| Library / Tipiṭaka / តិបិដក • Tipiṭaka / ខុទ្ទសិក្ខា-មូលសិក្ខា • Khuddasikkhā-mūlasikkhā |
៤៣. ឆន្ទទាននិទ្ទេសវណ្ណនា
43. Chandadānaniddesavaṇṇanā
៣៩៩. កម្មប្បត្តេតិ ឧបោសថាទិនោ កម្មស្ស បត្តេ យុត្តេ អនុរូបេ។ សង្ឃេ សមាគតេតិ ចតុវគ្គាទិកេ សង្ឃេ ឯកត្ថ សន្និបតិតេ។ ឯត្ថ ច ឆន្ទហារកេនាបិ សទ្ធិំ ចតុវគ្គាទិកោ វេទិតព្ពោ។
399.Kammappatteti uposathādino kammassa patte yutte anurūpe. Saṅghe samāgateti catuvaggādike saṅghe ekattha sannipatite. Ettha ca chandahārakenāpi saddhiṃ catuvaggādiko veditabbo.
៤០០. ឆន្ទទានាទិវិធិំ ទស្សេតុំ ‘‘ឯក’’ន្តិអាទិមាហ។ ឧបាគម្មាតិ សន្តិំ អាបត្តិំ បកាសេត្វា តតោ បច្ឆា ឧបគន្ត្វា។ ឆន្ទំ ទទេតិ វក្ខមានេសុ តីសុ ឯកេនបិ ពហិ ឧបោសថំ កត្វា អាគតោ ឆន្ទំ ទទេយ្យ, កេនចិ ករណីយេន សន្និបាតដ្ឋានំ គន្ត្វា កាយសាមគ្គិំ អទេន្តោ បន បារិសុទ្ធិំ ទេន្តោ ឆន្ទំ ទទេយ្យ។
400. Chandadānādividhiṃ dassetuṃ ‘‘eka’’ntiādimāha. Upāgammāti santiṃ āpattiṃ pakāsetvā tato pacchā upagantvā. Chandaṃ dadeti vakkhamānesu tīsu ekenapi bahi uposathaṃ katvā āgato chandaṃ dadeyya, kenaci karaṇīyena sannipātaṭṭhānaṃ gantvā kāyasāmaggiṃ adento pana pārisuddhiṃ dento chandaṃ dadeyya.
៤០២. ឧភិន្នំ ទានេ កិំបយោជនន្តិ អាហ ‘‘បារិសុទ្ធី’’តិអាទិ។ បារិសុទ្ធិប្បទានេន សង្ឃស្ស អត្តនោ ចាបិ ឧបោសថំ សម្បាទេតីតិ សម្ពន្ធោ។ បរិសុទ្ធិ ឯវ បារិសុទ្ធិ, តស្ស បទានំ, តេន។ ននុ ច បារិសុទ្ធិតាបទានមត្តមេវ ឧបោសថកម្មំ នាមាតិ បារិសុទ្ធិប្បទានំ អត្តនោ ឧបោសថំ សម្បាទេតុ, កថំ សង្ឃស្សាតិ? វុច្ចតេ – បារិសុទ្ធិទានស្ស ធម្មកម្មតាសម្បាទនេន សង្ឃស្សាបិ ឧបោសថំ សម្បាទេតីតិ។
402. Ubhinnaṃ dāne kiṃpayojananti āha ‘‘pārisuddhī’’tiādi. Pārisuddhippadānena saṅghassa attano cāpi uposathaṃ sampādetīti sambandho. Parisuddhi eva pārisuddhi, tassa padānaṃ, tena. Nanu ca pārisuddhitāpadānamattameva uposathakammaṃ nāmāti pārisuddhippadānaṃ attano uposathaṃ sampādetu, kathaṃ saṅghassāti? Vuccate – pārisuddhidānassa dhammakammatāsampādanena saṅghassāpi uposathaṃ sampādetīti.
ឯត្ថ បន ចតូសុ ឯកស្ស ឆន្ទបារិសុទ្ធិំ អាហរិត្វា តយោ បារិសុទ្ធិឧបោសថំ ករោន្តិ, តីសុ វា ឯកស្ស ឆន្ទបារិសុទ្ធិំ អាហរិត្វា ទ្វេ បាតិមោក្ខំ ឧទ្ទិសន្តិ, អធម្មេន វគ្គំ ឧបោសថកម្មំ។ ចត្តារោ បារិសុទ្ធិឧបោសថំ ករោន្តិ, តយោ វា ទ្វេ វា បាតិមោក្ខំ ឧទ្ទិសន្តិ, អធម្មេន សមគ្គំ។ ចតូសុ ឯកស្ស អាហរិត្វា តយោ បាតិមោក្ខំ ឧទ្ទិសន្តិ, តីសុ វា ឯកស្ស អាហរិត្វា ទ្វេ បារិសុទ្ធិឧបោសថំ ករោន្តិ, ធម្មេន វគ្គំ។ សចេ បន ចត្តារោ សន្និបតិត្វា បាតិមោក្ខំ ឧទ្ទិសន្តិ, តយោ បារិសុទ្ធិឧបោសថំ, ទ្វេ អញ្ញមញ្ញំ បារិសុទ្ធិឧបោសថំ ករោន្តិ, ធម្មេន សមគ្គំ។ បវារណកម្មេសុបិ បញ្ចសុ ឯកស្ស បវារណំ អាហរិត្វា ចត្តារោ គណញត្តិំ ឋបេត្វា បវារេន្តិ, ចតូសុ តីសុ វា ឯកស្ស អាហរិត្វា តយោ ទ្វេ វា សង្ឃញត្តិំ ឋបេត្វា បវារេន្តិ, អធម្មេន វគ្គំ បវារណកម្មន្តិអាទិ វុត្តនយមេវ។ សេសកម្មំ វិពាធតីតិ អវសេសសង្ឃកិច្ចំ វិពាធេតិ អលទ្ធាធិប្បាយត្តាតិ អធិប្បាយោ។
Ettha pana catūsu ekassa chandapārisuddhiṃ āharitvā tayo pārisuddhiuposathaṃ karonti, tīsu vā ekassa chandapārisuddhiṃ āharitvā dve pātimokkhaṃ uddisanti, adhammena vaggaṃ uposathakammaṃ. Cattāro pārisuddhiuposathaṃ karonti, tayo vā dve vā pātimokkhaṃ uddisanti, adhammena samaggaṃ. Catūsu ekassa āharitvā tayo pātimokkhaṃ uddisanti, tīsu vā ekassa āharitvā dve pārisuddhiuposathaṃ karonti, dhammena vaggaṃ. Sace pana cattāro sannipatitvā pātimokkhaṃ uddisanti, tayo pārisuddhiuposathaṃ, dve aññamaññaṃ pārisuddhiuposathaṃ karonti, dhammena samaggaṃ. Pavāraṇakammesupi pañcasu ekassa pavāraṇaṃ āharitvā cattāro gaṇañattiṃ ṭhapetvā pavārenti, catūsu tīsu vā ekassa āharitvā tayo dve vā saṅghañattiṃ ṭhapetvā pavārenti, adhammena vaggaṃ pavāraṇakammantiādi vuttanayameva. Sesakammaṃ vibādhatīti avasesasaṅghakiccaṃ vibādheti aladdhādhippāyattāti adhippāyo.
៤០៣. ទ្វយន្តិ ឧបោសថករណញ្ចេវ អវសេសកិច្ចញ្ច។ អត្តនោ ន សាធេតីតិ សម្ពន្ធនីយំ។
403.Dvayanti uposathakaraṇañceva avasesakiccañca. Attano na sādhetīti sambandhanīyaṃ.
៤០៤. ហរេយ្យាតិ បុព្ពេ វុត្តំ សុទ្ធិកឆន្ទំ វា ឥមំ វា ឆន្ទបារិសុទ្ធិំ ហរេយ្យ។ បរម្បរា ន ហារយេតិ បរម្បរា ន អាហរេយ្យ។ កស្មាតិ អាហ ‘‘បរម្បរាហដា’’តិអាទិ។ តេនាតិ បឋមតោ គហិតឆន្ទបារិសុទ្ធិកេន។ បរម្បរាហដាតិ យថា ពិឡាលសង្ខលិកាយ បឋមំ វលយំ ទុតិយំ បាបុណាតិ, តតិយំ ន បាបុណាតិ, ឯវំ ទុតិយស្ស អាគច្ឆតិ, តតិយស្ស ន អាគច្ឆតិ។ ‘‘បរិម្បរាហដា ឆន្ទ-បារិសុទ្ធិ ន គច្ឆតី’’តិ វា បាឋោ។
404.Hareyyāti pubbe vuttaṃ suddhikachandaṃ vā imaṃ vā chandapārisuddhiṃ hareyya. Paramparā na hārayeti paramparā na āhareyya. Kasmāti āha ‘‘paramparāhaṭā’’tiādi. Tenāti paṭhamato gahitachandapārisuddhikena. Paramparāhaṭāti yathā biḷālasaṅkhalikāya paṭhamaṃ valayaṃ dutiyaṃ pāpuṇāti, tatiyaṃ na pāpuṇāti, evaṃ dutiyassa āgacchati, tatiyassa na āgacchati. ‘‘Parimparāhaṭā chanda-pārisuddhi na gacchatī’’ti vā pāṭho.
៤០៥. សព្ពូបចារន្តិ ‘‘ឯកំសំ ចីវរំ កត្វា’’ តិអាទិ សព្ពំ ឧបចារំ។
405.Sabbūpacāranti ‘‘ekaṃsaṃ cīvaraṃ katvā’’ tiādi sabbaṃ upacāraṃ.
៤០៦. សោ អាគតោ អារោចេត្វា សង្ឃំ បវារេយ្យាតិ យោជនា។ អថាតិ អនន្តរត្ថេ។ អាគតោតិ បវារណំ គហេត្វា អាគតោ ភិក្ខុ។ អារោចេត្វាតិ ភិក្ខុសង្ឃស្ស អារោចេត្វា។ ឯវន្តិ វក្ខមានក្កមេន។
406. So āgato ārocetvā saṅghaṃ pavāreyyāti yojanā. Athāti anantaratthe. Āgatoti pavāraṇaṃ gahetvā āgato bhikkhu. Ārocetvāti bhikkhusaṅghassa ārocetvā. Evanti vakkhamānakkamena.
៤០៧-៨. គហេត្វា ហារកោតិ សម្ពន្ធោ។ នាហដាតិ អាហដាវ ន ហោតីតិ អត្ថោ។ ហារកោ សង្ឃំ បត្វា តថា ហេយ្យ, អាហដា ហោតីតិ យោជនា។ តថា ហេយ្យាតិ វិព្ភន្តាទិកោ ភវេយ្យ។
407-8. Gahetvā hārakoti sambandho. Nāhaṭāti āhaṭāva na hotīti attho. Hārako saṅghaṃ patvā tathā heyya, āhaṭā hotīti yojanā. Tathā heyyāti vibbhantādiko bhaveyya.
៤០៩. សង្ឃំ បត្តោ បមត្តោ វា សុត្តោ វា នារោចយេយ្យ អនាបត្តិ ចាតិ សម្ពន្ធោ។ ច-សទ្ទោ ឆន្ទបារិសុទ្ធិហរណំ សម្បិណ្ឌេតីតិ។
409. Saṅghaṃ patto pamatto vā sutto vā nārocayeyya anāpatti cāti sambandho. Ca-saddo chandapārisuddhiharaṇaṃ sampiṇḍetīti.
ឆន្ទទាននិទ្ទេសវណ្ណនា និដ្ឋិតា។
Chandadānaniddesavaṇṇanā niṭṭhitā.
