| Library / Tipiṭaka / តិបិដក • Tipiṭaka / វជិរពុទ្ធិ-ដីកា • Vajirabuddhi-ṭīkā |
៤. ចតុត្ថសង្ឃាទិសេសសិក្ខាបទវណ្ណនា
4. Catutthasaṅghādisesasikkhāpadavaṇṇanā
៦៩៤. បដិវត្តាតិ បដិវចនំ ទេន្តិ។ កម្មទោសន្តិ ‘‘អនញ្ញាយ គណស្ស ឆន្ទន្តិ ឯវមាទី’’តិ លិខិតំ។ កត្តព្ពដ្ឋានទោសន្តិ បោរាណា។ ការកគណស្សាតិ ការកសង្ឃស្ស។ ‘‘ភិក្ខុនិសង្ឃំ សន្និបាតេត្វា’តិ វុត្តត្តា ការកសង្ឃោបិ អយមេវាតិ ចេ? បឋមមេវ ការកសង្ឃំ ន អាមន្តេត្វា ពលក្ការេនាយំ ថុល្លនន្ទា តំ ភិក្ខុនិំ ឱសារេសី’’តិ បោរាណគណ្ឋិបទេ វុត្តំ, តស្មា ការកភិក្ខូនំ សម្មុខាបិ តេសំ អនុមតិំ បឋមំ អគ្គហេត្វា តំ កម្មំ ន បដិប្បស្សម្ភេតព្ពន្តិ សិទ្ធំ ហោតិ, បដិប្បស្សទ្ធំ ពលក្ការេន ន កាតព្ពមេវាតិ អធិប្បាយោ។ ‘‘ភិក្ខុនីបិ ទិដ្ឋាវិកម្មំ កាតុំ លភតី’’តិ ច តត្ថ វុត្តំ។
694.Paṭivattāti paṭivacanaṃ denti. Kammadosanti ‘‘anaññāya gaṇassa chandanti evamādī’’ti likhitaṃ. Kattabbaṭṭhānadosanti porāṇā. Kārakagaṇassāti kārakasaṅghassa. ‘‘Bhikkhunisaṅghaṃ sannipātetvā’ti vuttattā kārakasaṅghopi ayamevāti ce? Paṭhamameva kārakasaṅghaṃ na āmantetvā balakkārenāyaṃ thullanandā taṃ bhikkhuniṃ osāresī’’ti porāṇagaṇṭhipade vuttaṃ, tasmā kārakabhikkhūnaṃ sammukhāpi tesaṃ anumatiṃ paṭhamaṃ aggahetvā taṃ kammaṃ na paṭippassambhetabbanti siddhaṃ hoti, paṭippassaddhaṃ balakkārena na kātabbamevāti adhippāyo. ‘‘Bhikkhunīpi diṭṭhāvikammaṃ kātuṃ labhatī’’ti ca tattha vuttaṃ.
៦៩៨. អសន្តេ កម្មការកសង្ឃេ ឱសារេតិ, អនាបត្តីតិ ឯត្ថ កិត្តាវតា អសន្តោ នាម ហោតីតិ? ឥទំ សព្ពត្ថ ន វិចារិតំ។ ការកានំ កាលកិរិយាយាតិ ឯកេ។ ឯកស្សបិ អភាវេនាតិ ឯកេ។ ឯកស្មិំ រជ្ជេតិ ឯកេ។ ឯករដ្ឋេតិ ឯកេ។ ឯកគាមេតិ ឯកេ។ ឯកស្មិំ អាវាសេតិ ឯកេ។ យត្ថ សក្កា អបលោកេតុន្តិ ឯកេ។ អន្តោអទ្ធយោជនេតិ ឯកេ។ តត្ថ តស្មិំ អាវាសេ អសន្តេ ការកសង្ឃេ ឱសារេតិ, អនាបត្តីតិ ឥទំ បសំសន្តិ អាចរិយា។ យត្ថ សក្កា អបលោកេតុន្តិ សាមីចិ។
698.Asante kammakārakasaṅghe osāreti, anāpattīti ettha kittāvatā asanto nāma hotīti? Idaṃ sabbattha na vicāritaṃ. Kārakānaṃ kālakiriyāyāti eke. Ekassapi abhāvenāti eke. Ekasmiṃ rajjeti eke. Ekaraṭṭheti eke. Ekagāmeti eke. Ekasmiṃ āvāseti eke. Yattha sakkā apaloketunti eke. Antoaddhayojaneti eke. Tattha tasmiṃ āvāse asante kārakasaṅghe osāreti, anāpattīti idaṃ pasaṃsanti ācariyā. Yattha sakkā apaloketunti sāmīci.
ចតុត្ថសង្ឃាទិសេសសិក្ខាបទវណ្ណនា និដ្ឋិតា។
Catutthasaṅghādisesasikkhāpadavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / ភិក្ខុនីវិភង្គ • Bhikkhunīvibhaṅga / ៤. ចតុត្ថសង្ឃាទិសេសសិក្ខាបទំ • 4. Catutthasaṅghādisesasikkhāpadaṃ
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / ភិក្ខុនីវិភង្គ-អដ្ឋកថា • Bhikkhunīvibhaṅga-aṭṭhakathā / ៤. ចតុត្ថសង្ឃាទិសេសសិក្ខាបទវណ្ណនា • 4. Catutthasaṅghādisesasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៤. ចតុត្ថសង្ឃាទិសេសសិក្ខាបទវណ្ណនា • 4. Catutthasaṅghādisesasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៤. ចតុត្ថសង្ឃាទិសេសសិក្ខាបទវណ្ណនា • 4. Catutthasaṅghādisesasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៤. ចតុត្ថសង្ឃាទិសេសសិក្ខាបទំ • 4. Catutthasaṅghādisesasikkhāpadaṃ
