| Library / Tipiṭaka / তিপিটক • Tipiṭaka / ধম্মসঙ্গণি-অট্ঠকথা • Dhammasaṅgaṇi-aṭṭhakathā |
ছক্কাদিনিদ্দেসৰণ্ণনা
Chakkādiniddesavaṇṇanā
৯৭২-৪. ছব্বিধাদিসঙ্গহানং তিণ্ণং ওসানপদস্স ভেদাভাৰতো আদিতো পট্ঠায অপুচ্ছিত্ৰাৰ নিদ্দেসো কতো। তত্থ চক্খুৰিঞ্ঞাণেন জানিতুং সক্কাতি চক্খুৰিঞ্ঞেয্যং…পে॰… মনোৰিঞ্ঞাণেন জানিতুং সক্কাতি মনোৰিঞ্ঞেয্যং। তিৰিধায মনোধাতুযা জানিতুং সক্কাতি মনোধাতুৰিঞ্ঞেয্যং সব্বং রূপন্তি এত্থ যস্মা একং রূপম্পি মনোৰিঞ্ঞাণধাতুযা অজানিতব্বং নাম নত্থি, তস্মা ‘সব্বং রূপ’ন্তি ৰুত্তং। সম্মাসম্বুদ্ধেন হি অভিধম্মং পত্ৰা নযং কাতুং যুত্তট্ঠানে নযো অকতো নাম নত্থি। ইদঞ্চ একরূপস্সাপি মনোৰিঞ্ঞাণধাতুযা অজানিতব্বস্স অভাৰেন নযং কাতুং যুত্তট্ঠানং নাম, তস্মা নযং করোন্তো ‘সব্বং রূপ’ন্তি আহ।
972-4. Chabbidhādisaṅgahānaṃ tiṇṇaṃ osānapadassa bhedābhāvato ādito paṭṭhāya apucchitvāva niddeso kato. Tattha cakkhuviññāṇena jānituṃ sakkāti cakkhuviññeyyaṃ…pe… manoviññāṇena jānituṃ sakkāti manoviññeyyaṃ. Tividhāya manodhātuyā jānituṃ sakkāti manodhātuviññeyyaṃ sabbaṃ rūpanti ettha yasmā ekaṃ rūpampi manoviññāṇadhātuyā ajānitabbaṃ nāma natthi, tasmā ‘sabbaṃ rūpa’nti vuttaṃ. Sammāsambuddhena hi abhidhammaṃ patvā nayaṃ kātuṃ yuttaṭṭhāne nayo akato nāma natthi. Idañca ekarūpassāpi manoviññāṇadhātuyā ajānitabbassa abhāvena nayaṃ kātuṃ yuttaṭṭhānaṃ nāma, tasmā nayaṃ karonto ‘sabbaṃ rūpa’nti āha.
৯৭৪. সুখসম্ফস্সোতি সুখৰেদনাপটিলাভপচ্চযো। দুক্খসম্ফস্সোতি দুক্খৰেদনাপটিলাভপচ্চযো। ইধাপি ফোট্ঠব্বারম্মণস্স সুখদুক্খস্স সব্ভাৰতো অযং নযো দিন্নো।
974. Sukhasamphassoti sukhavedanāpaṭilābhapaccayo. Dukkhasamphassoti dukkhavedanāpaṭilābhapaccayo. Idhāpi phoṭṭhabbārammaṇassa sukhadukkhassa sabbhāvato ayaṃ nayo dinno.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ধম্মসঙ্গণীপাল়ি • Dhammasaṅgaṇīpāḷi / রূপৰিভত্তি • Rūpavibhatti
