| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༡༠. ཙེཏསོཝིནིབནྡྷསུཏྟཾ
10. Cetasovinibandhasuttaṃ
༨༢. ‘‘པཉྩིམེ , བྷིཀྑཝེ, ཙེཏསོཝིནིབནྡྷཱ། ཀཏམེ པཉྩ? ཨིདྷ, བྷིཀྑཝེ, བྷིཀྑུ ཀཱམེསུ ཨཝཱིཏརཱགོ ཧོཏི…པེ॰… ཨིམེ ཁོ, བྷིཀྑཝེ, པཉྩ ཙེཏསོཝིནིབནྡྷཱ།
82. ‘‘Pañcime , bhikkhave, cetasovinibandhā. Katame pañca? Idha, bhikkhave, bhikkhu kāmesu avītarāgo hoti…pe… ime kho, bhikkhave, pañca cetasovinibandhā.
‘‘ཨིམེསཾ ཁོ, བྷིཀྑཝེ, པཉྩནྣཾ ཙེཏསོཝིནིབནྡྷཱནཾ པཧཱནཱཡ ཙཏྟཱརོ སམྨཔྤདྷཱནཱ བྷཱཝེཏབྦཱ ། ཀཏམེ ཙཏྟཱརོ? ཨིདྷ, བྷིཀྑཝེ, བྷིཀྑུ ཨནུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ ཨནུཔྤཱདཱཡ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི; ཨུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ པཧཱནཱཡ… ཨནུཔྤནྣཱནཾ ཀུསལཱནཾ དྷམྨཱནཾ ཨུཔྤཱདཱཡ… ཨུཔྤནྣཱནཾ ཀུསལཱནཾ དྷམྨཱནཾ ཋིཏིཡཱ ཨསམྨོསཱཡ བྷིཡྻོབྷཱཝཱཡ ཝེཔུལླཱཡ བྷཱཝནཱཡ པཱརིཔཱུརིཡཱ ཚནྡཾ ཛནེཏི ཝཱཡམཏི ཝཱིརིཡཾ ཨཱརབྷཏི ཙིཏྟཾ པགྒཎྷཱཏི པདཧཏི ། ཨིམེསཾ ཁོ, བྷིཀྑཝེ, པཉྩནྣཾ ཙེཏསོཝིནིབནྡྷཱནཾ པཧཱནཱཡ ཨིམེ ཙཏྟཱརོ སམྨཔྤདྷཱནཱ བྷཱཝེཏབྦཱ’’ཏི། དསམཾ།
‘‘Imesaṃ kho, bhikkhave, pañcannaṃ cetasovinibandhānaṃ pahānāya cattāro sammappadhānā bhāvetabbā . Katame cattāro? Idha, bhikkhave, bhikkhu anuppannānaṃ pāpakānaṃ akusalānaṃ dhammānaṃ anuppādāya chandaṃ janeti vāyamati vīriyaṃ ārabhati cittaṃ paggaṇhāti padahati; uppannānaṃ pāpakānaṃ akusalānaṃ dhammānaṃ pahānāya… anuppannānaṃ kusalānaṃ dhammānaṃ uppādāya… uppannānaṃ kusalānaṃ dhammānaṃ ṭhitiyā asammosāya bhiyyobhāvāya vepullāya bhāvanāya pāripūriyā chandaṃ janeti vāyamati vīriyaṃ ārabhati cittaṃ paggaṇhāti padahati . Imesaṃ kho, bhikkhave, pañcannaṃ cetasovinibandhānaṃ pahānāya ime cattāro sammappadhānā bhāvetabbā’’ti. Dasamaṃ.
སམྨཔྤདྷཱནཝགྒོ ཏཏིཡོ།
Sammappadhānavaggo tatiyo.
