| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
7. சேதியபாடிஹாரியபஞ்ஹோ
7. Cetiyapāṭihāriyapañho
7. ‘‘ப⁴ந்தே நாக³ஸேன, ஸப்³பே³ஸங் பரினிப்³பு³தானங் சேதியே பாடிஹீரங் ஹோதி, உதா³ஹு ஏகச்சானங் யேவ ஹோதீ’’தி? ‘‘ஏகச்சானங், மஹாராஜ, ஹோதி, ஏகச்சானங் ந ஹோதீ’’தி. ‘‘கதமேஸங், ப⁴ந்தே, ஹோதி, கதமேஸங் ந ஹோதீ’’தி? ‘‘திண்ணன்னங், மஹாராஜ, அஞ்ஞதரஸ்ஸ அதி⁴ட்டா²னா பரினிப்³பு³தஸ்ஸ சேதியே பாடிஹீரங் ஹோதி. கதமேஸங் திண்ணன்னங்? இத⁴, மஹாராஜ, அரஹா தே³வமனுஸ்ஸானங் அனுகம்பாய திட்ட²ந்தோவ அதி⁴ட்டா²தி ‘ஏவங்னாம சேதியே பாடிஹீரங் ஹோதூ’தி, தஸ்ஸ அதி⁴ட்டா²னவஸேன சேதியே பாடிஹீரங் ஹோதி, ஏவங் அரஹதோ அதி⁴ட்டா²னவஸேன பரினிப்³பு³தஸ்ஸ சேதியே பாடிஹீரங் ஹோதி.
7. ‘‘Bhante nāgasena, sabbesaṃ parinibbutānaṃ cetiye pāṭihīraṃ hoti, udāhu ekaccānaṃ yeva hotī’’ti? ‘‘Ekaccānaṃ, mahārāja, hoti, ekaccānaṃ na hotī’’ti. ‘‘Katamesaṃ, bhante, hoti, katamesaṃ na hotī’’ti? ‘‘Tiṇṇannaṃ, mahārāja, aññatarassa adhiṭṭhānā parinibbutassa cetiye pāṭihīraṃ hoti. Katamesaṃ tiṇṇannaṃ? Idha, mahārāja, arahā devamanussānaṃ anukampāya tiṭṭhantova adhiṭṭhāti ‘evaṃnāma cetiye pāṭihīraṃ hotū’ti, tassa adhiṭṭhānavasena cetiye pāṭihīraṃ hoti, evaṃ arahato adhiṭṭhānavasena parinibbutassa cetiye pāṭihīraṃ hoti.
‘‘புன சபரங், மஹாராஜ, தே³வதா மனுஸ்ஸானங் அனுகம்பாய பரினிப்³பு³தஸ்ஸ சேதியே பாடிஹீரங் த³ஸ்ஸெந்தி ‘இமினா பாடிஹீரேன ஸத்³த⁴ம்மோ நிச்சஸம்பக்³க³ஹிதோ ப⁴விஸ்ஸதி, மனுஸ்ஸா ச பஸன்னா குஸலேன அபி⁴வட்³டி⁴ஸ்ஸந்தீ’தி, ஏவங் தே³வதானங் அதி⁴ட்டா²னவஸேன பரினிப்³பு³தஸ்ஸ சேதியே பாடிஹீரங் ஹோதி.
‘‘Puna caparaṃ, mahārāja, devatā manussānaṃ anukampāya parinibbutassa cetiye pāṭihīraṃ dassenti ‘iminā pāṭihīrena saddhammo niccasampaggahito bhavissati, manussā ca pasannā kusalena abhivaḍḍhissantī’ti, evaṃ devatānaṃ adhiṭṭhānavasena parinibbutassa cetiye pāṭihīraṃ hoti.
‘‘புன சபரங், மஹாராஜ, இத்தீ² வா புரிஸோ வா ஸத்³தோ⁴ பஸன்னோ பண்டி³தோ ப்³யத்தோ மேதா⁴வீ பு³த்³தி⁴ஸம்பன்னோ யோனிஸோ சிந்தயித்வா க³ந்த⁴ங் வா மாலங் வா து³ஸ்ஸங் வா அஞ்ஞதரங் வா கிஞ்சி அதி⁴ட்ட²ஹித்வா சேதியே உக்கி²பதி ‘ஏவங்னாம ஹோதூ’தி, தஸ்ஸபி அதி⁴ட்டா²னவஸேன பரினிப்³பு³தஸ்ஸ சேதியே பாடிஹீரங் ஹோதி, ஏவங் மனுஸ்ஸானங் அதி⁴ட்டா²னவஸேன பரினிப்³பு³தஸ்ஸ சேதியே பாடிஹீரங் ஹோதி.
‘‘Puna caparaṃ, mahārāja, itthī vā puriso vā saddho pasanno paṇḍito byatto medhāvī buddhisampanno yoniso cintayitvā gandhaṃ vā mālaṃ vā dussaṃ vā aññataraṃ vā kiñci adhiṭṭhahitvā cetiye ukkhipati ‘evaṃnāma hotū’ti, tassapi adhiṭṭhānavasena parinibbutassa cetiye pāṭihīraṃ hoti, evaṃ manussānaṃ adhiṭṭhānavasena parinibbutassa cetiye pāṭihīraṃ hoti.
‘‘இமேஸங் கோ², மஹாராஜ, திண்ணன்னங் அஞ்ஞதரஸ்ஸ அதி⁴ட்டா²னவஸேன பரினிப்³பு³தஸ்ஸ சேதியே பாடிஹீரங் ஹோதி.
‘‘Imesaṃ kho, mahārāja, tiṇṇannaṃ aññatarassa adhiṭṭhānavasena parinibbutassa cetiye pāṭihīraṃ hoti.
‘‘யதி³, மஹாராஜ, தேஸங் அதி⁴ட்டா²னங் ந ஹோதி, கீ²ணாஸவஸ்ஸபி ச²ளபி⁴ஞ்ஞஸ்ஸ சேதோவஸிப்பத்தஸ்ஸ சேதியே பாடிஹீரங் ந ஹோதி, அஸதிபி , மஹாராஜ, பாடிஹீரே சரிதங் தி³ஸ்வா ஸுபரிஸுத்³த⁴ங் ஓகப்பேதப்³ப³ங் நிட்ட²ங் க³ந்தப்³ப³ங் ஸத்³த³ஹிதப்³ப³ங் ‘ஸுபரினிப்³பு³தோ அயங் பு³த்³த⁴புத்தோ’’’தி. ‘‘ஸாது⁴, ப⁴ந்தே நாக³ஸேன, ஏவமேதங் ததா² ஸம்படிச்சா²மீ’’தி.
‘‘Yadi, mahārāja, tesaṃ adhiṭṭhānaṃ na hoti, khīṇāsavassapi chaḷabhiññassa cetovasippattassa cetiye pāṭihīraṃ na hoti, asatipi , mahārāja, pāṭihīre caritaṃ disvā suparisuddhaṃ okappetabbaṃ niṭṭhaṃ gantabbaṃ saddahitabbaṃ ‘suparinibbuto ayaṃ buddhaputto’’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
சேதியபாடிஹாரியபஞ்ஹோ ஸத்தமோ.
Cetiyapāṭihāriyapañho sattamo.
