, ад̇д̇аанамзва ваа ан̃н̃ам̣ вияа жа гад̇ваа вад̣̇ад̇и.
906.Vipulanti uḷāraphalaṃ vipulānubhāvaṃ. Tathāgatassa dhammeti tathāgatassa sāsane ovāde ṭhatvā katanti yojanā. Evaṃ anuddesikavasena vuttamevatthaṃ attuddesikavasena dassento ‘‘passā’’tiādimāha. Tattha passāti bhagavantaṃ vadati, attānameva vā aññaṃ viya ca katvā vadati.
907. гимид̣̇ам̣ гусалам̣ гимаажарзмаад̇и гусалам̣ наамзд̇ам̣ гим̣сабхаавам̣ гийд̣̇исам̣, гат̇ам̣ ваа д̇ам̣ аажарзяяаама. ижжзгз хи самзжжа манд̇аяанд̇ийд̇и звамзгз самзжжа самааг̇анд̇ваа бат̇авим̣ баривад̇д̇знд̇аа вияа синзрум̣ угкибанд̇аа вияа жа суд̣̇уггарам̣ гад̇ваа манд̇аяанд̇и вижаарзнд̇и, маяам̣ бана агижчзнзва бунаби гусалам̣ аажарзяяаамаад̇и ад̇хиббааяо. д̇знзвааха ‘‘маяа’’нд̇иаад̣̇и.
907.Kimidaṃkusalaṃ kimācaremāti kusalaṃ nāmetaṃ kiṃsabhāvaṃ kīdisaṃ, kathaṃ vā taṃ ācareyyāma. Icceke hi samecca mantayantīti evameke samecca samāgantvā pathaviṃ parivattentā viya sineruṃ ukkhipantā viya ca sudukkaraṃ katvā mantayanti vicārenti, mayaṃ pana akiccheneva punapi kusalaṃ ācareyyāmāti adhippāyo. Tenevāha ‘‘maya’’ntiādi.
908. б̣ахугаарод̇и б̣ахуубагааро, махааубагааро ваа. анугамбагод̇и гаарун̣иго. ма-гааро бад̣̇асанд̇хигаро. ид̇ийд̇и звам̣, бхаг̇авад̇о ад̇д̇ани бадибаннаагаарам̣ санд̇хааяа вад̣̇ад̇и. мз сад̇ийд̇и маяи сад̇и виж̇ж̇амаанз, жорзхи авад̇хид̇з зваад̇и ад̇т̇о. д̣̇иваа д̣̇ивассаад̇и д̣̇ивасассаби д̣̇иваа, гаалассзваад̇и ад̇т̇о. свааханд̇и со чад̇д̇амаан̣авабхууд̇о ахам̣. сажжанааманд̇и ‘‘бхаг̇аваа арахам̣ саммаасамб̣уд̣̇д̇хо’’д̇иаад̣̇инаамзхи авид̇ат̇анаамам̣ бхууд̇ад̇т̇анаамам̣. анугамбассууд̇и ануг̇г̇ан̣хаахи. бунабийд̇и бхияяоби сун̣зму, д̇ава д̇хаммам̣ сун̣зяяаамаязваад̇и ад̇т̇о.
908.Bahukāroti bahūpakāro, mahāupakāro vā. Anukampakoti kāruṇiko. Ma-kāro padasandhikaro. Itīti evaṃ, bhagavato attani paṭipannākāraṃ sandhāya vadati. Me satīti mayi sati vijjamāne, corehi avadhite evāti attho. Divā divassāti divasassapi divā, kālassevāti attho. Svāhanti so chattamāṇavabhūto ahaṃ. Saccanāmanti ‘‘bhagavā arahaṃ sammāsambuddho’’tiādināmehi avitathanāmaṃ bhūtatthanāmaṃ. Anukampassūti anuggaṇhāhi. Punapīti bhiyyopi suṇemu, tava dhammaṃ suṇeyyāmayevāti attho.
звам̣ д̣̇звабуд̇д̇о саб̣б̣амзд̇ам̣ гад̇ан̃н̃уд̇аабхаавз тад̇ваа сад̇т̇у баяирубаасанз жа д̇хаммассаванз жа ад̇ид̇д̇имзва д̣̇ийбзнд̇о вад̣̇ад̇и. бхаг̇аваа д̣̇звабуд̇д̇асса жа д̇ад̇т̇а саннибад̇ид̇абарисааяа жа аж̇жхаасаяам̣ ологзд̇ваа анубуб̣б̣игат̇ам̣ гат̇зси. ат̇а нзсам̣ аллажид̇д̇ад̇ам̣ н̃ад̇ваа саамуггам̣сигам̣ д̇хаммад̣̇зсанам̣ багаасзси. д̣̇зсанаабарияосаанз д̣̇звабуд̇д̇о жзва маад̇аабид̇аро жасса сод̇аабад̇д̇ипалз бад̇идтахим̣су, махад̇о жа ж̇анагааяасса д̇хаммаабхисамаяо ахоси.
Evaṃ devaputto sabbametaṃ kataññutābhāve ṭhatvā satthu payirupāsane ca dhammassavane ca atittimeva dīpento vadati. Bhagavā devaputtassa ca tattha sannipatitaparisāya ca ajjhāsayaṃ oloketvā anupubbikathaṃ kathesi. Atha nesaṃ allacittataṃ ñatvā sāmukkaṃsikaṃ dhammadesanaṃ pakāsesi. Desanāpariyosāne devaputto ceva mātāpitaro cassa sotāpattiphale patiṭṭhahiṃsu, mahato ca janakāyassa dhammābhisamayo ahosi.
909. батамапалз бад̇идтид̇о д̣̇звабуд̇д̇о убаримаг̇г̇зсу ад̇д̇ано г̇аружид̇д̇ийгаарам̣, д̇ад̣̇ад̇хиг̇амасса жа махаанисам̣сад̇ам̣ вибхаавзнд̇о ‘‘яз жид̇ха баж̇аханд̇и гаамарааг̇а’’нд̇и барияосаанаг̇аат̇амааха. д̇ассад̇т̇о – яз ид̇ха имасмим̣ саасанз тид̇аа баж̇аханд̇и анавасзсад̇о самужчинд̣̇анд̇и гаамарааг̇ам̣, на жа д̇з буна убзнд̇и г̇аб̣бхасзяяам̣ орамбхааг̇ияаанам̣ сам̣яож̇анаанам̣ самужчиннад̇д̇аа. яз жа бана бахааяа мохам̣ саб̣б̣асо самуг̇гхаад̇зд̇ваа бхаварааг̇аанусаяан̃жа баж̇аханд̇и, д̇з буна убзнд̇и г̇аб̣бхасзяяанд̇и вад̇д̇аб̣б̣амзва над̇т̇и. гасмаа? бариниб̣б̣аанаг̇ад̇аа хи сийд̇ибхууд̇аа, д̇з хи уд̇д̇амабурисаа анубаад̣̇исзсааяа ниб̣б̣аанад̇хаад̇уяаа бариниб̣б̣аанам̣ г̇ад̇аа звам̣ ид̇хзва саб̣б̣авзд̣̇аяид̇аанам̣ саб̣б̣абарил̣аахаанам̣ б̣яанд̇ибхаавзна сийд̇ибхууд̇аа.
909. Paṭhamaphale patiṭṭhito devaputto uparimaggesu attano garucittīkāraṃ, tadadhigamassa ca mahānisaṃsataṃ vibhāvento ‘‘ye cidha pajahanti kāmarāga’’nti pariyosānagāthamāha. Tassattho – ye idha imasmiṃ sāsane ṭhitā pajahanti anavasesato samucchindanti kāmarāgaṃ, na ca te puna upentigabbhaseyyaṃ orambhāgiyānaṃ saṃyojanānaṃ samucchinnattā. Ye ca pana pahāya mohaṃ sabbaso samugghātetvā bhavarāgānusayañca pajahanti, te puna upenti gabbhaseyyanti vattabbameva natthi. Kasmā? Parinibbānagatā hi sītibhūtā, te hi uttamapurisā anupādisesāya nibbānadhātuyā parinibbānaṃ gatā evaṃ idheva sabbavedayitānaṃ sabbapariḷāhānaṃ byantibhāvena sītibhūtā.
ид̇и д̣̇звабуд̇д̇о ад̇д̇ано арияасод̇асамаабаннабхаавам̣ бавзд̣̇знд̇о анубаад̣̇исзсааяа ниб̣б̣аанад̇хаад̇уяаа д̣̇зсанааяа гуудам̣ г̇ахзд̇ваа бхаг̇аванд̇ам̣ ванд̣̇ид̇ваа бад̣̇агкин̣ам̣ гад̇ваа бхигкусан̇гхасса абажид̇им̣ д̣̇ассзд̇ваа маад̇аабид̇аро аабужчид̇ваа д̣̇звалогамзва г̇ад̇о, сад̇т̇ааби удтааяаасанаа г̇ад̇о сад̣̇д̇хим̣ бхигкусан̇гхзна. маан̣авасса бана маад̇аабид̇аро б̣раахман̣о богкарасаад̇и саб̣б̣о жа махааж̇ано бхаг̇аванд̇ам̣ ануг̇анд̇ваа нивад̇д̇и. бхаг̇аваа ж̇зд̇аванам̣ г̇анд̇ваа саннибад̇ид̇ааяа барисааяа имам̣ вимаанам̣ вид̇т̇аарад̇о гат̇зси. саа д̣̇зсанаа махааж̇анасса саад̇т̇игаа ахосийд̇и.
Iti devaputto attano ariyasotasamāpannabhāvaṃ pavedento anupādisesāya nibbānadhātuyā desanāya kūṭaṃ gahetvā bhagavantaṃ vanditvā padakkhiṇaṃ katvā bhikkhusaṅghassa apacitiṃ dassetvā mātāpitaro āpucchitvā devalokameva gato, satthāpi uṭṭhāyāsanā gato saddhiṃ bhikkhusaṅghena. Māṇavassa pana mātāpitaro brāhmaṇo pokkharasāti sabbo ca mahājano bhagavantaṃ anugantvā nivatti. Bhagavā jetavanaṃ gantvā sannipatitāya parisāya imaṃ vimānaṃ vitthārato kathesi. Sā desanā mahājanassa sātthikā ahosīti.
чад̇д̇амаан̣авагавимаанаван̣н̣анаа нидтид̇аа.
Chattamāṇavakavimānavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / вимаанавад̇т̇убаал̣и • Vimānavatthupāḷi / 3. чад̇д̇амаан̣авагавимаанавад̇т̇у • 3. Chattamāṇavakavimānavatthu
