| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
43. ச²ந்த³தா³னநித்³தே³ஸவண்ணனா
43. Chandadānaniddesavaṇṇanā
399. கம்மப்பத்தே ஸங்கே⁴ ஸமாக³தேதி ஸம்ப³ந்தோ⁴. ஏதேன ஸங்கே⁴ அஸமாக³தே ச²ந்த³தா³னங் ந ருஹதீதி தீ³பிதங் ஹோதீதி வத³ந்தி. எத்தா²யங் விசாரணா – பஞ்சபி⁴க்கு²கே விஹாரே ஏகஸ்ஸ ச²ந்த³பாரிஸுத்³தி⁴ங் ஆஹரித்வா ஸேஸானங் உபோஸதா²தி³கரணங் அனுஞ்ஞாதங் பாளியங் (பரி॰ 496-497) அட்ட²கதா²யஞ்ச (பரி॰ அட்ட²॰ 487-488). தேஸு ஏகோ ச²ந்த³தா³யகோ, ஏகோ ச²ந்த³ஹாரகோ, தே முஞ்சித்வா ந எத்த² ஸன்னிபதிதோ ஸங்கோ⁴ திண்ணங் ஸமூஹபா⁴வதோ, தஸ்மா அஸமாக³தேபி தா³துங் வட்டதி. ஆரோசெந்தேன பன ஸமாக³தே ஏவ ஆரோசேதப்³ப³ங். இதா⁴பி ‘‘ஹரெய்யா’’தி வுத்தங், ந ‘‘தே³ஸெய்யா’’தி. தத்த² ச²ந்த³ஹாரகேன ஸத்³தி⁴ங் கம்மப்பத்தானங் ஸன்னிபாதோ வேதி³தப்³போ³.
399. Kammappatte saṅghe samāgateti sambandho. Etena saṅghe asamāgate chandadānaṃ na ruhatīti dīpitaṃ hotīti vadanti. Etthāyaṃ vicāraṇā – pañcabhikkhuke vihāre ekassa chandapārisuddhiṃ āharitvā sesānaṃ uposathādikaraṇaṃ anuññātaṃ pāḷiyaṃ (pari. 496-497) aṭṭhakathāyañca (pari. aṭṭha. 487-488). Tesu eko chandadāyako, eko chandahārako, te muñcitvā na ettha sannipatito saṅgho tiṇṇaṃ samūhabhāvato, tasmā asamāgatepi dātuṃ vaṭṭati. Ārocentena pana samāgate eva ārocetabbaṃ. Idhāpi ‘‘hareyyā’’ti vuttaṃ, na ‘‘deseyyā’’ti. Tattha chandahārakena saddhiṃ kammappattānaṃ sannipāto veditabbo.
400. இதா³னி ச²ந்த³தா³னவிதி⁴ங் த³ஸ்ஸேதுங் ‘‘ஏகங் பி⁴க்கு²’’ந்திஆதி³மாஹ (கங்கா²॰ அட்ட²॰ நிதா³னவண்ணனா).
400. Idāni chandadānavidhiṃ dassetuṃ ‘‘ekaṃ bhikkhu’’ntiādimāha (kaṅkhā. aṭṭha. nidānavaṇṇanā).
401. (க) ‘‘ச²ந்த³ங் த³ம்மீ’’தி எத்தகமேவ அலங், ‘‘ஹர, ஆரோசேஹீ’’தி இமேஹி கிங்பயோஜனந்தி சே? வுச்சதே – ‘‘அனுஜானாமி, பி⁴க்க²வே, தத³ஹுபோஸதே² பாரிஸுத்³தி⁴ங் தெ³ந்தேன ச²ந்த³ம்பிதா³துங், ஸந்தி ஸங்க⁴ஸ்ஸ கரணீய’’ந்தி (மஹாவ॰ 165) வுத்தத்தா ப⁴க³வதோ ஆணங் கரொந்தேன ‘‘ச²ந்த³ங் த³ம்மீ’’தி வுத்தங். ‘‘ச²ந்த³ஹாரகோ சே, பி⁴க்க²வே, தி³ன்னே ச²ந்தே³ அந்தராமக்³கே³ பக்கமதி, அனாஹடோவ ஹோதி ச²ந்தோ³’’தி (மஹாவ॰ 165) வுத்தத்தா ச²ந்த³ஹாரகஸ்ஸ அஞ்ஞஸ்ஸ அபக்கமனத்தா²ய பாரிஸுத்³தி⁴ங் தெ³ந்தேன ‘‘இத³ங் கரோஹி ஏவா’’தி ஆணாபெந்தேன ‘‘ச²ந்த³ங் மே ஹரா’’தி வுத்தங். ‘‘ச²ந்த³ஹாரகோ சே, பி⁴க்க²வே, தி³ன்னே ச²ந்தே³ ஸங்க⁴ப்பத்தோ ஸஞ்சிச்ச நாரோசேதி, ஆஹடோ ஹோதி ச²ந்தோ³, ச²ந்த³ஹாரகஸ்ஸ ஆபத்தி து³க்கடஸ்ஸா’’தி (மஹாவ॰ 165) வுத்தத்தா ‘‘யதி³த்வங் ஸஞ்சிச்ச நாரோசெஸ்ஸஸி, ஆபத்திங் ஆபஜ்ஜிஸ்ஸஸி , ஆரோசேஹி ஏவா’’தி தஸ்ஸ ஆசிக்க²ந்தோ ‘‘ஆரோசேஹீ’’தி ஆஹாதி ஏவமெத்த² இமேஸங் பதா³னங் ஸப்பயோஜனதா வேதி³தப்³பா³. ஏவங் பாரிஸுத்³தி⁴தா³னேபீதி.
401. (Ka) ‘‘chandaṃ dammī’’ti ettakameva alaṃ, ‘‘hara, ārocehī’’ti imehi kiṃpayojananti ce? Vuccate – ‘‘anujānāmi, bhikkhave, tadahuposathe pārisuddhiṃ dentena chandampidātuṃ, santi saṅghassa karaṇīya’’nti (mahāva. 165) vuttattā bhagavato āṇaṃ karontena ‘‘chandaṃ dammī’’ti vuttaṃ. ‘‘Chandahārako ce, bhikkhave, dinne chande antarāmagge pakkamati, anāhaṭova hoti chando’’ti (mahāva. 165) vuttattā chandahārakassa aññassa apakkamanatthāya pārisuddhiṃ dentena ‘‘idaṃ karohi evā’’ti āṇāpentena ‘‘chandaṃ me harā’’ti vuttaṃ. ‘‘Chandahārako ce, bhikkhave, dinne chande saṅghappatto sañcicca nāroceti, āhaṭo hoti chando, chandahārakassa āpatti dukkaṭassā’’ti (mahāva. 165) vuttattā ‘‘yaditvaṃ sañcicca nārocessasi, āpattiṃ āpajjissasi , ārocehi evā’’ti tassa ācikkhanto ‘‘ārocehī’’ti āhāti evamettha imesaṃ padānaṃ sappayojanatā veditabbā. Evaṃ pārisuddhidānepīti.
402. ஸேஸகம்மந்தி யதி³ ஸங்கோ⁴ உபோஸத²க்³கே³ அஞ்ஞங் அபலோகனாதி³கம்மங் கரோதி, தங் கம்மங் விபா³த⁴தி, விகோபேதீதி அத்தோ².
402.Sesakammanti yadi saṅgho uposathagge aññaṃ apalokanādikammaṃ karoti, taṃ kammaṃ vibādhati, vikopetīti attho.
403. த்³வயந்தி உபோஸத²ஞ்ச ஸேஸகம்மஞ்சாதி அத்தோ². நத்தனோதி அத்தனோ உபோஸத²ங் ந ஸம்பாதே³தி.
403.Dvayanti uposathañca sesakammañcāti attho. Nattanoti attano uposathaṃ na sampādeti.
405. ‘‘ஏகங்ஸங் உத்தராஸங்க³ங் கரித்வா உக்குடிகங் நிஸீதி³த்வா’’திஆதி³கங் (மஹாவ॰ 213) ஸப்³பூ³பசாரங் கத்வானாதி அத்தோ².
405. ‘‘Ekaṃsaṃ uttarāsaṅgaṃ karitvā ukkuṭikaṃ nisīditvā’’tiādikaṃ (mahāva. 213) sabbūpacāraṃ katvānāti attho.
406. ‘‘இத்த²ன்னாமேன பவாரணா தி³ன்னா’’தி ஆரோசெத்வா.
406. ‘‘Itthannāmena pavāraṇā dinnā’’ti ārocetvā.
408. படிஜானெய்ய நாஹடாதி (மஹாவ॰ 164-165, 213) பாடே² ந ஆஹடாதி நாஹடா, ஆஹடா ந ஹோதீதி அத்தோ². ததா² ஹெய்யாதி விப்³ப⁴மனாதீ³னி கரெய்யாதி அத்தோ².
408.Paṭijāneyya nāhaṭāti (mahāva. 164-165, 213) pāṭhe na āhaṭāti nāhaṭā, āhaṭā na hotīti attho. Tathā heyyāti vibbhamanādīni kareyyāti attho.
409. ஸுத்தோ வா நாரோசயெய்ய, ஆஹடா ஹோதீதி ஸம்ப³ந்தோ⁴. அனாபத்திவாதி அனாபத்தி ஏவ. ச²ந்த³தா³னவினிச்ச²யோ.
409. Sutto vā nārocayeyya, āhaṭā hotīti sambandho. Anāpattivāti anāpatti eva. Chandadānavinicchayo.
ச²ந்த³தா³னநித்³தே³ஸவண்ணனா நிட்டி²தா.
Chandadānaniddesavaṇṇanā niṭṭhitā.
